Wednesday 30 March 2022

မန်ကျည်းသီးဖျော်ရည်

 


ဒီနေ့တော့ ကျန်းမာရေးနဲ့ ညီညွတ်စေတဲ့ မန်ကျည်းသီးမှည့် ဖျော်ရည်လေး လုပ်သောက်ဖြစ်ပါတယ် ဒါကြောင့်မို့လို့ မာမာပြင်ဆင်ပြီး လုပ်ထားတဲ့ ဖျော်ရည်ဖျော်နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. မန်ကျည်းသီးမှည့် - ကြက်ဥတစ်လုံးစာ
  2. ထန်းလျှက်ခဲ - ပုံမှန်အနေအထား လေးခဲ
  3. ဆား - လက်ဖက်ရည်ဇွန်းဖျား ပါတယ်ဆိုရုံလေး
  4. ရေနွေးပွက်ပွက်ဆူပြီးသား - ပုံမှန်ဖန်ခွက် နှစ်လုံးစာ
ပြင်ဆင်ပြုလုပ်ပုံ
  • မန်ကျည်းသီးမှည့်ကို ရေနှင့် ခပ်ဖွဖွလေး ဆေးပေးပါ
  • ထန်းလျှက်ခဲများကိုလဲ ရေနှင့်ခပ်ဖွဖွလေး ဆေးပေးပါ
  • ပြီးတာနဲ့ ဇလုံတစ်လုံးထဲမှာ မန်ကျည်းသီးမှည့် ထန်းလျှက်ခဲ ဆားနှင့် ရေနွေးတို့ထည့်ကာ အနည်းဆုံး သုံးနာရီလောက် စိမ်ထားပါ
  • မန်ကျည်းသီးများ နူးအိလာပြီး ထန်းလျှက်ခဲများ အရည်ပျော်လာပါက လက်ကိုရေဆေးပြီး မန်ပျည်းသီး အနှစ်များ ထွက်လာအောင် နယ်ပေးပါ
  • ပြီးတာနဲ့ ဖန်ခွက်ထဲသို့ အဖတ်များ မပါအောင် ထည့်ပေးပြီး ရေခဲလေးနှင့် နှစ်သက်ပါက ရေခဲထည့်ကာ သောက်သုံးနိူင်ပါပြီ။

Sunday 27 March 2022

မုန့်ပဲဆုတ်

 



ဒီနေ့တော့ နေ့လည်နေ့ခင်း သရည်စာအဖြစ် စားရလေအောင် မုန့်ပဲဆုတ်လေးတွေ လုပ်ဖြစ်ပါတယ် မုန့်ပဲဆုတ် လုပ်ဖို့အတွက် မာမာကတော့ ready made ပြုပ်ပြီးသား red kidney beans 400g ဗူးကို သုံးပါတယ်။

ထိုပဲဗူးထဲမှာပါတဲ့ ပဲကိုသာယူပြီး  အရည်များကို သွန်ကာ ကျန်နေတဲ့  ပဲ 250 gကိုဘဲ မုန့်လုပ်ရာမှာ သုံးထားပါတယ်။

တစ်ကယ်လို့ မိတ်ဆွေတို့မှာ ready made ပြုပ်ပြီးသား ပဲဗူးလေးတွေ မရှိရင်တော့ ပဲနီလေးကို ရေလေးနာရီလောက် စိမ်ပေးကာ နူးအိနေအောင် ပြုပ်ပေးပြီးတော့လဲ အသုံးပြုနိူင်ပါတယ်။

ဒါကြောင့်မို့လို့ မာမာပြင်ဆင်ပြီး လုပ်ထားတဲ့ မုန့်ပဲဆုတ် လုပ်ထားတဲ့ လုပ်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ

  1. ဆန်မှုန့် -  ပေါင်းအိုးဆန်ချင်ဗူး လေးဗူး
  2. ကောက်ညှင်းမှုန့် - ပေါင်းအိုးဆန်ချင်ဗူး တစ်ဗူး
  3. ပြုပ်ပြီးသားပဲနီလေး - 250 g
  4. ဆား - လက်ဖက်ရည်ဇွန်း သုံးပုံတစ်ပုံ (မုန့်သားနယ်ရန်)
  5. ဆီ - ထမင်းသားဇွန်း တစ်ဇွန်း (မုန့်သားနယ်ရန်)
  6. ရေ - ပေါင်းအိုးဆန်ချင်ဗူး တစ်ဗူးသာသာ ( မုန့်သားစပ်ရန် )
  7. ထုံး - လက်ဖက်ရည်ဇွန်း တစ်ဇွန်း
  8. ထုံးရေကြည်လုပ်ရန် ရေ - ပေါင်းအိုးဆန်ချင်ဗူး ကိုးဗူး
  9. နှမ်းထောင်း - ထမင်းစားဇွန်း တစ်ဇွန်း
  10. ပဲဆီ - ထမင်းစားဇွန်း ၃ဇွန်း (မုန့်ပဲဆုတ်မှာ ဆမ်းပေးရန်)
ထုံးရည်ကြည်လုပ်ရန်
  • ဇလုံတစ်လုံးထဲမှာ ထုံးနှင့်ရေကိုထည့်ပြီး တစ်ညသိပ် ထားပေးပါ

