Sunday 19 June 2022

အိမ်မက်အဟော

 


၂၀၁၂ ခုနှစ်ထဲက တင်ထားတဲ့ ပို့စ်လေးက စာတွေ ပြောင်းပြန်ဖြစ်နေပြီး ဖတ်လို့မရဘူးလို့ လာလာပြောကြတဲ့အတွက် အခုတစ်ဖန် ပြန်လည်တင်ပေးလိုက်ခြင်း ဖြစ်ပါတယ်။

အိမ်မက်နိမိတ်များကို မသိသေးသော သူများအတွက် အိပ်မက်နှင့် ပတ်သက်သော နိမိတ်များကို (အိမ်မက်အမျိုးမျိုးနှင့် အသားလှုပ်နိမိတ်)စာအုပ်မှ ကူးယူဖော်ပြ ပေးလိုက်ပါသည်။

အိပ်မက်ကို လူတိုင်းမက်သည် သို့သော မိမိတို့ အိပ်မက်၏ ကောင်းကျိုး ဆိုး ကျိုးကို ကြိုတင်၍ သတိမထားသည့်အတွက် အကျိုးခံစားသင့်သော အရာများ လွဲချော်သွားသည်လည်း ရှိပေသည်။

မကောင်းကျိုးကို မခံစားရမီ ကြိုတင်၍ နိမိတ်အနေအထားအားဖြင့် အိပ်မက်မြင်မက်သည်ဖြစ်လျက် မိမိတို့၏ အိပ်မက်ကို သတိမမူ၍ ဖြစ်စေ၊ အဓိပ္ပာယ်ကို နားမလည်၍ဖြစ်စေ အမှုမဲ့ အမှတ်မဲ့နေသည့်အတွက် ဒုက္ခမတွေ့သင့်ဘဲ တွေ့ရတတ်သည်။

ဓာတ်လေချောက်ချား၍ မြင်မက်ခြင်းသည်လည်း ရှိတတ်၏ ထိုအိပ်မက်ကို အမှန်မယူနိုင်ပါ အကယ်၍ ပုဗ္ဗနိမိတ်အဖြစ်ဖြင့် မြင်မက်သည်ဟု ယူဆမိလျှင် မိမိမြင်မက်သော အိပ်မက်၏ ကောင်းကျိုး ဆိုးပြစ်ကို ဝေဖန်တတ်သူကို ရှာ၍ ထိုသူအား ပြောပြရမည်။

သို့မဟုတ် အိပ်မက်ဆိုင်ရာ ကျမ်းစာအုပ် တို့ကို ဖတ်၍ ဝေဖန်ချက်ချပြီးလျှင် ကောင်းကျိုးပေးမည့်အိပ်မက်ဖြစ်က ပေးရန် အချိန်ကာလကို စောင့်ဆိုင်းလျက်အထူး သတိနှင့် နေရမည်။ 

ဆိုးကျိုးပေးမည့် အိပ်မက်ဖြစ်က ထိုပေးလတ္တံ့သော အကျိုးကို မပေးရန် အဟောသိကံ ဖြစ်သွားအောင် ရတနာသုံးပါး၊ ဆရာသမား၊ ဘိုးဘွားမိဘတို့ကို ကိုးကွယ်ဆည်းကပ်၍ ယတြာများ ဆင်ရပေမည်။

ဤသို့ ညွှန်ပြအပ်သည့်အတိုင်း အိပ်မက်မြင်မက်တိုင်း ဂရုပြုရန် သတိရှိကြစေလိုသည် ဤသို့ ကျမ်း အစောင်စောင်တို့ အဆိုမတူညီကြ

သို့သော်လည်း အိပ်မက်မကောင်း ထင်မြင်လျက် မက်သည့်အချိန်အခါ နေ့၌ မက်သော အိပ်မက်ဖြစ်စေ 'ယတြာကောင်းက မင်းလောင်းပျော်က' ဆိုသကဲ့သို့ ဆေးရှစ်ပါးဖြင့် ခေါင်းဆေးခြင်းကိုလည်းကောင်း၊ ဘုရားပုထိုးရှိခိုးခြင်း၊ နံ့သာပန်းတို့ဖြင့် သက်စေ့ပူဇော်ခြင်း၊ တြိရန်း, စတုန်ရန်း, နံ့သင့်သစ်သား တို့ကို အောက် ခံပြု၍ ခေါင်းဆေးခြင်းကိုလည်းကောင်း ဤသို့ စသော လောက ဓမ္မယတြာ ကို ပြုခြင်းကြောင့် လွန်သည်မရှိ ကင်းပျောက်ကုန်၏။

အိပ်မက်၊ အ တိတ်၊ နိမိတ်၊ တဘောင်၊ စနည်း၊ ဂြိုလ်စာ သက်ရောက်အစရှိသည်တို့ကို မယုံ ကြည့်တတ်လျှင် မိစ္ဆာဒိဠိဖြစ်တတ်၏။ 

ထို့ကြောင့် "ငါ့အား အ,ကုသိုလ် ကံအကျိုးပေးလို၍ မကောင်းသောအိပ်မက် စသည်တို့ မြင်လာကုန်သည်။ ကုသိုလ်ကံအကျိုးပေးလို၍ ကောင်းသော အိပ်မက် စသည်တို့ မြင်လာ ကုန်သည်။

ဤသို့ ပုဗ္ဗနိမိတ်အဖြစ်ဖြင့် ကံကို အရင်းထား၍ ယုံကြည်ရ မည်"ဟု ပညာရှိတို့ မိန့်တော်မူကြ၏။ ထို့ကြောင့် အိပ်မက်များအားကံကို အရင်းထား၍ ယုံကြည်ကြပါလေ။

 

(အိပ်မက်ခြင်း ခြောက်ပါး)

၁။ မြင်ဖူးသည်ကို စွဲ၍မက်မူ အကျိုးအပြစ်ရှိ၏။

၂။ကြားဖူးသည်ကို စွဲ၍မက်မူ အကျိုးအပြစ်ရှိ၏။

၃။ ခံစားဖူးသည်ကို စွဲ၍မက်မူ အကျိုးအပြစ်ရှိ၏။

၄။ ကြုံဖူးသည်ကို စွဲ၍မက်မူ အကျိုးအပြစ်ရှိ၏။

၅။ ဖြစ်ဖူးသည်ကို စွဲ၍မက်မူ အကျိုးအပြစ်ရှိ၏။

၆။ ဓာတ်ချောက်ချား၍မက်မူ အကျိုးအပြစ်မရှိ။


အိပ်မက်အပြား လေးပါး

၁။ နတ်တို့ပြောကြား၍မက်မူ အကျိုးအပြစ်ရှိ၏။

၂။ ရှေ့ခံစား လေ့လာဖူး၍မက်မူ အကျိုးအပြစ်မရှိ။

၃။ ဓာတ်ချောက်ချား၍မက်မူ အကျိုးအပြစ်မရှိ။

၄။ အကျိုးပေးလတ္တံ့သော်ကြောင့်မက်မူ ဧကန္တ အကျိုးရှိ၏။


အိပ်မက်သော အခါသုံးပါး

၁။ ညဉ့်ဦးယံမက်မူ တစ်နှစ်အတွင်း အကျိုးအပြစ်ပေးအံ့။

၂။ သန်းခေါင်မက်မူ နှစ်နှစ်ခွဲအတွင်း အကျိုးအပြစ်ပေးအံ့။

၃။ မိုးသောက်မက်မူ တစ်လအတွင်း အကျိုးအပြစ်ပေးအံ့။


အိပ်မက်သော အခါလေးပါး

၁။ နေ့အခါမက်မူ မှန်မမှန် နှစ်ပါး။

၂။ ညဉ့်ဦးမက်မူ မှန်မမှန် နှစ်ပါး။

၃။ မိုးသောက်မက်မူ အမှန်။

၄။ အရုဏ်တက်မက်မူ အမှန်။


အိပ်မက်သော အခါငါးပါး

၁။ ညဉ့်ဦးယံမက်မူ တစ်နှစ်အတွင်း အကျိုးအပြစ်ပေးအံ့။

၂။ သန်းခေါင်မက်မူ နှစ်နှစ်အတွင်း အကျိုးအပြစ်ပေးအံ့။

၃။ မိုးသောက်မက်မူ တစ်နှစ်အတွင်း အကျိုးပေးအံ့။

၄။ နံနက်နေတက် မက်မူ ခုနစ်လအတွင်း အကျိုးပေးအံ့။

၅။ မွန်းတည့်မက်မူ ခုနစ်လအတွင် အကျိုးအပြစ်ပေးအံ့။


အိပ်မက်သော အခါလေးပါး

 ၁။ ညဉ့်ဦးမက်မူ တစ်နှစ်အတွင်း အကျိုးအပြစ်ပေးအံ့။

၂။ သန်းခေါင်ယံမက်မူ တစ်လခွဲအတွင်း အကျိုးအပြစ်ပေးအံ့။

၃။ သန်းလွဲမက်မူ ခုနစ်ရက်အတွင်း အကျိုးအပြစ်ပေးအံ့။

၄။ မိုးသောက်မက်မူ တစ်လအတွင်း အကျိုးအပြစ်ပေးအံ့။


အိပ်မက်သော အခါငါးပါး

 ၁။ နေ့အခါမက်မူ အကျိုးအပြစ်မပေး။

၂။ ပထမယံမက်မူ အကျိုးအပြစ်မပေး။

၃။ သန်းခေါင်ယံမက်မူ အကျိုးအပြစ်ပေးအံ့။

၄။ မိုးသောက်ယံမက်မူ အကျိုးအပြစ်ပေးအံ့။

၅။ အရုဏ်တက်မက်မူ အကျိုးအပြစ်ပေးအံ့။


အိပ်မက်သော အခါငါးပါး

 ၁။ ပထမယံမက်မူ တစ်နှစ်အတွင်း အကျိုးပေးအံ့။

၂။ ဒုတိယံမက်မူ ခြောက်လအတွင်း အကျိုးအပြစ်ပေးအံ့။

၃။ တတိယံမက်မူ သုံးလအတွင်း အကျိုးအပြစ်ပေးအံ့။

၄။ စတုတ္ထယံမက်မူ ဆယ်ရက်အတွင်း အကျိုးအပြစ်ပေးအံ့။

၅။ အရုဏ်တက် မက်မူ ဆယ်ရက်အတွင်း အကျိုးအပြစ်ပေးအံ့။


အိပ်မက်သော နေ့များ

 ၁။ တနင်္ဂနွေနေ့မက်မူ မယားအတွက် မက်သည်။

၂။ တနင်္လာနေ့မက်မူ ဆွေမျိုးအတွက် မက်သည်။

၃။ အင်္ဂါနေ့မက်မူ မိဘ၊ ဆရာသမားအတွက် မက်သည်။

၄။ ဗုဒ္ဓဟူးနေ့မက်မူ သားသမီးအတွက် မက်သည်။

၅။ ကြာသပတေးနေ့မက်မူ အဆွေခင်ပွန်းအတွက် မက်သည်။

၆။ သောကြာနေ့မက်မူ ကျွန်၊ ကျွဲ၊ နွားအတွက် မက်သည်။

၇။ စနေနေ့မက်မူ ကိုယ့်အတွက် မက်သည်။


အိပ်မက်မကောင်း ပျောက်အောင် ကုနည်း

 အိပ်မက်ကောင်းသည် ဖြစ်စေ၊ မကောင်းသည်ဖြစ်စေ နံနက်အခါ မြော်မြင်တတ်သူထံ ပြန်ကြားရာ၏။ အိပ်မက်ကောင်းမူဘုရားကို မီးပူဇော်၍ အိပ်မက်ကို ရွေးရာ၏။ 

အသက်ရှည်၍ ဘုန်းကြီးပြီး စည်းစိမ်ဥစ္စာနှင့် ပြည့်စုံလိုပါ၏ဟုဆုတောင်းရာ၏။

အိပ်မက်ကောင်းမက်မူ ဆရာသမားတို့ကို ပူဇော်၍ ပြန်ကြားရာ၏။

မကောင်းမက်မူ ထမင်းတစ်ဆုပ်၊ ရေတစ်မှုတ်နှင့် သစ်ငုတ်တိုတွင် တင်ခဲ့၍ ကောင်းသောအရသာ တစ်ပါးပါးစား၍ ပြန်ရာ၏။

အိပ်မက်မကောင်းသော သူသည် ပရိတ်တော်ရေ ခံ၍ ခေါင်းဆေးရာ၏။ 

သစ်ငုတ်၊ ရေချမ်း၊ ထီး၊ တံခွန်၊ ပန်းတို့ဖြင့် ဘုရားပုထိုးကို ပူဇော်ရာ၏။

ဗောဓိညောင်ကို ထောက်ရာ၏။


အိပ်မက်မကောင်းလျှင် ယတြာပြုခြင်း

 အင်္ကုရ ရသေ့ တိတံ္ထုကျမ်း၌ မကောင်းသောအိပ်မက်တို့ကို မြင်မက်ခဲ့လျှင် ရတနာသုံးပါး မိဘ, ဆရာသမားတို့အား ပူဇော်ကန်တော့ခြင်း၊ ဥပုသ်သီလဆောက်တည်ခြင်းတို့ကို ပြုလျှင် မကောင်းကျိုးပျောက်၍ ကောင်းကျိုးရောက်ရာ၏။


[ က ] နှင့်ပတ်သက်သော အိပ်မက်များ

 

၁။ ကြာမျိုးငါးပါးအနံ့ကို ရှုရသည်ဟု မြင်မက်မူ တည်ကြည်စွာ ဂုဏ်သတင်းကျော်စောရအံ့။

၂။ ကြာညိုပန်းကို ပန်ရသည်ဟု မြင်မက်မူ မယားကောင်းရအံ့။

၃။ ကြာသွတ်အိုးနှင့် ရေချိုးရသည်ဟု မြင်မက်မူ သူတစ်ပါးတို့၏မှီခိုရာဖြစ်အံ့။ 

၄။ကြာသွတ်အိုးမြင်မက်မူ စည်းစိမ်များအံ့။

၅။ကြာပန်းစသည်မြင်မက်မူ ဖျားနာအံ့။

၆။ကျွဲစီးရသည်ဟု မြင်မက်မူ ကျေးကျွန်ရအံ့။

၇။ ကျွဲ၊ နွား၊ ဝက်၊ မြေခွေး၊ လင်းတ တိရစ္ဆာန်တို့ကိုမြင်မက်မူ ဥပါဒ်ရောက်အံ့။

၈။ကျွဲ၊ နွား၊ ဝက်၊ ဆင်၊ မြင်းတို့အား ကောင်းသော အခြင်းအရာဖြင့်မြင်မက်မူ နတ်စိမ်းတို့ နှစ်သက်အံ့။

၉။ကျွဲခတ်သည်ဟု မြင်မက်မူ ရန်ကြီးစွာ တွေ့ရအံ့။

၁၀။ကျွဲထွက်ပြေးသည်ဟု မြင်မက်မူ ရန်သူ၊ ကျွန်အမှုလုပ်တို့ ပြေးအံ့။

၁၁။ကျင်ကြီးစွန့်သည်ဟု မြင်မက်မူ ဥစ္စာလျှောအံ့။

၁၂။ကျင်ငယ်စွန့်ရသည်ဟု မြင်မက်မူ ဂုဏ်သရေလျှောအံ့။

၁၃။ကိုယ်ပေါ်သို့ လောက်တက်သည်ဟု မြင်မက်မူ ဥစ္စာရအံ့ ကျေးကျွန်၊ ကျွဲ၊ နွားသော် ရအံ့။

၁၄။ ကိုယ်ခန္ဓာပုပ်သည်ဟု မြင်မက်မူ တန်ခိုးကြီးအံ့။

၁၅။ကိုယ်မှာ အကြောင်အကြားရှိသည်ဟု မြင်မက်မူ မယားကောင်းရအံ့။ 

၁၆။ကိုယ်အမွေးရှည်သည်ကို မက်မူ လာဘ်ကြီးရအံ့။

၁၇။ကိုယ်ရောင် တောက်ပသည်ဟု မြင်မက်မူ တန်ခိုးကြီးအံ့။

၁၈။ကောင်းသော အခြင်းအရာဖြင့် မြွေကို မြင်မက်မူ ပြိတ္တာ၊ သရဲ၊သဘက်တို့ ကျေးဇူးပြုအံ့။ 

၁၉။ကောင်းသော အခြင်းအရာဖြင့် လင်းတကို မြင်မက်မူ ဇော်ဂနီနတ်ချစ်ရအံ့။

၂၀။ကောင်းကင်၌တည်ရှိသော ပြာသာဒ်တို့တက်၍ ကာမဂုဏ် ခံစားရသည်ဟု မြင်မက်မူ အကြီးအမှူးဖြစ်ရအံ့။

၂၁။ ကောင်းကင်ပျံတက် တံခွန်လွှားမြင်မက်မူ ထင်ရှားရအံ့။

၂၂။ကျောက်ဖျာအိမ်မိုးမြင်မက်မူ အများသခင်ဖြစ်ရအံ့။

၂၃။ကျောက်ဖျာထက်နေရသည်ဟု မြင်မက်မူ အလွန်ကောင်းအံ့။

၂၄။ ကျောက်ဖျာကို မျိုရသည်ဟု မြင်မက်မူ ကျေးဇူးသတင်းပျံ့နှံ့ခြင်းဖြစ်အံ့။

၂၅။ကြက်ချင်းခွပ်သည်ဟု မြင်မက်မူ တရားတွေ့ရအံ့။

၂၆။ကြက်၊ ငှက်တို့၏အတောင်များကို စားရသည်ဟု မြင်မက်မူချမ်းသာရအံ့။

၂၇။ကခုန်မြူးတူးရသည်ဟု မြင်မက်မူ မကောင်း။

၂၈။ကျားစွယ်၊ မိကျောင်းစွယ်ကို ရင်ခွင်ပိုက်ရသည်ဟုမြင်မက်မူ အများထက် ထူးချွန်သူ ဖြစ်ရ၏။

၂၉။ကျားကို မြင်မက်မူ မကောင်း။

၃၀။ကုန်းကိုတက်ပြီးမှ ကျင်းသို့ဆင်း၍ ခေါင်းဆေးရသည်ဟု မြင်မက်မူ ဘုန်တန်းခိုးကြီးအံ့။

