Thursday 30 September 2021

မုန့်ဦးနှောက်

 






ဒီနေ့တော့ မုန့်ဦးနှောက်လေး စားချင်တာနဲ့ အရင်ဆန်မှုန့်နဲ့ လုပ်တဲ့နည်းကို ပြောင်းကော်မှုန့် အစားထိုးပြီး လုပ်ကြည့်ပါတယ်။

လုပါရတာလဲ လွယ်လဲလွယ် မြန်လဲမြန်ပြီး ဒီမုန့်လေးက မုန့်သားကြည်လာတဲ့အထိ အဆက်မပြတ် မွှေရတာမို့လို့ လက်မောင်းလေ့ကျင့်ခန်းလဲ ရသလို မုန့်ကောင်းကောင်းလေးလဲ စားရမှာ ဖြစ်တဲ့အတွက် အားတဲ့ရက်ကလေးမှာ လုပ်စားကြည့်စေချင်ပါတယ်။

နောက်တစ်ခုက မုန့်လုပ်တဲ့အခါမှာ အောက်ခြေမကပ်ဘဲ အိုးအသားထူတဲ့ အိုးကိုသုံးပါ လက်အပူ မဟပ်အောင် မွှေလို့ကောင်းတဲ့ သစ်သားယောင်းမ အရှည်ကို သုံးပေးရင် မုန့်လုပ်ရတာ အရမ်းအဆင်ပြေပါတယ်ရှင်။

အခုမာမာ လုပ်ပြတဲ့ နည်းအတိုင်းလုပ်ပြီး အအေးခံကာ  ရေခဲသေတ္တာထဲမှာ ထားပြီးစားပါက တပါတ်မက အထားခံပါတယ်။

ပါ၀င်ပစ္စည်းများ (မုန့်သားကျိုရန်)
  1. ပြောင်းကော်မှုန့် - 50 g (cornflour )
  2. အုန်းနို့ - 300ml (milk)
  3. သကြားဖြူ - ထမင်းစားဇွန်း နှစ်ဇွန်းခွဲ (အချိုကြိုက်ပါက ပိုထည့်ပါ) (sugar )
  4. ဆား - လက်ဖက်ရည်ဇွန်း သုံးပုံတစ်ပုံ
သာကူကျိုရန်
  1. သာကူ - 50 g
  2. ရေ - 400 ml
အုန့်နို့ကျိုရန်
  1. အုန်းနို့ - ထမင်းပေါင်းအိုး ဆန်ချင်ဗူး ၄ဗူး ( အုန်းဆီချက်ရန် )
  2. ဆီ - ထမင်းစားဇွန်း ၅ဇွန်း ( အုန်းဆီချက်ရန် )
  3. ဆား - လက်ဖက်ရည်ဇွန်း တဝက် ( အုန်းဆီချက်ရန် )
မုန့်ကျိုပြီးထည့်ရန်
  1. အလျှား 195 cm အမြင့် 3 5cm  အကျယ် 110cm  ရှိသော အပူခံနိူင်မည့် ပလပ်စတစ်ဗူး - တစ်ဗူး (သို့)
  2. မိမိဆီမှာ အဆင်ပြေမည့် ဗန်း သို့ ခွက် တို့ကို သုံးပေးပါ
  3. ဇောက်နက်ပြီး အိုးအသားထူကာ အောက်ခြေမကပ်သောအိုး - တစ်လုံး
  4. မွှေလို့ကောင်းသော ယောင်းမ - တစ်ချောင်း
  5. ဆီ - အနည်းငယ် (မုန့်ထည့်မည့်ဗူးကို သုပ်ရန်)

အုန်းနို့ကျိုပုံ
  • ဇောက်နက်ပြီး အောက်ခြေမကပ်သော အိုးထဲကို အုန်းနို့ထည့်ပြီး မီးအနေတော်နှင့် တည်ပေးပါ
  • အုန်းနို့အိုးက တည်ထားစဉ် ပွက်ပွက်ဆူလာပြီး ဝေကျတတ်တဲ့အတွက် ဇောက်နက်ပြီး မကပ်သောအိုးကို သုံးပေးပါ
  • အုန်းနို့အိုး ပွက်ပွက်ဆူလာပြီး ရေအနည်းငယ် ခမ်းလာပါ ဆီနှင့်ဆားကိုထည့်ပြီး မွှေပေးပါ
  • အိုးနို့များ ဥလာပါက မီးပိတ်ပြီး လက်ကျန်အပူရှိန်နဲ့ ဆက်တည်ထားပေးပါ
  • ဆီသံကြားလာပြီး အုန်းနို့နံ့လေး သင်းလာတာနဲ့ အုန်းဆီချက် မွှေးမွှေးလေး ရပါပြီ
  • အုန်းဆီချက်ကို မိမိ လိုသလောက်သုံးပြီး ပိုနေပါက ထမင်းပူပူနှင့် နယ်စားနိုင်သလို အုန်းထမင်းချက်ရာမှာလဲ ပြန်ပြီးသုံးလို့ရတဲ့အတွက် လိုတဲ့အခါ ပြန်သုံးနိူင်အောင် ရေခဲသေတ္တာထဲမှာ ထည့်ခဲထားနိူင်ပါတယ်။
ပြင်ဆင်ပုံ
  • မုန့်ရည်ကျိုပြီး ထည့်မည့် ခွက်ကို ဆီအနည်းငယ် သုတ်ပေးထားပါ
  • ဇလုံအနေတော် တစ်လုံးကို ပြင်ထားပါ
  • ထိုဇလုံထဲမှာ ဆား သကြား ပြောင်းကော်မှုန့် နှင့် အုန်းနို့တို့ကိုထည့်ပြီး သမအောင် ရောမွှေပေးထားပါ
မုန့်ကျိုရန်
  • ဇောက်နက်ပြီး အိုးအသားထူကာ မကပ်သောအိုးထဲမှာ ရေနှင့်သာကူတို့ကိုထည့်ပြီး မီးနွေးနွေးလေးနဲ့ ကျိုပေးပါ
  • ​သာကူကျိုနေစဉ် အဆက်မပြတ် မွှေမွှေပေးပါ
  • ရေခမ်းလာပြီး သာကူစေ့များ မျက်စေ့ပျောက်စ ပြုလာတာနဲ့ အရသာစပ်ပြီး ဖျော်ထားသော ပြောင်းကော်မှုန့် မုန့်နှစ်များကို ထည့်ပေးပါ
  • မုန့်နှစ်ရည် ထည့်ပြီးတာနဲ့ မီးခပ်နွေးနွေးလေးဘဲ စိတ်ရှည်လက်ရှည် ထိုအိုးကို အဆက်မပြတ် မွှေပေးပါ
  • မွှေနေရင်းက မုန့်နှစ်ရည် စပြီးပျစ်လာပြီ ဆိုတာနဲ့ လက်အားသန်သန်နဲ့ အဆက်မပြတ် မွှေပေးပါ
  • မွှေနေရင်း ရေပျစ်ချိန်မှစပြီး မုန့်သားကြည်ကာ ရေကုန်လာတဲ့အထိ ငါးမိနစ်နစ်ခန့် မွှေပေးပါ
  • မွှေနေတာကို မရပ်ပါနဲ့ ဆက်တိုက် မွှေပေးပါ
  • တစ်ဖြည်းဖြည်းနဲ့ မုန့်အိုးထဲမှာ ရေမပေါက်တော့ဘဲ မုန့်သားကြည်လာပြီ ဆိုလာပါက ဆီသုတ်ထားသော ဗူးထဲသို့ ခပ်မြန်မြန် လောင်းထည့်ပေးပါ
  • မုန့်သားညီညီလေးရအောင် သစ်သားယောင်းမဖြင့် အသာလေး ညှိပေးပြီး မျက်နှာပြင်ကို လိုက်ဖိပေးပါ
  • ပြီးတာနဲ့ မုန့်ဗူးကို အခန်းအတွင်းမှာဘဲ၂နာရီလောက် အအေးခံပေးပါ
  • မုန့်သားပူနေချိန် ရေခဲသေတ္တာထဲမှာထည့်ပြီး အအေးမခံမိဖို့ အထူးသတိထားပေးပါ
  • မုန့်သားအေးသွားမှ ရေခဲသေတ္တာထဲမှာ ထည့်ထားနိူင်ပါတယ်ဆ
  • ပြောင်းကော်မှုန့်နှင့်လုပ်သော မုန့်ဖြစ်တဲ့အတွက် ရေခဲသေတ္တာထဲမှာ တစ်ပါတ်လောက်အထိထားပြီး စားနိူင်ပါတယ်
  • မုန့်ဦးနှောက်ဗူး အေးပြီးခဲသွားမှ ဗန်းတစ်ခုထဲကို ဗူးထဲမှ မှောက်ချပေးပါ
  • မှောက်ချပေးသည့်ဘက်မှ မိမိနှစ်သက်သလို လှီးပေးပါ
  • လှီးတဲ့အခါမှာ ဓါးကိုဆီသုတ်ပြီးမှ လှီးပေးပါမှ မုန့်တုံးလှလှလေးတွေ ရပါမယ်
  • ပြီးတာနဲ့ အဆင်သင့် ကျိုထားသော အုန်းနို့ဆမ်းကာ ချိုစိမ့်စိမ့် အိအိတုံတုံ မုန့်ဦးနှောက် အုန်းဆီဆမ်းတဲ့ မုန့်ပွဲကို ပြင်ပေး နိူင်ပါပြီ။

Wednesday 29 September 2021

ငရုတ်သီး ဆားလှော်ထောင်း







ဒီနေ့တော့ ကြက်သားကြော်နှင့် တစ်ခြားသော အသားငါးကြော် မာလကာသီး သရက်သီး ပန်းသီး ဂွေးသီး စောင်းလျှားသီး မန်ကျည်းသီး သံပုရာသီး အစရှိတဲ့ အသီးလေးတွေနဲ့ တွဲဖက်ပြီး စားလို့ရအောင် ငရုတ်သီး ဆားလှော်ထောင်းလေး ထောင်းဖြစ်ပါတယ်။