ပြင်ဆင်ပုံ

  • ဇလုံတစ်လုံးထဲမှာ ဆား ဆန်မှုန့်နှင့် ကောက်ညှင်းမှုန့်ကို ရောနယ်ပြီး ရေကိုနည်းနည်းခြင်းထည့်ကာ နယ်ပေးပါ
  • ရေကို တစ်ခါထဲ ထည့်ပါက မုန့်သားပျော့ပျဲကြီး ဖြစ်သွားနိူင်လို့ ရေကို နည်းနည်းချင်း ချင့်ချိန်ပြီး  ထည့်ပေးကာ မုန်ပ့်သားကို နယ်ပေးပါ
  • ရေကို လိုတိုးပိုလျှော့ လုပ်ပေးကာ မုန့်သား ညက်လာအောင် ၅မိနစ်လောက် အနည်းဆုံး နယ်ပေးပါ
  • ပြီးတာနဲ့ မုန့်သားပြုပ်တဲ့အချိန် လွယ်ကူစေရန် ရွယ်တူ အလုံးလေးနှစ်လုံး လုံးပေးထားပါ
  • မုန့်သားလုံးပြီးပြီ ဆိုတာနဲ့ ဇောက်နက်သော အိုးထဲမှာ ထုံးရည်ကြည်များကို ထည့်ပေးကာ ပွက်ပွက်ဆူအောင် တည်ပေးပါ
  • ထုံးရေကြည်များ ပွက်ပွက် ဆူလာတာနဲ့ မုန့်သားအလုံးလေးများကို အလုံးလိုက်ထည့်ပြီး အိုးအဖုံး မဖုံးဘဲ ၇မိနစ်ပြုပ်ပေးပါ
  • မုန့်သား အလုံးလေးတွေ အကျက်ညီစေရန် မကြာမကြာ လှည့်ပေးပါ
  • ၇မိနစ်ပြည့်တာနဲ့ မုန့်သားကြည်လာပြီး အပေါ်ယံ တစ်၀က်ကျက်သွားသော မုန့်လုံးကို ဇလုံတစ်လုံးထဲ ဆယ်ပြီးထည့်ပေးပါ
  • မုန့်သားမအေးခင် မုန့်သားကို မွနေအောင် ထိုးခြေပြီး ဆီ ထမင်းစားဇွန်း တစ်ဇွန်းထည့်ကာ နယ်ပေးပါ
  • ရောနယ်ပြီးတာနဲ့ ပြုပ်ထားသော ပဲကိုထည့်ပြီး မုန့်သားနဲ့ သမသွားအောင် ရောနယ်ပေးပါ
  • မုန့်သားနဲ့ပဲများ သမသွားတာနဲ့  လက်မှာမကပ်စေရန် လက်ကိုရေစွတ်ကာ လက်တစ်ဆုတ်စာ မုန့်သားကိုယူပြီး အချက်နှစ်ဆယ်လောက် လက်ထဲမှာ ဆုတ်ဆုတ်ပေးပါ
  •  အထက်ပါ နည်းအတိုင်း မုန့်သားများ ကုန်တဲ့အထိ လုပ်ပေးပါ
  • အားလုံးပြီးတာနဲ့ မုန့်ပေါင်းမည့် အောက်ခံအိုးကို ပေါင်းခံခုံ ထိလောက်တဲ့အထိ ရေထည့်ပေးပါ
  • မုန့်ပေါင်းမည့် ဇကာထဲမှာ အဝတ်စ သန့်သန့်လေးကို ရေစွတ်ပြီး ခင်းပေးပါ
  • ထိုအဝတ်စ အပေါ်မှာ ဆုတ်ထားသော မုန့်ပဲဆုတ်များကို ထည့်ပေးပြီး အဝတ်စနှင့် ပြန်အုပ်ပေးပါ 
  • ပြီးတာနဲ့ ပေါင်းမည့်  အောက်ခံအိုးထဲမှာ ထည့်ထားသော ခုံလေးပေါ်မှာ  မုန့်ပေါင်းမည့် ဇကာကို တင်ပေးပါ
  • ပြီးတာနဲ့ အိုးအဖုံးအုပ်ကာ simmer ကိုနှိပ်ပြီး မိနစ်နှစ်ဆယ် ချိန်ပေးကာ ပေါင်းပေးပါ
  • မိနစ်၂၀ပေါင်းပေးပြီးပါက အိုးထဲမှ ထုတ်ပေးကာ မုန့်ပဲဆုတ် ပူပူလေးတွေ ရပါပြီ။
နောက်တစ်နည်း
  • တကယ်လို့ မာမာပြထားတဲ့ ပေါင်းအိုးမျိုး မရှိဘူး ဆိုရင်တော့ 
  • အိုးအဝ ကျယ်ရိုးသော ရိုးအိုးထဲမှာ ရေထည့်ကာ ပေါင်းခံခုံခံပြီး မုန့်ပဲဆုတ် ထည့်ထားသော ဇကာကို တင်ပေးပါ
  • ပြီးတာနဲ့ အဖုံးအုပ်ပေးပြီး မိနစ်နှစ်ဆယ် ပေါင်းပေးပါ

နှမ်းထောင်းပြုလုပ်ရန်

  • နှမ်းဖြူ ထမင်းစားဇွန်း ၃ဇွန်းကို မီးအေးအေးနှင့် ညိုလာတဲ့ထိ လှော်ပေးပါ
  • နှမ်းအရောင် ညိုလာတာနဲ့ ဆားနှင့်အတူ ငရုတ်ဆုံထဲထည့်ကာ မညက်တစ်ညက် ထောင်းပေးပါက နှမ်းလှော်ထောင်း မွှေးမွှေးလေး ရပါပြီ။

မုန့်ပွဲပြင်ရန်

  • မုန့်ပဲဆုတ်များကို မိမိနှစ်သက်သလောက် အနေအထားလေးတွေ ရလာအောင် ကပ်ကြေးဖြင့် ညှပ်ပေးပါ
  • ပန်းကန်ပြား တစ်ချပ်ထဲမှာ မုန့်ပဲဆုတ်များ ထည့်ပေးကာ ပဲဆီနှင့် နှမ်းထောင်းတို့ ထည့်ပေးပြီး စားပွဲပြင်ပေးနိူင်ပါပြီ။

Saturday 26 March 2022

ထောပါတ်ဘိန်းမုန့်



အရင်ရက်က ဘိန်းမုန့်စားချင်တာနဲ့ ဆန်ဘိန်းမုန့်လေး လုပ်ဖြစ်ပါတယ် ဘိန်းမုန့်လုပ်နည်းလေးတွေ အမျိုးမျိုး စမ်းလုပ်ရင်းက ဒီမုန့်လုပ်နည်းလေးက တော်တော်လေး အဆင်ပြေတဲ့အတွက် မာမာဝေငှပေးလိုက်ပါတယ်ရှင်။

မာမာလုပ်တဲ့ အိုးအရွယ်အစား မရှိပါက မိမိမှာ အဆင်ပြေတဲ့ အိုးကိုဘဲ သုံးပေးနိူင်ပါတယ် ထမင်းကြမ်းခဲကတော့ မနေ့က ချက်ထားပြီး ကျန်နေတဲ့ ထမင်းကြမ်းခဲကို သုံးပေးပါ ဘိန်းမုန့်လုပ်ရာမှာ မီးအရမ်း မပြင်းအောင်လဲ သတိထားပေးစေချင်ပါတယ်။