၃၁။ကြွယ်ဝသောသူကို မြင်မက်မူ ကောင်းကျိုးရောက်အံ့။

၃၂။ကျက်ပြီးသား လူသားကိုလည်းကောင်း၊ လူ၏လက်ရုံးသားကိုလည်းကောင်း စားရသည်ဟု မြင်မက်မူ ထီပေါက်အံ့။

၃၃။ကွန်းစင်အခေါင် တက်ရသည်ဟု မြင်မက်မူ အကြီးအကဲ ဖြစ်အံ့။

၃၄။ကွမ်းရွက်၊ သစ်ရွက် စားရသည်ဟု မြင်မက်မူ ပုဆိုးကောင်း၊အဝတ်ကောင်းရအံ့။


[ ခ ] နှင့် ပတ်သက်သော အိပ်မက်များ

 

၁။ ခရုသင်းကို မြင်မက်မူ ဘေးဥပါဒ်ပျောက်ကင်းအံ့။

၂။ ခရုသင်း ပေးလာသည်ကို မြင်မက်မူ အကျင့်မြတ်သူ သန္ဓေတည်အံ့။

၃။ခရုသင်းမှုတ်ရသည်ဟု မြင်မက်မူ စည်းစိမ်တိုးအံ့။

၄။ခွေးကိုက်သည်ဟု မြင်မက်မူ အမှောင့်ပယောဂ ကိုယ်သို့ကပ်အံ့။

၅။ခေါင်းဖြီးသည်ဟုမြင်မက်မူ မိဘတို့အကျော်အစောရှိအံ့။ ဘေးပျောက်အံ့။

၆။ခံတွင်းသို့ မကောင်းသောအနံ့ဝင်သည်ဟု မြင်မက်မူ သီချင်းကျက်မှတ်ရအံ့။ 

၇။ခံတွင်းက အနံ့မကောင်းထွက်သည်ဟု မြင်မက်မူယုတ်မာသော စကားကို ဆိုရအံ့။ 

၈။ခံတွင်းကောင်းသောအနံ့ ထွက်သည်ဟု မြင်မက်မူ ကောင်းသော စကားကို ဆိုရအံ့။

၉။ခံတွင်းသို့ မွှေးကြိုင်သော ရနံ့ ဝင်သည်ဟု မြင်မက်မူ လောကုတ္တရာကျမ်းစာကျက်မှတ်ရအံ့။ 

၁၀။ခံတွင်းက အပုပ်နံ့ထွက်သည်ဟု မြင်မက်မူ ယုတ်မာသော စကားကို ဆိုရအံ့။

၁၁။ ခံတွင်းဖြင့် လက်နက်ကို ယူရသည် မြင်မက်မူ ချမ်းသာကြွယ်ဝအံ့။

၁၂။ခြေလက်တိုသည်ဟု မြင်မက်မူ ဘုန်းကြီးအံ့။

၁၃။ ခြေသည်းလက်သည်းတို့ကို လှီးရသည်ဟု မြင်မက်မူ အကြီးအကဲဖြစ်အံ့။ အထက်လူကြီးများ ချစ်ခင်အံ့။

၁၃။ခြေသည်းလက်သည်းတို့ကို ရေတွက်ရသည်ဟု မြင်မက်မူအသက်ရှည်အံ့။

၁၄။ခြင်္သေ့ကို စီးသွားသည် မြင်မက်မူ စီးသူ ကြီးပွားချမ်းသာအံ့။

၁၅။ခင်ပုပ်ငှက်သံကို ကြားရသည်မြင်မက်မူ အနာဖျားသင့်အံ့။

၁၆။ခရီးသွားရသည်ဟု မြင်မက်မူ အကြံမြောက်အံ့။

၁၇။ ခိုးသူတို့ အရပ်လေးမျက်နှာမှ လာသည်ကို ဖမ်းမိသည်ဟုမြင်မက်မူ ချမ်းသာအံ့။

၁၈။ချွေးထွက်၊ သွေးထွက်သည်ကို မြင်မက်မူ ဘုန်ကြီးအံ့။

၁၉။ချွန်းတောင်းလက်ဆွဲရသည်ဟု မြင်မက်မူ အကြီးအကဲဖြစ်အံ့။

၂၀။ချောင်းအကြည်၊ ကန်အကြည်ကို မြင်မက်မူ ဝန်ထမ်းဖြစ်အံ့။

၂၁။ ချိုးသား၊ ကြက်သားကို စားရသည်ဟု မြင်မက်မူ လာဘ်ရအံ့။

၂၂။ ခုံညင်းကစားရသည်ဟု မြင်မက်မူ အကြီးအကဲ ဖြစ်အံ့။

၂၃။ခြူ၊ ဆည်းလည်းလှုပ်သည်ဟု မြင်မက်မူ မကောင်း။

၂၄။ခင်ပုပ်ငှက်မြည်သံကို ကြားရသည် မြင်မက်မူ အနာကြီးသင့်ရာ၏။


[ ဂ ] နှင့် ပတ်သက်သော အ်ိပ်မက်များ

 

၁။ ဂူလိုဏ်ကိုလည်းကောင်း၊ တံတိုင်းကိုလည်းကောင်း ပြုလုပ်ရသည်မြင်မက်မူ ချမ်းသာသုခကိုရ၍ ဘေးရန်မရှိ တည်မြဲအံ့။

၂။ ဂူ(သချင်္ိုင်း)ကို မြင်မက်မူ အမွေရအံ့၊ ထီပေါက်အံ့။

၃။ ဂျုံစားရသည်ကို မြင်မက်မူ လုံခြုံအံ့၊ အသက်ရှည်အံ့။

၄။ ဂဏန်းသချာင်္ များ ပေါင်းရသည်၊ မြှောက်ရသည် မြင်မက်မူဝင်ငွေတိုးအံ့၊ စိတ်ချမ်းသာအံ့။

၅။ ဂမုန်းပင်ကို မြင်မက်မူ အကြီးအကျယ်စီးပွားဖြစ်အံ့။ (စီးပွားဂမုန်း)

၆။မီးကွင်းဂမုန်းဖြစ်လျှင် ပူပင်သောက ကင်းဝေးအံ့။

၇။ဂုန်လျှော်ပင်များ စိုက်ရသည်ဟု မြင်မက်မူ သာယာသော အိမ်ထောင်ရေး ဖန်တီးရအံ့။

၈။ဂေါ်မုတ်ကျောက်ကို မြင်မက်မူ အေးချမ်းသာယာအံ့။

၉။ဂေါက်သီးကစားရသည်ကို မြင်မက်မူ လိုအင်ဆန္ဒပြည့်စုံအံ့။

၁၀။ဂျုံခင်းထဲ၌ သွားရသည်မြင်မက်မူ မြင့်မြတ်သော သူနှင့် လက်ထပ်ရအံ့၊ ချမ်းသာရန် နီးကပ်အံ့။


[ င ] နှင့် ပတ်သက်သော အိပ်မက်များ

 

၁။ ငှက်ပျောပင်ကို မြင်မက်မူ ရွာအရပ်ပြောင်းရအံ့။

၂။ ငှက်ပျောပင်ကို စိုက်ရသည်ဟု မြင်မက်မူ ရာထူးကြီးရအံ့။

၃။ ငှက်တော်ကို ဖမ်းမိသည်ဟု မြင်မက်မူ ပညာရှိဖြစ်အံ့။

၄။ ငရုတ်သီးကို စားရသည်ဟု မြင်မက်မူ ရာထူးတိုးတက်အံ့။

၅။ ငရုတ်၊ ချင်းစားရသည်ကို မြင်မက်မူ သူတကာတို့၏ ဆရာဖြစ်အံ့။

၆။ ငိုကြွေးရသည်ဟု မြင်မက်မူ လာဘ်ရအံ့။


[ စ ] နှင့် ပတ်သက်သော အိပ်မက်များ

 

၁။ စင်ကြယ်သော ကလေးသူငယ်ကိုလည်းကောင်း၊ မီးရဲရဲကိုလည်းကောင်း၊ ခြသေ့င်္ကိုလည်းကောင်း၊ နန်းပြဿဒ်ကိုလည်းကောင်း၊နတ်ကိုလည်းကောင်း၊ ပုဏ္ဏားကိုလည်းကောင်း၊ မြင်မက်မူ ချမ်းသာ သုခကြီးအံ့။

၂။ စင်ကြယ်သောနွားကို မြင်မက်မူ ကောင်းကျိုးဖြစ်အံ့။

၃။ စောင်းတီးရသည်ဟု မြင်မက်မူ စည်းစိမ်တိုးအံ့။

၄။ စောင်းမှတပါး အခြားတူရိယာတို့ကို တီးရသည်၊ သီချင်းဆိုရသည်ဟု မြင်မက်မူ မကောင်း။

၅။ စပါးကိုမြင်မက်မူ စကားဟောင်း ပေါ်အံ့။

၆။ စစ်သည်အများ လာသည်ကို မြင်မက်မူ အနာရောဂါဖြစ်အံ့။

၇။စစ်ဗိုလ်ပါကို မြင်မက်မူ ချမ်းသာသုခတိုးအံ့။

၈။စည်၊ ကြေးနန်း၊ မောင်း၊ ခွက်ခွင်း၊ ပက်သာ၊ နရည်၊ ခေါင်းလောင်းစသော အသံကို ကြားရသည်ဟု မြင်မက်မူ ဘုန်းကျက်သရေတိုးအံ့။

၉။စားကြူးရသည်ဟု မြင်မက်မူ ဥစ္စာရွှေငွေလျော့အံ့၊ ဖျားနာအံ့၊

၁၀။စိုးရိမ်ကြောင့်ကြသည်ဟု မြင်မက်မူ ဆိုလေရာကောင်းအံ့။


[ ဆ ] နှင့် ပတ်သက်သော အိပ်မက်များ

 

၁။ ဆင်၊ မြင်း၊ ဗိုလ်ပါကို မြင်မက်မူ စိတ်ချမ်းသာအံ့။

၂။ ဆင်ပေါက် မြင်မက်မူ သူတစ်ပါးကိုးကွယ်ရာ ဖြစ်အံ့။

၃။ ဆင်၊ မြင်း၊ နွားတို့ကို မြင်မက်မူ ကောင်းစားအံ့။

၄။ ဆင်ဖြူချွန်းတင် မြင်မက်မူ သူကောင်းပြုခံရအံ့။

၅။ ဆင်စွယ်နှစ်ချောင်းဆွဲရသည်ကို မြင်မက်မူ ထင်ရှားကျော်စောအံ့။

၆။ ဆင်ဖြူစီး၍ကောင်းကင်သို့တက်ရာ နေလနှစ်ပါးကျလာ၍ ခြေဖဝါးအပြင်ကပ်လျက်တည်သည်ဟု မြင်မက်မူ တန်ခိုးကြီးအံ့။

၇။ ဆံပင်ရှည်ကို မြင်မက်မူ တန်ခိုးကြီးအံ့။

၈။ ဆံပင်ရှည်ကိုမြင်မက်မူ အကျင့်ကောင်း၍ အကြီးအကဲ ဖြစ်အံ့။

၉။ ဆံပင်ဖြေရသည်ကို မြင်မကမူ မကောင်း။

၁၀။ ဆား၊ ဆီ၌ထိုင်ရသည်ကို မြင်မက်မူ သူတစ်ပါးတို့ ကိုးကွယ်ရာဖြစ်အံ့။

၁၁။ ဆားလျက်ရသည်ဟု မြင်မက်မူ သူတစ်ပါးတို့ ကိုးကွယ်ရာ ဖြစ်အံ့။

၁၂။ ဆင်းတုရုပ်ပွား တရားဟောသည်ကို ကြားရမက်မူ ကျော်စောအံ့။

၁၃။ဆိတ်ဆိတ်နေသည်ကို မြင်မက်မူ သေအံ့။

၁၄။ဆူးစူးသည်ဟု မြင်မက်မူ ရန်တွေ့အံ့။


[ ဇ ] နှင့် ပတ်သက်သော အိပ်မက်များ

 

၁။ ဇာထိုးရသည်ကို မြင်မက်မူ အချစ်တိုးအံ့၊ အကြံအောင်အံ့။

၂။ ဇာကနာနှင့် အသုံးပြုသည် မြင်မက်မူ အဆွေခင်ပွန်းကောင်းရအံ့။

၃။ ဇာတာလုပ်ရသည်ကို မက်မူ မိမိအတွက် အထူးအကျိုးပေးအံ့။

၄။ ဇီးကွက်ကို နေ့အခါမြင်မက်မူ လာဘ်ကြီးရအံ့၊ ပျော်ရွှင်ရအံ့။

၅။ ဇီးကွက်အော်သံကြားရသည် မြင်မက်မူ အတင်းပြောသူတို့ တိတ်ဆိတ်အံ့၊ ကောင်းမွန်သော နည်းလမ်းများရအံ့၊ အလုပ်အကိုင် အကြံပေးသူများပေါအံ့။

၆။ ဇရပ်ဆောက်လုပ်ရသည်မြင်မက်မူ ရပ်ရေးရွားရေးကိစ္စများ၌ အထူးကူညီရအံ့၊ ငွေရလွယ်အံ့။

၇။ ဇော်ဂျီကို မြင်မက်မူ ကျန်းမာအံ့၊ ဆေးကောင်းတွေ့အံ့၊ထင်ပေါ်ကျော်စောအံ့။

၈။ ဇော်က က ရသည်ကို မက်မူ အချစ်ရေး စိတ်ကူး အောင်မြင်အံ့။

၉။ ဇွဲ၊ ဝီရိယစိုက်၍ အလုပ်လုပ်ရသည်မြင်မက်မူ မနာလိုသူတို့ တီးတိုးစကားပြောအံ့၊ အလုပ်ကောင်းအံ့။


[ စျ ] နှင့် ပတ်သက်သော အိပ်မက်များ


၁။ စျေးဆိုင်များစွာ မြင်မက်မူ အမြတ်အစွန်းများရအံ့။

၂။ စျေး၀ယ်နေသည် မြင်မက်မူ ကံကောင်းအံ့။

၃။ စျေးသည် မိမိအိမ်သို့ ခေါ်သည် မြင်မက်မူ ဝင်ငွေတိုးကာ လာဘ်ကောင်းအံ့၊ စိတ်ပျော်ရွှင်ရအံ့။

၄။ စျာန်ရသည် မြင်မက်မူ အရောင်းအဝယ်ကောင်းအံ့။

၅။ စျာန်ပျံရသည့်လူများကို မြင်မက်မူအကြီးအကဲဖြစ်အံ့၊ အောင်မြင်အံ့။

၆။ စျာန်ရသော ဘုန်းတော်ကြီးကို မြင်မက်မူ အထူကဲကောင်းအံ့၊မျက်နှာပွင့်အံ့။

၇။ စျာန်ပျံရထားစီးရသည်မြင်မက်မူ အကြီးအကဲဖြစ်အံ့၊ ထင်ပေါ်ကျော်စောအံ့။


[ ည ] နှင့် ပတ်သက်သော အိပ်မက်များ

 

၁။ ညမှောင်ပြီး အလင်းရောင်ပေါ်သည် မြင်မက်မူ ကံကောင်းချိန်ရောက်ပြီဟု မှတ်ယူပါ။

၂။ ညစာစားရသည်ကို မြင်မက်မူ အိမ်တွင်းရေး အေးအံ့၊ ချစ်သူ ခင်သူပေါများအံ့။

၃။ ညဉ့်ငှက်သံ သာယာစွာ ကြားရသည် မက်မူ ချမ်းသာ သုခ ဖြစ်အံ့၊မိမိလိုအင်အန္ဒပြည့်အံ့။

၄။ ညီညာစွာ စွမ်းဆောင်ရသည်မြင်မက်မူ အထင်ကြီးခြင်းခံရအံ့၊ပူဇော်ခံရအံ့။

၅။ ညီအစ်ကို မောင်နှမများကို မြင်မက်မူ ကျန်းမာအံ့၊ ရောဂါအနာကင်းအံ့။

၆။ ညောင်ရေအိုး မြင်မက်မူ မုချလက်ထက်ရအံ့၊ ပျားရည်ဆမ်း ချစ်ခရီးထွက်ရအံ့။

၇။ ညောင်ပင်ကို မြင်မက်မူ အသက်ရှည်အံ့၊ ဥစ္စာ ပစ္စည်း တိုးတက်အံ့။

၈။ ညောင်ရွက်ကို မြင်မက်မူ သူတော်ကောင်းများက စောင့်ရှောက်အံ့၊အလွန်ကံကောင်းအံ့။

၉။ ညောင်ရွက်အိမ် ဦးခန်းကျသည်ကို မြင်မက်မူ ရွှေဆင်းတုတော်ရရှိအံ့၊ ဘုရားကိုးဆူပင့်ရအံ့။

၁၀။ ညည်းညူသံကြားရသည် မြင်မက်မူ ချီးမွမ်းခံရအံ့၊ ရန်သူများ ဒုက္ခရောက်အံ့။


[ တ ] နှင့် ပတ်သက်သော အိပ်မက်များ

 

၁။ တောင်ပို့တက် ခေါင်းဖြီးရသည်ဟု မြင်မက်မူ သူတစ်ပါးတို့၏ ကိုးကွယ်ရာဖြစ်အံ့့။

၂။ တောင်ထိပ်၌နေရသည်ဟု မြင်မက်မူ ပြည်သူ့ဝန်ထမ်းအကြီးအကဲဖြစ်အံ့။

၃။ တောင်အရပ်သို့ သွားရသည်ဟု မြင်မက်မူ ရောဂါရအံ့။

၄။ တောင်ကလပ်တက်နေသည်ဟု မြင်မက်မူ လက်ရှိ ရာထူးထက်မြင့်သော အဆင့်ကို ရအံ့။

၅။ တောင်ဖျားတက်ရသည်ဟု မြင်မက်မူ လာဘ်ကြီးရအံ့။

၆။ တံခွန်လှူရသည်ဟု မြင်မက်မူ ထင်ရှားအံ့။

၇။ တံခွန်လွှားရသည်ဟု မြင်မက်မူ အကြီးအကဲဖြစ်အံ့။

၈။ တံတားပေါ်လျှောက်ရသည်ဟူမြင်မက်မူ သောကရှိလျက် အလိုပြည့်အံ့။

၉။ တန်ဆာဆင်ရသည်ဟု မြင်မက်မူ သူတစ်ပါး ရှိခိုးခံရအံ့။

၁၀။ တန်ဆောင်းညှိဟု မြင်မက်မူ စာတတ်အံ့၊ ထင်ရှားအံ့။

၁၁။ တူရိယာအမျိုးမျိုးတွင် စောင်းမှတစ်ပါး အခြားတူရိယာတို့ကိုတီးရသည်ဟု မြင်မက်မူ မကောင်း။