မာမာကတော့ ခနခနလှော်နေရင် ညှော်မှာ​ကြောက်တဲ့အတွက် တစ်ခါထဲ ခပ်များများ လှော်ထားပါတယ် နည်းနည်းဘဲ လှော်ချင်တဲ့ သူတွေအတွက် အနည်းငယ်ဘဲ လှော်ပေးလို့ ရပါတယ် ဒါကြောင့်မို့လို့ မာမာပြင်ဆင်ပြီး ထောင်းထားတဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. ငရုတ်သီး အခြောက်တောင့် - အတောင့် တစ်ရာခန့်
  2. ဆား - ထမင်းစားဇွန်း ငါးဇွန်း
  3. နာနတ်ပွင့် - အပွင့်ကြီးကြီး ဆယ်ပွင့်ခန့်
  4. စီချွမ်ငရုတ်ကောင်း - ထမင်းစားဇွန်း သုံးဇွန်းမောက်မောက်
  5. ငရုတ်ကောင်းစေ့ - ထမင်းစားဇွန်း သုံးဇွန်း
  6. အချိုမှုန့် - ထမင်းစားဇွန်း တစ်ဇွန်း
ပြင်ဆင်ပုံ
  • နာနတ်ပွင့် အထဲမှ အစေ့လေးတွေကို စိတ်ရှည်လက်ရှည် ဖယ်ပေးပါ
  • အိုးအသားထူသော ဒယ်အိုးထဲမှာ ဆား ငရုတ်ကောင်းစေ့ စီချွမ်ငရုတ်ကောင်း နာနတ်ပွင့်နှင့် ငရုတ်သီး အခြောက်တောင့်တို့ကို ထည့်ပေးပါ
  • ပြီးတာနဲ့ မီးဖိုပေါ်တင်ပြီး မီးခပ်နွေးနွေးနှင့် လှော်ပေးပါ
  • လှော်နေစဉ် မီးအားမပျင်းစေရန် သတိထားပေးပြီး မကြာမကြာ မွှေမွှေပေးပါ
  • ငရုတ်သီးများ ကျွတ်ရွလာပါက မီးပိတ်ပေးပြီး အိုးကိုမီးဖိုပေါ်မှ ဖယ်ပေးကာ အအေးခံပေးပါ
  • အားလုံးအေးသွားပါက အချိုမှုန့်နှင့်အတူ ငရုတ်ဆုံထဲမှာ ထည့်ပြီး ထောင်းပေးပါ
  • ကြိတ်စက်ရှိပါက ကြိတ်စက်ထဲမှာ ထည့်ပြီးကြိတ်ပေးပါ
  • မိမိနှစ်သက်တဲ့ အနေအထား ရလာပါက မွှေးကြိုင်နေသော ငရုတ်သီး ဆားထောင်းလေးကို ပုလင်းသန့်သန့်ထဲမှာထည့်ပြီး သိမ်းထားပေးပါ
  • ပူစပ်ပြီး မွှေးနေတဲ့ ငရုတ်သီး ဆားလှော်ထောင်းကို ကြက်သားကြော် အသားငါးကြော်တို့ အပေါ်မှာ ဖြူးပြီး စားနိူင်သလို အချဉ်ဓာတ်ပါသော အသီးမျိုးစုံတို့နဲ့လဲ တို့စား သုပ်စားနိူင်ပါပြီ။

Tuesday 28 September 2021

ခေါက်ဆွဲကြော်



ဒီတစ်ခါတော့ ကြက်ဥလေးနဲ့ ခေါက်ဆွဲအဖြူထည်လေးကို ဂေါ်ဖီ ဘရော့ကိုလီနဲ့ ပန်းဂေါ်ဖီတွေရယ်ရောကာ ကြော်စားဖြစ်ပါတယ်။
အရမ်းစားလို့ ကောင်းလွန်းတဲ့အတွက် မာမာ့လိုဘဲ ကြော်စားချင်တဲ့သူတွေ ကြော်စားနိူင်အောင် မာမာကြော်တဲ့နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ခေါက်ဆွဲ အစို - လေးဆယ်သား
  2. ဘရော့ကိုလီ - အနေတော်တစ်စိတ်
  3. ဂေါ်ဖီ - အနေတော် တစ်စိတ်
  4. ပန်းဂေါ်ဖီ - အနေတော် တစ်စိတ်
  5. ကြက်သွန်ဖြူ - အမွှာကြီးကြီး သုံးမွှာ
  6. ပဲငံပြာရည် အကြည် - ထမင်းစားဇွန်း နှစ်ဇွန်း
  7. နှမ်းဆီမွှေး - လက်ဖက်ရည်ဇွန်း တစ်ဝက်
  8. ဆား - လက်ဖက်ရည်ဇွန်း တစ်ဇွန်း
  9. ဆီ - ထမင်းစားဇွန်း ရှစ်ဇွန်းခန့်
  10. တရုတ်နံနံ - မိမိနှစ်သက်သလောက်
  11. ကြက်ဥ - တစ်လုံး

ပြင်ဆင်ချက်ပြုပ်ပုံ
  • ခေါက်ဆွဲကို ဇလုံတစ်လုံးထဲထည့်ကာ နှမ်းဆီမွှေး ဆား ပဲငံပြာရည် အကြည် ထမင်းစားဇွန်း တစ်ဇွန်းနဲ့ နယ်ပေးထားပါ
  • ပန်းဂေါ်ဖီကို ရေဆေးကာ ခပ်ကြမ်းကြမ်း လှီးထားပါ
  • ဘရော့ကိုလီကို ရေဆေးပြီး အနေတော်လေးတွေ လှီးထားပါ
  • ဂေါ်ဖီကို ရေဆေးပြီး ခပ်ကြမ်းကြမ်း လှီးထားပါ
  • တရုတ်နံနံကို ရေဆေးပြီး အနေတော် လှီးထားပါ
  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • ပါ၀င်ပစ္စည်းများကို အဆင်သင့် ပြင်ထားပါ
  • အောက်ခြေမကပ်သော ဒယ်အိုးကို အပူပေးပါ အိုးပူလာပါက ဆီထည့်ပေးပါ
  • ဆီပူလာတာနဲ့ ကြက်သွန်ဖြူကို အရင်ထည့်ကြော်ပါ
  • ကြက်သွန်ဖြူ အနံ့လေး မွှေးလာတာနဲ့ ပန်းဂေါ်ဖီ ဂေါ်ဖီနှင့် ဘရော့ကိုလီတို့ကို ထည့်ကြော်ပေးပါ
  • ပြီးတာနဲ့ ပဲငံပြာရည်အကြည်ကို ထည့်ကြော်ပေးပါ
  • အသီးအရွက်များ အရမ်းနူးမသွားစေရန် ၂မိနစ်လောက် ကြော်ပြီးတာနဲ့ အရသာ နယ်ထားသော ခေါက်ဆွဲကို ထည့်ကြော်ပါ
  • အသီးအရွက်များနှင့် သမသွားအောင် မွှေပေးပြီး တစ်မိနစ်လောက် မွှေပြီးတာနဲ့ အရသာ သမအောင် မွှေပေးပြီး အရသာမြည်းပေးကာ လိုသလို ပြင်ပေးပါ
  • ပြီးတာနဲ့ ခေါက်ဆွဲကြော်ကို ဘေးဖက်မှာ ခနတွန်းထားပြီး ကြက်ဥကို ဖောက်ထည့်ပြီး မွှေပေးပါ
  • ကြက်ဥ ကျက်တာနဲ့ ခေါက်ဆွဲကြော်ကို ရောမွှေပေးကာ အားလုံးသမသွားတာနဲ့ တရုတ်နံနံကို ထည့်မွှေပေးပြီးပါက ခေါက်ဆွဲကြော် မွှေးမွှေးလေးကို သုံးဆောင်နိူင်ပါပြီ။

သတ်သတ်လွတ် ထမင်းပေါင်း



ဒီနေ့တော့ ဈေးမသွားတာလဲ ကြာပြီဖြစ်နေတော့ ရှိတာတွေ ဆွဲထုတ်ပြီး ထမင်းပေါင်းလေး လုပ်ဖြစ်ပါတယ် နောက်တစ်ခုက မာမာက အသားတွေ သိပ်မစားတော့ သတ်သတ်လွတ်လေးတွေ စားတာများပါတယ်။

ဒါကြောင့်မို့လို့ သတ်သတ်လွတ်ပေမဲ့ စားလို့ကောင်းတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
  1. ပဲလိပ်ချောင်း - တစ်ပေခန့် နှစ်ချောင်း
  2. ကြက်သွန်နီ - အလုံးသေး ငါးဥခန့်
  3. ဘိုစားပဲ  - အတောင့်သုံးဆယ်
  4. မှိုခြောက် - ဆယ့်ငါးခုခန့်
  5. ကြက်သွန်ဖြူ - အမွှာကြီးကြီး သုံးမွှာ
  6. ပန်းခြောက် - ဆယ့်ငါးခုခန့်
  7. တရုတ်နံနံ - အခက်ကြီးကြီး နှစ်ခက်
  8. ပြောင်းကော်မှုန့်. - ထမင်းစားဇွန်း နှစ်ဇွန်းမောက်မောက်
  9. သကြား - ထမင်းစားဇွန်း တစ်ဇွန်း 
  10. ဆား - လက်ဖက်ရည်ဇွန်း တစ်ဇွန်း
  11. ပဲငံပြာရည်အနောက်ရည် - ထမင်းစားဇွန်း တစ်ဇွန်း
  12. ရေ - 2 cups
  13. ဆီ - ထမင်းစားဇွန်း သုံးဇွန်း 
  14. ငရုတ်ကောင်းမှုန့် - လက်ဖက်ရည်ဇွန်း တစ်ဝက်
  15. ချက်ပြီးသား ထမင်း 

