Thursday 15 October 2015

ငါးနုသန်း အချဉ်ဆီပြန်


ငနုသန်းငါးလေးတွေရတော့ မြန်မာပြည် အလွမ်းပြေ အချဉ်ဆီပြန်လေး ချက်မိသွားခဲ့တယ် ငါးနုသန်းဆိုတဲ့အတိုင်း ငါးအသားက အရမ်းနုလေတော့ ချက်ရတာ သတိထားပြီး ချက်ရတာမို့ မာမာချက်တဲ့နည်းလေး ဝေငှလိုက်ပါတယ်။

ပါဝင်ပစ္စည်းများ

  1. ငါးမြွေထိုး - 400 gm
  2. ညက်နေအောင် ထောင်းထားသော ကြက်သွန်ဖြူ - အမွှာကြီးကြီး သုံးမွှာ
  3. ညက်နေအောင် ထောင်းထားသော ကြက်သွန်နီ - အနေတော် တစ်ခြမ်း
  4. ညက်နေအောင် ထောင်းထားသော ချင်း - လက်တစ်ဆစ်
  5. မကျည်းမှည့်အနှစ် လက်ဖက်ရည်ဇွန်း - တစ်ဇွန်းသာသာ
  6. ငရုတ်သီးအရောင်တင်မှုန့် လက်ဖက်ရည်ဇွန်း - တစ်ဇွန်း
  7. ဆီ ထမင်းစားဇွန်း - လေးဇွန်းသာသာ
  8. နနွင်းမှုန့်. - လက်ဖက်ရည်ဇွန်း တစ်ဝက်
  9. နံနံပင် - နှစ်သက်သလောက်

ငါးအရသာနယ်ရန်
  • ငါးကိုအရင်ဆုံး ဆူးတောင်ခုတ် ဗိုက်ခွဲပြီး မလိုတာတွေထုတ်ကာ ရေစင်အောင်ဆေးပေးပါ
  • ဇလုံကျယ်ကျယ်ထဲမှငါးကိုထဲ့ပေးပါ
  • ငါးထဲကို ဆား လက်ဖက်ရည်ဇွန်း တ၀က်နှင့်ငါးငံပြာရည် ထမင်းစားဇွန်း တဇွန်းသာသာထဲ့ပေးပါ
  • နနွင်းမှုန့် လက်ဖက်ရည်ဇွန်း သုံးပုံတစ်ပုံထဲ့ပေးပါ
  • ဟင်းချိုမှုန့် လက်ဖက်ရည်ဇွန်း တစ်ဝက်သာသာထဲ့ပေးပါ
  • အားလုံးထဲ့ပြီးပါက ငါးကိုအရသာဝင်စေရန် နယ်ပေးပါ
ဟင်းချက်ရန်
  • ဆီကိုအရင်ဆုံးအပူပေးပါ
  • ဆီပူလာမှ နနွင်းမှုန့်ကိုအရင်ဆုံးထဲ့ပြီးတာနဲ့ထောင်းထားသော ဟင်းချက်အမွှေးအကြိုင်များ ထဲ့မွှေပါ
  • တမိနစ်လောက်မွှေပြီးတာနဲ့ငရုတ်သီးအရောင်တင်မှုန့်ကိုထဲ့ပြီး ၂မိနစ်လောက်မွှေပေးပါ
  • ငရုတ်သီးဆီသတ်နံ့မွှေးလာပြီဆိုတာနဲ့ ငါးအရသာနယ်ကို ထဲ့ပြီးမွှေပေးပါ
  • ငံပြာရည် ထမင်းစားဇွန်းတဇွန်း ထဲ့ပြီးအိုးကိုအရသာညီအောင် လှုပ်ပေးပါ
  • ငါးအသားများ မာပြီးတင်းသွားမှ ရေမြုပ်အောင်ထဲ့ပြီး အဖုံးအုပ်တည်ပေးပါ
  • ရေဆူလာပါက မကျည်းမှည့်အနှစ်ထဲ့မွှေပြီး အဖုံးအုပ်ပြီးပြန်ချက်ပါ
  • ဆီပြန်မဖြစ်ခင် အရည်လေးနည်းနည်း ကျန်နေချိန်မှာ နံနံပင်အုပ်ပြီး အရသာမြည်းကာ မီးပိတ်ပေးပါ
  • ငါးနေုသန်း အချဉ်ဆီပြန် ဟင်းလေးတစ်ခွက် ရပါပြီ။

No comments:

Post a Comment