၁၂။ တလားမှာ ဝင်သည်ကို မြင်မက်မူ သေအံ့။


[ ထ ] နှင့် ပတ်သက်သော အိပ်မက်များ

 

၁။ ထောပတ်၊ ပျားရည်တို့ကို နှစ်နှစ်သက်သက် မြင်မက်မူ ချမ်းသာအံ့။

၂။ ထောပတ်၊ နို့ စသည်တို့ကို ရွံရှာဖွယ်မြင်မက်မူ ဘီလူးဘေး၊ငတ်မွတ်ဘေး၊ နာဖျားသောဘေး တွေ့အံ့။

၃။ ထမ်းစင် သံလျှင်စီးရသည် မြင်မက်မူ လာဘ်ရအံ့။

၄။ ထမ်းစင်ထက် ကျီးနားသည်ဟု မြင်မက်မူ နာဖျား ပျက်စီးအံ့။

၅။ ထမင်းစားရသည်ဟု မြင်မက်မူ လာဘ်ရအံ့၊ ကြောင့်ကြရအံ့။

၆။ ထမင်းနှင့်တကွ သပိတ်လွယ်ရသည်ဟု မြင်မက်မူ လာဘ်ရအံ့။

၇။ ထီးဆောင်းရသည်ဟု မြင်မက်မူ စိတ်အေးမြအံ့။

၈။ ထိတ်လန့်သည်ဟု မြင်မက်မူ မကောင်း။

၉။ ထင်းပုံပြိုကျသည်ဟု မြင်မက်မူ မကောင်း။


[ ဒ ] နှင့် ပတ်သက်သော အိပ်မက်များ

 

၁။ ဒွန်းစဏ္ဍားအထက်က နေရသည်ဟု မြင်မက်မူ မကောင်း။

၂။ ဒါနပြုရသည်ဟု မြင်မကမူ ရာထူးတိုးအံ့၊ စန်းပွင့်အံ့၊ စကားကောင်းပြောအံ့။

၃။ ဒုံးလှေကို မြင်မက်မူ စိတ်ပျော်ရွှင်အံ့။

၄။ ဒေလီယာပန်းပွင့်ကြီးကို မြင်မက်မူ အခြွေအရံ အသင်းအပင်းများပေါများအံ့။

၅။ ဒေလီယာပန်းကြီး ပန်ရသည်ဟု မြင်မက်မူ မုချလက်ထပ်ရအံ့။စိတ်လွတ်ကိုယ်လွတ် ပျော်ရအံ့။

၆။ ဒန်အိုး၊ ဒန်ခွက်များကို မြင်မက်မူ အိမ်တွင်းသုခ ရအံ့။

၇။ ဒယ်အိုးကို မြင်မက်မူ စိတ်ချမ်းသာရအံ့။

၈။ ဒေါင်းမွေးမြူရသည်ဟု မြင်မက်မူ အိမ်ကျက်သရေတိုးအံ့။


[ ဓ ] နှင့် ပတ်သက်သော အိပ်မက်များ

 

၁။ ဓာတ်တော်ရသည်ဟု မြင်မက်မူ ကျက်သရေတက်အံ့။

၂။ ဓာတ်လုံးနှင့် ပေါက်ရသည်၊ ပစ်ရသည်ဟု မြင်မက်မူ ရန်သူအပေါင်းကို အလွယ်တကူ နိုင်အံ့။

၃။ ဓားသွေးကျောက်ကို မြင်မက်မူ အကြံအစည်များရှိနေအံ့။

၄။ ဓား၊ လှံအရောင်တောက်သည်ဟု မက်မူ ဘုန်းတန်းခိုးကြီးအံ့။

၅။ ဓား၊ လှံ စွဲကိုင်ရသည်ဟု မြင်မက်မူ အသက်ရှည်အံ့။

၆။ ဓား၊ လှံ အရောင်တောက်သည်ကို မြင်မက်မူ ဘုန်းတန်ခိုး ကြီးအံ့။

၇။ ဓား၊ လှံ ကိုင်ရသည် မြင်မက်မူ အသက်ရှည်အံ့။

၈။ ဓူဝံကြယ်ကို မြင်မက်မူ အကြံအောင်အံ့။


[ န ] နှင့် ပတ်သက်သော အိပ်မက်များ

 

၁။ နို့အမျိုးမျိုးကို သောက်သည်ဟု မြင်မက်မူ သူတစ်ပါး ပညာပေးအံ့။

၂။ နို့ညှစ်ရသည်ဟု မြင်မက်မူ ကြွယ်ဝအံ့။

၃။ နို့ကို ရွှေခွက်နှင့် ထည့်၍ သောက်ရသည်ဟု မြင်မက်မူ လာဘ်ရအံ့။

နွားနို့သောက်ရသည်ဟုမြင်မက်မူ သူတစ်ပါးတို့ထက် ကျော်စောအံ့။

၄။ နွားမ, ဖမ်းရသည်ဟု မြင်မက်မူ သူကြီးဖြစ်အံ့။

၅။ နွားရသည်ဟု မြင်မက်မူ ပစ္စည်းဥစ္စာတိုးအံ့။

၆။ နွားစီးရသည်ဟု မြင်မက်မူ ချမ်းသာအံ့။

၇။ နွားကျောင်းရသည်ဟု မြင်မက်မူ အကြီးအကဲဖြစ်အံ့။

၈။ နွားချေးရေချိုးရသည်ဟု မြင်မက်မူ လာဘ်ရအံ့။

၉။ နတ်ရုပ်၊ ဗိဿနိုးရုပ်ကို မြင်မက်မူ အဆွေခင်ပွန်းကောင်းရအံ့။

၁၀။ နတ်ဆေးလိမ်းကျံမြင်မက်မူ ဥစ္စာရအံ့။

၁၁။ နတ်တို့ စကားပြောသည်ဟု မြင်မက်မူ တုန်လှုပ်ပျက်စီးအံ့။

၁၂။ နေဗိမာန်သည် ကြယ်အပေါင်းခြံရံချက် မြေမှကောင်းကင်သို့ ပျံ

တက်သည်ဟုမြင်မက်မူ ဘုန်းကံသေးငယ်သူတို့အတုမရှိ ဘုန်းကြီးအံ့။

၁၃။ နေ လ ကြတ်သည်ဟု မြင်မက်မူ ဘုန်းကျက်သရေ တိုးအံ့။

၁၄။ နေ လတို့ မွန်းတည့်သည်ဟု မြင်မက်မူ ကြီးစွာသောချမ်းသာသုခကို ရအံ့။ အမျိုး(၇)ဆက်တိုင် မပျက်နိုင်သော စည်းစိမ်ကို ရအံ့။

၁၅။ နေ လတို့ကို ရင်ခွင်ပိုက်ရသည်ဟု မြင်မက်မူ ဘုန်းကြီးသောသားကို ရအံ့။ 

၁၆။နေအိမ်၊ လအိမ်ဖွဲ့၍ ဝမ်းတွင်းဝင်သည်ဟု မြင်မက်မူ ကောင်းစားအံ့။

၁၇။နေ လ ကြယ်တို့ကို မြင်ရသည်ဟု မြင်မက်မူ သူတစ်ပါးတို့ထက်မြင့်မားသော ရာထူးရှိသူ ဖြစ်အံ့။

၁၈။နေသည် အရှေ့က ထွက်၍ အနောက်သို့ ဝင်သည်ဟု မြင်မက်မူ ကမ္ဘာတွင် ထင်ရှားသော ပုဂ္ဂိုလ်ပေါ်ပေါက်အံ့။

၁၉။နေ လတိုိ့ကို ဖက်ရသည်ဟု မြင်မက်မူ ကြွယ်ဝချမ်းသာအံ့။

၂၀။နေသည် ဝမ်းတွင်းသို့ ဝင်ရောက်သည်ဟု မြင်မက်မူ သားကောင်းဖွားအံ့။

၂၁။နေကြာပန်းပန်၍ ပတ်စည်တီးရသည်ဟု မြင်မက်မူမင်းဆရာဖြစ်အံ့။

၂၂။နားတွင်းသို့ မစင်ရည်ဝင်သည်ဟု မြင်မက်မူ လာဘ်ရအံ့။

၂၃။နားပင်းသည်ဟု မြင်မက်မူ သူတစ်ပါး အတင်းပြောအံ့။

၂၄။နားတွင်းသို့ ဆီသန့်သန့်ဝင်သည်ဟု မြင်မက်မူ နှစ်သက်ဖွယ်ရာ စကားကို ကြားရအံ့။

၂၅။နှာခေါင်းသွေးယိုထွက်သည်ဟု မြင်မက်မူ သူတစ်ပါးတို့ မှီခိုရာဖြစ်အံ့။

၂၆။နှာခေါင်းလှီးမြင်မက်မူ စည်းစိမ်တိုးပွားအံ့။

၂၇။နှာခေါင်းပဲ့သည်ဟု မြင်မက်မူ စီးပွားဥစ္စာလျှောအံ့။

၂၈။နှာခေါင်းတွင်းသို့ မကောင်းသော အနံ့ဝင်သည်ဟု မြင်မက်မူ မကောင်းသော အကြံကို ကြံရအံ့။

၂၉။နှာခေါင်းတွင်းသို့ ကောင်းသော အနံ့ဝင်သည်ဟု မြင်မက်မူ ကောင်းသော အကြံကို ကြံရအံ့။

၃၀။နှလုံးသား အပြင်ထွက်သည်ဟု မြင်မက်မူ သားသမီး အရပ်တပါးသို့ ပြောင်းအံ့။

၃၁။နဂါးကို ဖမ်းမိသည်ဟု မြင်မက်မူ ရန်ပျောက်အံ့။

၃၂။နှမ်းဆီကို သောက်ရသည်ဟု မြင်မက်မူ စိုးရိမ်သောက ကင်းအံ့။

၃၃။နနွင်း၊ စန္ဒကူးလိမ်းကျံရသည်ဟု မြင်မက်မူ ဖျားနာအံ့။

၃၄။နန်းတော်အိမ်ကို မီးလောင်သည်ဟု မြင်မက်မူ ရန်အောင်၍ အနာနှိပ်စက်ပျက်စီးအံ့။

၃၅။နံ့သာမျိုးငါးပါး တစ်ပါးပါးကို နမ်းရှုရသည်ဟု မြင်မက်မူ တစ်နေ့တခြား ဂုဏ်သတင်းထွက်အံ့။


[ ပ ] နှင့် ပတ်သက်သော အိပ်မက်များ

 

၁။ ပန်းအမျိုးမျိုးတွင် မိမိကြိုက်နှစ်သက်သော ပန်း၏အနံ့ကို နမ်းရှူရသည်ဟု မြင်မက်မူ ကျက်သရေ ဂုဏ်သတင်း ပျံ့နှံ့အံ့။

၂။ ပန်းစည်းမြင်မက်မူ ရာထူးရအံ့။

၃။ ပန်းထီးဆောင်းရသည်ဟု မြင်မက်မူ ကျော်စောအံ့။

၄။ ပန်းနီပန်၍ ဖန်ရည်စွန်းသောအဝတ်ကို ဝတ်ရသည်ဟု မြင်မက်မူ ဘေးထိတတ်အံ့။

၅။ ပန်းကြာပန်ရသည်ဟု မြင်မက်မူ နာဖျားတတ်အံ့။

၆။ ပန်းပန်ရသည်ဟု မြင်မက်မူ ဖျားနာအံ့။

၇။ ပန်းဖြူ ပန်ရသည်ဟု မြင်မက်မူ အကြီးအကဲ ဖြစ်အံ့။

၈။ ပြာသာဒ်ထက်၌ အစားအစာကို စားရသည်ဟု မြင်မက်မူ အထူးကောင်းမွန်အံ့။ 

၉။ပြာသာဒ်ထက်မှနေ၍ အရသာအဖျော်ကိုသောက်ရသည်ဟု မြင်မက်မူ ချမ်းသာသုခ တစ်နေ့တခြားတိုးအံ့။

၁၀။ပြာသာဒ်၊ တောစိုးသစ်ပင်၊ အထိကရသစ်ပင်၊ တောင်တို့ကို တက်စီးရသည်ဟု မြင်မက်မူ ချမ်းသာစီးပွားများအံ့။

၁၁။ပြာသာဒ်ကြီးကို ပြုရသည်ဟု မြင်မက်မူ ဘုန်းကြီးအံ့။

၁၂။ပုဆိုးအသစ်၊ လုံချည်သစ်ကို မြင်မက်မူ ဘုန်းကျက်သရေ တိုးအံ့။

၁၃။ပုဆိုးဖြူကို ဝတ်ရသည်ဟု မြင်မက်မူ အကြီးအကဲဖြစ်အံ့။

၁၄။ပုဏ္ဍားရေသွန်း၍ စကားပြောသံကြားရသည်ဟု မြင်မက်မူ ရန်သူလက်မှ လွတ်အံ့။

၁၅။ပုဏ္ဍားကို စွဲလန်းမက်သော် လာဘ်ရအံ့။

၁၆။ပုခက်စီးရသည်ဟု မြင်မက်မူ ထင်ရှားကျော်စောအံ့။

၁၇။ပုပ်စော ဆီ၊ ရေတို့ နားတွင်းသို့ ဝင်သည်ဟု မြင်မက်မူဒုစရိုက်နှင့်စပ်သော မနှစ်သက်ဖွယ်ကို ကြားရအံ့။

၁၈။ပျားရည်သောက်ရသည်ဟု မြင်မက်မူ ကြံသမျှ ပြီးစီး၍ လာဘ်ရအံ့။

၁၉။ပျားတုတ်ခံရသည်ဟု မြင်မက်မူ ရန်တွေ့အံ့။

၂၀။ပခြုပ်တွင်း၌ မီးလောင်သည်ဟု မြင်မက်မူ လက်အောက်ငယ်သားတို့ တော်လှန်အံ့။

၂၁။ပွဲခံရသည်ကိုလည်းကောင်း၊ ပွဲလမ်းသဘင်ကိုလည်းကောင်း မြင်မက်မူ မကောင်း၊ သေပျောက်တတ်၏။

၂၂။ပျဉ်တလားတွင်းသို့ ဝင်ရသည်ဟု မြင်မက်မူ မကောင်း။

၂၃။ပိတုန်းတုပ်သည်ဟု မြင်မက်မူ ရန်တွေ့အံ့။

၂၄။ပါးစပ်ပဲ့သည်ဟု မြင်မက်မူ အလိုရှိသောစကားကို မပြောနိုင်ဘဲဆွံ့အနေအံ့။

၂၅။ပတ္တမြားရသည်ဟု မြင်မက်မူ သားကောင်း ရအံ့။


[ ဖ ] နှင့် ပတ်သက်သော အိပ်မက်များ

 

၁။ ဖျာလှုပ်သည်ဟု မြင်မက်မူ လာဘ်ရအံ့။

၂။ ဖွဲမီးတငွေ့ငွေ့ကို မြင်မက်မူ အလွန်ပူအံ့။

၃။ ဖိနပ်စီးရသည်ဟု မြင်မက်မူ အသရေတိုးအံ့။

၄။ ဖယောင်းတိုင်ကို မြင်မက်မူ စိတ်ချမ်းသာအံ့။

၅။ ဖယောင်းတိုင် မီးလင်းနေသည်ကို မြင်မက်မူ

နတ်ကောင်းနတ်မြတ်တို့ မ စအံ့။

၆။ ဖရဲသီး မြင်မက်မူ သားကောင်းရအံ့။

၇။ ဖရဲသီးစားရသည် မြင်မက်မူ ရောဂါဝေဒနာ ကင်းရှင်းအံ့။

၈။ ဖောင်တိန်လက်ဆောင်ရသည် မြင်မက်မူ စာပေ၌အထူး အောင်မြင်ကျော်စောအံ့။

၉။ ဖောင်တိန်ကို မြင်မက်မူ စာပေ၌ ကျော်စောအံ့။

၁၀။ ဖန်ခွက်ရေအပြည့်နှင့်မြင်မက်မူ မင်္ဂလာပွဲများ ခင်းကျင်းရအံ့။


[ ဗ ] နှင့် ပတ်သက်သော အိပ်မက်များ

 

၁။ ဗေဒါပန်းကို မြင်မက်မူ အကြံကောင်းရအံ့။

၂။ ဗေဒင်ဟောသည် မြင်မက်မူ လိုအပ်သော အကူအညီများ ပေးစွမ်းနိုင်သူ ပေါ်အံ့။

၃။ ဗိုလ်ချုပ်ကြေးရုပ်ကို မြင်မက်မူ ရာထူးတိုးအံ့။သားကောင်းရတနာရအံ့။

၄။ ဗျောသံကြားရသည် မြင်မက်မူ ရာထူးတိုးအံ့။

၅။ ဗျိုင်းငှက်ကို မြင်မက်မူ ဇနီးကောင်း ရအံ့။

၆။ ဗြဟ္မာမင်းကို မြင်မက်မူ လာဘ်ကြီးရအံ့။


[ ဘ ] နှင့် ပတ်သက်သော အိပ်မက်များ

 

၁။ ဘုရားရုပ်ထုတော် မိမိဦးခေါင်း၌ တည်ရှိသည်ဟု မြင်မက်မူ အကြီးအကဲတို့ ချီးမြှောက်အံ့။

၂။ ဘုရားရုပ်ထုတော် မိမိလက်ဝဲ၊ လက်ယာ ပခုံးတို့၌ တည်ရှိသည်ကို မြင်မက်မူ ကြီးမြင့်သော အခြွေအရံ ပရိသတ်ရအံ့။

၃။ ဘုရားရုပ်တုတော် မိမိခြေရင်း၌ တည်ရှိသည်ဟု မြင်မက်မူ ရှိပြီးအကြီးအကဲသည် ရာထူးသက်လျှော၍ မိမိသည်ပင်အကြီးအကဲဖြစ်အံ့။