ပါဝင်ပစ္စည်းများ

  1. ဆန်စိမ်းမှုန့် - 400 g
  2. ဒိန်ချဉ်  - ထမင်းပေါင်းအိုး ဆန်ချင်ဗူး တစ်ဗူး
  3. Baking soda - လက်ဖက်ရည်ဇွန်း သုံးဇွန်း
  4. ထမင်းကြမ်းခဲ - ထမင်းပေါင်းအိုး ဆန်ချင်ဗူး တစ်ဗူး
  5. ကြက်ဥ - လေးလုံး
  6. ထန်းလျှက် - 400 g (အချိုကြိုက်ပါက ပိုထည့်ပါ)
  7. ဆား - လက်ဖက်ရည်ဇွန်း နှစ်ဇွန်း
  8. ရေ - ထမင်းပေါင်းအိုး ဆန်ချင်ဗူး တစ်ဗူး (ထန်းလျှက်ကျိုရန်)
  9. ရေ - ထမင်းပေါင်းအိုး ဆန်ချင်ဗူး တစ်ဗူး (မုန့်နှစ်စပ်ရန်)
  10. ထောပါတ်ခဲ - တစ်လက်မခွဲပါတ်လည် တစ်တုံး
  11. မြေပဲလှော် - မိမိနှစ်သက်သလောက် (အခွံချွတ်ပြီး သန့်စင်ထားပါ)
  12. အုန်းသီးစိတ် - မိမိနှစ်သက်သလောက်
  13. ဘိန်းစေ့လှော်ပြီးသား - မိမိနှစ်သက်သလောက်
  14. မကပ်သော ဒယ်အိုး - အိုးအဝအကျယ် 16 cm, အိုးအမြင့် 3.5cm,အိုးအောက်ချေ အကျယ်12cm
  15. ယောက်ချိုဇွန်း - တစ်ဇွန်း
မုန့်နှစ်ဖောက်ရန် ပြင်ဆင်ပုံ
  • ထမင်းကြမ်းခဲနှင့် ကြက်ဥတို့ကို ဘလင်ဒါထဲမှာထည့်ပြီး ညက်နေအောင် ကြိတ်ပေးပါ
  • ခပ်သေးသေး အိုးတစ်လုံးထဲမှာ ထန်းလျှက် ဆားနှင့် ရေတို့ကိုထည့်ပြီး ထန်းလျှက်များ အရည်ပျော်သွားအောင် ကျိုပေးပါ
  • ထန်းလျှက်များ အရည်ပျော်သွားတာနဲ့ ခပ်ပါးပါး အဝတ်စ သန့်သန့်နှင့် အမှိုက်များ မပါအောင် စစ်ပေးကာ အအေးခံထားပေးပါ
  • ဇလုံကြီးကြီး တစ်လုံးထဲမှာ ထန်းလျှက်ရည် ထမင်းကြမ်းနှင့် ကြက်ဥကြိတ်ထားသောအနှစ် ဆန်မှုန့် baking soda နှင့် ဒိန်ချဉ်ကို ဇလုံတစ်လုံးထဲမှာ ရောထည့်ပေးကာ မုန့်နှစ်မုန့်ခဲများ မကျန်အောင် မွှေတံနှင့် စိတ်ရှည်လက်ရှည် မွှေပေးပါ
  • ပြီးတာနဲ့ မုန့်နှစ်ကို အဖုံးအုပ်ကာ အခန်းတွင်းမှာရှိတဲ့ အပူရှိန်အတိုင်း အနည်းဆုံး ငါးနာရီလောက် ဖောက်ထားပေးပါ။
မုန့်လုပ်ရန်
  • မုန့်လုပ်ရန် ပါဝင်သော ပစ္စည်းများကို အဆင်သင့် ပြင်ထားပါ
  • ထောပါတ်ခဲကို အရည်ဖျော်ထားပါ
  • ဒယ်အိုးကို ထောပါတ်ထမင်းစားဇွန်း တစ်ဇွန်းခွဲစာထည့်ပြီး အပူပေးကာ အိုးပူလာတာနဲ့ မီးကို အနည်ပါးငယ် လျှော့ထားပါ
  • ပြီးတာနဲ့ မုန့်နှစ်ရည်ကို အထက်အောက် သမအောင် မွှေပေးပြီးမှ မုန့်နှစ်ရည်ကို ယောက်ချိုဇွန်း တစ်ဇွန်းစာကို အိုးထဲကို ထည့်ပေးပါ
  • မုန့်နှစ်ရည် ထည့်ပြီးတာနဲ့ အိုးအဖုံးကို မိနစ်ဝက်လောက် အုပ်ပေးပြီးမှ အုန်းသီးစိတ် ဘိန်း​ေ့နှင့် မြေပဲတို့ကို မိမိအဆင်ပြေသလို ဖြန့်ပြီး ထည့်ပေးပါ
  • ပြီးတာနဲ့ အိုးအဖုံးကို ပြန်အုပ်ပေးကာ နှစ်မိနစ်ခန့် အုပ်ပေးထားပါ
  • နှစ်မိနစ် ပြည့်တာနဲ့ အိုးအဖုံးကို ဖွင့်ကာ မုန့်သားအပေါ်ကို ထောပါတ်ရည်လေး သုပ်ပေးကာ နောက်တစ်ဖက်ကို လှန်ပေးပါ 
  • နောက်တစ်ဖက် လှန်ပြီးတာနဲ့ တစ်မိနစ်လောက်ဘဲထားကာ အိုးထဲမှ ဖယ်ပေးပါ
  • အထက်ပါ နည်းအတိုင်း မုန့်နှစ်ရည် ကုန်တဲ့အထိ လုပ်ပေးပြီးပါက အိုးလေး ထောပါတ်ဘိန်းမုန့် ရပါပြီ။