ပြင်ဆင်ပုံ

  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • ကြက်သွန်နီကို အခွံခွာပြီး ရေဆေးထားပါ
  • ပဲလိပ်ချောင်းကို ရေမြုပ်အောင်ထည့်ပြီး နှစ်နာရီလောက် စိမ်ပေးကာ ရေဆေးပြီး ရေစစ်ထားပါ
  • မှိုခြောက်ကို ရေမြုပ်အောင်ထည့်ကာ နှစ်နာရီလောက် စိမ်ပေးကာ ရေဆေးပြီး ရေစစ်ထားပါ
  • ပန်းခြောက်ကို ရေမြုပ်အောင်ထည့်ကာ နာရီဝက်လောက် စိမ်ပေးပြီး ရေစစ်ထားပါ
  • ဘိုစားပဲကို ရေဆေးပြီး အနေတော်လေးတွေ လှီးထားပါ
  • တရုတ်နံနံကို ရေဆေးပြီး ခပ်ကြမ်းကြမ်း လှီးထားပါ
  • အသီးအရွက် မကြော်ခင် ကော်ရည်ကို ဖျော်ထားပေးပါ
  • ပြောင်းကော်မှုန့် သကြား ဆားတို့ကို ရေ တရုတ်ဟင်းရေသောက်ပန်းကန်အလတ် တစ်လုံးခွဲစာလောက်နဲ့ ဖျော်ထားပေးပါ
အသီးအရွက် ကြော်ရန်ပြင်ဆင်ပုံ
  • ပါဝင်ပစ္စည်း အားလုံးကို အဆင်သင့် ပြင်ထားပါ
  • ဇောက်နက်သော အိုးတစ်လုံးကို အပူပေးပြီး ဆီထည့်ပေးပါ
  • ဆီပူလာပါက ဓါးပြားရိုက်ထားသော ကြက်သွန်ဖြူကို မွှေးလာတဲ့အထိ ကြော်ပေးပါ
  • ကြက်သွန်ဖြူ အနံ့လေး မွှေးလာတာနဲ့ ဖျော်ထားသော ကော်ရည်ကို ထည့်ပေးပါ 
  • ကော်ရည် ပွက်ပွက်ဆူလာတာနဲ့  ငရုတ်ကောင်းမှုန့်နှင့် ပဲသီး မှိုခြောက် ပန်းခြောက် ပဲလိပ်တို့ကို ထည့်မွှေပေးပါ
  • ကော်ရည် ဆယ်မိနစ်လောက် ဆူပြီးတာနဲ့ ကော်ရည်ပျစ်လာပါက ပဲငံပြာရည်ကို ထည့်မွှေပေးပါ
  •  အရသာကို မြည်းပေးပြီး မိမိစိတ်ကြိုက် အရသာ ရလာအောင် ပြင်ပေးပါ
  • ပြီးတာနဲ့  ငရုတ်ကောင်းမှုန့်နှင့် တရုတ်နံနံကို ထည့်မွှေပြီးတာနဲ့ မီးပိတ်ပေးပြီး ပန်းကန်ထဲ ပြောင်းထည့်ပေးပါ
  • ပန်းကန်ပြား တစ်ချပ်ထဲမှာ ထမင်းကို ထည့်ပေးကာ ကော်ရည်ကို ဆမ်းပေးပါ
  • ပဲလိပ် မှိုခြောက်ပန်းခြောက် ကော်ရည်ပူပူလေးကို ထမင်းပူပူနဲ့ တွဲဖက်ပြီး စားသုံးရန် ပြင်ပေးနိုင်ပါပြီ။

Sunday 26 September 2021

ကြက်သားကင်


 







ဒီနေ့တော့ ကြက်ရင်ပုံသားကို အရသာနှပ်ကာ ကြက်သားလေး ကင်ဖြစ်ပါတယ် အရသာကမွှေးပြီး စားလို့ကောင်းတဲ့အတွက် ကြက်ကင်လေး ကင်စားကြည့်ရအောင် မာမာကင်ထားတဲ့ နည်းလေးကို မျှဝေပေးလိုက်ပါတယ်ရှင်။


ပါ၀င်ပစ္စည်းများ
  1. ကြက်ရင်ပုံသား  - 350 g
  2. ဆား - လက်ဖက်ရည်ဇွန်း တစ်ဝက်
  3. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  4. ချင်းမှုန့် - လက်ဖက်ရည်ဇွန်း တစ်ဝက်
  5. ကြက်သွန်ဖြူမှုန့် - လက်ဖက်ရည်ဇွန်း တစ်ဇွန်း
  6. အရသာမှုန့် - လက်ဖက်ရည်ဇွန်း တစ်ဝက်သာသာ
  7. နှမ်းဆီမွှေး - လက်ဖက်ရည်ဇွန်း တစ်ဇွန်း
  8. ထောပါတ်ဆီ - ထမင်းစားဇွန်း လေးဇွန်း
  9. အကင်အိုး သို့မဟုတ် အောက်ခြေထူသော - ဒယ်အိုး
ပြင်ဆင်ပုံ
  • ကြက်ရင်ပုံသားကို ရေဆေးပြီး ရေစစ်ထားပါ
  • ရေစစ်သွားတာနဲ့ ကြက်သားကို ဆား နှမ်းဆီမွှေး နနွင်းမှုန့် အရသာမှုန့် ကြက်သွန်ဖြူမှုန့် နှင့် ချင်းမှုန့်တို့ထည့်ကာ အရသာဝင်အောင် နယ်ပေးပါ
  •  အရသာ နယ်ပြီးတာနဲ့ ရေခဲသေတ္တာ မခဲတဲ့ အကနံထဲမှာ အနည်းဆုံး နှစ်နာရီလောက် နှပ်ထားပေးပါ
  • မကင်ခင် ကြက်သားတုံးကို အတွင်းသားအထိ ကျက်စေရန် ပုံပါအတိုင်း ခပ်စောင်းစောင်းလေးတွေ မွှန်းပေးပါ
  • မွှန်းတာဖြစ်တဲ့အတွက် အောက်ချေအထိ မပြတ်အောင် သတိထားပြီး မွှန်းပေးပါ
  • အကင်အိုးနှင့် ကင်ပါက အကင်အိုးကို အပူပေးပြီး ထောပါတ်ဆီ အနည်းငယ် သုတ်ပေးပါ
  • အကင်အိုး မရှိပါက အောက်ခြေထူပြီး မကပ်သော အိုးတစ်လုံးကို အသုံးပြုပြီး ကင်ပေးပါ
  • မာမာကတော့ ဆေးရတာလွယ်ကူတဲ့ အောက်ခြေထူသော ဒယ်အိုးကိုသုံးပြီး ကင်ထားပါတယ်
  • ဒယ်အိုးကို low heat နှင့်  အပူပေးကာ ပူလာတာနဲ့ ထောပါတ်ဆီ ထည့်ပေးပါ
  • ထောပါတ် ပူလာတာနဲ့ အရသာနယ်ပြီး နှပ်ထားသော ကြက်သားကို အကင်အိုးထဲထည့်ပြီး ကင်ပေးပါ
  • ကင်နေစဉ် အကျက်ညီစေရန် အိုးအဖုံးကို ဖုံးထားပေးပါ
  • ကြက်သားကင် တစ်ဖက်ကို ၃မိနစ်လောက် အပူပေးပြီး ကြက်သား အပေါ်ယံကို အိုးထဲမှ ထောပါတ်ဆီအနည်းငယ် သုတ်ပေးကာ တစ်ဖက်ကို လှည့်ပေးပြီး ကင်ပေးပါ
  • နောက်တစ်ဖက်ကိုလဲ ၃မိနစ်လောက် ကင်ပေးပါ
  • အထက်ပါ နည်းအတိုင်း တစ်ဖက်ကိုလှန်ပေးလိုက် ကင်ပေးလိုက်ကို လေးခါလောက် လုပ်ပေးပါ
  • ပြီးတာနဲ့ ပန်းကန်ထဲ ပြောင်းထည့်ပေးပြီးပါက ထောပါတ်နံ့သင်းနေသော ကြက်သားကင် မွှေးမွှေးလေး ရပါပြီ
  • ထမင်းပူပူလေးနဲ့ဘဲ စားစား အသီးအရွက်သုပ်ထဲဘဲ ထည့်စားစား အရမ်းကို အရသာ ကောင်းမွန်လွန်းတဲ့ ကြက်သားကင်လေး ကို ပြင်ဆင်ကာ စားသုံးနိူင်ပါပြီ။

Friday 24 September 2021

ကြက်သားပြုပ်ကြော်

 


ဒီနေ့တော့ ကြက်သားပြုပ်ကြော် မွှေးမွှေးလေး ချက်ဖြစ်ပါတယ် တစ်ချို့ကလဲ ကြက်သားပြုပ်ကြော် ချက်တဲ့အခါ လွယ်လွယ်လေးလို့ ထင်မိမှာပါဘဲ။

ဟုတ်ပါတယ် ချက်နေကျ ချက်တတ်နေတဲ့ သူတွေအတွက်တော့ အရမ်းကိုဘဲ လွယ်ပါတယ် ချက်နေမကျရင်တော့ အချိန်အဆလေးတွေအတွက် အနည်းငယ် ခက်တတ်ပါတယ်။

