Thursday 7 April 2022

ကြက်သားပေါင်း

 


ဒီနေ့တော့ ကြက်ပေါင်လေးတွေ ဝယ်လာပြီး  ကြက်ပေါင်းလေး လုပ်ဖြစ်ပါတယ် ဒီကြက်ပေါင်းလေးက ထမင်းနဲ့လဲ လိုက်ဖက်သလို ကြာဆံဆီချက် ခေါက်ဆွဲဆီချက်လေးတွေ လုပ်စားရင်လဲ စားလို့ကောင်းတဲ့အတွက် မာမာပြင်ဆင်ပြီး ပေါင်းထားတဲ့ နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ကြက်သား - 400 g
  2. ဟင်းခတ်မှုန့် - လက်ဖက်ရည်ဇွန်း တစ်ဝက်
  3. ချင်း - လက်တစ်ဆစ်ခန့်
  4. ကြက်သွန်ဖြူ  - အမွှာကြီးကြီး သုံးမွှာ
  5. ဆား - လက်ဖက်ရည်ဇွန်း သုံးပုံတစ်ပုံ
  6. ပဲငံပြာရည်အပျစ် - ထမင်းစားဇွန်း တစ်ဇွန်း

ပြင်ဆင်ပုံ
  • ကြက်သားများကို ရေစင်အောင်ဆေးပြီး ပဲငံပြာရည် ဟင်းခတ်မှုန့် နှင့် ဆားတို့ထဲ့ကာ နယ်ထားပါ 
  • ချင်းကို အခွံခွာကာ ရေဆေးပြီး ခပ်ပါးပါးလေးတွေ လှီးပေးထားပါ
  • ကြက်သွန်ဖြူ ကို အခွံခွာပြီး ရေဆေးထားပါ
  • အပူခံနိုင်ပြီး ပေါင်းအိုးထဲမှာ ဝင်ဆန့်နိူင်မည့် ပန်းကန်လုံးထဲမှာ အရသာ နယ်ထားသော ကြက်သား ကြက်သွန်ဖြူ နှင့် ချင်းတို့ကို ထည့်ပေးပါ 
  • ပေါင်းအိုးထဲမှာ  ရေထည့်ပြီး သံဇကာအောက်ခံခုံ အခင်းကို ထည့်ပေးပါ
  • ထိုသံဇကာ အောက်ခံခုံပေါ်မှာ ကြက်သားပန်းကန်ကို တင်ပေးပါ
  • ပေါင်းမည့်အိုး အောက်ခြေမှရေများ ပွက်ပွက်ဆူလာစဉ် ကြက်သားပန်းကန်ထဲ မ၀င်စေရန် ကြက်သားပေါင်းမည့် ပန်ကန်လုံးအောက်မှ သံဇကာခုံလေး မြုပ်ရုံရေထည့်ပေးပါ
  • ပြီးလျှင် အိုးကို အဖုံးဖုံးပြီး ပေါင်းမည့်ခလုပ်ကိုနှိပ်ကာ မိနစ်နှစ်ဆယ်နှင့် အရင်ဆုံး ကြက်သားနူးအိလာတဲ့အထိ ပေါင်းပေးပါ
  • ကြက်သားပေါင်းချိန် မိနစ်နှစ်ဆယ်ပြည့်ပါက ပေါင်းအိုးထဲမှ လေကိုကုန်အောင် ထုတ်ပေးပြီးမှ အိုးအဖုံးကို ဖွင့်ပေးပါ
  • ကြက်သားပေါင်းနေစဉ် ပေါင်းဇကာ အောက်မှာ ထည့်ထားတဲ့ ရေမှာ ခမ်းတတ်တဲ့အတွက် သတိထားပြီး ကြည့်ပေးကာ နည်းနေပါက ထပ်ဖြည့်ပေးပါ
  • ပြီးတာနဲ့ အရိုးထဲမှ သွေးစများ ကျက်သွားစေရန် နောက်ထပ်ငါးမိနစ် ထပ်ပေါင်းပေးပါ
  • ပေါင်းချိန် ငါးမိနစ်ပြည့်တာနဲ့ ပထမနည်းအတိုင်း အိုးထဲမှ လေကုန်အောင် ထုတ်ပြီးမှ အိုးအဖုံးကို ဖွင့်ပေးပါ
  • ကြက်သားကို စပြီးပေါင်းကာစက ပန်းကန်လုံးထဲမှာ ရေမထည့်ထားသော်လဲ ကြက်သားပေါင်းစဉ် ထွက်လာတဲ့ ကြက်ပေါင်းရည်များ ပန်းကန်လုံးထဲမှာ ပြည့်လာပါလိမ့်မယ်
  • ကြက်သားပေါင်း ပန်းကန်ထဲမှ ကြက်ပေါင်းရည်များကို ဟင်းချိုရည် ပြင်ဆင်ရာမှာ ငရုတ်ကောင်းမှုန့်ခပ်ပြီး ပြင်ဆင်ပေးနိူင်ပါပြီ။