Friday 25 March 2022

ကြက်သား ကုန်းဘောင်ကြီးကြော်



ဒီနေ့တော့ ကြက်သားကုန်းဘောင်ကြီးကြော်လေး ကြော်ဖြစ်တဲ့အတွက် ထမင်းစားလို့ မြိန်စေအောင် မာမာပြင်ဆင်ပြီး ကြော်ထားတဲ့ နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ကြက်သား - 250 g ( နှစ်သက်ရာ အသားကို သုံးနိုင်ပါတယ်)
  2. ကြက်သွန်နီ - အနေတော် တစ်လုံး
  3. ကြက်သွန်ဖြူ - အမွှာကြီးကြီး၂မွှာ
  4. မုံလာဥနီ - အနည်းငယ်
  5. ကြက်သွန်မြိတ် - ၂ပင်
  6. ချင်း - လက်မ၀က်ခန့်
  7. ငရုတ်သီး အခြောက်တောင့် - ငါးတောင့်ခန့်
  8. တရုတ်မဆလာ - လက်ဖက်ရည်ဇွန်း လေးပုံတစ်ပုံ
  9. ခရုဆီ - ထမင်းစားဇွန်း တစ်ဇွန်း
  10. ပဲငံပြာရည်အကြည် - ထမင်းစားဇွန်း၂ဇွန်း
  11. ပဲငံပြာရည်အနောက်ရည် - ထမင်းစားဇွန်း တစ်၀က်
  12. ဆား - လက်ဖက်ရည်ဇွန်း တစ်ဇွန်း
  13. နနွင်းမှုန့် - အနည်းငယ်
  14. သကြား - ထမင်းစားဇွန်း တစ်ဇွန်း
  15. ဆီ - ထမင်းစားဇွန်း ၆ဇွန်းခန့်

ပြင်ဆင်ပုံ
  • ကြက်သားကို ရေစင်အောင်ဆေးပြီး ဆားအနည်းငယ်နှင့် နနွင်းမှုန့်တို့ထည့်ကာ နယ်ပေးပါ
  • ပြီးတာနဲ့ ရေမြုပ်အောင်ထည့်ပြီး ပြုပ်ပေးပါ
  • ပြုပ်ရည်ခမ်းတာနဲ့ ခပ်ပါးပါး လှီပေးထားပါ
  • ကြက်သွန်နီကို အခွံခွာကာ ရေဆေးပြီး လေးစိတ် လှီးထားပါ
  • ကြက်သွန်မိတ်ကို ရေဆေးပြီး လက်၂လုံးလောက်အနေ ခပ်ကြမ်းကြမ်း ထူထူလေးတွေ လှီးထားပေးပါ
  • ချင်းကို အခွံခွာပြီး ရေဆေးကာ အမျှင်လေးများ ရအောင် လှီးပေးပါ
  • ကြက်သွန်ဖြူကို အခွံခွာပြီး ဓါးပြားရိုက်ကာ ခပ်နုတ်နုတ် လှီးပေးပါ
  • ဟင်းချက်ရန် လိုအပ်မည့် ပစ္စည်းများ ပြင်ထားပေးပါ
  • ဒယ်အိုးကို အပူပေးပြီး ဆီထမင်းစားဇွန်း ၃ဇွန်းကို ထည့်ပေးပါ
  • ပြီးတာနဲ့ ငရုတ်သီးတောက့်ကို မွှေးသွားအောင် ထည့်ကြော်ပြီး ဆယ်ထားပါ
  • ထိုဆီထဲမှာဘဲ ကြက်သွန်ဖြူကို မွှေးသွားအောင် ကြော်လိုက်ပါ
  • ကြက်သွန်ဖြူ  မွှေးလာတာနဲ့ လှီးထားသော မုံလာဥနီ ကြက်သွန်နီစသည့် အသီးအရွက်များကို အနည်းငယ် နွမ်းအောင်ကြော်ပြီး ဆယ်ထားပါ
  • ဒယ်အိုးထဲမှာ ဆီအနည်းငယ် ထပ်ထည့်ပြီး လှီးထားသော ချင်းကိုထည့်ကြော်ပေးပါ 
  • ချင်းနံ့အနည်းငယ် မွှေးလာတာနဲ့ ပြုပ်ပြီးလှီးထားသော ကြက်သားများကို ထည့်ကြော်ပေးပါ
  • ကြက်သားများက ကျက်ပြီးသား ဖြစ်တဲ့အတွက် ချက်ချင်းဆိုသလို ဆား သကြား ပဲငံပြာရည်အကြည် ခရုဆီ ပဲငံပြာရည်အနောက် သကြား စသည့် အရသာများကို ခပ်မြန်မြန်လေး ထည့်ပေးပါ
  • ပြီးတာနဲ့ ကြော်ပြီးဆယ်ထားသော ငရုတ်သီးကြော် အသီးအရွက်ကြော်များနှင့် ကြက်သွန်မိတ် တို့ကိုထည့် မွှေပေးကာ အရသာမြည်းပြီး လိုသလို ပြင်ပေးပါ
  • မိမိနှစ်သက်တဲ့ အရသာ ရပါက စားပွဲပြင်ရန် ပန်းကန်ထဲ ပြောင်းထည့်ပြီး တရုတ်မဆာလာ ဖြူးပေးကာ ကြက်သားကုန်းဘောင်ကြီးကြော် ပူပူလူလူလေးကို သုံးဆောင်နိူင်ပါပြီ။

