Monday, 19 October 2015

ချဉ်ပေါင်ခါး မျှစ်ကြော် ချဉ်ငံစပ်


ချဉ်ပေါင်ခါးရွက်လေးတွေ ရတာနဲ့ ပုဇွန်ခြောက်ကိုထောင်းပြီး မျှစ်အရောနဲ့ကြော်ပါတယ် ချဉ်ပေါင်ခါးရွက်က ဆေးဘက်ဝင်တယ်လို့ ပြောသံကြားဖူးပေမဲ့ ဘာအတွက်ဝင်သလဲတော့ သေသေချာချာမသိလေတော့ ကြော်နည်းလေးဘဲ မျှဝေလိုက်ပါတယ်။

ရိုးရိုးချဉ်ပေါင်ကြော်တဲ့  ကြော်နည်းအတိုင်းပါဘဲ ဒါပေမဲ့ ချဉ်ပေါင်ခါးရွက်က အရွက်ကြီးပြီး အရွက်သားမာတော့ ကြော်တဲ့အခါမှာ မကျေဘဲ ဖိုးသိုးဖတ်သတ် ခါးသက်သက်လေးနဲ့မို့လို့ စားလို့အင်မတန်မှ ကောင်းပါတယ်။

ပါဝင်ပစ္စည်းများ

  1. အရိုးသင်ပြီး ရေစင်အောင်ဆေးပြီး ရေစစ်ထားသော ချဉ်ပေါင်ခါးအရွက်- ဇကာအလတ် တစ်လုံးစာ
  2. ပြုပ်ပြီး ခပ်ပါးပါးလှီးထားသော မျှစ် - တရုတ်ဟင်းပြင်ပန်းကန် အလတ် တစ်လုံးစာ
  3. ပုဇွန်ခြောက် - အကောင် နှစ်ဆယ်ခန့် ထောင်းထားပါ
  4. ခပ်ပါးပါး လှီးထားသော ကြက်သွန်နီ - အနေတော် တစ်လုံး
  5. အနေတော် စိတ်ထားသော ကြက်သွန်ဖြူ - အမွှာကြီးကြီး ငါးမွှာ
  6. ငရုတ်သီး လုံးခြမ်းကွဲ - ထမင်းစားဇွန်း နှစ်ဇွန်း
  7. ငါးငံပြာရည် - ထမင်းစားဇွန်း သုံးဇွန်း
  8. အရသာမှုန့် - လက်ဖက်ရည်ဇွန်း တစ်ဝက်သာသာ
  9. ဆီ - ထမင်းစားဇွန်း ငါးဇွန်း
  10. နနွင်းမှုန့်. - လက်ဖက်ရည်ဇွန်း လေးပုံတစ်ပုံ


ပြင်ဆင်ချက်ပြုပ်ပုံ
  • လိုအပ်သော ပစ္စည်းများကို ပြင်ထားပါ
  • အောက်ခြေမကပ်သော အိုးကို အပူပေးပြီး ဆီနှင့်နနွင့်မှုန့်ကိုထည့်ပါ
  • ဆီပူလာပါက ကြက်သွန်နီနှင့် ငရုတ်သီးမှုန့်ကို ထည့်ပြီး မွှေးလာအောင်ကြော်ပေးပါ
  • ငရုတ်သီးနံ့မွှေးလာတာနဲ့ ပုဇွန်ခြောက်မှုန့်ကို မိနစ်ဝက်လောက်ထည့်ပြီး ကြော်ပေးပါ
  • ပြီးတာနဲ့ ချဉ်ပေါင်ရွက်ကို ထည့်ပြီးမွှေပါ
  • ချဉ်ပေါင်ခါးရွက် ဖြစ်တဲ့အတွက် အရွက်များ အရမ်းကျေမသွားဘဲ ပျော့ရုံဘဲ ပျော့လာတာနဲ့ငံပြာရည်နှင့် အရသာမှုန့် မျှစ်တို့ ထည့်မွှေပေးပါ
  • မျှစ်နဲ့ ချဉ်ပေါင်ရွက် လုံးမိသွားတာနဲ့ ငရုတ်သီးစိမ်း ကြက်သွန်ဖြူတို့ကိုထည့်ပြီး သမအောင်မွှေပေးပါ
  • အားလုံးသမသွားပြီဆိုတာနဲ့ အရသာမြည်းပြီး လိုသလိုပြင်ပေးကာ သုံးဆောင်နိုင်ပါပြီ။

No comments:

Post a comment