၄။ ဘုရားရုပ်တုတော် ကြွသွားတော်မူသည်ဟု မြင်မက်မူဘုန်းကျက်သရေတိုးအံ့။

၅။ ဘုရားရုပ်ပွားတော် ဖူးတွေ့ရသည်ဟု မြင်မက်မူ တစ်နေ့တခြား ကျော်စောအံ့။

၆။ ဘုရားရုပ်တုတော်၊ စေတီတော်၊ ပုထိုးတော်တို့ကို မြင်မက်မူ နတ်ကောင်းနတ်မြတ်တို့ ချစ်အံ့။

၇။ ဘုရားရုပ်တုတော် မကောင်းသောအခြင်းအရာဖြင့်ကြွသွားသည်ကို မြင်မက်မူ ဘုန်းကျက်သရေ ဆုတ်ယုတ်အံ့။

၈။ ဘုရားရုပ်ပွား၊ စေတီ၊ ပုထိုးကို မကောင်းသော အခြင်းအရာအားဖြင့်မြင်မက်မူ နတ်ကောင်းနတ်မြတ်တို့ မချစ်ခင်သဖြင့် ဥပါဒ်ရောက်အံ့။

၉။ ဘုရားရုပ်ပွားတော်၊ ဆင်းတုတော် တရားဟောသည်ကို မြင်မက်မူ ကျော်စောအံ့။

၁၀။ ဘုရားရုပ်ပွားတော်၊ ဆင်းတုတော် တရားဟောသည်၊စကားပြောသည်ကို ကြားရသည်ဟု မြင်မက်မူ ကျော်စောအံ့။

၁၁။ ဘုရားရှိခိုးသည်ဟု မြင်မက်မူ ချမ်းသာသုခတိုးအံ့။

၁၂။ ဘုရားရုပ်တုတော်ကို ဖက်ရသည်ဟု မြင်မက်မူကျက်သရေတိုးအံ့။

၁၃။ ဘုရားဓာတ်တော်ရသည်ဟု မြင်မက်မူ ကျက်သရေတိုးအံ့။

၁၄။ ဘုရားဓာတ်တော်မြင်ရသည်ဟုမြင်မက်မူ ကျက်သရေ တိုးတက်အံ့။


[ မ ] နှင့် ပတ်သက်သော အိပ်မက်များ

 

၁။ မိမိရူးသည်ဟု မြင်မက်မူ လာဘ်ရအံ့။

၂။ မိမိအူကို ထုတ်၍ ပတ်ရသည်ဟု မြင်မက်မူ သြဇာအာဏာ အရှိန်အဝါကြီးမားအံ့။

၃။ မိကျောင်းဖမ်းသည် မြင်မက်မူ လာဘ်ရအံ့။

၄။ မိကျောင်းစီးရသည် မြင်မက်မူ ရန်သူကို နိုင်အံ့။

၅။ မိကျောင်းစွယ်ကို ရင်ခွင်ပိုက်သည်ဟု မြင်မက်မူ ရာထူးကြီးအံ့။

၆။ မိကျောင်းသား စားရသည်ဟု မြင်မက်မူ လာဘ်ကြီးအံ့။

၇။ မိန်းမကို ဆွဲရသည်ဟု မြင်မက်မူ ချမ်းသာကြွယ်ဝအံ့။

၈။ မ်ိန်းမနှင့် အတူ အိပ်ရသည်ဟု မြင်မက်မူ လာဘ်ရအံ့။

၉။ မိန်းမကို နားထွင်းရသည်ဟု မြင်မက်မူ ရွှေရအံ့။

၁၀။ မိန်းမအမွေးအမျှင်ရှည်သည်ကို မြင်မက်မူ ချမ်းသာအံ့။

၁၁။ မျက်စိမှိတ်သည်ဟု မြင်မက်မူ အရမ်းကာရော ပြုမိအံ့။

၁၂။ မျက်စိဖွင့်သည်ဟုမြင်မက်မူကောင်းကျိုး၊ မကောင်းကျိုးကို မြင်ရအံ့။

၁၃။ မျက်စိကြည်လင်သည်ဟု မြင်မက်မူ ကောင်းသော ဉာဏ်တိုးအံ့။

၁၄။ မျက်စိ၌ အမှိုက်ဝင်သည်ဟု မြင်မက်မူ အနိဠာရုံကို ရအံ့။

၁၅။ မျက်စိ၌ တိမ်သလ္လာကျသည်ဟု မြင်မက်မူ အသိဉာဏ်နည်းပါးအံ့။

၁၆။ မျက်စိ၌ မျက်ချီးများသည်ဟု မြင်မက်မူ အရှိန်အစော်မဲ့အံ့။

၁၇။ မျက်စိပျက်သည်ဟု မက်မူ မှားယွင်းသော အယူကိုရအံ့။

၁၈။ မျက်စိထွက်သည်ဟု မက်မူ သားသမီးတို့ ထွက်ပြေးတတ်အံ့။

၁၉။ မီးပုံမှ အခိုးအလျှံထွက်သော မီးကို မြင်မက်မူ ပညာရှိ ပေါ်ထွန်းအံ့။

၂၀။ မီးထည့်ရသည်၊ မီးဖုတ်ရသည်၊ မီးရှို့ရသည်၊ မီးတိုက်ရသည်ဟု

မြင်မက်မူ ရပ်ရွာကြီးကဲ ဖြစ်အံ့။

၂၁။ မီးတန်ဆောင် ညှိထွန်းရသည်ဟု မြင်မက်မူ ပညာတတ်အံ့။

၂၂။ မီးမှုတ် မက်မူ အကြီးအကဲဖြစ်အံ့။

၂၃။ မီးတငွေ့ငွေ့မြင်မက်မူ စိတ်နှလုံးပူပန်ရအံ့။

၂၄။ မြွေငန်းစီးရသည်ဟု မြင်မက်မူ ရောဂါဖြစ်အံ့။

၂၅။ မြွေကိုက်သည်ကို မြင်မက်မူ လူလိမ်ခံရအံ့။

၂၆။ မြွေကို ခါးပိုက်ပိုက်ရသည်ကို မက်မူ အတွင်းရန်ဖြစ်ပေါ်အံ့။

၂၇။ မြွေခဲသည်ကို မြင်မက်မူ သားသမီးရ၍ အစွဲရှိအံ့။

၂၈။ မြွေခံသည်ကို မြင်မက်မူ လာဘ်ရအံ့။

၂၉။ မြွေစိမ်းကိုက်သည်ကို မြင်မက်မူ လူလိမ်တွေ့ရအံ့။

၃၀။ မြွေပွေး၊ မြွေဟောက်ကိုက်လိုက်သည်ကို မြင်မက်မူ လူဆိုးတို့လိမ်ရန် လာအံ့။

၃၁။ မြေတူးရသည်ဟု မြင်မက်မူ မကောင်း။

၃၂။ မြေဇာပန်း ပန်ရသည်ဟု မြင်မက်မူ ပညာရှိ ဆရာတစ်ဆူဖြစ်အံ့။

၃၃။ မြင်းမိုရ်တောင် ခေါင်းအုံးရသည်ကို မြင်မက်မူ လူအများ ပူဇော်ခြင်းကို ခံရအံ့။

၃၄။ မြင်းမိုရ်တောင်သို့ တက်ရသည်ဟု မြင်မက်မူ လူချစ်လူခင်များအံ့။

၃၅။ မြင့်ရာမှ နိမ့်ကျသည်ဟု မြင်မက်မူ မကောင်း။

၃၆။ မြင့်သောအရပ်ကို တက်ရသည်ဟု မြင်မက်မူ လူတကာတို့ထက်မြင့်မြတ်ရအံ့။

၃၇။ မန်ကျည်းသီး စားရသည်ကို မြင်မက်မူ သူကောင်းဖြစ်အံ့။

၃၈။ မိုးရေထဲ ပျော်ပါးရသည်ကို မြင်မက်မူ ဥစ္စာပစ္စည်းရအံ့။

၃၉။ မစင်လိမ်းကျန်ရသည်ကို မြင်မက်မူ ပစ္စည်းဥစ္စာရအံ့။

၄၀။ မှိုချက်စားရသည်ကို မြင်မက်မူ လာဘ်ရအံ့။

၄၁။ မြစ်ရေသောက်ရသည်ကို မြင်မက်မူ သူတစ်ပါးတို့ထက်ကျော်စော ထင်ရှားအံ့။

၄၂။ မုန်တိုင်းထန်သည်ကို မြင်မက်မူ ကြောင့်ကြများအံ့။ စိုးရိမ်သောကများအံ့။

၄၃။ မျှော့တွယ်သည်ကို မြင်မက်မူ အကြီးအကဲဖြစ်အံ့။

၄၄။ မောင်းတိုဆောင်းရသည်ကို မြင်မက်မူ အကြီးအကဲ ဖြစ်အံ့။

၄၅။ မကောင်းသောရေကို သွန်းလာသည်ကို မက်မူ ပျက်စီးအံ့။

၄၆။ မကာရ်းကို ဖမ်းမက်မူ လာဘ်ရအံ့။


[ ယ ] နှင့် ပတ်သက်သော အိပ်မက်များ

၁။ ယောက်ျားချင်းသင့်မြတ်၍ ကိုယ်ဝန်ရှိသည်ကို မြင်မက်မူမကောင်း။

၂။ ယမမင်းကို မြင်မက်မူ အသက်ရှည်အံ့။ အိမ်တွင်းအေးချမ်းအံ့ မိမိအားစောင့်ရှောက်သူကို ကျေနပ်ဖွယ်တွေ့ရအံ့။

၃။ ယိုးစွပ်ခံရသည်မြင်မက်မူ အကြံအောင်အံ့။ မကောင်းပြောသူများ ပျက်စီးအံ့။ အနီးရန်သူများ ဘေးတွေ့ကြအံ့။


[ ရ ] နှင့် ပတ်သက်သော အိပ်မက်များ

 

၁။ ရွှေကိုဖြစ်စေ၊ ငွေကိုဖြစ်စေ မြင်မက်မူ ယောက်ျားမှာ မယားကောင်းရအံ့။

၂။ ရွှေရတနာ ပတ္တမြားစသော ရတနာတို့ကို မြင်မက်မူ ကောင်းကျိုးရအံ့။

၃။ ရွှေလက်ဖွဲ့ဝတ်ရသည်ဟု မြင်မက်မူ ယောက်ျား၌ မယားရအံ့။

၄။ ရွှေဟင်္သာ တရားဟောသည်ကို နာကြားရသည်ဟု မြင်မက်မူ ဘုန်းကျက်သရေတိုးအံ့၊ စိတ်ချမ်းသာအံ့။

၅။ ရွှေလက်ကောက်ဝတ်မက်မူ ကြီးသောသူတို့ ချီးမြှင့်ခံရအံ့။

၆။ ရွှေငွေအား အစိုးရသည်ကို မြင်မက်မူ ချမ်းသာအံ့။

၇။ ရွှေခွက်နှင့်ထည့်၍ ထမင်းစားရသည် မြင်မက်မူ ထီပေါက်အံ့။ (သို့)ကြီးကျယ်သော လာဘ်ရအံ့။

၈။ ရေကြည်ကို မြင်မက်မူ အလွန်စိတ်ချမ်းသာအံ့။

၉။ ရေနောက်ကို မြင်မက်မူ အလွန်စိတ်မချမ်းသာအံ့။

၁၀။ ရေထဲ၌ မြွေ၊ ကင်းတို့ကို မြင်မက်မူ ချမ်းသာရောက်အံ့။

 ၁၁။ ရေကန်၏အလယ် ကြာထက်၌ နို့ဃနာ စားရသည်ကို မြင်မက်မူ သူတစ်ပါးထက် ကြီးကျယ်မြင့်မြတ်သူ ဖြစ်အံ့။

၁၂။ ရေသောက်ရသည်ဟု မြင်မက်မူ ဂုဏ်သတင်းတိုးအံ့။

၁၃။ ရေအိုးတွင် လ ကျသည်ဟု မြင်မက်မူ ဘုန်းတန်ခိုးကြီးအံ့။

၁၄။ ရဟန်းသာမဏေ၊ ရသေ့တို့၏ မကောင်းသောအခြင်းအရာ မြင်မက်မူ သမ္မာဒေဝနတ်တို့ မုန်းသဖြင့် ဥပါဒ်ရောက်အံ့။

၁၅။ ရဟန်း၊ ပုဏ္ဏားနှင့် ကြုံရ မြင်မက်မူ ချမ်းသာအံ့။

၁၆။ ရဟန်း၊ ပုဏ္ဏားနှင့် စကားပြောရ မြင်မက်မူ ချမ်းသာအံ့။

၁၇။ ရဟတ်ကို မြင်မက်မူ မကောင်း။

၁၈။ ရှောက်သီး၊ သံပုရာသီး စားရသည်ကို မက်မူ လာဘ်ရအံ့။

၁၉။ ရထားစီးရသည်ကို မြင်မက်မူ မယားကောင်းရအံ့။

၂၀။ ရုပ်ထုကို ဖက်ရသည် မြင်မက်မူ ချမ်းသာကြွယ်ဝအံ့။

၂၁။ ရွှံ့စင်၊ ရွှံ့ထိမက်မူ မကောင်းသတင်း ဖြစ်အံ့။

၂၂။ ရွှံ့ နားဝင်မက်မူ ကျက်သရေ ယုတ်အံ့။

၂၃။ ရယ်စရာပြုမက်မူ ဝမ်းမြောက်စရာ ကိစ္စဖြစ်အံ့။


[ လ ] နှင့် ပတ်သက်သော အိပ်မက်များ

 

၁။ လှေစီးရသည်ကို မြင်မက်မူ ချမ်းသာတိုးအံ့။

၂။ လှေစီးစဉ် ရေနစ်သည်ဟု မြင်မက်မူ ပစ္စည်းဥစ္စာပျက်စီးအံ့။

၃။ လှေစီးလျက် မြစ်ကို ပင်ပန်းစွာ ကူးရသည်ဟု မြင်မက်မူ အရပ်တစ်ပါးပြောင်းပြီး ပြန်ရအံ့။

၄။ လက်နက်ကို ဖက်ရသည်ဟု မြင်မက်မူ ချမ်းသာအံ့။

၅။ လက်ကတုံးတိုင်မ လဲသည်ကို မြင်မက်မူ မယားသေအံ့။

၆။ လက်ကတုံးတိုင်မ လဲသည်ကို မြင်မက်မူ မက်သူ သေအံ့။

၇။ လက်ကတုံးတိုင် လဲသည် မြင်မက်မူ ကိုးကွယ်ထားသော အကြီးအကဲ သေအံ့။

၈။ လူသေကို မြင်မက်မူ စကားဟောင်းပေါ်အံ့။

၉။ လူဦးခေါင်း ပြတ်သည်ကို မြင်မက်မူ ရန်အောင်အံ့။

၁၀။ လူသားစားရသည်ကို မြင်မက်မူ အထွတ်အထိပ်သို့ ရောက်အံ့။

၁၁။လူသားကို ဓားနှင့်လှီး၍ စားရသည်ကို မြင်မက်မူ လူဖြစ်လျှင်အကြီးအကဲဖြစ်အံ့။ 

၁၂။ရဟန်းဖြစ်မူ မင်းဆရာ သာသနာပိုင်ဖြစ်အံ့။

၁၃။လှည်း၊ ပျဉ်၊ တံစဉ်း၊ ဆုံ၊ ချားရဟတ်ကို မြင်မက်မူသူ မကောင်းကြံတတ်အံ့။

၁၄။ လှည်းဘီးကို မြင်မက်မူ အကြီးအကဲဖြစ်အံ့။

၁၅။လက်ကောက်၊ လက်စွပ်၊ ခြေကျင်း ဝတ်ရသည်ဟု မြင်မက်မူ သားကောင်းရအံ့။

၁၆။လက်ကောက်၊ နားထောင်း၊ ဆံကျင် ဝတ်ရသည်ကို မြင်မက်မူ ရာထူးရာခံရအံ့။

၁၆။လက်ကောက်ဝတ်ဆင်မက်မူ သားကောင်းရအံ့။

၁၈။လက်ကိုလည်းကောင်း၊ ပေါင်ကိုလည်းကောင်း၊ ရင်ကိုလည်းကောင်း ကျော့ကွင်းဖွဲ့မြင်မက်မူ သားသမီးရအံ့။

၁၉။လူတို့၏ အူအချင်းကို စားရသည် မြင်မက်မူ ကြွယ်ဝချမ်းသာအံ့။

၂၀။လူ၏ ဦးခေါင်းကို စားရသည်ကို မြင်မက်မူ ထင်ရှားကျော်ကြားအံ့။

၂၁။လက်ယာအံသွားကျိူးသည်ကို မြင်မက်မူ အမျိုးယောက်ျားတို့၌ ဥပါဒ်ဖြစ်အံ့။

၂၂။လက်ဝဲ အံသွားကျိုးသည်ကို မြင်မက်မူ အမျိုးမိန်းမတို့၌ ဥပါဒ်ဖြစ်အံ့။

၂၃။လက်စွပ်ဝတ်ရသည်ဟု မြင်မက်မူ သူစွပ်စွဲအံ့။

၂၄။လက်ဝါးထက် ကြာပန်းရောက်သည်ကို မြင်မက်မူ ကျော်စောအံ့။

၂၅။ပြေးလွှားကစားရသည်ကို မြင်မက်မူ မကောင်း။

၂၆။လည်တို၍ ဦးသျှောင်လှီးမက်မူ နာဖျားတတ်အံ့။

၂၇။လည်ပင်းတိုသည် မြင်မက်မူ နာဖျားတတ်အံ့။

၂၈။လောက်ဖမ်းရသည်ကို မြင်မက်မူ အစားအသောက် ဆန်စပါး ပေါများအံ့။

၂၉။လက်ယာလက်ချောင်းတို့ ကြီးသည်ကို မြင်မက်မူ အမျိုးသားတို့ ကြီးပွားအံ့။

၃၀။လက်ဝဲလက်ချောင်းတို့ ကြီးသည်ကို မြင်မက်မူ အမျိုးသမီးတို့ ကြီးပွားအံ့။

၃၁။လက်ယာလက်သည်း ပုပ်သည် မြင်မက်မူ သား နာဖျားအံ့။

၃၂။လက်ဝဲလက်သည်း ပုပ်သည် မြင်မက်မူ သမီးဖျားနာအံ့။

၃၃။လက်သည်းရှည်သည် မြင်မက်မူ အသက်ရှည်အံ့။

၃၄။လက်ဝဲခြေသည်းပုပ်သည် မြင်မက်မူ အမျိုးသမီး နာဖျားအံ့။

၃၅။လက်ယာခြေသည်း ပုပ်သည် မြင်မက်မူ အမျိုးသား၌ နာဖျားအံ့။

၃၆။လက်ယာခြေသည်းပွင့်သည် မြင်မက်မူ အမျိုးသား၌ လာဘ်ရအံ့။

၃၇။လက်ဝဲခြေသည်းပွင့်သည်ကို မြင်မက်မူ အမျိုးသမီး၌ လာဘ်ရအံ့။

၃၈။လက်ယာလက်သဲပွင့်သည်ကို မြင်မက်မူ သား၌ လာဘ်ရအံ့။

၃၉။လက်ဝဲလက်သဲပွင့်သည်ကို မြင်မက်မူ သမီး၌ လာဘ်ရအံ့။

၄၀။လက်ယာပေါင်ကြီးသည်ကို မြင်မက်မူ ကိုယ့်အောက်နိမ့်သူ အမျိုးသားတို့ ကြီးပွားအံ့။ 

၄၂။လက်ဝဲပေါင်ကြီးသည် မြင်မက်မူ ကိုယ့်အောက်နိမ့်သူ အမျိုးသမီးတို့ ကြီးပွားအံ့။

၄၃။လက်ယာပေါင် ကြုံလှီသည်ကို မြင်မက်မူ ကိုယ့်အောက်ငယ်သူ အမျိုးယောက်ျားတို့ ညှိုးနွမ်းအံ့။ 