Thursday 24 March 2022

ကြက်ဥကြော်






မာမာဒီနေ့တော့ ကြက်ဥနဲ့ အသီးအရွက် လေးတွေကို ကြော်စားဖြစ်တဲ့အတွက် မာမာပြင်ဆင်ပြီး ကြော်ဖြစ်တဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. ကြက်ဥ - နှစ်လုံး
  2. မုံလာဥနီ - အနေတော် တစ်ဥ
  3. ‌‌‌ဂေါ်ဖီ - အနေတော် တစ်စိတ်
  4. အကြော်မှုန့် - ထမင်းစားဇွန်း တစ်ဇွန်းမောက်မောက်
  5. ကြက်သွန်နီ - အနေတော် တစ်လုံး
  6. ကြက်သွန်မိတ် - သုံးပင်
  7. ဆား - လက်ဖက်ရည်ဇွန်း တစ်ဝက်
  8. အရသာမှုန့် - လက်ဖက်ရည်ဇွန်း တစ်ဝက်သာသာ
  9. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  10. ဆီ - ထမင်းစားဇွန်း ငါးဇွန်း
  11. မကပ်သောဒယ်အိုး - တစ်အိုး
ပြင်ဆင်ပုံ
  • ဂေါ်ဖီကို ရေဆေးပြီး ခပ်ပါးပါးလေးတွေ လှီးထားပါ
  • ကြက်သွန်မိတ်ကို ရေဆေးပြီး မထူမပါးလေးတွေ လှီးထားပါ
  • ကြက်သွန်နီကို အခွံခွာပြီး ရေဆေးကာ ခပ်ပါးပါးလေးတွေ လှီးထားပါ
  • မုံလာဥနီကို အခွံခွာပြီး ခြစ်နှင့်ခြစ်ထားပါ
  • ဇလုံတစ်လုံးထဲမှာ ကြက်ဥများကို ဖောက်ထည့်ပေးပြီး ပါဝင်ပစ္စည်းများ နှင့်အတူ ဆား အရသာမှုန့်တို့ကိုထည့်ကာ  အရသာ သမအောင် ခလောက်ပေးပါ
  • အားလုံး အဆင်သင့် ဖြစ်တာနဲ့ ဒယ်အိုးထဲကို ဆီထမင်းစားဇွန်း ငါးဇွန်းထည့်ကာ အပူပေးပါ
  • ဆီပူလာတာနဲ့ ကြက်ဥတို့ကို အထက်အောက် သမအောင် မွှေပြီး ဆီအိုးထဲမှာ ဖြန့်ပြီး ထည့်ပေးပါ
  • ပြီးတာတဲ့ မီးကိုအနေတော် လျှော့ပေးပြီး အိုးကို အဖုံးအုပ်ပေးပါ
  • တစ်မိနစ်ခွဲလောက် ရတာနဲ့  ကြက်ဥကြော်ကို အထက်အောက် အချပ်လိုက်လေး ရလာအောင် လှန်ပေးပါ
  • ပြီးတာနဲ့ အိုးအဖုံးကို ပြန်ဖုံးပေးပြီး နောက်ထပ် တစ်မိနစ်ခွဲလောက် ထပ်ကြော်ပေးကာ ဆယ်ပေးပါ
  • ကြော်ပြီးတာနဲ့ စိမ့်စိမ့်လေးနဲ့ အရသာရှိသော ကြက်ဥကြော်ကို စားသုံးရန် ပြင်ပေးနိူင်ပါပြီ။

Tuesday 22 March 2022

ကြက်ဥမှိုကြော်

 



မာမာဒီနေ့တော့ ကြက်ဥ့ oyster mushroom လေးတွေကို ကြော်စားဖြစ်တဲ့အတွက် မာမာပြင်ဆင်ပြီး ကြော်ဖြစ်တဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. Oyster mushroom - အလုံးကြီးကြီး သုံးခု
  2. ကြက်ဥ - လေးလုံး
  3. ဆား - လက်ဖက်ရည်ဇွန်း တစ်ဝက်
  4. အရသာမှုန့် - လက်ဖက်ရည်ဇွန်း တစ်ဝက်သာသာ
  5. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  6. ဆီ - ထမင်းစားဇွန်း ငါးဇွန်း
  7. မကပ်သောဒယ်အိုး - တစ်အိုး
ပြင်ဆင်ပုံ
  • မှိုမှ မလိုတာတွေကို ဖယ်ပေးပါ
  • မှိုကို အလုံးလိုက်ရေဆေးပြီး ထက်ဝက်ခြမ်းကာ မထူမပါး အနေတော်လေးလေးတွေ လှီးပေးပါ
  • ဇလုံတစ်လုံးထဲမှာ ကြက်ဥများကို ဖောက်ထည့်ပေးပြီး ဆား အရသာမှုန့်နှင့် နနွင်းမှုန့်တို့ကိုထည့်ကာ အရသာ သမအောင် ခလောက်ပေးပါ
  • ပြီးတာနဲ့ လှီးထားသော မှိုများကို ထည့်မွှေပေးပါ
  • အားလုံး အဆင်သင့် ဖြစ်တာနဲ့ ဒယ်အိုးထဲကို ဆီထမင်းစားဇွန်း ငါးဇွန်းထည့်ကာ အပူပေးပါ
  • ဆီပူလာတာနဲ့ ကြက်ဥနှင့် မှိုများကို အထက်အောက် သမအောင် မွှေပြီး ဆီအိုးထဲမှာ ဖြန့်ပြီး ထည့်ပေးပါ
  • ပြီးတာတဲ့ မီးကိုအနေတော် လျှော့ပေးပြီး အိုးကို အဖုံးအုပ်ပေးပါ
  • တစ်မိနစ်ခွဲလောက် ရတာနဲ့  ကြက်ဥကြော်ကို အထက်အောက် အချပ်လိုက်လေး ရလာအောင် လှန်ပေးပါ
  • ပြီးတာနဲ့ အိုးအဖုံးကို ပြန်ဖုံးပေးပြီး နောက်ထပ် တစ်မိနစ်ခွဲလောက် ထပ်ကြော်ပေးကာ ဆယ်ပေးပါ
  • ကြော်ပြီးတာနဲ့ စိမ့်စိမ့်လေးနဲ့ အရသာရှိသော မှို ကြက်ဥကြော်ကို စားသုံးရန် ပြင်ပေးနိူင်ပါပြီ။

Monday 21 March 2022

အပ်မှို အစပ်ဟင်း

 

ဒီနေ့တော့ အပ်မှိုလေးတွေ ဝယ်လာပြီး ချဉ်ငံစပ်လေး ချက်ဖြစ်ပါတယ် စားလို့ကောင်းလွန်းတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. အပ်မှို - 250 g
  2. ငါးငံပြာရည် - ထမင်းစားဇွန်း နှစ်ဇွန်း
  3. မန်ကျည်းသီးမှည့်အနှစ် - ထမင်းစားဇွန်း တစ်ဝက်သာသာ
  4. မာလာအနှစ် - ထမင်းစားဇွန်း နှစ်ဇွန်း
  5. ပဲငပိအချို - ထမင်းစားဇွန်း နှစ်ဇွန်း
  6. နံနံပင် - မိမိနှစ်သက်သလောက်
  7. ဆီ - ထမင်းစားဇွန်း သုံးဇွန်း
  8. ရေ - ထမင်းပေါင်းအိုး ဆန်ချင်ဗူး နှစ်ဗူး
ပြင်ဆင်ပုံ
  • အပ်မှိုကို မလိုတာတွေဖယ်ပြီး ရေဆေးကာ ရေစစ်ထားပါ
  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • နံနံပင်ကို ရေဆေးပြီး ခပ်ကြမ်းကြမ်း လှီးထားပါ
  • အားလုံးအဆင်သင့် ဖြစ်တာနဲ့  အိုးထဲမှာ ဆီထည့်ကာ အပူပေးပါ
  • ဆီပူလာတာနဲ့ ကြက်သွန်ဖြူကို ထည့်ကြော်ပေးပါ
  • ကြက်သွန်ဖြူ အနည်းငယ် နွမ်းလာတာနဲ့ မာလာအနှစ် ငါးငံပြာရည် မန်ကျည်းမှည့်အနှစ် ပဲငပိနှင့် ရေတို့ထည့်ပြီး မွှေပေးပါ
  • ရေပွက်ပွက် ဆူလာတာနဲ့ အပ်မှိုကို ထည့်မွှေပေးကာ သုံးမိနစ်လောက် ပွက်ပွက်ဆူအောင် တည်ပေးကာ နံနံပင် ထည့်မွှေပေးပါ
  • ပြီးတာနဲ့ စားသုံးရန်အတွက် အပ်မှိုအစပ် ဟင်းပွဲလေးကို ပြင်ပေးလို့ ရပါပြီ။