ဒါကြောင့်မို့လို့ မာမာပြင်ဆင်ပြီး ချက်ထားတဲ့ စားလို့လဲကောင်းစေ ထမင်းလဲမြိန်စေဆိုတဲ့ ကြက်သားပြုပ်ကြော် ကြော်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ 
  1. ကြက်ရင်ပုံသား - သုံးဆယ်သား
  2. ဆား - လက်ဖက်ရည်ဇွန်း သုံးပုံတစ်ပုံ
  3. ချင်း - ခပ်ပါးပါး လေးပြား
  4. အရသာမှုန့် - လက်ဖက်ရည်ဇွန်း တစ်၀က်
  5. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  6. ဆီ - ထမင်းစားဇွန်း ဆယ်ဇွန်း (များများထည့်ရင်လဲ ရပါတယ်)
ပြင်ဆင်ပုံ
  • ကြက်သားကို ရေဆေးပြီး ရေစစ်ကာ အနေတော် အတုံးလေးတွေ တုံးပေးပါ
  • ချင်းကိုအခွံခွာပြီး ရေဆေးကာ ခပ်ထားပါးပါးလေးတွေ လှီးပေးထားပါ
  • ဇောက်အနည်းငယ်နက်သော အိုးထဲမှာ ကြက်သား ဆား နနွင်း ချင်း အရသာမှုန့်တို့ကို အရသာဝင်အောင် နယ်ပေးပါ  
  • ပြီးတာနဲ့ ရေအနည်းငယ်ထည့်ကာ ပြုပ်ပေးပါ
  • လုံးရည်လေး ခမ်းကာနီးတော့မှ ရေမြုပ်အောင် ပထမတရည် ထပ်ထည့်ပေးပြီး ပြုပ်ပေးပါ
  • ပြုပ်ထားသော ပထမတစ်ရည် ခမ်းကာနီးမှာ ကြက်သားနူးမနူး စမ်းကြည့်ပေးပါ
  • ကြက်သားမနူးသေးပါက ရေမြုပ်အောင် ထပ်ထည့်ပြီး တည်ပေးပါ
  • ရေခမ်းကာနီးပါက မီးအပူရှိန်ကို အနည်းငယ် လျှော့လိုက်ပြီး ရေခမ်းပြီး ကြက်သားကို အိုးနဲနဲကပ်အောင် ထားပေးပါ
  • အိုးအောက်ခြေမှာ ကပ်လာပြီ ဆိုတော့မှ ရေအနည်းငယ်နှင့် ဆီတို့ကိုထည့်ပြီး ဆီကျွတ်ကျွတ် မြည်လာအောင် တည်ပေးပါ 
  • မာမာကတော့ ထမင်းပူပူလေးနဲ့ နယ်စားရအောင် ဆီကိုခပ်များများလေး ထည့်ပေးပါတယ်
  • ပြီးတာနဲ့ အထက်အောက် သမအောင် မွှေပေးပြီး မီးပိတ်ပေးပါ
  • မီးပိတ်ပြီးတာနဲ့ လက်ကျန်မီးအပူရှိန်နှင့် ထားပေးပြီး ဆီနံ့လေး မွှေးလာလျှင် ကြက်သားပြုပ်ကြော် မွှေးမွှေးလေး ရပါပြီ။

Wednesday 22 September 2021

ပဲကြော် ကြွတ်ကြွတ်လေး

 











မနေ့က မုန့်တီချက်နည်းလေး တင်ပြီးသွားတော့ ဒီနေ့တော့ ပဲကြော်ကြော်နည်းလေး တင်ပေးလိုက်ပါတယ် ဒီအကြော် ကြော်နည်းလေးက မကြာမကြာလဲ တင်ပေးဖြစ်ပါတယ်။

နောက်တစ်ခုက ကြော်တဲ့အခါမှာ မာမာပြောတဲ့ အိုးအနေအထားကိုတော့ သုံးစေချင်ပါတယ် အိုးအနေအထား မတူတဲ့အခါမှာ မာမာကြော်သလို မရနိူင်သလို ဆီကိုလဲ ခပ်များများ သုံးစေချင်ပါတယ်။

ဆီသုံးတာ နည်းနေရင်လဲ ပဲကြော်ကောင်းကောင်း မရပါဘူး နောက်ပြီးတော့ ဘာဘဲလုပ်လုပ် စိတ်ရှည်ရှည်ထားပြီး လုပ်ရပါတယ် စိတ်မရှည်ရင်တော့ ဘာဘဲလုပ်လုပ် မအောင်မြင်တတ်ပါဘူး။

ဒီတစ်ခါတော့ ပဲအချိုးအစားနဲ့ အကြော်မှုန့် ထည့်တာချင်း တူပေမဲ့ ရေအချိုးအစားကို အနည်းငယ်လေး ပိုထည့်ပြီး ကြော်တဲ့အခါမှာ အကြော်အချပ်ရည် တစ်ချပ်တိုးလာတဲ့အတွက် မာမာကြော်တဲ့ နည်းတွေထဲက အခုနည်းအတိုင်းလေးလဲ ကြော်လို့ရကြောင်းကို မျှဝေပေးလိုက်ပါတယ်ရှင်။ 

ပါ၀င်ပစ္စည်းများ (အချပ်ကြီး ၁၁ချပ်)

  1. ကုလားပဲခြမ်း - ထမင်းပေါင်းအိုး ဆန်ချင်ဗူး နှစ်ဗူး
  2. တန်ပူရာမှုန့် - 150 g (မည်သည့်အကြော်မှုန့်မဆို သုံးနိူင်ပါတယ်)
  3. ရေ - ထမင်းပေါင်းအိုး ဆန်ချင်ဗူး လေးဗူး
  4. ဆီ - နှစ်လီတာ
  5. ဒယ်အိုး အကြီး - တစ်လုံး 28cmခန့် (မကပ်သော ဒယ်အိုးကို သုံးပေးပါ)
  6. ဒယ်အိုးအသေး - တစ်လုံး 17 cmခန့် (မကပ်သောဒယ်အိုးကို သုံးပေးပါ)
  7. ယောက်ချိုဇွန်းမှုတ် - တစ်ချောင်း

ပြင်ဆင်ပုံ

  • ပဲခြမ်းကို ရေမြုပ်အောင်ထည့်ပြီး ရေစိမ်ပေးကာ အပေါက်ပါသော ဇကာဖြင့်အုပ်ပြီး တစ်ညလောက် ရေစိမ်ထားပါ
  • မနက်ရောက်လျှင် ရေဝပြီး ပွနေသော ပဲများကို ရေလေးထပ်လောက် ဆေးပေးပြီး ရေစစ်ပေးပါ
  • တန်ပူရာမှုန့်ကို (အကြော်မှုန့်) ရေနှင့်ပျော်အောင်ဖျော်ပြီး ရေစစ်ထားသော ပဲခြမ်များနှင့်ရောမွှေပါ
  • အောက်ခြေ မကပ်သော ဒယ်အိုးနှစ်အိုးကို အကြော်ကြော်ဖို့ ပြင်ဆင်ပေးပါ
  • ဒယ်အိုးအသေးနှင့် ဒယ်အိုးအကြီးကို မီးဖိုနှစ်လုံး ပြိုင်တူမီးဖွင့်ကာ မီးလယ်အလတ်လောက်နှင့် အပူပေးထားပါ
  • အိုးများပူလာတာနဲ့ ဒယ်အိုးအသေးထဲကို အိုးတဝက်လောက် ဆီထည့်ပေးပါ
  • ဒယ်အိုးအကြီးထဲကိုတော့ ကျန်နေတဲ့ ဆီအကုန်လုံး ထည့်ပေးပါ
  • အိုးထဲမှ ဆီအငွ့ တက်လာတာနဲ့ ဒယ်အိုးအကြီး တင်ထားသော မီးဖိုမှမီးကို အနည်းငယ် ထပ်လျှော့ပေးထားပါ
  • ဒယ်အိုးအသေးထဲမှ ဆီပူလာတာ အနေတော် ဖြစ်ပါက တန်ပူရာမှုန့် အနှစ်စပ်ထားသော ပဲရည်ဖျော်ကို ဟင်းချိုခပ် ယောက်ချိုဇွန်းနှင့် အရင်ဆုံး အထက်အောက် သမအောင်မွှေပေးပါ
  • အထက်အောက် သမသွားတာနဲ့ ယောက်ချိုဇွန်း ဇွန်းတစ်ဇွန်းစာကို ပဲနှင့်အရည် မျှအောင်ခပ်ယူပြီး ဆီအိုး အ​ေသးထဲကို ထည့်ပေးပါ
  • ဆီအိုးထဲ ထည့်ရာမှာ ဇွန်းကိုစောင်းပြီး အိုးဘေးအနားဘက်မှစ​ပြီး အဝိုင်းပုံ သဏ္ဌန် လှည့်ပြီး အလယ်ကို ရောက်တဲ့အထိဖြန့်ပြီး ခပ်ဖြေးဖြေး ထည့်ပေးပါ
  • ပဲစေ့များ ပြန့်နေမှ အကျက်ညီစေမှာ ဖြစ်ပါတယ်
  • ပဲစေ့များ တစ်နေရာထဲ ပုံနေပါက အကျက်မညီဘဲ ဖြစ်သွားတတ်ပါတယ်
  • ပဲစေ့နှင့် မုန့်နှစ်ရည်များ ထည့်ပြီးပါက အထက်အောက် လှန်ပေးစရာ မလိုဘဲ ဒီအတိုင်သူ့းလေး ထားပေးပါ
  • အောက်ချေဘက် သူ့ဘာသာသူ ကြွတ်ပြီး မွတက်လာမှ အသာလေး ဆယ်ပြီး ဆီအိုးအကြီးထဲသို့ ပြောင်းထည့်ပေးပါ
  • ပဲကြော်ရဲ့ အောက်ချေလေးဘဲ ကြွတ်လာပြီး အပေါ်ယံဘက်မှ ပဲစေ့များ မကျက်ပေမဲ့ စိတ်မပူပါနှင့်
  • နောက်ထပ်ဆီအိုး အကြီးထဲကို ပြောင်းထည့်တဲ့အခါ အပေါ်ယံမှ ပဲစေ့များ တဖြည်းဖြည်း ကျက်လာပါလိမ့်မယ်
  • ဆီအိုးအကြီးထဲမှာ ကြော်ထားစဉ် ပဲကြော်တစ်ချပ်လုံး ရွှေဝါရောင် သန်းလာတဲ့အထိ ကြော်ပေးပါ
  • ရွှေဝါရောင် သန်းလာပါက ဆယ်ပေးပြီး ဆီစစ်ဇကာထဲထည့်ကာ  ဆီစစ်ပေးပါ
  • နောက်တစ်ချပ် ထပ်မကြော်ခင် အကြော်အိုး အ​ေသးထဲမှာ ဆီနည်းသွားပါက အိုးအ​ကြီးထဲမှဆီကို အပူခံဇွန်း ခပ်ကြီးကြီးနှင့် ခပ်ယူကာ အိုးအေသးထဲကို ခပ်ထည့်ပေးပါ
  • နောက်ထပ် ကျန်သောပဲနှင့် မုန့်နှစ်ရည်များကိုလဲ  အိုးအသေးထဲမှ အကြော်ကို အိုးအကြီးထဲ ပြောင်းပြီးတာနဲ့ ပထမ ကြော်သည့်အတိုင်း ထည့်ကြော်ပေးပါ
  • ဆီအိုးထဲကို ပဲရည်ခပ်ထည့်စဉ် ဆီအပူရှိန်က အရင်ကထက် ပိုပြီးပူနေတဲ့အတွက် အိုးအပြင်ကို ​​ဝေကျ တတ်တဲ့အတွက် ဖြေးဖြေးချင်း ထည့်ပေးပါ
  • အထက်ဖော်ပြပါ နည်းအတိုင်း ပထမ အချပ်အတိုင်း ပဲရည်ကုန်တဲ့အထိ ဆက်ကြော်ပေးပါက အကြော်၁၀ချပ်ရပါမယ် 
  • အားလုံးကြော်လို့ ပြီးသွားကာ  အကြော်များ ဆီစစ်သွားပါက မိမိနှစ်သက်သလို သုံးဆောင်နိုင်မည့် ပဲကြော်ကြွတ်ကြွတ်လေးများ ရပါပြီ။