Wednesday 6 April 2022

မုံလာဥနီဖျော်ရည်

 


ဒီနေ့တော့ ကျန်းမာရေးနဲ့ ညီညွတ်ပြီး ဝိတ်ကျစေမဲ့ မုံလာဥနီ ဖျော်ရည်လေး လုပ်သောက်ဖြစ်ပါတယ် မာမာကတော့ ခပ်ပျစ်ပျစ်ကြီး သောက်ရမှာ သိပ်မကြိုက်တဲ့အတွက် ခပ်ကျဲကျဲလေး ဖျော်လိုက်ပါတယ် ဒါကြောင့်မို့လို့ မာမာပြင်ဆင်ပြီး ဖျော်ထားတဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ

  1. မုံလာဥနီ - အနေတော် နှစ်ဥ
  2. သကြား - ထမင်းစားဇွန်း တစ်ဇွန်း
  3. သံပုရာသီး - အနေတော် တစ်ခြမ်း
  4. ချင်းတက် - လက်မဝက်ခန့်
  5. ရေခဲတုန်း - မိမိနှစ်သက်သလောက်
  6. ရေ - ပုံမှန်ဖန်ခွက် တစ်လုံးခွဲစာ
ပြင်ဆင်ပြုလုပ်ပုံ
  • မုံလာဥနီကို အခွံခွာပြီး ရေဆေးကာ အနေတော်လေးတွေ ပိုင်းထားပါ
  • သံပုရာသီးကို ရေဆေးပြီး ထက်ဝက်ခြမ်းထားပါ
  • ချင်းကို အခွံခွာပြီး ရေဆေးထားပါ
  • အားလုံးအဆင်သင့် ဖြစ်တာနဲ့ ဘလင်ဒါထဲမှာ ရေခဲမှလွဲပြီး ပါဝင်ပစ္စည်း အားလုံးကိုထည့်ပြီး ညက်နေအောင် ကြိတ်ပေးပါ
  • ပြီးတာနဲ့ ဖန်ခွက်ထဲထည့်ကာ ရေခဲတုန်းလေးများ မိမိနှစ်သက်သလောက် ထည့်ပေးပြီး သောက်သုံးနိူင်ပါပြီ။

Friday 1 April 2022

ကျောက်ကျောဖျော်ရည်


 မာမာ ဒီနေ့တော့ ရာသီဥတုလေးက ပူသယောင်ယောင် ရှိတာနဲ့ ကျောက်ကျော ဖျော်ရည်လေး လုပ်သောက် ဖြစ်ပါတယ်။
ကျောက်ကျော ဖျော်ရည်လေးက ဆီးပူဆီးအောင့် ဝေဒနာတွေကို သက်သာစေတဲ့အတွက် မာမာပြင်ဆင်ပြီး ဖျော်သောက်ဖြစ်တဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. ကျောက်ကျော - 300 g
  2. သကြား - ထမင်းစားဇွန်း ငါးဇွန်းမောက်မောက်
  3. ဆား - လက်ဖက်ရည်ဇွန်း တစ်ဝက်
  4. ရေ - ထမင်းပေါင်းအိုး ဆန်ချင်ဗူး နှစ်ဗူးစာ ( သကြားကျိုရန်)
  5. သံပုရာသီး - လိုသလောက်
  6. ရေခဲ - လိုသလောက်
  7. ရေ - လိုသလောက် ( ကျောက်ကျောဖျော်ရန်)
သကြားရည်ကျိုရန်
  • အိုးတစ်လုံထဲမှာ သကြား ဆားနှင့် ရေတို့ထည့်ပြီး သကြားများ ပျော်သွားအောင် ကျိုပေးကာ အအေးခံထားပါ
ပြင်ဆင်ပြုလုပ်ပုံ
  • ကျောက်ကျောတုံးကို မိမိနှစ်သက်တဲ့ အနေအထားလေးတွေ ရလာအောင် လှီးပေးထားပါ
  • သံပုရာသီးကို ရေဆေးကာ အစိတ်လေးတွေ လှီးထားပါ
  • အားလုံးအဆင်သင့် ဖြစ်တာနဲ့  ပါဝင်ပစ္စည်းများကို အဆင်သင့် ပြင်ထားပါ
  • ဖန်ခွက်တစ်ခွက်ထဲမှာ ကျောက်ကျော သကြားရည် ရေနှင့် သံပုရာသီး တစ်စိတ်ကို ညှစ်ထည့်ကာ မွှေပေးပါ
  • ပြီးတာနဲ့ အချို အချဉ်အရသာကို မိမိစိတ်ကြိုက် အရသာ ရလာအောင် ပြင်ပေးကာ ရေခဲတုံးလေးတွေ ထည့်ပေးပြီး ကျောက်ကျော ဖျော်ရည်လေးကို သောက်သုံးနိူင်ပါပြီ။