Friday 18 March 2022

ဆိတ်သားကင်

 


ဒီနေ့တော့ honey bbq အနှစ်လေး အရသာသွင်းကာ ဆိတ်သားလေး ကင်ဖြစ်တဲ့အတွက် ထမင်းကတော့ စားလို့ မြိန်ခဲ့ပြန်ပါတယ်။

 အရသာကမွှေးပြီး စပ်စပ်လေးမို့လို့ honey bbq အရသာ ရယ်ဒီမိတ် ပုလင်းလေး ရခဲ့ရင်တော့ ဆိတ်သားကင်လေးကို ကင်စားကြည့်စေချင်ပါတယ်ရှင် ကင်တဲ့အခါ အသားများတူးပြီး မကပ်သွားစေရန် baking paper ကိုသုံးပြီး ကင်ထားပါတယ်။


ပါ၀င်ပစ္စည်းများ

  1. ဆိတ်သား  - 350 g
  2. ဆား - လက်ဖက်ရည်ဇွန်း တစ်ဝက်
  3. Honey bbq အနှစ် - ထမင်းစားဇွန်း ၃ဇွန်း
  4. သံပုရာရည် - ထမင်းစားဇွန်း တစ်ဇွန်းခွဲ
  5. ထောပါတ် - ထမင်းစားဇွန်း နှစ်ဇွန်း
  6. အကင်အိုး သို့မဟုတ် အောက်ခြေထူသော - ဒယ်အိုး
  7. Baking paper - လိုသလောက်


ပြင်ဆင်ပုံ

  • ဆိတ်သားကို ရေဆေးပြီး ရေစစ်ထားပါ
  • ရေစစ်ထားသော ဆိတ်သားကို  ဆား honey bbq အနှစ်တို့နှင့်ရောနယ်ကာ ရေခဲသေတ္တာ မခဲတဲ့ အကနံထဲမှာ အနည်းဆုံး ၅နာရီလောက် နှပ်ထားပေးပါ
  • ဘာဘီကျူး အကင်အိုးနှင့် ကင်ပါက အကင်အိုးကို အပူပေးပြီး ဆီအနည်းငယ်သုပ်ပေးပါ
  • အကင်အိုး မရှိပါက အောက်ခြေထူပြီး မကပ်သော အိုးတစ်လုံးကို အသုံးပြုပြီး ကင်ပေးပါ
  • မာမာကတော့ ဆေးရတာလွယ်ကူတဲ့ အောက်ခြေထူသော ဒယ်အိုးကိုသုံးပြီး ကင်ထားပါတယ်
  • ဒယ်အိုးပေါ်မှာ baking paper ကို ဖြန့်ခင်းပေးပြီး အိုးကို low heat နှင့်  အပူပေးပါ
  • အပူပေးထားသော ဒယ်အိုးထဲမှာ Baking paper ဖြန့်ခင်းပြီး ထောပါတ်ခဲကိုထည့်ပြီး အပူပေးပါ
  • ထောပါတ်ခဲ ပူလာတာနဲ့ အရသာနယ်ပြီး နှပ်ထားသော ဆိတ်သားကို အကင်အိုးထဲထည့်ပြီး ကင်ပေးပါ
  • ကင်နေစဉ် အကျက်ညီစေရန် အိုးအဖုံးကို ဖုံးထားပေးပါ
  • ဆိတ်သားကင် တစ်ဖက်ကို လေးမိနစ်လောပ် အပူပေးပြီး ဆိတ်သား အပေါ်ယံကို အိုးထဲမှ ထောပါတ်ဆီအနည်းငယ် သုတ်ပေးကာ တစ်ဖက်ကို လှည့်ပေးပြီး ကင်ပေးပါ
  • နောက်တစ်ဖက်ကိုလဲ လေးမိနစ်လောက် ကင်ပေးပြီးရင် ပျားရည်နံ့လေး သင်းနေသော ဆိတ်သားကင် မွှေးမွှေးလေး ရပါပြီ။

Wednesday 16 March 2022

သတ်သတ်လွတ် ဟင်းချို


 ဒီနေ့တော့ မိုးထဲလေထဲ ချမ်းလိုက်တာလဲ ခိုက်ခိုက်တုန်နေပြီး မာမာတို့နေတဲ့ မြို့လေးမှာ ရေတွေလဲ ကြီးလို့နေပါတယ်။

ဒီတော့လဲ အချမ်းပြေဖို့အတွက် အိမ်မှာအဆင်သင့် ရှိနေတဲ့ မှိုခြောက်လေးတွေနဲ့ ဟင်းချိုရည်လေး ချက်ဖြစ်ပါတယ်။

 ဒါကြောင့်မို့လို့ အရည်သောက်ဆမ်း ဟင်းချိုတစ်မယ်အတွက် အလွယ်ချက်နည်းလေးကို မျှဝေပေးလိုက်ပါတယ်ရှင်။

ဟင်းချိုရည်ထဲထည့်တဲ့ အသီးအရွက်တွေကတော့ မိမိနှစ်သက်တဲ့ အသီးအရွက်တွေ ထည့်နိူင်ပါတယ်။