Tuesday 21 September 2021

မုန့်တီ

 







မုန့်တီပူပူစပ်စပ်လေး ချက်သောက်ဖြစ်လို့ မာမာချက်တဲ့ နည်းလေးကိုဘဲ မျှဝေလိုက်ပါတယ် တိုင်းရင်းသား ရိုးရာအစာတွေ ချက်ရတာ နေရာဒေသ တစ်နေရာနဲ့ တနေရာ ချက်နည်းတွေ မတူကြတဲ့အတွက် တစ်ခါတရံ ချက်နည်းမှားတယ် ဘာညာ လာပြောရင်တော့ တော်တော်လေးတော့ သည်းခံရပါတယ်။

ဘယ်အစာကိုဘဲဖြစ်ဖြစ် အစားတစ်ခုမှာ ပါ၀င်တာတွေကို ရိုးရာအစာ အရသာကို မပျောက်ပျက်စေဘဲ ပါ၀င်ပစ္စည်းတွေကို အခြေခံကာ ကိုကိုယ်တိုင် ဆန်းသစ်ပြီး ချက်ကြည့်စေချင်သလို တစ်ယောက်နဲ့ တယောက်လဲ အကြိုက်တွေ မတူကြတာမို့လို့ ကိုယ်နှစ်သက်သလို ပြင်ဆင်ပြီး ချက်ပြုပ်တတ်အောင် ကျိုးစားကြည့်စေချင်ပါတယ်။

အခုလဲ မာမာ့အကြိုက် ပုံစံတစ်မျိုးနဲ့ ချက်ထားတဲ့ မုန့်တီချက်နည်းတူပေမဲ့ သုံးထားတဲ့ ငါးမတူတဲ့အတွက် ငါးရွှေနဲ့ချက်မှ မုန့်တီလို့တော့ ပြောကြအုံးမယ် ထင်ပါတယ်။

ငါးရွှေမရှိတဲ့ အရပ်ဒေသမှာ အနီးစပ်ဆုံးတူအောင် စားချင်စိတ်ကို အာသီသဖြေဖို့အတွက် ချက်ထားခြင်းသာ ဖြစ်ပါတယ်။

အရင်တစ်ခါ ဘာဆာငါးနဲ့ချက်ပြီး အခုတစ်ခါတော့ ငါးခူနဲ့ ချက်ထားပါတယ် ငါးခူက ဟင်းရည်အရသာကို ပိုပြီးချိုစေပြီး ဘာဆာငါးကတော့ အချိုပေါ့ပါတယ် ချက်နည်းတိုင်းမှာ ပါ၀င်ပစ္စည်းကတော့ အတူတူပါဘဲရှင်။

ပါ၀င်ပစ္စည်းများ
ငါးပြုပ်ရန်
  1. ငါးခူ - နှစ်ဆယ်သား
  2. ငါးငံပြာရည် - ထမင်းစားဇွန်း သုံးဇွန်း
  3. ဟင်းချိုမှုန့် - လက်ဖက်ရည်ဇွန်း တစ်ဇွန်း 
  4. ဆား ထမင်းစားဇွန်း တစ်ဇွန်း (ငါးဆေးရန်)
  5. နနွင်းမှုန့် - လက်ဖက်ရည်ဇွန်း တစ်ဇွန်း (ငါးဆေးရန်)
  6. မန်ကျည်းသီးမှည့် - ထမင်းစားဇွန်း တစ်ဇွန်း (ငါးဆေးရန်)
ငါးပြုပ်ပုံ
  1. ငါးခူကို အရင်ဆုံး မန်ကျည်းသီးမှည့် ဆားနှင့်နနွင်းမှုန့်ထည့်ပြီး အချွဲများကုန်သွားအောင် နယ်ပေးပါ
  2. ပြီးတာနဲ့ ရေတစ်ထပ်ဆေးပြီး ခေါင်းထဲမှ ပါးဟက်များ ဆူးတောင်များ အညှိလုံးများနှင့် ဗိုပ်ထဲမှ မလိုတာတွေကို ဖယ်ပေးပါ
  3. အားလုံးဖယ်ပြီးတာနဲ့ ရေနှင့် လေးငါးထပ်လောက် စင်အောင်ဆေးပေးပါ
  4. အိုးထဲမှာ ငါး ဟင်းချိုမှုန့်နှင့်  ငါးငံပြာရည်တို့ ထည့်ကာ ငါးကို ရေမြုပ်အောင် ထည့်ပေးပြီး ပြုပ်ပေးပါ  
  5. ငါးအသားများ နူးလာပါက မီးပိတ်ပြီး အအေးခံကာ အရိုးအသား သတ်သတ်စီ ထွင်ထားပါ 
  6. ငါးအရိုးများကို ငရုတ်ဆုံထဲမှာ ညက်အောင်ထောင်းပြီး ငါးပြုပ်အရည်နှင့် ရေ အနည်းငယ်ထည့်ကာ အရည်ငင်ပြီး အရည်ကို ယူထားပါ
  7. ငါးအသားများကို မကပ်သော ဒယ်အိုးထဲမှာထည့်ပြီး ခြောက်ပြီးမွလာတဲ့အထိ လှော်ပေးထားပါ

ဟင်းရည်ချက်ရန်
ပါဝင်ပစ္စည်းများ
  • ရေ - 11 cups
  • အရိုးငင်ထားသော ငါးရိုး အရည် - 2 cups
  • ကြက်သွန်ဖြူ - ဆယ်မွှာ 
  • ငရုတ်ကောင်းမှုန့် - လက်ဖက်ရည်ဇွန်း တစ်ဇွန်းမောက်မောက်
  • ပုဇွန်ငပိ - ထမင်းစားဇွန်းနှစ်ဇွန်း
  • ဆား - လက်ဖက်ရည်ဇွန်းတစ်ဇွန်း
  • ငါးငံပြာရည် - ထမင်းစားဇွန်းနှစ်ဇွန်း
  • ဟင်းချိုမှုန့် - ထမင်းစားဇွန်းတစ်ဝက်
  • ပဒဲကော - တစ်လက်မ 
ဟင်းရည်ချက်ရန် ပြင်ဆင်ပုံ
  1. ကြက်သွန်ဖြူကို အခွံခွာပြီး ရေဆေးကာ မညက်တစ်ညက် ထောင်းထားပါ
  2. ပဒဲကောကို ရေဆေးပြီး ညက်နေအောင် ထောင်းထားပါ
  3. ပုဇွန်ငပိကို ဇလုံတစ်လုံးထဲမှာ ရေအနည်းငယ်နှင့် ဖျော်ထားပါ
  4. ငရုတ်ကောင်းမှုန့်နှင့် ပါဝင်ပစ္စည်းများကို အဆင်သင့် ပြင်ထားပါ
  5. အိုးထဲမှာ လှော်ထားသော ငါးအသားများ ငါးငံပြာရည် အရသာမှုန့် ရေနှင့် ငါးပြုပ်အရိုးငင်ရည်ကို ထည့်ပြီး ပွက်ပွက်ဆူအောင် တည်ပေးပါ
  6. ဟင်းရည်အိုး ပွက်ပွက်ဆူလာတာနဲ့ ပုဇွန်ငပိ ဖျော်ထားသော အရည်ကို အနယ်များ မပါအောင် ထည့်ပေးပါ
  7. ဟင်းရည်အိုး ပွက်ပွက်ဆူလာတာနဲ့ အရသာကို မိမိစိတ်ကြိုက် ရလာအောင် ပြင်ပေးပါ
  8. ပြီးတာနဲ့ ထောင်းထားသော ပဒဲကော ငရုတ်ကောင်းမှုန့်နှင့် ကြပ်သွန်ဖြူတို့ကို ထည့်မွှေပေးပါ
  9. ကြက်သွန်ဖြူများ နူးလာချိန်မှာ အရသာကို ထပ်မြည်းပေးပါ
  10. ဟင်းရည်ပွက်ပွက် ဆူလာတဲ့အချိန်မှာ ရေအနည်းငယ် ခမ်းသွားတဲ့အတွက် ဟက်းရည်အရသာ လေးနေရင် ရေနွေးအနည်းငယ် ထပ်ရောပေးပါ
  11. အရသာ အနေတော်ဘဲဆိုရင်မီးပိတ်ပြီး လက်ကျန်မီးအပူရှိန်နဲ့ တင်ထားပေးပါ
မုန့်ပွဲပြင်ရန် ပါဝင်ပစ္စည်းများ
  1. မုန့်ဖတ် - 600 g (ready made အထုတ်ကို သုံပါတယ် )
  2. ပဲကြော် - မိမိနှစ်သက်သလောက်
  3. နံနံပင် - မိမိနှစ်သက်သလောက်
  4. ငရုတ်သီးစိမ်း - မိမိနှစ်သက်သလောက်
  5. ငါးဖယ်ကြော် - မိမိနှစ်သက်သလောက်
  6. ကြက်သွန်ဖြူ ဆီချက်ဖတ် - မိမိနှစ်သက်သလောက်
  7. မန်ကျည်းသီးမှည့် - ထမင်းစားဇွန်း သုံးဇွန်း
  8. ရေ - ထမင်းပေါင်းအိုး ဆန်ချင်ဗူး နှစ်ဗူး ( မန်ကျည်းသီးမှည့်ဖျော်ရန်)
မုန့်ဖတ်ပြုပ်ပုံ
  • အိုးထဲမှာ ရေထည့်ပြီး ပွက်ပွက်ဆူအောင် တည်ပေးပါ
  • ရေဆူလာတာနဲ့ မုန့်ဖတ်ကို ထည့်ပြီးပြုပ်ပေးပါ
  • ပြုပ်နေစဉ် မုန့်ဖတ်ကို ဆယ်ပြီးစမ်းကြည့်ပါ 
  • ခပ်ပျော့ပျော့ အနေအထား ရလာပြီဆိုရင် ဇကာထဲသွန်ချပြီး ရေများများနှင့်ဆေးကာ ရေစစ်ထားပါ
မုန့်ပွဲပြင်ရန်
  • မုန့်ဖတ် ပဲကြော် ငါးဖယ်ကြော် ကြက်သွန်ဖြူကြော်တို့ကို အဆင်သင့် ပြင်ထားပါ
  • မန်ကျည်းသီးမှည့်ကို ရေတစ်ထပ်ဆေးပြီး ရေနွေးပူပူနှင့် စိမ်ထားပါ
  • နံနံပင်ကို ရေဆေးပြီး မထူမပါးလေးတွေ လှီးထားပါ
  • ငရုတ်သီးစိမ်းကို ရေဆေးပြီး အညှာခြွေကာ လှော်ပေးပါ ပြီးတာနဲ့ ညက်နေအောင် ထောင်းပေးပါ
  • မုန့်တီဟင်းရည်ကို ပူနေအောင် ပြန်နွှေးထားပါ
မုန့်ပွဲတစ်ပွဲစာပြင်ပုံ
  • မုန့်ဖတ် - လက်တစ်ဆုတ်စာ
  • ပဲကြော် - တစ်ချပ်ငါး
  • ငံပြာရည် - လက်ဖက်ရည်ဇွန်းတစ်ဝက် (အငံအရသာ လိုမှထည့်ပါ)
  • မန်ကျည်းမှည့်ရေ - လက်ဖက်ရည်ဇွန်းတစ်ဇွန်းခွဲ
  • ငရုတ်သီးစိမ်းထောင်း - လက်ဖက်ရည်ဇွန်းတစ်ဇွန်း
  • ငါးဖယ် - တစ်ချပ်
  • ကြက်သွန်ဖြူဆီချက်အဖတ် - အနည်းငယ်
  • နံနံပင် - နှစ်သက်သလောက်တို့ကို ပန်းကန်ထဲမှာ ထည့်ပေးပြီး မုန့်တီဟင်းရည် ပူပူလေး ထည့်ပေးကာ သုံးဆောင်နိူင်ပါပြီ။
  • ငါးအသား လှော်ပြီးသားလေး ထည့်စားချင်ပါက ငါးကိုပိုပြီး ပြုပ်ပေးပါ