၄၄။လက်ဝဲပေါင် ကြုံလှီသည်ကိုမြင်မက်မူ ကိုယ့်အောက်ငယ်သူ အမျိုးသမီးတို့ ညှိုးနွမ်းအံ့။

၄၅။လက်ဝဲပေါင်ပဲ့သည်ကို မြင်မက်မူ အမျိုးမိန်းမတို့ နာဖျားအံ့။

၄၆။လက်ယာပေါင်ပဲ့သည်ကို မြင်မက်မူ အမျိုးသားယောက်ျားတို့ ဖျားနာအံ့။

၄၈။လက်ယာခြေသလုံးကြီးသည် မြင်မက်မူ အမျိုးယောက်ျားတို့ ကြီးပွားအံ့။

၄၉။လက်ဝဲခြေသလုံးကြီးသည် မြင်မက်မူ အမျိုးမိန်းမတို့ ကြီးပွားအံ့။

၅၀။လက်ယာခြေသလုံး ကြုံလှီသည် မြင်မက်မူ အမျိုးယောက်ျားတို့ နွမ်းနယ်အံ့။

၅၁။လက်ဝဲခြေသလုံး ကြုံလှီသည် မြင်မက်မူ အမျိုးမိန်းမတို့ နွမ်းနွယ်အံ့။

၅၂။လက်ယာခြေသလုံးပဲ့သည် မြင်မက်မူ အမျိုးယောက်ျားတို့နာဖျားအံ့။ 

၅၃။လက်ဝဲခြေသလုံးပဲ့သည် မြင်မက်မူ အမျိုးမိန်းမတို့ ဖျားနာအံ့။

၅၄။လက်ယာလက်မောင်းကြီးသည် မြင်မက်မူ သား၊ညီတို့ကြီးပွားချမ်းသာအံ့။ မြင်မက်သူက မိန်းမဖြစ်မူ သားအကြီး၊ မောင်အကြီးတို့ ကြီးပွားချမ်းသာအံ့။ 

၅၅။လက်ဝဲလက်မောင်းကြီးသည်ဟု မြင်မက်မူ သမီး၊ နှမတို့ ကြီးပွားအံ့။

၅၆။လက်ယာလက်ရုံး ပွန်းပဲ့သည်ဟု မြင်မက်မူ နှမ၊ သားသမီးတို့နာဖျားအံ့။ မိန်းမမက်မူ သမီး၊ ညီမတို့ နာဖျားအံ့။

၅၇။လက်ဝဲလက်ရုံးပဲ့သည် မြင်မက်မူ နှမ၊ သားသမီးတို့ နာဖျားအံ့၊။မိန်းမမက်မူ သမီး၊ ညီမတို့ နာဖျားအံ့။

၅၈။လက်ယာလက်မောင်းကြုံလှီသည် မြင်မက်မူ ညီနှင့် သားတို့နာဖျားအံ့။ 

၅၉။လက်ဝဲလက်မောင်း ကြုံလှီသည်ကို မြင်မက်မူ နှမနှင့် သမီးတို့ နာဖျားအံ့။

၆၀။လက်ယာလက်မောင်း သွေးယိုသည်ဟု မြင်မက်မူ ညီ၊ သားတို့ တစ်ရပ်တစ်ပါးသို့ ပြောင်းရွှေ့သွားရအံ့။

၆၁။လက်ဝဲလက်မောင်း သွေးယိုသည်ဟု မြင်မက်မူ ညီမ၊ သမီးတို့ တစ်ပါးသို့ ပြောင်းရွှေ့သွားအံ့။

၆၂။လက်ယာဘက် လက်ငါးချောင်းတွင် တစ်ချောင်းကြီးသည်မြင်မက်မူ သားနှင့်ညီတို့၏ သားသမီးများ ကြီးပွားအံ့။

၆၃။လက်ဝဲဘက် လက်ငါးချောင်းတွင် တစ်ချောင်းကြီးသည် မြင်မက်မူ သမီးနှင့် ညီမတို့၏ သားသမီးများ ကြီးပွားအံ့။

၆၄။လက်ယာလက်ချောင်း ပွန်းပဲ့သည်ဟု မြင်မက်မူ သားနှင့် ညီတို့၏သားသမီးများ နာဖျားအံ့။

၆၅။လက်ဝဲလက်ချောင်း ပွန်းပဲ့သည်ဟု မြင်မက်မူ သမီးနှင့်ညီမတို့၏ သားသမီးများ နာဖျားအံ့။

၆၆။လက်ယာဘက်လက်ချောင်း ပြတ်သည်ဟု မြင်မက်မူသားနှင့်ညီတို့၏ သားသမီးများ ပျက်စီးအံ့။ 

၆၇။လက်ဝဲလက်ချောင်းပြတ်သည်ဟုမက်မူ သမီးနှင့်ညီမတို့၏ သားသမီးများ ပျက်စီးအံ့။

၆၈။လက်ယာနား ကြီးသည်ဟု မြင်မက်မူ ဆွေရင်းမျိုးရင်း မိတ်ဆွေတို့ကြီးပွားအံ့။ 

၆၉။လက်ဝဲနား ကြီးသည်ဟု မြင်မက်မူ ဆွေရင်းမျိုးရင်း မိတ်ဆွေတို့ ညှိုးနွမ်းအံ့။

၇၀။လဲသည်ဟု မြင်မက်မူ တရားရှုံးအံ့။

၇၁။လေးမျက်နှာမှလာ၍ ခိုးသူကို ဖမ်းမက်မူ ချမ်းသာအံ့။

၇၂။လိပ်၊ ငါး စားရသည်ကို မြင်မက်မူ စပါးဆန်ရေ အစားအစာ ပေါကြွယ်ဝအံ့။

၇၃။လိပ်ဥ၊ ဖွပ်ဥမှစ၍ ဥအမျိုးမျိုးစားရသည်ကို မြင်မက်မူ ဆင်းရဲသော်လည်း ကြွယ်ဝချမ်းသာအံ့။

၇၄။လိပ်၊ ငါး ဖမ်းရသည် မြင်မက်မူ ဆန် စပါး ရအံ့။

၇၅။လိင်တိုသည်ကို မြင်မက်မူ မယားအနိုင်ကျင့်ခံရအံ့။

၇၆။လယ်၌ ကြာရောက်သည် ကြာပေါက်သည်ကို မြင်မက်မူ အများ၏ခေါင်းဆောင်ဖြစ်အံ့။

[ ဝ ] နှင့် ပတ်သက်သော အိပ်မက်များ

၁။ ဝက်ပက်ခြင်းကို မြင်မက်မူ ခိုက်ရန်ဖြစ်အံ့။

၂။ ဝက်ပက်ခံရသည်ကို မြင်မက်မူ မကောင်း။

၃။ ဝက်ကို ခြံလှောင်သည်ဟု မြင်မက်မူ ကျော်စောအံ့။

၄။ ဝက်ရူးပြန်မက်မူ ရန်သူရောက်အံ့။

၅။ ဝမ်းတွင်းသို့ ငါးဝင်မည်ဆိုသော အသံကို ကြားရသည်ဟု မြင်မက်မူ သားကောင်းရအံ့။

၆။ ဝမ်းမြောက်ဝမ်းသာ မြင်မက်မူ ကောင်းစားအံ့။

၇။ ဝတ်ဖြူစင်ကြယ်ဝတ်ရ မြင်မက်မူ ချမ်းသာကြွယ်ဝအံ့။

၈။ ဝရမ်းဖမ်းမက်မူ လာဘ်ကြီးရအံ့။


[ သ ] နှင့် ပတ်သက်သော အိပ်မက်များ

 

၁။ သွေးကို ရေချိုးရသည်ဟု မြင်မက်မူ ချမ်းသာအံ့။

၂။ သွေးပေါက်ယိုစီးသည်ဟု မြင်မက်မူ ဘုန်းကြီးအံ့။

၃။ သွေးကိုလည်းကောင်း၊ မြေပြင်၌ လက်နက်တိုက်ကိုလည်းကောင်း၊မြူတိမ်ကင်းစော ကောင်းကင်ကိုလည်းကောင်း၊ နတ်ကိုလည်းကောင်း၊ ပုဏ္ဏားကိုလည်းကောင်း မြင်မက်မူ ချမ်းသာအံ့။

၄။ သမုဒ္ဒရာကိုရေကူးရသည်ကိုမြင်မက်မူ တိုင်းပြည်ခေါင်းဆောင်ဖြစ်အံ့။

၅။ သမုဒ္ဒရာ၌ အိပ်ရာပြု၍ မိန်းမပေါင်းခြံရံလျက်ကာမဂုဏ်ခံစားရသည် ကို မြင်မက်မူ မင်းစိုးရာဇာဖြစ်အံ့။

၆။ သမုဒ္ဒရာရေကို သောက်ရသည် မြင်မက်မူအလွန်ကျော်စော ထင်ရှားအံ့။

၇။ သားသမီးရသည် မြင်မက်မူ ချမ်းသာအံ့။

၈။ သားငါးစားရ၊ မိချောင်းစားရ မြင်မက်မူ လာဘ်ကြီးအံ့။

၉။ သစ်သီးစားရသည်၊ မြိန်သောအရသာကို စားရသည်ကို မြင်မက်မူ လာဘ်ကြီးအံ့။

၁၀။ သစ်သီးလွယ်ပိုးရသည်ဟု မြင်မက်မူ ကောင်းအံ့။

၁၁။ သူတောင်းစားကို မြင်မက်မူ စစ်သည်ဗိုလ်ပါ ဖြစ်အံ့။

၁၂။ သူကောင်းကို ချီရသည်ကို မြင်မက်မူ လာဘ်ရအံ့။

၁၃။ သူငယ်ကို ချီရသည်ကို မြင်မက်မူ လာဘ်ရအံ့။

၁၄။ သူတစ်ပါး သားမယားကို ကျူးလွန်သည်ဟု မြင်မက်မူ မကောင်း၊ဖျားနာအံ့။ သူတစ်ပါးကို စည်းတား ကန့်ကွက်ရသည်ဟု မြင်မက်မူ မကောင်း။

၁၅။ သူခိုးကို ခုတ်ဖြတ်ရသည် မြင်မက်မူ အန္တရာယ်ပျောက်အံ့။

၁၆။ သူ့မျက်စိ၊ သူ့ဦးခေါင်းထုတ်မြင်မက်မူ စည်းစိမ်ဥစ္စာများအံ့။

၁၇။ သာယာသောအသံကို ကြားရသည်ဟု မြင်မက်မူ စိတ်ချမ်းသာ၍ သတင်းကောင်းကြားရအံ့။

၁၈။ သပိတ်၊ ပရိက္ခရာတို့ကို မြင်မက်မူ လာဘ်ရအံ့။

၁၉။ သေရည်သေရက် သောက်ရသည်ဟု မြင်မက်မူ ကြောင့်ကြများအံ့။

၂၀။ သေသူထသည်မြင်မက်မူ စကားဟောင်းပေါ်အံ့။

၂၁။ သင်္ဘောစီးရသည် မြင်မက်မူ သူတစ်ပါးထက် မြတ်အံ့။ယောက်ျားမက်မူ မယားရအံ့။ မိန်းမမက်မူ လင်ရအံ့။

၂၂။ သွားနာသည်၊ နဲ့သည်၊ ယိုင်သည် မြင်မက်မူ ဥစ္စာလျှောအံ့။ဖျားနာအံ့။

၂၃။ သိန္ဓောမြင်းက်ို ရသည်ဟု မြင်မက်မူ အသက်ရှည်အံ့။

[ ဟ ] နှင့် ပတ်သက်သော အိပ်မက်များ

၁။ ဟင်္သာငှက်နှင့် သူရဿတီ မယ်တော်အား မြင်မက်မူ ကောင်းကျိုးပေးအံ့။

၂။ ဟင်းမျိုးစုံစားရသည်မက်မူ ဝမ်းရေးအတွက် စိတ်အေးရအံ့။

၃။ ဟော်နန်းဆောင်ကို မြင်မက်မူ သာယာအေးချမ်းစွာနေရအံ့။

၄။ ဟောက်သံကြားရသည် မြင်မက်မူ စားဝတ်နေရေး အဆင်ပြေအံ့။

၅။ (ကျား) ဟိန်းသံ ကြားရသည် မြင်မက်မူ အကြံပေးသူ ဖြစ်အံ့။


[ အ ] နှင့် ပတ်သက်သော အိပ်မက်များ

 

၁။အိမ်ကို ဆူးရံသည်ဟု မြင်မက်မူ (သို့မဟုတ်) စည်းစောင်ရမ်း ကာရံသည်ဟု မြင်မက်မူ ချမ်းသာအံ့။

၂။အိမ်စောင်း၍ သွားသည်ဟု မြင်မက်မူ ဖရိုဖရဲ အရှက်ကွဲအံ့။

၃။အိမ်ပြိုသွားသည်ဟု မြင်မက်မူ အိမ်ရှင်တို့ အရှက်ရ၍ အကျိုးမဲ့အံ့။

၄။အိမ်ရှိသည့်အရပ်၌ လဟာပြင်ကွင်းအထိ မြင်မက်မူ ၎င်းအရပ်၌မီးလောင်အံ့။ 

၅။အိမ်၌ ထင်းပေါက်ရသည်ဟု မြင်မက်မူ မိုးကြိုးကျအံ့။

၆။အိမ်မီးလောင်သည်ဟု မြင်မက်မူ ဘေးရောက်အံ့။

၇။အိမ်ပြို၊ ဘုရားပြို၊ သစ်ပင်ကျိုးသည်ကို မြင်မက်မူ ဘေးရောက်အံ့။

၈။အိမ်ဝန်းကျင်၌ မှိုပေါက်သော် မိုးကြိုးကျအံ့။

၉။အိမ်ဝင်းထဲ၌ ဆင်၊ မြင်း၊ နွားသွားသည်ကို မြင်မက်မူကောင်းကျိုးရအံ့။ 

၁၀။အိမ်ခေါင်မိုးသို့တက်၍ ရေသောက်ရသည်ဟု မြင်မက်မူ အကြီးအကဲဖြစ်အံ့။

၁၁။အိမ်တွင် ခရမ်းပင်စိုင်သည်ဟု မြင်မက်မူ မကောင်း။

၁၂။အိမ်သစ်ထက်၌ စောင်းတီးသည်ဟု မြင်မက်မူ မင်းဆရာဖြစ်အံ့။

၁၃။အ်ိမ်ရာထောင်ရသည်ဟု မြင်မက်မူ လာဘ်ရအံ့။

၁၄။အုန်းသီး၊ ထန်းသီးကို မြင်မက်မူ လာဘ်ရအံ့။

၁၅။အုန်းသီး၊ ထန်းသီးစားရသည်ဟု မြင်မက်မူ လာဘ်ရအံ့။

၁၆။အေးယာဉ်စီးရသည်ဟူ၍လည်းကောင်း၊ ဝက် စီးရသည်ဟူ၍လည်းကောင်း မြင်မက်မူ သေအံ့။

၁၇။အိုးမည်းလိမ်းကျံရသည်ဟု မြင်မက်မူ မကောင်း။

၁၈။အိုးလည်ပြတ်သည်ကို မြင်မက်မူ မကောင်း။

၁၉။အဝတ်မည်းကို ဝတ်သော သတို့သမီးသည် မည်းသောပန်းကိုပန်လျက် တစ်စုံတစ်ခု စွဲကိုင်သည်ကို မက်မူ သေပျောက်တတ်အံ့။

၂၀။အဝတ်ရွှေရောင်ဝတ်သော အမျိုးသမီးသည် ရွှေရောင်ပန်းကိုပန်လျက် တစ်စုံတစ်ခု စွဲကိုင်သည်ကို မြင်မက်မူ ရာထူးကြီးကိုရအံ့။ 

၂၁။အဝတ်ဖြူဝတ်သော အမျိုးသမီးသည် ဖြူသော ပန်းကိုပန်လျက် တစ်စုံတစ်ရာကိုကိုင်သည်ကို မြင်မက်မူ ကြီးပွားတိုးတက်အံ့။

၂၂။အရူးလှည့်ပတ်ခံရသည်ဟု မြင်မက်မူ သွားလေရာ အရပ်တိုင်းလာဘ်ရအံ့။

၂၃။အနှိပ်စက်ခံရသည်ဟု မြင်မက်မူ သွားလေရာ အရပ်တိုင်းလာဘ်ရအံ့။

၂၄။အစွယ်ရှိသော သတ္တဝါ၊ ဦးချိုရှိသော သတ္တဝါနှင့် မျောက်၊ဝက်တို့၏ အနှိပ်စက်ခံရသည်ဟု မြင်မက်မူ ရာဇဝတ်သင့်အံ့။