ပါဝင်ပစ္စည်းများ
  1. မှိုခြောက် - ဆယ်ပွင့်
  2. ကြက်သွန်မိတ် - နှစ်ပင်
  3. နံနံပင် - နှစ်ပင်
  4. သံပုရာသီး - တစ်လုံး
  5. ခေါက်ဆွဲဖတ် - အနည်းငယ်
  6. ဆား - လိုသလောက်
  7. အရသာမှုန့် - လိုသလောက်
  8. ကြက်သွန်ဖြူ - အမွှာကြီးကြီး သုံးမွှာ
  9. ရေ - 5 cups
ပြင်ဆင်ပုံ
  • မှိုကို ရေမြုပ်အောင်ထည့်ပြီး တစ်နာရီလောက် စိမ်ထားပါ 
  • ပြီးတာနဲ့ မှိုကို အနေတော်လေးတွေ ပိုင်းဖြတ်ထားပါ
  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • ​သံပုရာသီးကို ရေဆေးကာ အစိတ်လေးတွေ စိတ်ထားပါ
  • ကြက်သွန်မိတ်နှင့် နံနံပင်ကို ရေဆေးကာ အနေတော်လေးတွေ လှီးထားပါ
  • အားလုံးအဆင်သင့် ဖြစ်တာနဲ့ အိုးထဲမှာ ရေထည့်ပြီး ပွက်ပွက်ဆူအောင် တည်ပေးပါ
  • ရေပွက်ပွက် ဆူလာတာနဲ့ မှို ဆားနှင့် အရသာမှုန့်တို့ထည့်ပြီး တည်ပေးပါ
  • ပြီးတာနဲ့ ကြက်သွန်ဖြူနှင့်  အသီးအရွက်တို့ကို ထည့်ပေးပြီး ဆက်တည်ပေးပါ
  • ဟင်းရေ ပွက်ပွက်ဆူလာတာနဲ့ အရသာမြည်းပြီး မိမိစိတ်ကြိုက် အရသာ ရလာအောင် ပြင်ပေးပါ
  • အရသာ ပြင်ပြီးတာနဲ့ ပန်ဟးကန်င်းလုံးထဲမှာ ခေါက်ချိုဆွဲဖတ်ရ ထည့်ပေးပါ
  • ထိုခေါက်ဆွဲဖတ်ထဲကို ဟင်းရည်ပူပူလေး ဆမ်းပေးကာ ကြက်သွန်မိတ်နှင့် နံနံပင်တို့ ဖြူးပေးပါ
  •  ပြီးတာနဲ့ ဟင်းရည် ပူပူလေးထဲကို သံပုရာရည် ညှစ်ပေးကာ သောက်သုံးရန် ပြင်ပေးနိူင်ပါပြီ။

Tuesday 15 March 2022

သစ်တိုသီး ငပိချက်

 





ဒီတစ်ခါတော့ သစ်တိုသီးလေးတွေ ဝယ်လာပြီး ငပိချက်လေး ချက်ပါတယ် အချဥ် အရသာလေးနဲ့ စားလို့အရမ်းကောင်းတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။ 
ပါ၀င်ပစ္စည်းများ
  1. သစ်တိုသီး - လေးလုံး
  2. ပုဇွန်ခြောက် - အကောင်ကြီးကြီး နှစ်ဆယ်သား
  3. ကြက်သွန်နီ - ခပ်ကြီးကြီး နှစ်လုံး
  4. ကြက်သွန်ဖြူ - အနေတော်အမွှာ နှစ်ဆယ်ခန့်
  5. ငရုတ်သီး လုံးခြမ်းကွဲ -  ထမင်းစားဇွန်း လေးဇွန်း
  6. ဆီ - ထမင်းပေါင်းအိုး ဆန်ချင်ဗူး တစ်ဗူးခန့်
  7. နနွင်းမှုန့် - လက်ဖက်ရည်ဇွန်း တစ်ဇွန်း
  8. ငါးငံပြာရည် - ထမင်းစားဇွန်း လေးဇွန်း (အငံကြိုက်ပါက ပိုထည့်ပေးပါ)
  9. ဆား - ထမင်းစားဇွန်း တစ်ဝက်
  10. အရသာမှုန့် - လက်ဖက်ရည်ဇွန်း နှစ်ဇွန်း
ပြင်ဆင်ပုံ
  • သစ်တိုသီးကို အခွံခွာပြီး ရေစင်အောင်ဆေးကာ မထူမပါးလေးတွေ ပေါက်ပြီး လှီးထားပါ
  • ပုဇွန်ခြောက်ကို ရေတစ်ထပ်ဆေးကာ ရေနာရီ၀က်လောက် စိမ်ထားပြီးမှ ညက်နေအောင် ထောင်းပေးပါ။
  • ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးထားပါ။
  • ကြက်သွန်ဖြူကို အခွံခွာပြီး ရေဆေးထားပါ။
  • ပါဝင်ပစ္စည်းများကို အဆင်သင့် ပြင်ထားပါ။
  • အားလုံးအဆင်သင့် ဖြစ်ပါက ဒယ်အိုးထဲမှာ ဆီထည့်ပြီး အပူပေးပါ။
  • ဆီပူလာပါက နနွင်းမှုန့်ထည့်ကာ ကြက်သွန်နီကို ထည့်ကြော်ပေးပါ။
  • ကြက်သွန်နီများ နွမ်းလာပြီး အရောင်မပြောင်းခင်မှာ ငရုတ်သီး လုံးကြမ်းခွဲကို ထည့်ပြီး ၂မိနစ်လောက် ကြော်ပေးပါ။
  • ကြော်နေစဉ် ငရုတ်သီးများ အကျက်ညီစေရန် မကြာမကြာ မွှေမွှေပေးပါ
  • ငရုတ်သီးနံ့ မွှေးလာပါက ပုဇွန်ခြောက်ထောင်း ဆား ငါးငံပြာရည်နှင့် အရသာမှုန့်တို့ထည့်ပြီး မွှေပေးပါ
  • မကြာမကြာ မွှေပေးပြီး သစ်တိုသီးကို ထည့်မွှေပေးပါ
  • သစ်တိုသီးများ နူးအိလာစေရန် ရေမြုပ်အောင်ထည့်ပြီး တည်ပေးကာ အိုးမကပ်စေရန် မကြာမကြာ မွှေပေးပါ
  • ထည့်ထားသော ရေများခမ်းလာကာ သစ်တိုသီးများ နူးအိလာပြီး ဆီပြန်ထွက်လာတဲ့အထိ မီးအေးအေးနဲ့  တည်ပေးပါ 
  • အရသာမြည်းကာ မိမိစိတ်ကြိုက် အရသာ ရလာအောင် ပြင်ပေးကာ ကြက်သွန်ဖြူများကို ထည့်မွှေပေးပြီး မီးပိတ်ပေးပါ။
  • သစ်တိုသီး ပုဇွန်ခြောက် ငါးပိချက်ကို ခပ်ငံငံလေး ကြိုက်ပါက ငါးငံပြာရည်ကို ပိုထည့်ပေးပါ။
  • သစ်တိုသီး ပုဇွန်ခြောက် ငါးပိချက် ချဥ််စပ်စပ် မွှေးမွှေးလေး ရလာတာနဲ့ နှစ်သက်ရာ တို့စရာတို့ဖြင့် တွဲဖက်ပြီး စားသုံးနိုင်ပါပြီ။