Saturday 18 September 2021

ရွှေကြည်ဆနွင်းမကင်း


 

ဒီနေ့တော့ အချိုပွဲလေး ပြင်ရအောင်လို့ ရွှေကြည်ဆနွင်းမကင်းလေး လုပ်ဖြစ်ပါတယ် မိုက်ခရိုဝေ့မီးဖိုထဲမှာထည့်ပြီး ပင်ပင်ပန်းပန်း လုပ်ရတာ မဟုတ်တဲ့အတွက် ရွှေကြည်ဆနွင်းမကင်းလေး လုပ်စားကြည့်ရအောင် မာမာပြင်ဆင်ပြီး နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ရွှေကြည်မှုန့် - ထမင်းပေါင်းအိုး ဆန်ချင်ဗူး သုံးဗူး
  2. သကြား - ထမင်းစားဇွန်း ငါးဇွန်း (အချိုကြိုက်လျှင် ပိုထည့်ပါ)
  3. ထောပတ် - 75 ml
  4. ဆီ - 80 ml
  5. အုန်းနို့ - 400 ml 
  6. ကြက်ဥ - သုံးလုံး
  7. ဘိန်းစေ့ - ထမင်းစားဇွန်း တစ်ဇွန်း
  8. ဆား - လက်ဖက်ရည်ဇွန်း သုံးပုံတစ်ပုံ
  9. ရေ - 200 ml
ပြင်ဆင်ပုံ
  • ရွှေကြည်မှုန့်များကို အိုးအသားထူသော ဒယ်အိုးထဲမှာထည့်ပြီး ရွှေဝါရောင် သန်းလာတဲ့အထိ လှော်ပေးကာ အအေးခံပေးပါ
  • ဇလုံတစ်လုံးထဲမှာ ကြက်ဥများကို အနှစ်နှင့်အကာ သမသွားအောင် ခေါက်ထားပါ
  • ထောပါတ်ကို အပူပေးပြီး ဖျော်ထားပါ
  • ပါဝင်သော ပစ္စည်းများကို ပြင်ထားပါ
  • ဇောက်နက်ပြီး အိုးအသားထူသော အိုးထဲမှာ လှော်ထားသော ရွှေကြည်မှုန့် ကြက်ဥ အုန်းနို့ သကြား ဆား ရေ ထောပါတ် ဆီ အားလုံးတို့ကို ထည့်ပြီး အကုန်နှံ့အောင် ရောမွှေပေးပါ
  • အားလုံးအဆင်သင့် ဖြစ်တာနဲ့ မီးဖိုပေါ်တင်ကာ တည်ပေးပါ
  • ရွှေကြည်များ အိုးမှာ မကပ်စေရန် အဆက်မပြတ် မွှေပေးပါ
  • ရွှေကြည်များ ပြစ်လာတာနဲ့ ရွှေကြည်ဖုတ်မည့် ဘန်းထဲကို ပြောင်းထည့်ပေးပါ
  • ကျိုထားသော ရွှေကြည်များ မုန့်ဖုတ်မည့် ဘန်းထဲကိုထည့် ပြီးတာနဲ့ သစ်သားယောင်းမဖြင့် ဖိသိပ်ပေးပါ
  • ပြီးတာနဲ့ ရွှေကြည်ပေါ်မှာ ဘိန်းစေ့များ ဖြူးပေးပါ
  • ဘိန်းစေ့ဖြူးပြီးတာနဲ့ မိုက်ခရိုဝေ့ထဲ ထည့်ပေးပြီး အဖုံးအုပ်ပေးပါ
  • ပြီးတာနဲ့ တစ်မိနစ်ထည့်လိုက် ပြန်ထုတ်လိုက် ငါးခါလောက် ထည့်ဖုတ်ပေးပါ
  • ငါးမိနစ် ထည့်ပေးပြီးတာနဲ့ ရွှေကြည်ဗန်းကို ထုတ်ပေးပြီး အအေးခံပေးထားပါ
  • ရွှေကြည်ဗန်း အေးတော့မှ ရွှေကြည်များကို မိမိနှစ်သက်သည့် ပုံစံလေးများ လှီးပေးကာ စားသုံးနိူင်ပါပြီ။

Friday 17 September 2021

ခေါက်ဆွဲကြော်


ဒီတစ်ခါတော့ တစ်ရုတ်မုန့်ညှင်းထုတ်လေး ဝယ်လာပြီး တစ်ခြားအသီး အရွက်လေးတွေနဲ့ရောကာ အရမ်းစားလို့ကောင်းလွန်းတဲ့ ခေါက်ဆွဲကြော်လေး ကြော်စားဖြစ်ပါတယ်။

ထမင်းကို တခြားဟင်းတွေနဲ့ မစားချင်တဲ့နေ့ဆို ခေါက်ဆွဲကြော် ပူပူလေးနဲ့ စားဖြစ်ပါတယ် ဒါကြောင့်မို့လို့ မာမာ့လိုဘဲ ကြော်စားချင်တဲ့သူတွေ ကြော်စားနိူင်အောင် မာမာကြော်တဲ့နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ကြက်ဥခေါက်ဆွဲအစို - လေးဆယ်သား
  2. တရုတ်မုန့်ညှင်း - လေးရွက်ခန့်
  3. ဂေါ်ဖီ - အနေတော် တစ်စိတ်
  4. ပဲတောင့်ရှည် - ငါးတောင့်
  5. မုံလာဥနီ - အနေတော် တစ်ဥ
  6. ကြက်သွန်ဖြူ - အမွှာကြီးကြီး သုံးမွှာ
  7. ပဲငံပြာရည် အပျစ် - ထမင်းစားဇွန်း တစ်ဇွန်း
  8. ပဲငံပြာရည် အကျဲ - ထမင်းစားဇွန်း တစ်ဇွန်း
  9. နှမ်းဆီမွှေး - လက်ဖက်ရည်ဇွန်း တစ်ဝက်
  10. သကြား - ထမင်းစားဇွန်း တစ်ဇွန်း
  11. ဆား - လက်ဖက်ရည်ဇွန်း တစ်ဇွန်း
  12. ဆီ - ထမင်းစားဇွန်း ရှစ်ဇွန်းခန့်
  13. ကြက်ပြုပ်ရည် - ထမင်းစားဇွန်း ရှစ်ဇွန်း
  14. တရုတ်နံနံ - မိမိနှစ်သက်သလောက်
  15. ကြက်ဥ - တစ်လုံး