၂၅။အဆင်းလှသော ဦးပြည်ကတုံးမိန်းမနှင့် ကာမစပ်ယှက်သည်ဟုလည်းကောင်း၊ ထိပါးရသည်ဟုလည်းကောင်း မြင်မက်မူ ယောက်ျားမြတ်တို့၏ ဆရာခံရအံ့။

၂၆။အထက်ရှေ့သွားကျိုးသည်ဟု မြင်မက်မူ သား၌ ဥပါဒ်ဖြစ်အံ့။

၂၇။အယူမှားသော သူကို မြင်မက်မူ မိစ္ဆာနတ် နှောင့်ယှက်တတ်အံ့။

၂၈။အလိုမတူသူနှင့် ပေါင်းဖော်ရသည်ဟု မြင်မက်မူ သေတတ်အံ့။

၂၉။အရပ်လေးမျက်နှာ လူသူလေးပါးလာသည်ဟု မြင်မက်မူ လာဘ်ရအံ့။ 

၃၀။အလွန်ကြီးသော ကျွဲ၊ နွားမြင်မက်မူ အလွန်ကောင်းအံ့။

၃၁။အပုပ်အစပ်ကို မြင်မက်မူ လာဘ်ရအံ့။

၃၂။အူအပြင်ထွက်သည်ဟု မြင်မက်မူ ကျော်စောအံ့။

၃၃။အသီးရှိသော သစ်ပင်သို့ တက်ရသည်ဟု မြင်မက်မူ ချမ်းသာအံ့။

၃၄။အောက်ရှေ့သွားကျိုးသည်ဟု မြင်မက်မူ မကောင်း။

၃၅။အသီးရှိသော သရက်ပင်၊ ဥသျှစ်ပင်တို့ကို မြင်မက်မူ ဥစ္စာတိုးပွားအံ့။

၃၆။အုတ်ခဲပစ်သည်ဟုမြင်မက်မူ အမှုရောက်အံ့။ တစ်နည်းမြင့်မြတ်အံ့။

၃၇။အခိုးအလျှံတောင်သော မီးပုံကို မြင်မက်မူ လာဘ်ရအံ့။

၃၈။အသံသည်းစွာ ငိုကြွေးရ မြင်မက်မူ ထင်ရှားအံ့။ စည်းစိမ်များအံ့။

၃၉။အနှောင်အဖွဲ့ မြင်မက်မူ ဥစ္စာရအံ့။ အမှုများ မြင်မက်မူ အလွန်ကောင်းအံ့။

၄၀။အပုပ်စား မြင်မက်မူ လာဘ်ရအံ့။ ၎င်းအပုပ်စားပြီး အန်မက်မူမကောင်း။

၄၁။ဥအမျိုးမျိုးစားရသည်ဟု မြင်မက်မူ သူတစ်ပါး အပူဇော်ခံရအံ့။

၄၂။ဥဗျိုင်းဝန်းရံသည်ဟု မြင်မက်မူ သူတစ်ပါး အပူဇော်ခံရအံ့။

၄၃။ဥဒေါင်းသံကို ကြားရသည်ဟု မြင်မက်မူ သတင်းကောင်းကြားရအံ့။

၄၄။ဥယျာဉ်ခြံတို့ကို မြင်မက်မူ လာဘ်ရအံ့။

၄၅။ဦးထုပ်ဆောင်းရသည်ဟု မြင်မက်မူ ချမ်းသာအံ့။

၄၆။ဦးခေါင်းထက်၌ ကြာညိုရောက်သည်ဟု မြင်မက်မူ မယားကောင်းရအံ့။

၄၇။ဦးခေါင်းအပိုရသည်ဟု မြင်မက်မူ နာဖျားအံ့။

၄၈။ဦးခေါင်းပြတ်သည်ဟု မြင်မက်မူ သေတတ်အံ့။

၄၉။ဦးခေါင်းကြီးသည်ဟု မြင်မက်မူ မိဘ၊ ဆရာသမားတို့ ကြီးပွားခြင်းသို့ ရောက်အံ့။

၅၀။ဦးခေါင်းဦးခေါင်းရှည်သည်ဟု မြင်မက်မူ ဆွေမျိုးရောက်အံ့။

၅၁။ဦးခေါင်းပွန်းပဲ့သည်ဟု မြင်မက်မူ မိဘ၊ ဆရာသမားတို့ ကြီးပွားခြင်းသို့ ရောက်အံ့။

၅၂။ဦးခေါင်းကွဲသည်ဟု မြင်မက်မူ မကောင်း။

၅၃။ဦးခေါင်းရှည် မြင်မက်မူ ဆွေများရောက်အံ့၊ ပြန်ပွားအံ့။

Posted by Tuumar at 10:00 am 20 comments:

Saturday 18 June 2022

မုန့်ဟင်းခါး (အချိန်တစ်ဆယ်စာ)



ဒီနေ့တော့ မုန့်ဟင်းခါးလေးချက်စား ဖြစ်ပါတယ် မုန့်ဟင်းခါးကို မိသားစုစားစာ ခပ်နည်းနည်းလေးတွေဘဲ ချက်ဖြစ်တာက များပါတယ်။

ဒီတခါတော့ မုန့်ဟင်းခါး အချိန်တစ်ဆယ်စာကို ချက်ဖို့အတွက် အချိုးအစားလေးတွေ လာလာပြီး မေးကြလွန်းလို့ အချိန်တစ်ဆယ်စာ အချိုးအစားလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ

  1. မုန့်ဖတ် - ၁၀ ပိသာ
  2. ငါးခူ ငါးရံ ငါးကြင်းဖြူ နှစ်သက်ရာ ငါး - ၄ ပိသာ
  3. ကြက်သွန်နီ - ခပ်သေးသေး ၁ပိသာ (မုန့်ဟင်းရည်အိုးထဲထည့်ရန်)
  4. ကြက်သွန်နီ - အလုံးကြီးကြီး - ငါးဆယ်သား (ငါးဆီသတ်ရန်)
  5. ကြက် သွန်ဖြူ -၂၅ ကျပ်သား (ငါးဆီသတ်ရန်)
  6. ချင်း - ၁၀ သား (ငါးဆီသတ်ရန်)
  7. ငရုတ်ပွတောင့် - ငါးကျပ်သား (ငါးပြုပ်ထဲထည့်ရန်)
  8. ငရုတ်သီး အရောင်တင်မှုန့် - ၁၅ ကျပ်သား (ငါးဆီသတ်ရန်)
  9. စပါးလင် - အပင် ၂၀ (ငါးဆီသတ်ရန်)
  10. စပါးလင် - ငါးပင် (ငါးပြုပ်ထဲထည့်ရန်)
  11. ငှက်ပျောအူ - မိမိနှစ်သက်သလောက်ထဲ့ပေးပါ
  12. ငရုတ်ကောင်း - ၁၀သား
  13. ဆန် - ထမင်းပေါင်းအိုး ဆန်ချင်ဗူး လေးဗူး (ဆန်လှော်မှုန့် ပြုလုပ်ရန်)
  14. ကုလားပဲခြမ်း - နှစ်ဆယ်သား
  15. နနွင်းမှုန့် - ထမင်းစားဇွန်း တစ်ဇွန်း (ပဲပြုပ်တဲ့အထဲထည့်ရန်)
  16. မြေပဲဆံ - နှစ်ဆယ်သား
  17. ငါးဖယ်ခြစ် - ၅၀သား
  18. ငါးငံပြာရည် - လိုသလောက် သုံးပါ
  19. ဆီ - ၈၀ သား
  20. ဆား - ထမင်းစားဇွန်း ဆယ်ဇွန်း
  21. နနွင်းမှုန့် - ထမင်းစားဇွန်း တစ်ဇွန်းခွဲ
  22. အချိုမှုန့် - ထမင်းစားဇွန်း သုံးဇွန်း
  23. နံနံပင် - နှစ်သက်သလောက်
  24. ငရုတ်သီး အလှော်မှုန့် - နှစ်သက်သလောက်
  25. နှစ်သက်ရာအကြော် - အချပ် ၁၅၀
  26. သံပုရာသီး - နှစ်သက်သလောက်
  27. ပဲပင်ပေါက် - နှစ်သက်သလောက်
  28. ပဲတောင့်ရှည် - နှစ်သက်သလောက်
  29. ပဲပြုပ် - နှစ်သက်သလောက်
  30. အီကြာကွေး - အချောင်း ၅၀

ဆန်လှော်မှုန့် ပြုလုပ်ရန်

  • အိုးအသားထူသော ဒယ်အိုးထဲမှာ ဆန်ထဲ့ပြီး မီးအနေတော်ဖြင့် လှော်ပေးပါ
  • မီးအား အရမ်းပြင်းပါက ဆန်လှော်က ခနလေးနဲ့ ကျွန်းကုန်ပြီး မမွှေးဘဲ တူးခါးခါးကြီး ဖြစ်သွားတတ်ပါတယ်
  • ဆန်ကိုလှော်နေစဉ် မကြာမကြာ မွှေမွှေပေးပါ
  • ဆန်လှော်များ နီညိုရောင်သန်းလာတာနဲ့ စကောထဲပြောင်းထည့်ပြီး အအေးခံပေးထားပါ
  • ဆန်လှော်များ အေးသွားတာနဲ့ ကြိတ်စက်ထဲထည့်ပြီး ညက်နေအောင် ကြိတ်ပေးထားပါ

ငါးဖယ်ငါးဆုတ်လုပ်ရန် ပြင်ဆင်ပုံ

  • ငါးဖယ်ခြစ်ပြီးသားကို ဆား နနွင်းမှုန့်နှင့် အရသာမှုန့်ထဲ့ကာ ညက်နေအောင် ကြိတ်ပေးပါ
  • ကြိတ်စက် မရှိပါက ငရုတ်ဆုံထဲမှာ အချက်၂၀၀လောက် ထောင်းပေးပါ
  • ငရုတ်ဆုံ မရှိပါက ဇလုံကျယ်ကျယ် တစ်လုံးထဲမှာ အချက်၂၀၀လောက် ပေါက်ပေးပါ
  • ပြီးတာနဲ့ အနေတော် အလုံးလေးတွေ လုံးပေးပါ
  • အဆင်သင့် ဖြစ်တာနဲ့ ဒယ်အိုးထဲမှာ ဆီထည့်ပြီး အပူပေးပါ
  • ဆီပူလာတာနဲ့ အပေါ်ယံ တင်းလာတယ် ဆိုရုံလေး ကြော်ပေးပြီး ဆယ်ထားပါ
  • အားလုံး ကြော်ပေးပြီးတာနဲ့ ဇောက်နက်သော အိုးတစ်လုံးထဲမှာ ရေထဲ့ပြီး ပွက်ပွက်ဆူအောင် တည်ပေးပါ
  • ရေပွက်ပွက် ဆူလာတာနဲ့ ကြော်ထားသော ငါးဖယ်များကို ၅မိနစ်ခန့် ပြုပ်ပေးပြီး ပြန်ဆယ်ထားပါ
  • ငါးဖယ်ကြော်ကို ကပ်ကြေးနှင့် အနေတော်လေးတွေ ညှပ်ပေးပြီး ပြင်ထားပါ
ငရုတ်ကောင်းလှော််ထောင်းရန်
  • ငရုတ်ကောင်းစေ့များကို အိုးထဲမှာထဲ့ပြီး မီးအနေတော်နှင့် လှော်ပေးပါ
  • ငရုတ်ကောင်းစေ့များကို မွှေးလာအောင် လှော်ပေးပြီး ညက်နေအောင် ထောင်းထားပါ
ပဲပြုပ်ရန်
  • ကုလားပဲခြမ်းကို ရေလေးထပ်လောက် ဆေးပေးပါ
  • ရေဆေးပြီးတာနဲ့ ဇောက်နက်သော အိုးထဲမှာ ကုလားပဲခြမ်းများကို ရေမြုပ်အောင် ထည့်ပေးပါ
  • ပြီးတာနဲ့ နနွင်းမှုန့်ထည့်ကာ ပဲကို နူးအိလာတဲ့အထိ ပြုပ်ပေးပါ
  • ပထမ တရည်နှင့် ပဲများမနူးပါက ပဲများနူးအိလာတဲ့အထိ ရေထပ်ထပ်ထည့်ပြီး ပြုပ်ပေးပါ
  • ပဲများ နူးအိသွားတာနဲ့ ဇကာအပေါက် ခပ်စိတ်စိတ်ထဲထည့်ကာ ပဲများကို အနှစ်ရအောင် တိုက်ထားပါ။
မြေပဲဆံလှော်ရန်
  • မြေပဲဆံကို ဒယ်အိုးထဲမှာထည့်ပြီး မီးအနေတော်နှင့် လှော်ပေးပါ
  • မြေပဲဆံလေးတွေ ကြွတ်ရွလာပါက မီးပိတ်ပြီး အအေးခံကာ အခွံများ ခြွတ်ပေးပါ
  • အခွံများ ခြွတ်ပြီးတာနဲ့ ညက်နေအောင် ထောင်းပေးထားပါ။

ငှက်ပျောအူလှီးရန်

  • ဇလုံတစ်လုံးထဲမှာ ရေနှင့် နနွင်းမှုန့်ကိုထည့်ပြီး ငှက်ပျောအူစိမ်ရန် အရည်ဖျော်ထားပါ
  • ငှက်ပျောအူကို အကြောသင်ပြီး အနေတော်လှီးကာ ဇလုံထဲထည့်ပြီး နနွင်းရည်နှင့် စိမ်ထားပေးပါ
  • ငါးပြုပ်ပုံ

    • မိမိ အသုံးပြုမည့်ငါးကို မလိုတာတွေ ဖယ်ပေးပြီး သန့်စင်ကာ ရေစင်အောင် ဆေးထားပါ
    • စပါးလင် ငါးပင်ကို ရေဆေးပြီး ထုပေးထားပါ
    • ဇောက်နက်သော အိုးတစ်လုံးထဲမှာ ငါးကိုထည့်ပြီး ငရုတ်ပွတောင့် နနွင်းမှုန့် ငါးငံပြာရည် ဆီအနည်းငယ်နှင့် စပါလင်ထုထားတာကိုထည့်ပြီး ရေအနည်းငယ်ထည့်ကာ ပြုပ်ပေးပါ
    • ပြုပ်ထားသော ငါးအသားများ နူးလာတာနဲ့ မီးဖိုပေါ်မှဖယ်ပြီး အအေးခံပေးကာ အရိုးအသား ထွင်ပေးထားပါ
    • ငါးပြုပ်ရည်ထဲမှ စပါးလင် အဖတ်များနှင့် ငရုတ်သီးများကို ညက်နေအောင် ထောင်းပေးပြီး ရေအနည်းငယ်နှင့် အရည်ငင်ထားပါ။
    ငါးဆီသတ်ရန်
    • ကြက်သွန်နီများကို အခွံခွာပြီး ရေဆေးထားပါ
    • ကြက်သွန်ဖြူကို အခွံခွာပြီး ရေဆေးထားပါ
    • ငရုတ်သီး အရောင်င်တင်မှုန့်ကို ပြင်ထားပါ
    • ချင်းကိုအခွံခွာပြီး ရေဆေးထားပါ
    • ပြီးတာနဲ့ ငရုတ်တ်သီး အရောင်တင်မှုန့် ချင်း ကြက်သွန်နီနှင့် ကြက်သွန်ဖြူကို ညက်နေအောင် ရောပြီးထောင်းပေးပါ
    • ဒယ်အိုးထဲမှာ ဆီနှင့် နနွင်းမှုန့်ထည့်ပြီး အပူပေးပါ
    • ဆီပူလာတာနဲ့ ငရုတ်သီးထောင်းကိုထည့်ပြီး ဆီသတ်ပေးပါ
    • ဆီသတ်နံ့ သင်းလာတာနဲ့ အသားထွင်ထားသော ငါးများကို ထည့်မွှေပေးပါ
    • ငါးအသားများ ခြောက်ပြီး မွလာတာနဲ့ မီးပိတ်ပေးထားပါ
    မုန့်ဟင်းရည်ချက်ရန်
    • ခပ်ကြီးကြီး အိုးတစ်လုံးထဲမှာ ငါးပြုပ်ရည် စပါးလင်နှင့် ငရုတ်သီးရောထောင်းထားတာတို့ကို ငင်ထားသောအရည် ရေနှင့်ဆီသတ်ထားသော ငါးများကို ထဲ့ပေးကာ မီးဖိုပေါ် တင်ကာ ပွက်ပွက်ဆူအောင် တည်ပေးပါ
    • ကြက်သွန်နီ ၅၀ဆယ်သားကို အခွံခွာပြီး အလုံးလိုက် ရေဆေးထားပါ
    • ဆန်လှော်မှုန့်ကို ရေထည့်ပြီး ဖျော်ထားပါ
    • အနှစ်တိုက်ထားသော ပဲအနှစ်များကို ရေနှင့်ဖျော်ထားပါ
    • တည်ထားသော ဟင်းရည်အိုး ပွက်ပွက်ဆူလာတာနဲ့ ငှက်ပျောအူများ ထောင်းထားသော မြေပဲဆံများ အချိုမှုန့် ဆန်မှုန့်ဖျော်ရည် ပဲအနှစ်ဖျော်ရည်နှင့် ငံပြာရည်တို့ကို ထည့်ကာ ဆက်တည်ပေးပါ
    • ဆန်အနှစ်များ အိုးမကပ်စေရန် အထက်အောက် မကြာမကြာ မွှေမွှေပေးပါ
    •  ကြက်သွန်နီ ငါးဖယ်ကြော်နှင့် ငံပြာရည်တို့ကို ထည့်ပေးပါ
    • ဟင်းရည်အိုး ပွက်ပွက်ဆူ လာတာနဲ့ ကြက်သွန်နီနှင့် ငါးဖယ်ကြော်တို့ထည့်ကာ အရသာ မြည်းပေးပါ
    • အရသာ မြည်းပြီးတာနဲ့ အရသာကို လိုသလို ပြင်ပေးကာ ငရုတ်ကောင်းမှုန့်ကို ထည့်ပေးပါ
    • ငှက်ပျောအူနှင့် ကြက်သွန်နီများ နူးလာတာနဲ့ မီးကို အနည်းငယ်လေးဘဲ ထားပေးပြီး မီးဖိုပေါ်မှာ တင်ထားပေးပါ

