Thursday, 15 October 2015

ကြက်ခြေနီ လက်ဖက်သုပ်


လက်ဖက် ကြက်ခြေနီသုပ်ဆိုရင် ကျန်ခဲ့တဲ့ ၂၅နှစ်လောက်က မန္တလေးမှာ နေခဲ့တာကို ပြေးပြီးသတိရမိတယ် အမတ၀မ်းကွဲအိမ်နဲ့ အရီးထောင်းအိမ်က ခြေလှမ်း ၃၀လောက် လှမ်းရင် ရောက်တာမို့ နေ့လည်ဆို လက်ဖက် သုပ်ပြီးသာ ၅ကျပ်ဖိုးလောက် ပြေးဝယ်ပြီး ထမင်းနဲ့စားကြရင်း စကားတွေဖောင်ဖွဲ့ခဲ့တာ အမှတ်တရပါဘဲ။

တခါတ​လေ လက်ဖက်ကို ဘယ်လိုသုပ်ပေးရမလဲ မေးတိုင်း အစဉ်ပြေတာ သုပ်ပေးပါဆိုရင် စိတ်ကြိုက်သုပ်ပေးတာကို ယူပြီး ပြန်လာရုံပါဘဲ အဲဒီထဲကမှ ခရမ်းချဉ်သီးအစိမ်း ငရုတ်သီးစိမ်း နိုင်းချင်းနဲ့ သုပ်ပေးတတ်တဲ့ ကြက်ခြေနီသုပ်ကတော့ စွဲမက်စရာတခုပါဘဲ စားပြီးရင် လျှာဂျွမ်းထိုးနေရလို့ပါ လျှာဂျွမ်းထိုး ချင်ရင်တော့  ကြက်ခြေနီသုပ်နည်းလေး မျှဝေပေးလိုက်ပါတယ်။

ပါဝင်ပစ္စည်းများ

  • ချဉ်ငံစပ်နှပ်ထားသော လက်ဖက်အသား - ထမင်းစားဇွန်း ၂ဇွန်းမောက်မောက်
  • လက်ဖက်အကြော်စုံ - လက်ဖက်ရည်အကြမ်းပန်းကန် တလုံး
  • ခရမ်းချဉ်သီးအစိမ်း - အနေတော် တလုံး
  • ဂေါ်ဖီ - အနေတော် ၂ရွက်
  • ပုဇွန်ခြောက် - အကောင်ကြီးကြီး ၂၀ခန့်
  • ကြက်သွန်ဖြူ - နှစ်သက်သလောက်
  • ငရုတ်သီးစိမ်း - နှစ်သက်သလောက်
  • ပဲဆီစိမ်း - ထမင်းစားဇွန်း နှစ်ဇွန်း
  • ဆား - လက်ဖက်ရည်ဇွန်း တ၀က်
 ပြင်ဆင်ပုံ
  • ဂေါ်ဖီကို ခပ်ပါးပါးလှီးပြီး ရေဆေးထားပါ
  • ခရမ်းချဉ်သီးကို အလုံးလိုက် ရေဆေးပြီး အကွင်းလိုက် ခပ်ပါးပါးလှီးထားပါ
  • ကြက်သွန်ဖြူကို အခွံခွာပြီး ရေဆေးထားပါ 
  • ဇလုံကျယ်ကျယ် တလုံးထဲမှာ လက်ဖက်အသားနှင့်အတူ လက်ဖက်အကြော်စုံ  ဂေါ်ဖီ ခရမ်းချဉ်သီး ဆား နှင့်ဆီတို့ထည့်ကာ ခပ်ဖွဖွနယ်ပေးပါ
  • နယ်ပြီးတာနဲ့ပြင်မည့် ပန်းကန်ထဲ  လက်ဖက်သုပ်ပြီးသားကို ခပ်ဖွဖွ ထည့်ပေးပါ
  • လက်ဖက်သုပ်ပေါ်မှ ပုဇွန်ခြောက်ကို ဖြူးပေးကာ ငရုတ်သီးစိမ်း ကြက်သွန်ဖြူတို့ကို ပန်းကန်ထဲထည့်ပေးပါ
  •  ကြက်ခြေနီ လက်ဖက်သုပ် ချဉ်ငံစပ်ကို ပန်းကန်ထဲ ထည့်ကာ ကြက်သွန်ဖြူ ငရုတ်သီးစိမ်းတို့နှင့် တွဲဖက်ကာ လျှာဂျွမ်းပြန်အောင်  စားသုံးနိူင်ပါပြီ။

No comments:

Post a Comment