ပြင်ဆင်ချက်ပြုပ်ပုံ
  • ခေါက်ဆွဲကို ဇလုံတစ်လုံးထဲထည့်ကာ နှမ်းဆီမွှေး ဆား ပဲငံပြာရည် အပျစ်တို့နဲ့ နယ်ပေးထားပါ
  • တရုတ်မုန့်ညှင်းကို ရေဆေးကာ ခပ်ကြမ်းကြမ်း လှီးထားပါ
  • ပဲတောင့်ရှည်ကို ရေဆေးပြီး အနေတော်လေးတွေ လှီးထားပါ
  • မုံလာဥနီကို အခွံခွာပြီး ရေဆေးပြီး မိမိနှစ်သက်သလို လှီးထားပါ
  • ဂေါ်ဖီကို ရေဆေးကာ ခပ်ထူထူလေးတွေ လှီးထားပါ
  • တရုတ်နံနံကို ရေဆေးပြီး အနေတော် လှီးထားပါ
  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • ပါ၀င်ပစ္စည်းများကို အဆင်သင့် ပြင်ထားပါ
  • အောက်ခြေမကပ်သော ဒယ်အိုးကို အပူပေးပါ အိုးပူလာပါက ဆီထည့်ပေးပါ
  • ဆီပူလာတာနဲ့ သကြားကို အရင်ထည့်ကြော်ပါ
  • သကြားပျော်လာပြီး အညိုရောင် ပြောင်းလာတာနဲ့ကြက်သွန်ဖြူကို အရင်ထည့်ကြော်ပါ
  • ကြက်သွန်ဖြူ မွှေးလာတာနဲ့ ပဲသီး ဂေါ်ဖီ တရုတ်မုန့်ညှင်းနှင့် မုံလာဥနီတို့ကို ထည့်ကြော်ပေးပါ
  • ပြီးတာနဲ့ ပဲငံပြာရည်အကျဲနှင့် ကြက်ပြုပ်ရည်တို့ကို ထည့်ကြော်ပေးပါ
  • အသီးအရွက်များ အရမ်းနူးမသွားစေရန် ၂မိနစ်လောက် ကြော်ပြီးတာနဲ့ အရသာနယ်ထားသော ခေါက်ဆွဲကို ထည့်ကြော်ပါ
  • အသီးအရွက်များနှင့် သမသွားအောင် မွှေပေးပြီး တစ်မိနစ်လောက် မွှေပြီးတာနဲ့ ကျန်နေသော ကြက်ပြုပ်ရည်ကို ထည့်ကြော်ကာ အရသာမြည်းပေးကာ လိုသလို ပြင်ပေးပါ
  • ပြီးတာနဲ့ ခေါက်ဆွဲကြော်ကို ဘေးဖက်မှာ ခနတွန်းထားပြီး ကြက်ဥကို ဖောက်ထည့်ပြီး မွှေပေးပါ
  • ကြက်ဥ ကျက်တာနဲ့ ခေါက်ဆွဲကြော်ကို ရောမွှေပေးကာ အားလုံးသမသွားတာနဲ့ တရုတ်နံနံကိုထည့်မွှေပေးပြီးပါက ခေါက်ဆွဲကြော်မွှေးမွှေးလေးကို သုံးဆောင်နိူင်ပါပြီ။

Thursday 16 September 2021

ဆီထမင်း

 




ဒီနေ့တော့ ဆီထမင်း စားချင်တာနဲ့ မနက်စောစော ဆီထမင်း ထိုးဖြစ်ပါတယ် ဆီထမင်း ထိုးရတာကတော့ အရမ်းကိုဘဲ လွယ်ပါတယ် ဆီထမင်းထိုးတဲ့ နည်းတွေကလဲ အမျိုးမျိုး ရှိပါတယ်။

ဒါပေမဲ့ တစ်ခါတစ်လေမှာ မိမိတို့ အသုံးပြုတဲ့ ကောက်ညှင်းဆန်အပေါ် မူတည်ပြီး ရေအနည်းအများကိုတော့ ချိန်ရတာတွေ ရှိတတ်ပါတယ်။

သက်ရင့်ကောက်ညှင်းဆန်ဆိုရင် ရေနည်းနည်း ပိုထဲ့ရပါတယ် သက်နုကောက်ညှင်းဆန် ဆိုရင်တော့ ရေကိုပုံမှန်ဘဲ ထဲ့ပေးရပါတယ် သက်ရင့်ဟုတ် မဟုတ်ကိုတော့ ကောက်ညှင်းချက်နေရင်း ဆန်သားကျက်ချိန်မှာ ကြည့်ပေးရပါတယ်။

ချက်နေကျအတိုင်း ရေကိုထဲ့ပြီး ချက်ပေမဲ့ သက်ရင့်ကောက်ညှင်းဆိုရင် အကျက်နည်းနည်း လိုနေတတ်ပါတယ် အဲဒီအခါမျိုး ဆိုရင်တော့ ရေကိုချင့်ချိန်ပြီး ထပ်ထဲ့ပေးပြီး ကျက်တဲ့အထိ ဆက်ချက်ပေးရပါတယ်။

ဆီထမင်းချိုး လိုချင်ရင်တော့ စိတ်ရှည်ရှည်နဲ့ တည်ပေးပြီး မီးအရမ်း မများဖို့ကိုလဲ သတိထားစေချင်ပါတယ် နောက်တစ်ခုက ဆီထမင်းချိုး လိုချင်တဲ့အတွက် အောက်ချေမကပ်တဲ့ အိုးကောင်းကောင်းကို သုံးစေချင်ပါတယ် အိုးမကောင်းရင်တော့ ဆီထမင်းချိုး ကောင်းကောင်းနဲ့ လှလှလေး မရနိူင်ဘူး ဆိုတာလေးလဲ ပြောချင်ပါသေးတယ်။

ဒါကြောင့်မို့လို့ ဒီနေ့ မာမာပြင်ဆင်ပြီး ချက်ထားတဲ့ ဆီထမင်းချိုးရအောင် ချက်ထားတဲ့ နည်းလေးနဲ့ အသုံးပြုတဲ့ ကောက်ညှင်းဆန် တံဆိတ်ပါတဲ့ အထုတ်ကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ကောက်ညှင်းဆန် - ထမင်းပေါင်းအိုး ဆန်ချင်ဗူး နှစ်ဗူး
  2. အရသာမှုန့် - လက်ဖက်ရည်ဇွန်း တစ်ဝက်
  3. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  4. ရေ - ထမင်းပေါင်းအိုး ဆန်ချင်ဗူး သုံးဗူး
  5. ဆား - လက်ဖက်ရည်ဇွန်း တစ်၀က်
  6. ကြက်သွန်နီ - ခပ်သေးသေး ငါးဥ
  7. ဆီ - ထမင်းစားဇွန်း ငါးဇွန်း
  8. ကြက်သွန်နီဆီချက်
  9. ပဲပြုပ်ဆီဆမ်း
  10. ငါးခြောက်
ပြင်ဆင်ပုံ
  • အရင်ဆုံး ကောက်ညှင်းဆန်ကို ရေဆေးပြီး ရေစစ်ထားပါ
  • ကြက်သွန်နီများကို အခွံခွာကာ ရေဆေးထားပါ
  • အောက်ချေမကပ်သော ဒယ်အိုးထဲမှာ ကောက်ညှင်းဆန် ရေ ဆား ကြက်သွန်နီ အရသာမှုန့် ဆီနှင့် နနွင်းမှုန့်တို့ကို ထဲ့ပေးပါ
  • အိုးအဖုံး ဖုံးပေးပြီး မီးဖိုပေါ် တင်ကာ အပူပေးပါ
  • အိုးထဲမှ ရေပွက်ပွက် ဆူလာတာနဲ့ မီးကိုအလယ် အလတ်လောက်ထိ လျှော့ပေးပါ
  • ကောက်ညှင်းဆန်သား ပွလာတာနဲ့ မီးကိုခပ်မျှင်းမျှင်းလေး ရသွားအောင် ထပ်လျှော့ပေးပါ
  • အောက်ချေမကပ်တဲ့ အိုးနှင့်ဆီထမင်း ထိုးတဲ့အတွက် ဆီထမင်းချိုး မရခင် မွှေပေးစရာ အထက်အောက် လှန်ပေးစရာ မလိုပါ
  • မီးခပ်မျှင်းမျှင်း အပူရှိန်နဲ့ ဆီထမင်းချိုး ရလာအောင် စိတ်ရှည်ရှည် တည်ပေးထားပါ
  • ဆီထမင်းချိုးသံ ကြားလာပြီး ကောက်ညှင်းဆန်သား ကျက်လာပါက အနေတော် ဗန်းတစ်ခုထဲကို အိုးကိုမပြီး မှောက်ချပေးပါ
  • ပြီးတာနဲ့ အပေါ်ယံဘက်ကိုပါ ဆီထမင်း ချိုးလိုချင်တဲ့အတွက် အိုးထဲကို မှောက်ပြီး ပြန်ထဲ့ပေးကာ မီးဖိုပေါ် ပြန်တင်ပေးပါ
  • အောက်ချေဘက်မှာ ချိုးကပ်ပါလာက ဆီပြန်ထွက်လာတဲ့ အသံကြားလာပါလိမ့်မယ်
  • ဆီထမင်းချိုး နှစ်ဖက်လုံး ရလာပါက မီးဖိုပေါ်မှ ဖယ်ပေးပါ
  • ဆီထမင်းချိုးနှင့် ငါးခြောက်ဆီဆမ်း ပဲပြုပ်ဆီဆမ်းတို့နဲ့ တွဲဖက်ပြီး စားသုံးရန် ပြင်ပေးနိုင်ပါပြီ

Wednesday 15 September 2021

ရွှေပဲပင်

 




ကိုဗစ်ကာလ အိမ်ထဲမှာ နေနေရတာ ပျင်းသလိုလို ခံစားလာရတဲ့အတွက် အပင်လေးတွေကို အရင်ကထက် ပိုပြီးတော့ စိုက်ဖြစ်ပါတယ်။။

ဒါကြောင့်မို့လို့ ဒီနေ့တော့ အိမ်မှာစိုက်ထားတဲ့ ရွှေပဲပင်လေးတွေကို ဘယ်လိုစိုက်ရတယ်ဆိုတဲ့ စိုက်နည်းနဲ့ စိုက်ထားတဲ့ အကြောင်းလေးတွေကို မျှဝေပေးလိုက်ပါတယ်ရှင်။

