မာမာ ဒီနေ့တော့ သပွတ်သီးကို ပဲကြာဇံနဲ့ အရည်သောက်ဆမ်း ကြော်ချက်လေး ချက်ပါတယ်။
ဒါကြောင့်မို့လို့ မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- သပွတ်သီး - အနေတော် တစ်တောင့်
- ငါးပြုပ်ပြီးသား -အနေတော် တစ်တုံး
- ပဲကြာဇံ - အနည်းငယ်
- ကြက်သွန်ဖြူ - အမွှာကြီးကြီး နှစ်မွှာ
- ကြက်သွန်နီ - အနေတော် တစ်ခြမ်း
- ဆား - လက်ဖက်ရည်ဇွန်း တစ်၀က်သာသာ
- ငရုတ်ကောင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆီ - ထမင်းစားဇွန်း တစ်ဇွန်းခွဲ
- နနွင်းမှုန့် - လက်ဖက်ရည်ဇွန်း လေးပုံတစ်ပုံ
ပြင်ဆင်ပုံ
- သပွတ်သီးရဲ့ အပေါ်ဖက်မှ အခွံများကို အခွံခွာဓါးဖြင့် ခွာပေးပါ
- အခွံများ ခွာပြီးပါက ထိပ်နှစ်ဖက်ဖြတ်ကာ ရေဆေးပေးပါ
- ရေဆေးပြီးမှ ထက်ဝက်ခြမ်းကာ ခပ်စောင်းစောင်း ထူထူလေးတွေ လှီးပေးပါ
- ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
- ကြက်သွန်နီကို အခွံခွာပြီး ရေဆေးကာ ခပ်ပါးပါး လှီးထားပါ
- ငါးပြုပ်ကို အရိုးထွင်ပြီး အပေါ်ယံ အရည်ခွံကိုဖယ်ထားပါ
- ပဲကြာဇံကို ရေမြုပ်အောင်ထည့်ပြီး ရေစိမ်ထားပါ
- ဇောက်နက်သော အနေတော် အိုးတစ်လုံးထဲမှာပု ဆီထည့်ပြီး အပူပေးပါ
- ဆီပူလာတာနဲ့ နနွင်းမှုန့် ထည့်ပေးကာ ကြက်သွန်ဖြူနှင့် ကြက်သွန်နီကိုထည့်ပြီး ကြော်ပေးပါ
- ကြက်သွန်များ နွမ်းသွားတာနဲ့ ငါးပြုပ် သပွတ်သီး ဆားနှင့် အချိုမှုန့် တို့ကိုထည့်ပေးကာ ကြော်ပေးပါ
- အရသာ သမသွားတာနဲ့ မိမိနှစ်သက်သလောက် ရေထည့်ပြီး တည်ပေးပါ
- ဟင်းရည်အိုး ပွက်ပွက်ဆူလာတာနဲ့ ပဲကြာဇံကို ထည့်ပေးပါ
- ပဲကြာဇံက ခနလေးနဲ့ နူးလွယ်ပါတယ်
- သပွတ်သီး အစိမ်းရောင် မပြောင်းအောင် အိုးအဖုံးကိုဖွင့်ကာ တည်ပေးပါ
- သပွတ်သီး နူးလာတာနဲ့ အရသာမြည်းပြီး လိုသလို ပြင်ပေးကာ မီးပိတ်ပေးပြီး အိုးကိုမီးဖိုပေါ်က ဖယ်ထားပြီး သုံးဆောင်နိူင်ပါပြီ။