    မုန့်ပွဲပြင်ရန်

    • မုန့်ဖတ်ကို အဆင်သင့် ပြင်ထားပါ
    • နံနံပင်ကို ရေဆေးပြီး အနေတော် ပိုင်းဖြတ်ထားပါ
    • ငရုတ်သီး အလှော်မှုန့်ကို အဆင်သင့် ပြင်ထားပါ
    • သံပုရာသီးကို ရေဆေးပြီး အစိတ်လေးတွေ စိတ်ပေးထား
    • ပဲပင်ပေါက်ကို ရေဆေးပြီး ရေစစ်ထားပါ
    • ပဲတောင့်ရှည်ကို ရေဆေးပြီး မထူမပါးလေးတွေ လှီးထားပါ
    • ပဲပြုပ်ကို အဆင်သင့် ပြင်ထားပါ
    • အီကြာကွေးကို မထူမပါးလေးတွေ ညှပ်ထားပါ
    • မိမိနှစ်သက်ရာ အကြော်များကို အဆင်သင့် ပြင်ထားပါ
    • အားလုံးအဆင်သင့် ဖြစ်တာနဲ့ မုန့်ဟင်းခါး စားသုံးရန် မုန့်ပွဲပြင်ပေးလို့ ရပါပြီ။

    Friday 17 June 2022

    ဝက်ကြိတ်သား ဘုံလုံသီး အစာသွပ်

     



    ဘုံလုံသီး အစာသွတ်လေးတွေ ချက်ကြတဲ့အခါမှာ အထဲက အစာကို ပုဇွန် ကြက်သား ဝက်သား အမဲသား အစရှိသည်ဖြင့် အသားလေးတွေနဲ့ အစာသွတ်တတ်ကြပါတယ်။

    ဒီနေ့တော့ ဘုံလုံသီးကို ဝက်သားနဲ့ အစာသွတ်လေး ချက်ပါမယ် မဆိုသလောက်လေး လက်ဝင်ပေမဲ့ စားလို့အရမ်းကောင်းတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေလိုက်ပါတယ်ရှင်။

    ပါ၀င်ပစ္စည်းများ
    1. ဘုံလုံသီး - နှစ်တောင့် 
    2. ဝက်ကြိတ်သား - 250 g
    3. ကြက်သွန်နီ - ဥကြီးကြီး တစ်လုံး
    4. ကြက်သွန်နီ - အနေတော် တစ်ဥ (ဆီသတ်ရန် အနည်းငယ် ချန်ထားပါ)
    5. ချင်း - လက်တစ်ဆစ်သာသာ
    6. ကြက်သွန်ဖြူ - အမွှာကြီးကြီး ၄မွှာ (ဆီသတ်ရန် တစ်၀က်ချန်ထားပါ )
    7. ကြက်ဥ - တစ်လုံး
    8. ဆား - လက်ဖက်ရည်ဇွန်း တစ်ဇွန်း (တစ်၀က်ကို အစာထဲ ထည့်ပေးပါ)
    9. အချိုမှုန့် - လက်ဖက်ရည်ဇွန်း တစ်ဇွန်း (တစ်၀က်ကို အစာထဲ ထည့်ပေးပါ)
    10. နနွင်းမှုန့် - လက်ဖက်ရည်ဇွန်း တစ်၀က် (ဆီသတ်ရန် တ၀က်ချန်ထားပါ )
    11. ငရုတ်သီး အရောင်တင်မှုန့် - လက်ဖက်ရည်ဇွန်း တစ်ဇွန်းသာသာ
    12. ဆီ - ထမင်းစားဇွန်း ၈ဇွန်းသာသာ 
    13. ပဲဆီ - ထမင်းစားဇွန်း တစ်ဇွန်းခွဲ

    ပြင်ဆင်ပုံ
    • ဘုံလုံသီးကို အတောင့်လိုက်ကိုင်ကာ အပေါ်ယံ အမှေးအဖြူရောင်များ ကုန်သွားအောင် ဓါးနှင့် ခြစ်ပေးပါ
    • နှစ်တောင့်လုံး အမှေးပါးများ ခြစ်ပြီးတာနဲ့ အတောင့်လိုက် ရေဆေးပြီး ပုံပါအတိုင်း မိမိနှစ်သက်သလောက် အရှည်အနေအထား ရအောင် လှီးပေးပါ 
    • လှီးထားသော ဘုံလုံသီးအထဲမှ အစေ့များကို တစ်ဖက်ပိတ်ချန်ပြီး တစ်ဖက်မှ အရိုးရှည်သော ဇွန်းဖင်နှင့် ကလော်ထုတ်ပေးပါ
    • ကလော်ထုတ်ထားသော ဘုံလုံစေ့များနှင့် အမျှင်များကို အစေ့အရမ်း မရင့်ပါက ဓါးနှင့်နုတ်နုတ် စဉ်းပေးထားပါ
    • ကြက်သွန်နီကို အခွံခွာပြီး ရေဆေးကာ ခပ်နုပ်နုပ် လှီးထားပါ
    • ဝက်ကြိတ်သားကို ဇလုံထဲထည့်ကာ ပဲဆီ ကြက်ဥ ငရုတ်သီး အရောင်တင်မှုန့် လက်ဖက်ရည်ဇွန်း တဝက် ဆား နနွင်းမှုန့် နုတ်နုတ်စဉ်းထားသော ဘုံလုံစေ့များနှင့် အချိုမှုန့်တို့ထည့်ကာ နယ်ထားပါ
    • ကြက်သွန်နီ အနေတော်ဥကို အခွံခွာပြီး ရေဆေးကာ ခပ်နုပ်နုပ် လှီးထားပါ
    • ကြက်သွန်ဖြူကို အခွံခွာပြီး ရေဆေးကာ ခပ်နုတ်နုတ် လှီးထားပါ
    • ချင်းကိုအခွံခွာပြီး ရေဆေးထားကာ လှီးထားသော ကြက်သွန်နီ ကြက်သွန်ဖြူနှင့် ငရုတ်သီး အရောင်တင်မှုန့်တို့ထည့်ကာ ညက်နေအောင် ထောင်းပေးပါ
    • အားလုံး အဆင်သင့် ဖြစ်တာနဲ့ ဘုံလုံသီးများကို အစာသွပ်ဖို့ ပြင်ပေးပါ
    • အရသာ နယ်ထားသော အစာကို ဇွန်းလေးတစ်ခုနှင့်ခပ်ပြီး ဘုံလုံသီးထဲကို တစ်ခုခြင်း အစာသွပ်ပေးပါ
    • အစာသွပ်ပြီးလို့ ပိုနေတဲ့ အစာတွေကို ဆီသတ်ရန် ချန်ထားပေးပါ
    • ဘုံလုံသီးများ အစာသွပ်ပြီးပြီဆိုတာနဲ့ ဇောက်နက်သော ဒယ်အိုးကို အပူပေးကာ ဆီနှင့်နနွင်းမှုန့်တို့ကိုထည့်ပါ
    • ဆီပူလာတာနဲ့ ငရုတ်သီးထောင်းကို မွှေးလာအောင် ဆီသတ်ပေးပါ 
    • ဆီသတ်နံ့ မွှေးလာတာနဲ့ ပိုနေသော အစာအသားများကိုထည့်ပြီး ဆီသတ်ပါ
    • ဆီသတ်ထားသော ကြက်သားများ မာလာပါက အစာသွပ်ထားသော ဘုံလုံသီး အစာသွပ်များကို ထည့်ပေးပါ
    • ဘုံလုံသီးများ အိုးမကပ်စေရန် အိုးကိုအသာ လှုပ်လှုပ်ပေးပါ 
    • ပြီးတာနဲ့ အိုးအဖုံး အုပ်ပေးပြီး အသားများ မကပ်စေရန် အိုးကို မကြာမကြာ လှုပ်ပေးပါ
    • ပြီးတာနဲ့ ဘုံလုံသီးများ မမြုပ်တစ်မြုပ် ရေထည့်ပေးကာ အဖုံးအုပ်ပြီး တည်ပေးပါ
    • ရေပွက်ပွက် ဆူလာပါက ဆားနှင့် အချိုမှုန့်ထည့်ပြီး မွှေပေးကာ အရသာ မြည်းပေးပါ
    • အရသာ အနေတော် ဖြစ်ပြီဆို အထက်အောက် အသာလှန်ပေးပြီး ရေကိုမိမိနှစ်သက်သလောက်ထားကာ မီးပိတ်ပေးပါ
    • ဘုံလုံသီး ဝက်သား အစာသွပ် မွှေးမွှေးလေးကို စားပွဲပြင်ပေးကာ သုံးဆောင်နိူင်ပါပြီ။

    Tuesday 14 June 2022

    ငါးဆားနယ်လုပ်နည်း

     




    မာမာ ဒီနေ့တော့ ငါးဆားနယ်လေး လုပ်ဖြစ်ပါတယ် ငါးဆားနယ်နဲ့ ငါးပိကောင် လုပ်နည်းလေးက ခပ်ဆင်ဆင် တူပေမဲ့ ငါးဆားနယ်က ရက်တိုတို အတွင်းမှာ ကြော်စား ချက်စား စားလို့ရပါတယ်။

    ငါးပိကောင်ကတော့ ငါးဆားနယ်လုပ်ရတဲ့ ရက်ထက် သူ့ကို ရက်ကြာကြာလေးထားမှ ငါးပိကောင် အရသာ ရလာပါတယ်။

    ဒါကြောင့်မို့လို့ မာမာတို့ နယ်ဘက်က ဘောလယ်ငါးပိလုပ်နည်း ငါးပိကောင်လုပ်နည်း ငါးဆားနယ်လုပ်နည်းလေးတွေထဲက ငါးဆားနယ် လုပ်နည်းလေးကို မျှဝေပေးလိုက်ပါတယ်ရှင်။

    ပါ၀င်ပစ္စည်းများ
    1. က ကတစ်ငါး တစ်ကောင် - တစ်ကီလိုခန့်
    2. ဆား - ထမင်းစားဇွန်း လေးဇွန်းမောက်မောက် 
    ငါးဆားနယ်လုပ်ရန်
    1. ငါးကို ငါးခေါင်း ဆူးတောင်များ အကျေးခွံများနှင့် ဗိုက်ထဲမှ မလိုတာတွေ ဖယ်ပေးပြီး ရေစင်အောင်ဆေးပေးပါ
    2. ရေဆေးပြီးတာနဲ့ ရေစစ်သွားအောင် ဇကာထဲထဲ့ပြီး ရေစစ်ထားပါ
    3. ရေစစ်သွားတာနဲ့ ငါးနှင့်ဆားတို့ကို ဇလုံကျယ်ကျယ်ထဲမှာထဲ့ပြီး ဆားအရသာ ဝင်သွားအောင် ဆုတ်ဆုတ်ပြီး နယ်ပေးပါ
    4. ပြီးတာနဲ့ သန့်ပြန့်သော ပလပ်စတစ်အိတ်ထဲကို ဆားနယ်ထားသော ငါးကို ထဲ့ပေးပါ
    5. ငါးထဲ့ထားသော ပလပ်စတစ်အိတ်ကို လုံနေအောင်ပိတ်ပြီး ဇလုံထဲ ထည့်ပေးကာ အပေါ်မှ အလေးတစ်ခုခုနဲ့ ဖိထားပါ
    6. နှစ်ရက်လောက် ရပါက ဖိထားသော ငါးထဲမှ ဆားရည်များ အပြင်သို့ ထွက်လာလျှင် သွန်မပြစ်ဘဲ ဒီအတိုင်း ထားပေးပါ
    7. ရေခဲသေတ္တာထဲ့ ထဲ့စရာ မလိုဘဲ မီးဖိုဆောင် အတွင်းရှိတဲ့ အခန်းအပူချိန်နဲ့ဘဲ ထားထားပါ
    8. ရေခဲသေတ္တာထဲ ထည့်လိုက်ပါက ငါးဆားနယ် အနံ့ အရသာ မရတော့ဘဲ ရေခဲရိုက်ထားသော ငါးအရသာကြီးသာ ရလာပါလိမ့်မယ်
    9. မီးဖိုဆောင် အခန်းအတွင်းမှာ သုံးရက်မှ လေးရက်အတွင်း ထားလိုက်ရင် ငါးဆားနယ် အနံ့လေးမွှေးကာ မာတင်းနေသော ငါးဆားနယ် ရပါပြီ။

    Saturday 11 June 2022

    ဝက်နံရိုး မျှစ်ချဉ်ဟင်း

     


    ဒီနေ့တော့ ဝက်နံရိုးနဲ့ မျှစ်ချဉ်ကို ချက်ပါမယ် မျှစ်ချဉ်နဲ့ အသားရောပြီး ချက်လေတိုင်း အသားက အရသာနည်းသွားပေမဲ့ မျှစ်ချဉ်က အရသာ အရမ်းရှိတာမို့လို့ မျှစ်ချဉ်ကို ပိုပြီး ထည့်ထားပါတယ်။

    စားမဲ့ လူဦးရေ နည်းရင်တော့ ချင့်ချိန်ပြီး ချက်စေချင်ပါတယ် လွယ်ကူတဲ့ ချက်နည်းလေးပေမဲ့ ထမင်းစားလို့ မြိန်စေတဲ့ ဟင်းတစ်မျိုးဖြစ်လို့ မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။

    ပါ၀င်ပစ္စည်းများ
    1. မျှစ်ချဉ် - 1 kg
    2. ဝက်နံရိုး - 500 g 
    3. ကြက်သွန်ဖြူ - အမွှာကြီးကြီး ၂မွှာ
    4. ကြက်သွန်နီ - အနေတော် တစ်လုံး
    5. ချင်း - ခပ်ပါးပါး ၃ပြားလောက်
    6. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
    7. ငါးငံပြာရည် - ထမင်းစားဇွန်း ၂ဇွန်း
    8. အချိုမှုန့် - လက်ဖက်ရည်ဇွန်း တစ်၀က်သာသာ
    9. ငရုတ်သီးအရောင်တင်မှုန့် - လက်ဖက်ရည်ဇွန်း တစ်ဇွန်း
    10. ဆီ - ထမင်းစားဇွန်း ၄ဇွန်း
    11. ဆန်ဆေးရည် - မျှစ်ချဉ်မြုပ်လောက်အောင် ဆန်ဆေးစဉ် ယူထားပါ

    ပြင်ဆင်ပုံ
    • ဝက်နံရိုးများကို အတုံးလိုက် ရေဆေးပြီးမှ ရေစစ်ကာ အနေတော် တုံးထားပါ
    • ပြီးတာနဲ့ ဇလုံတစ်လုံးထဲထည့်ပြီး ဆား ငံပြာရည် အချိုမှုန့် နနွင်းမှုန့်တို့ နှင့် အရသာ၀င်အောင် နယ်ထားပါ
    • မျှစ်ချဉ်ကို အချဉ်ပေါ့စေရန်နှင့် အဆိပ်အတောက် ပြေစေရန် ဆန်ဆေးရည်နှင့် မြုပ်အောင်ထည့်၍ တစ်နာရီလောက် စိမ်ထားပြီးမှ ရေဆေးထားပါ
    • ကြက်သွန်ဖြူ ကြက်သွန်နီ ချင်း ငရုတ်သီးမှုန့်တို့ကို ညက်နေအောင် ရောထောင်းပေးထားပါ
    • အရည် သောက်ဆမ်းဟင်း အနေအထား ချက်မှာ ဖြစ်တဲ့အတွက် ဝက်နံရိုးကို ဆီနိုင်နိုင် သတ်ပေးပြီးမှ ချက်ပေးပါ
    • ဇောက်နက်သော အနေတော် အိုးတစ်လုံးထဲမှာ ဆီကိုထည့်ပြီး အပူပေးပါ
    • ဆီပူလာတာနဲ့ ငရုတ်သီးထောင်းကို ထည့်ပြီးဆီသတ်ပါ
    • ဆီသတ်နံ့ မွှေးလာတာနဲ့ အရသာ နယ်ထားသော ဝက်နံရိုးကိုထည့်ပြီး ဆီသတ်ပါ
    • ဝက်နံရိုးများ ထည့်ပြီးပြီးခြင်း အထက်အောက် အရသာမျှအောင် သုံးလေးချက်လောက် မွှေပေးပါ
    • ဝက်နံရိုးများ လုံးမိစေရန် ရေအနည်းငယ် ထည့်ပေးပြီး အဖုံးအုပ်ကာ တည်ပေးပါ
    • ဝက်နံရိုးများ အရောင်ပြောင်းလာပြီး လုံးမိပြီဆိုတာနဲ့ မျှစ်ချဉ်များထည့်ပြီး ၂ချက်လောက် သမအောင် မွှေလိုက်ပါ
    • ပြီးတာနဲ့ ရေမြုပ်အောင်ထည့်ပြီး ပွက်ပွက်ဆူအောင် တည်လိုက်ပါ
    • ရေပွက်ပွက် ဆူလာတာနဲ့ အရသာမြည်းပြီး မိမိစိတ်ကြိုက် လိုသလို ပြင်ပေးပါ
    • မျှစ်ချဉ်က အငံများတဲ့အတွက် အငံအရသာကို ချင့်ချိန်ပြီးထည့်ပေးပါ
    • မျှစ်ချဉ်ဟင်းရည် ပထမ တစ်ရည်ခမ်းအောင် တည်လိုက်ပြီး နောက်တစ်ရည် မြုပ်အောင် ထပ်ထည့်ပြီး တည်ပေးပါ
    • ဟင်းရည် ပွက်ပွက်ဆူလာပြီ ဆိုတာနဲ့ မျှစ်ချဉ်နံ့ မွှေးနေတဲ့ ဝက်နံရိုး မျှစ်ချဉ်ဟင်းကို စားသုံးနိူင်သလို မီးကိုလျှော့လိုက်ပြီး မီးမျှင်းမျှင်းနဲ့ တစ်နေကုန် တည်ထားပြီး စားပါက ပိုပြီးစားကောင်းတဲ့ ဝက်နံရိုး မျှစ်ချဉ်ဟင်းကို အရသာရှိစွာ စားသုံးနိူင်ပါပြီ။

    Friday 10 June 2022

    ထမင်းပေါင်း

     