ပါဝင်ပစ္စည်းများ

  1. White peas - ထမင်းပေါင်းအိုး ဆန်ချင်ဗူး နှစ်ဗူး
  2. မြေကြီးခပ်ပွပွ - လိုသလောက် သုံးပေးပါ
  3. နွားချေး - အနည်းငယ် (မြေဆွေးလေးဆ နွားချေး တစ်ဆ ရောပေးပါ)
  4. ပန်းအိုး - လိုသလောက် သုံးပေးပါ (မိမိအသုံးပြုသည့် အိုးအရွယ်အစားအပေါ် မူတည်ပြီး)
ပြင်ဆင်စိုက်ပျိုးပုံ
  • ဇလုံတစ်လုံးထဲမှာ ပဲများကို ရေမြုပ်အောင် ရေခပ်များများထည့်ပြီး တစ်ညသိပ် စိမ်ထားပါ
  • နောက်နေ့မနက်မှာ စိမ်ထားသော ရေများသွန်ပြီး ဇကာထဲမှာ ထည့်ပေးပါ
  • ပြီးတာနဲ့ အဝတ်စသန့်သန့် တစ်စကို ရေစွတ်ပြီး ပဲများအပေါ်မှာ အုပ်ထားပေးပါ
  • ပဲအပေါ်မှာ အုပ်ထားသော အဝတ်စမှာ ရေခြောက်ပါက ရေထပ်ထပ်စွတ်ပြီးပဲအပေါ် ပြန်အုပ်ပေးကာ လေးရက်လောက် ထားပေးပါ
  • ပဲမှာ အညှောင့်လေးတွေ ထွက်လာပါက စိုက်ဖို့ပြင်ပေးပါ
  • ပန်းအိုးလေးတွေထဲမှာ မြေကြီးနှင့် နွားချေး စပ်ထားတာကို အိုးတစ်ဝက် ထည့်ပေးပါ 
  • ထိုမြေကြီး အပေါ်မှာ ပဲစေ့များကို ဖြန့်ပြီး ထည့်ပေးပါ
  • ပြီးတာနဲ့ ပဲစေ့များ အပေါ်မှာ မြေကြီးကို ခပ်ဖွဖွလေးတွေ လိုက်ဖြူးပေးပါ
  • ရေကို နေ့စဉ် ပုံမှန် ဖျန်းဖျန်းပေးပါ
  • ပဲအပင်ပေါက်ချိန်က တစ်နေရာနှင့် တစ်နေရာ ရာသီဥတု အပူအအေး မတူကြတဲ့အတွက် အပင်ပေါက်ချိန်တော့ တူချင်မှ တူကြပါလိမ့်မယ်
  • ရာသီဥတု ပူပါက အပင်ပေါက်ချိန် မြန်ပြီး ရာသီဥတု အေးပါက အပင်ပေါက်ချိန် နှေးကွေးတတ်ပါတယ်
  • မာမာတို့ဆီမှာ ရာသီဥတုက အရမ်းအေးတဲ့အတွက် အပင်ထွက်နူံး နှေးပါတယ်
  • ရာသီဥတု ပူချိန်မှာ စိုက်တဲ့အခါ သုံးပါတ်အတွင်းမှာ ပဲရွက်လေးတွေ စားလို့ပါတယ်
  • ရာသီဥတု အရမ်းအေးတဲ့ အချိန်မှာတော့ ၇ပါတ်လောက်နေမှ စားလို့ရပါတယ်
  • ပဲရွက်လေးတွေ ရလာတဲ့ အခါမှာ ပဲညွန့်ဟင်းချို ရှမ်းခေါက်ဆွဲ အသုပ် စတဲ့ စားဖွယ်ရာ မျိုးစုံကို ပြင်ဆင်ချက်ပြုပ်ပြီး စားသုံးရန် ပြင်ပေးနိူင်ပါပြီ။

Tuesday 14 September 2021

တို့ဟူး ချဉ်ငံစပ်

 






ဒီနေ့တော့ တို့ဟူးကျိုပြီး အမျိုးစုံ ကြိုးခုန်တဲ့ နေ့ပါဘဲ ချဉ်ငံစပ်လေးတစ်မယ်ရယ် တို့ဟူးသုပ်ရယ်နဲ့ တို့ဟူးလေးလဲကြော် လိုက်ပါသေးတယ်။ ဒါကြောင့်မို့လို့ သတ်သတ်လွတ် စားချင်တဲ့သူတွေ ချက်စားနိူင်အောင် မာမာချက်ထားတဲ့ တို့ဟူးဟင်း ချက်နည်းလေးကို မျှဝေပေးလိုက်ပါတယ်ရှင်။

တို့ဟူးကြိုနည်း
  1. ပဲအစိမ်းမှုန့် ထမင်းပေါင်းအိုး ဆန်ချင်ဗူး ၅ဗူးကို ရေအေး ထမင်းပေါင်းအိုး ဆန်ချင်ဗူး ၇ဗူးခွဲနဲ့စိမ်ပါမယ်
  2. ပဲမှုန့်များကို ရေစိမ်ရာတွင် ခဲနေသောပဲမှုန့်များကို လက်နှင့်ချေပေးပါ
  3. ပဲမှုန့်ရေစိမ်ထားချိန် ၆နာရီလောက် ကြာရပါမယ်။

တို့ဟူးကျိုရန်
  • မကပ်သော အိုးဇောက်နက်နက် တစ်လုံးကို မီးအပူပေးပါ
  • တို့ဟူးကျိုပြီး ထည့်ရန် စတီးဇလုံ ( သို့) ဗူးတစ်ခုကို ဆီသုတ်ထားပေးပါ
  • အိုးပူလာပြီဆိုတာနဲ့ မီးကို အနေတော် အလယ်အလတ်လောက် ရောက်အောင် လျှော့လိုက်ပါ
  • အိုးထဲကို အရည်ဖျော်ထားသော ပဲအရည်ကြည်များ အရင်ဆုံးထည့်ပြီး ကျိုပါမယ်ပဲ
  • အရည်ကြည် ထည့်ပြီးတာနဲ့ ဆား လက်ဖက်ရည်ဇွန်း တစ်ဇွန်း နနွင်းမှုန့် လက်ဖက်ရည်ဇွန်း သုံးပုံတစ်ပုံလောက် ထည့်ပြီး မွှေပေးပါ
  • မွှေနေစဉ် ပဲရည်ကြည် ပျစ်လာတာနဲ့ အနည်ထိုင်နေသော ပဲအနှစ်များကို ထည့်ပြီး မွှေပေးပါ
  • ပဲအနှစ်မွှေနေချိန်မှာ နဲနဲလေး ပြစ်လာတာနဲ့ဆီ ထမင်းစားဇွန်းနှစ်ဇွန်းလောက် ပဲအနှစ်ထဲထည့်ပြီး မွှေပေးပါ
  • ပဲအနှစ်မွှေချိန် သိမ်မကြာပါဘူး ၁၀မိနစ်လောက်ဆိုရင် ရပါတယ်
  • ပဲရည်ပြစ်လာပြီး တော်တော်လေး ခဲလာပြီဆိုတာနဲ့ ဆီသုတ်ထားတဲ့ ဗူး (သို့ ) ပန်းကန်ထဲ လောင်းထဲ့ပေးပါ
  • နာရီ၀က်လောက်ဆိုရင် ကောင်းကောင်း ခဲပါပြီ။
တို့ဟူးချက်ရန်
  1. တို့ဟူးကို နှစ်သက်သလိုပုံစံ နည်းနည်းထူထူလှီးကာ တစ်ပွဲစာ ပြင်ထားပါ
  2. ခရမ်းချဉ်သီး ခပ်ကြီးကြီး တစ်လုံးကို ပါးပါးလှီးပါ
  3. ငရုတ်သီးစိမ် လေးတောင့်လောက်ကို အညှာခြွေပြီး ရေဆေးထား ပါးပါးလှီးထားပါ
  4. ကြက်သွန်နီတစ်ခြမ်းကို ခပ်ပါးပါး လှီးထားပါ
  5. ကြက်သွန်ဖြူ အမွှာကြီးကြီး ၂မွှာကို ခပ်နုတ်နုတ် လှီးထားပါ
  6. ချင်းလက်တစ်ဆစ်ခန့်ကို အခွံခွာပြီး ရေဆေးကာ ညက်နေအောင် ထောင်းပေးပါ
  7. ကြက်သွန်မိတ်ကို လက်တဆစ်လောက် အရှည်အရွယ် လှီးထားပါ
  8. ငရုတ်သီး အရောင်တင်မှုန့် လက်ဖက်ရည်ဇွန်း တ၀က်ပြင်ထားပါ
  9. ပဲငံပြာရည် ထမင်းစားဇွန်း တ၀က်ပြင်ထားပါ
  10. အရသာမှုန့် လက်ဖက်ရည်ဇွန်း တ၀က်ပြင်ထားပါ
  11. ဆား လက်ဖက်ရည်ဇွန်း တစ်ဝက်ကို ပြင်ထားပါ
  12. ဆီ ထမင်းစားဇွန်း နှစ်ဇွန်း ပြင်ထားပါ
တို့ဟူးချက်နည်း
  • မကပ်သော ဒယ်အိုးတလုံးကို ဆီထည့်ပြီး အပူပေးပါ
  • ဆီပူလာပါက ချင်း ကြက်သွန်အဖြူ အနီနှင့်ငရုတ်သီးမှုန့်တို့ကို ဆီသတ်ပါ
  • ဆီသတ်နံ့ သင်းလာတာနဲ့ ခရမ်းချဉ်သီးကျေအောင် ရေအနေတော်လောက် ထည့်မွှေပါ
  • ခရမ်းချဉ်သီးများ ကျေလာတာနဲ့ဆား အရသာမှုန့် ပဲငံပြာရည်နှင့် ငရုတ်သီးစိမ်းတို့ကို တစ်မိနစ်လောက် ထည့်မွှေပေးပါ
  • ခရမ်းချဉ်သီးအနှစ် ပျစ်လာတာနဲ့ တို့ဟူးကိုထည့်ပြီး မမွှေဘဲ အိုးကိုလှုပ်ပေးပြီး အရသာ သမအောင်လုပ်ပေးပါ
  • တစ်မိနစ်လောက် တည်ပြီးတာနဲ့ အရသာမြည်းကာ မိမိနှစ်သက်တဲ့ အရသာ ရလာအောင် ပြင်ပေးပါ
  • ပြီးတာနဲ့ ငရုတ်သီးစိမ်းနှင့် ကြက်သွန်မိတ်ထဲ့ပြီး တစ်မိနစ်လောက် ပွက်ပွက်ဆူအောင် တည်ပေးပါ
  • ဟင်းရည် အနေတော်လေး ရလာတာနဲ့ ချဉ်ငံစပ် အရသာထူးတဲ့ တို့ဟူးဟင်းကို စားပွဲပြင်နိုင်ပါပြီ။