Wednesday 2 March 2022

မုန့်ကြိုးလိမ်

 

ဒီနေ့တော့ မုန့်ကြိုးလိမ်လေးတွေ လုပ်ဖြစ်ပါတယ် မာမာတို့နေတဲ့ ပြည်နယ်ဖက်မှာ မိုးရွာတာ သုံးပါတ်ကျော်ခဲ့ပြီး တစ်ချို့နေရာတွေလဲ ရေကြီးနေတဲ့အတွက် အပြင်လဲ မထွက်ဖြစ်တော့ပါဘူး။
ဒီတော့လဲ အိမ်မှာရှိတဲ့ ပစ္စည်းလေးတွေနဲ့ မုန့်လေးတွေ လုပ်စားဖြစ်တဲ့အထဲက ဒီနေ့လုပ်ဖြစ်တဲ့ မုန့်ကြိုးလိမ် လုပ်နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. ကောက်ညှင်းဆန်မှုန့် - 200 g
  2. ဆန်မှုန့် - 200 g
  3. ဆီ - ထမင်းစားဇွန်း တစ်ဇွန်းခွဲ
  4. ဆား - လက်ဖက်ရည်ဇွန်း တစ်ဝက်
  5. ရေနွေး - 355 ml (မုန့်သားစပ်ရန် ခပ်နွေးနွေးလေးကို သုံးပါ)
  6. ဆီ - လိုသလောက် သုံးပေးပါ (မုန့်သားကြော်ရန်)
  7. သကြား - 120 g
  8. ရေ - 40 ml (သကြားရည်ကျိုရန်)
ပြင်ဆင်ပြုလုပ်ပုံ
  • ဇလုံတစ်လုံးထဲမှာ ဆန်မှုန့် ကောက်ညှင်းမှုန့် ဆီနှင့်ဆားတို့ထည့်ပြီ သမအောင် မွှေပေးပါ
  • ပြီးတာနဲ့ ရေနွေးကို နည်းနည်းချင်း ထည့်ကာ မုန့်သားရအောင် နယ်ပေးပါ
  • ရေနွေးနွေးလေးကို မုန့်သားစပ်ထားတဲ့ အထဲကို တစ်ခါထဲ အများကြီး မထည့်ဘဲ နည်းနည်းချင်း ထည့်နယ်ပေးပါ
  • မိမိတို့ အသုံးပြုတဲ့ ကောက်ညှင်းမှုန့်နဲ့ ဆန်မှုန့်တို့က မတူညီနိူင်ကြတဲ့အတွက် ရေကိုနည်းနည်းချင်း ထည့်နယ်တာက အကောင်းဆုံးပါ
  • မုန့်သား အနေတော် ရလာပြီဆိုရင် မုန့်အသား သေအောင် သုံးနာရီလောက် နှပ်ထားပေးပါ
  • မုန့်သားနှပ်ထားတာ ရတာနဲ့ မုန့်သားကို အချက်နှစ်နှစ်လောက် ဖိဖိပြီး ထပ်နယ်ပေးပါ
  • ပြီးတာနဲ့ မုန့်သားကို လက်တစ်ဆုတ်စာသာသာ ယူပြီးတာနဲ့ လက်ထဲမှာ ဆယ်ချက်လောက် ဆုတ်ဆုတ်ပေးပါ
  • ပြီးတော့မှ မျက်နှာပျင်ညီသော နေရာမှာ လက်ဝါးနှစ်ဖက်နှင့် ဆယ်လက်မလောက် အရှည်ရအောင် လှိမ့်ပေးပါ
  • မုန့်သား ရှည်ရှည်လေး ရတာနဲ့ အလယ်လောက်ကနေ ထက်ဝက်လောပ်ကနေ ခပ်ကွေးကွေးလေးရအောင် ကွေးပေးပါ
  • ပြီးတာနဲ့ ထိုမုန့်သား နှစ်ဖက်ကို လိမ်ပေးကာ အောင်ဖက်အနားစ နှစ်ဖက်ကို ဖိပြီးကပ်ပေးပါ
  • ထိုနည်းအတိုင်း မုန့်သားကုန်တဲ့အထိ လုပ်ပေးပါက မုန့်ကြိုးလိမ် ဆယ်ခု ရပါမယ်။
မုန့်ကြော်ရန်
  • အိုးတစ်လုံးထဲမှာ ဆီခပ်များများလေး ထည့်ပေးကာ အပူပေးပါ
  • ဆီပူလာတာနဲ့ အိုးဆန့်သလောက် မုန့်ကြိုးလိမ်လေးတွေကို ထည့်ကြော်ပေးပါ
  • မုန့်သား အကျက်ညီစေရန် မကြာမကြာ လှည့်ပေးပြီး မုန့်သားကျက်ပါက ဆယ်ပြီးဆီစစ်ပေးပါ
  • ကျန်နေသော မုန့်များကိုလဲ ကုန်တဲ့အထိ ဆက်ကြော်ပေးကာ ဆီစစ်ပေးပါ 
သကြားရည်ကျိုရန်
  • ဒယ်အိုးတစ်လုံးထဲမှာ သကြားနှင့်ရေတို့ထည့်ပြီး သကြားအရည်ပျော်ကာ ခပ်စေးစေး အနေအထားရတဲ့အထိ တည်ပေးပါ
  • သကြားများ အရည်ပျော်ပြီး ခပ်စေးစေး အနေအထား ရလာတာနဲ့ ဆီစစ်ထားတဲ့ မုန့်ကြိုးလိမ်လေးတွေကို ထည့်မွှေပေးပါ
  • မွှေနေရင်းက သကြားအရည်များ ခြောက်လာပြီး သကြားလေးတွေ ပွင့်လာရင် အပြင်သား ကြွတ်ကြွတ် အတွင်းသား အိအိလေးနဲ့ မုန့်ကြိုးလိမ်လေးတွေ ရပါပြီ။