    ဒီနေ့တော့ ထမင်းပေါင်းလေး လုပ်ဖြစ်ပါတယ် စားလို့ကောင်းတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။
    ပါဝင်ပစ္စည်းများ
    1. ပဲပြား - တစ်တုံး
    2. ကြက်သွန်နီ - အလုံးသေး ငါးဥခန့်
    3. ပဲတောင့်ရှည်   - လေးတောင့်
    4. မုန့်ညှင်းဖြူ - အနေတော် တစ်စိတ်
    5. မုံလာဥနီ - အနေတော် တစ်ဥ
    6. ကြက်သွန်မိတ် - နှစ်ပင်ခန့်
    7. ကြက်သွန်ဖြူ - အမွှာကြီးကြီး သုံးမွှာ
    8. တရုတ်နံနံ - အခက်ကြီးကြီး နှစ်ခက်
    9. ပြောင်းကော်မှုန့်. - ထမင်းစားဇွန်း နှစ်ဇွန်းမောက်မောက်
    10. သကြား - ထမင်းစားဇွန်း တစ်ဇွန်း 
    11. ဆား - လက်ဖက်ရည်ဇွန်း တစ်ဇွန်း
    12. ပဲငံပြာရည်အနောက်ရည် - ထမင်းစားဇွန်း တစ်ဇွန်း
    13. ကြက်ပြုပ်ရည် chicken stock - 2 cups
    14. ဆီ - ထမင်းစားဇွန်း သုံးဇွန်း 
    15. ငရုတ်ကောင်းမှုန့် - လက်ဖက်ရည်ဇွန်း တစ်ဝက်
    16. ချက်ပြီးသား ထမင်း - လိုသလောက် 

    ပြင်ဆင်ပုံ

    • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
    • ကြက်သွန်နီကို အခွံခွာပြီး ရေဆေးထားပါ
    • ပဲပြားကို ရေဆေးပြီး အတုံးလေးတွေ တုံးထားပါ
    • ပဲသီးကို ရေဆေးပြီး အနေတော်လေးတွေ လှီးထားပါ
    • မုန့်ညှင်းဖြူကို ရေဆေးပြီး အနေတော် မထူမပါးလေးတေံ လှီးထားပါ
    • မုံလာဥနီကို အခွံခွာပြီး ရေဆေးကာ မိမိနှစ်သက်သလို လှီးထားပါ
    • တရုတ်နံနံကို ရေဆေးပြီး ခပ်ကြမ်းကြမ်း လှီးထားပါ
    • အသီးအရွက် မကြော်ခင် ကော်ရည်ကို ဖျော်ထားပေးပါ
    • ပြောင်းကော်မှုန့် သကြား ဆားတို့ကို ရေ တရုတ်ဟင်းရေသောက်ပန်းကန် တစ်လုံးစာလောက်နဲ့ ဖျော်ထားပေးပါ
    အသီးအရွက် ကြော်ရန်ပြင်ဆင်ပုံ
    • ပါဝင်ပစ္စည်း အားလုံးကို အဆင်သင့် ပြင်ထားပါ
    • ဇောက်နက်သော အိုးတစ်လုံးကို အပူပေးပြီး ဆီထည့်ပေးပါ
    • ဆီပူလာပါက ဓါးပြားရိုက်ထားသော ကြက်သွန်ဖြူကို မွှေးလာတဲ့အထိ ကြော်ပေးပါ
    • ကြက်သွန်ဖြူ အနံ့လေး မွှေးလာတာနဲ့ ကြက်ပြုပ်ရည်ကို ထည့်ပေးပါ 
    • ကြက်ပြုပ်ရည် ပွက်ပွက်ဆူလာတာနဲ့  ငရုတ်ကောင်းမှုန့်နှင့်  တရုတ်နံနံမှလွဲပြီး အားလုံးကို ထည့်ပေးပါ
    • ရေကို ဆယ်မိနစ်လောက် ပေးဆူပြီးမှ ဖျော်ထားသော ကော်ရည်ကို လောင်းထည့်ပြီး မွှေပေးပါ
    • ကော်ရည်ပျစ်လာပါက ကြက်ဥနှင့် ပဲငံပြာရည်ကို ထည့်မွှေပေးပါ
    •  အရသာကို မြည်းပေးပြီး မိမိစိတ်ကြိုက် အရသာ ရလာအောင် ပြင်ပေးပါ
    • ပြီးတာနဲ့  ငရုတ်ကောင်းမှုန့်နှင့် တရုတ်နံနံကို ထည့်မွှေပြီးတာနဲ့ မီးပိတ်ပေးပြီး ပန်းကန်ထဲ ပြောင်းထည့်ပေးပါ
    • ပန်းကန်ပြား တစ်ချပ်ထဲမှာ ထမင်းကို ထည့်ပေးကာ ကော်ရည်ကို ဆမ်းပေးပါ
    • ပဲပြားကော်ရည် ပူပူလေးကို ထမင်းပူပူနဲ့ တွဲဖက်ပြီး စားသုံးရန် ပြင်ပေးနိုင်ပါပြီ။

    Thursday 9 June 2022

    ကြာဇံချက်

     



    ရာသီဥတုက အရမ်းအေးခဲနေတဲ့အတွက် ပူပူစပ်စပ်လေးတွေဘဲ စားချင်နေမိတော့တယ် ဒါကြောင့်မို့လို့ ဒီနေ့တော့ ကြာဇံချက်လေး ချက်ဖြစ်ပါတယ်။

    ကြာဇံချက် ချက်နည်းလေး မကြာမကြာ တင်ဖြစ်တဲ့အတွက် ကြာဇံချက်ထဲ ထည့်ရမဲ့ ပါဝင်ပစ္စည်းတွေက အရင်ချက်နေကျအတိုင်း ပါဝင်ပစ္စည်းတွေက အတူတူပါဘဲ။

    ဒါကြောင့်မို့လို့ ဒီနေ့ မာမာပြင်ဆင်ပြီး ချက်ထားတဲ့ ကြာဇံချက် ချက်နည်းလေးကို မျှဝေလိုက်ပါတယ်ရှင်။

    ပါ၀င်ပစ္စည်းများ
    1. ကြက်ရင်ပုံသား - နှစ်ဆယ်သား
    2. ဆား -လက်ဖက်ရည်ဇွန်း တစ်ဇွန်း (ကြက်သားပြုပ်ရန်)
    3. ငါးငံပြာရည် - ထမင်းစားဇွန်း တစ်ဇွန်း (ကြက်သားပြုပ်ရန်)
    4. နနွင်းမှုန့် - လက်ဖက်ရည်ဇွန်း သုံးပုံတစ်ပုံ (ကြက်သားပြုပ်ရန်)
    5. ကြက်ရိုး - သုံးဆယ်သားခန့်
    6. ဆား - လက်ဖက်ရည်ဇွန်း တစ်ဇွန်း (ကြက်ရိုးပြုပ်ရန်)
    7. ပဲကြာဇံ အခြောက် – 200 g
    8. ကြက်သွန်နီ - ခပ်သေးသေး ၅လုံး (ဟင်းရည်ထဲထည့်ရန်)
    9. ကြက်သွန်နီ - အလုံးကြီးကြီး တစ်လုံး (အချဉ်တည်ရန်)
    10. ကြက်သွန်နီ အနေတော် တစ်လုံး (ကြက်သားဆီသတ်ရန်)
    11. ကြက်သွန်ဖြူ - သုံးမွှာ (ကြက်သားဆီသတ်ရန်)
    12. ငရုတ်သီးစိမ်း - စားနိူင်သလောက် (အချဉ်တည်ရန်)
    13. သံပုရာသီး - သုံးလုံးခန့် (အချဉ်တည်ရန်)
    14. ဆား - လက်ဖက်ရည်ဇွန်း သုံးပုံတစ်ပုံ (အချဉ်တည်ရန်)
    15. ဂေါ်ဖီ - တစ်စိတ်ခန့် (အချဉ်တည်ရန်)
    16. နံနံပင် - စားနိူင်သလောက်
    17. မှိုခြောက် – 30 gခန့်
    18. ပဲလိပ်ခြောက် – 30 g
    19. ပန်းခြောက် – 30 gခန့်
    20. နနွင်းမှုန့် – လက်ဖက်ရည်ဇွန်း တစ်၀က် (ဆီသတ်ရန်)
    21. ငရုတ်သီး အရောင်တင်မှုန့် – လက်ဖက်ရည်ဇွန်း တစ်ဇွန်း (ဆီသတ်ရန်)
    22. ဆား – လက်ဖက်ရည်ဇွန်း ၂ဇွန်း
    23. ငါးငံပြာရည် – ထမင်းစားဇွန်း ၄ဇွန်း
    24. အချိုမှုန့် – လက်ဖက်ရည်ဇွန်း ၂ဇွန်း
    25. ဆီ – ထမင်းစားဇွန်း ၄ဇွန်း
    26. ကြက်သွန်ဖြူ  - လေးမွှာ (ဟင်းရည်အနံ့ အရသာအတွက် သုံးရန်)
    27. ငရုတ်ကောင်း - ၁၀စေ့ခန့် (ဟင်းရည်အနံ့ အရသာအတွက် သုံးရန်)

    အချဉ်နှင့် တွဲဖက်စားရန်အတွက် ပြင်ဆင်ရန် 
    ပါ၀င်ပစ္စည်းများ
    1. ကြက်သွန်နီကို အခွံခွာ၍ အလုံးလိုက် ရေဆေးပြီး ပါးပါးလှီးကာ ရေဆေးတစ်ထပ် ဆေးထားပါ
    2. ငရုတ်သီးစိမ်းကို ရေဆေးပြီး ပါးပါးလှီးထားပါ
    3. ဂေါ်ဖီကို ခပ်ပါးပါးလှီးပြီး ရေဆေးထားကာ အားလုံးကို ဆားနှင့် သံပုရာသီး တခြမ်းညှစ်၍ နယ်ထားပါ
    4. နံနံပင်ကို ရေဆေးပြီး အနေတော် လှီးထားပါ
    5. သံပုရာသီးကို အစိတ်လေးတွေ စိတ်ထားပါ
    6. ငရုတ်သီးအလှော်မှုန့်ကို  ပြင်ထားပါ
    7. ငါးငံပြာရည်ကို ပြင်ထားပါ

     ကြက်သားဆီသတ်ရန် ပြင်ဆင်ပုံ
    • ကြက်သားကို ရေဆေးပြီး ငါးငံပြာရည် ဆားနှင့် နနွင်းမှုန့်တို့ထည့်ကာ အရသာဝင်အောင် နယ်ပေးပါ
    • ပြီးတာနဲ့ ဇောက်နက်သော အနေတော်အိုးထဲမှာ ကြက်သားကို ရေမြုပ်အောင်ထည့်ပြီး ပြုပ်ပေးပါ
    • ပြုပ်ထားသော ရေခမ်းတာနဲ့ မိမိနှစ်သက်သလို အတုံးလေးတွေ တုံးထားပါ
    • ကြက်သွန်ဖြူ ကြက်သွန်နီတို့ကို အခွံခွာပြီး ငရုတ်သီး အရောင်တင်မှုန့်နှင့် ညက်နေအောင် ထောင်းပေးပါ
    • ပြီးတာနဲ့ ဒယ်အိုးထဲမှာ ဆီထည့်ပြီး အပူပေးပါ
    • ဆီပူလာတာနဲ့ ငရုတ်သီးထောင်းပြီးသားကို ထည့်ပြီးဆီသတ်ပေးပါ
    • ဆီသတ်နေစဉ် မကြာမကြာ မွှေပေးပြီး ငရုတ်သီးထောင်းများ မွလာပါက ကြက်သားပြုပ်ကို ထည့်ပေးပါ
    • ဆီသတ်နံ့လေး သင်းလာပါက မီးပိတ်ထားပါ
    ကြက်ရိုးပြုပ်ရန်
    • ကြက်ရိုးများကို အနေတော် ခုတ်ပိုင်းပြီး ရေဆေးပြီး ဇောက်နက်သော အိုးထဲမှာ ထည့်ပေးပါ
    • အရင်ဆုံး ကြက်ရိုးများမြုပ်အောင် ရေထည့်ပြီး ပြုပ်ပေးပါ
    • ကြက်ရိုး ပြုပ်နေစဉ် အပေါ်မှာ တက်လာသော အမြှုပ်များပို ခပ်ပြီးသွန်သွန်ပေးပါ
    • အရိုးမှ အချိုရည်များ ထွက်လောက်ပါက မီးပိတ်ထားပေးပါ
    ဟင်းရည်ချက်ရန် ပြင်ဆင်ပုံ
    • ပဲကြာဇံ မှိုခြောက် ပန်းခြောက် ပဲလိပ်တို့ကို သတ်သတ်ဇလုံ တစ်လုံးစီမှာ ရေမြုပ်အောင်ထည့်ပြီး တစ်နာရီလောက် စိမ်ထားပါ
    • ရေစိမ်ချိန် ပြည့်ပါက ပဲကြာဇံ ပဲလိပ်နှင့် ပန်းခြောက်တို့ကို ရေဆေးပြီ ရေစစ်ထားပါ
    • မှိုခြောက်မှာ ကပ်နေသော သဲနှင့်ခဲများ စင်သွားအောင် ရေ ငါးထပ်လောက် ဆေးပြီးရေစစ်ထားပါ
    • ကြက်သွန်နီ အလုံးသေးများကို အခွံခွာပြီး ရေဆေးထားပါ
    • ကြက်သွန်ဖြူ သုံးမွှာကို အခွံခွာပြီး ရေဆေးကာ ငရုတ်ကောင်းနှင့် ရောထောင်းထားပါ
    • အားလုံး အဆင်သင့် ဖြစ်ပါက ကြက်ရိုးပြုပ်ရည် အိုးထဲကို ဆီသတ်ထားသော ကြက်သားများ ထည့်ပေးပါ
    • ရေကိုအနေတော် ချင့်ချိန်ထည့်ပြီး ဟင်းရည်အိုးကို ပွက်ဆူပွက်အောင် တည်ပေးပါ
    • ဟင်းရည်အိုး ပွက်ပွက်ဆူလာတာနဲ့ ကြက်သွန်နီ ပဲလိပ် မှိုခြောက် ပန်းခြောက်တို့ကို ထည့်ပေးကာ ပွက်ပွက် ဆူလာအောင် ထပ်ပြီး တည်ပေးပါ
    • ပြီးတာနဲ့ ပဲကြာဇံ ငါးငံပြာရည် ဆားနှင့် အရသာမှုန့်တို့ကို ထည့်ပြီးမွှေပေးကာ အရသာ မြည်းပေးပါ
    • အရသာကို မိမိစိတ်ကြိုက် ရလာအောင် ပြင်ပေးပြီး ထောင်းထားသော ငရုတ်ကောင်း ကြက်သွန်ဖြူထောင်းကို ခပ်ပေးပါ
    • ပြီးတာနဲ့ မီးပိတ်ပြီး ဟင်းရည်အိုးကို မီးဖိုပေါ်မှ ဖယ်ထားပေးပါ
    •  သံပုရာသီး ကြက်သွန်ချဉ် ငရုတ်သီးစိမ်း ငရုတ်သီးအလှော်မှုန့် နံနံပင်တို့နှင့် သုံးဆောင်နိူင်မည့် ကြာဇံချက် ပူပူလေး ရပါပြီ။

    Wednesday 8 June 2022

    အမဲသားစင်းကော ခရမ်းသီးနှပ်

     


    မာမာဒီနေ့တော့ အမဲသား စင်းကောလေးနဲ့ ခရမ်းသီး နှပ်ပါတယ် ရာသီဥတု အေးအေးလေးမှာ ငရုတ်သီး ခပ်စပ်စပ်လေးနဲ့မှ လိုက်ဖက်မှာမို့လို့ ငရုတ်သီး အနှစ်များများနဲ့ ချက်ထားတဲ့ ဟင်းချက်နည်းလေးကို မျှဝေလိုက်ပါတယ်။

    ပါ၀င်ပစ္စည်းများ
    1. ခရမ်းသီး - အလုံးကြီးကြီး သုံးလုံး
    2. ကြက်သွန်ဖြူ - အမွှာ ကြီးကြီး လေးမွှာ
    3. ကြက်သွန်နီ - ဥကြီးကြီး တစ်လုံး
    4. အမဲသားစင်းကော - 200 g
    5. ဆား - လက်ဖက်ရည်ဇွန်း တစ်ဇွန်း
    6. ငရုတ်သီးအစိမ်းမှုန့် - လက်ဖက်ရည်ဇွန်း နှစ်ဇွန်း
    7. အရသာမှုန့် - လက်ဖက်ရည်ဇွန်း တစ်ဝက်သာသာ
    8. နနွင်းမှုန့် - လက်ဖက်ရည်ဇွန်း လေးပုံတစ်ပုံ
    9. ဆီ - ထမင်းစားဇွန်း လေးဇွန်း
    ပြင်ဆင်ပုံ
    • အမဲသားကို ရေဆေပြီး ညက်နေအောင် စင်းထားပါ
    • ကြက်သွန်ဖြူနှင့် ကြက်သွန်နီတို့ကို အခွံခွာပြီး ရေဆေးကာ ညက်နေအောင် ထောင်းထားပါ
    • ကြက်သွန်ဖြူ  ကြက်သွန်နီ ငရုတ်သီးမှုန့် ဆား အရသာမှုန့် နနွင်းမှုန့်နှင့် အမဲသားတို့ပို  ဇလုံတစ်လုံးမှာ ရောနယ်ထားပေးပါ
    • ခရမ်းသီးကို အညှာမဖြုတ်ဘဲ အညှာနားထိ လေးစိတ်စိတ်ပြီး ရေဆယ်မိနစ်လောက် စိမ်ထားပေးပါ
    • ပြီးမှရေစစ်ပြီး  အားလုံးရောနယ်ထားသော အစာများကို ခရမ်းသီးစိတ်များကြားထဲ သွပ်ပေးပါ 
    • အစားသွပ်ပြီးသော ခရမ်းသီးများကို ဒယ်အိုးထဲတွင် ရေမြုပ်အောင်ထဲ့ပြီး ဆီထဲ့၍ အဖုံးအုပ်ပြီး တည်ထားပေးပါ 
    • ရေပွက်ပွက် ဆူလာပြီး အရမ်းမခမ်းခင် အရသာမြည်းပြီး မိမိစိတ်ကြိုက် အရသာ ရလာအောင် ပြင်ပေးပါ
    • ရေခမ်းပြီး ခရမ်းသီး နူးအိသွားပါက အမဲသား ခရမ်းသီးနှပ် စပ်စပ်အိအိလေးကို ထမင်းပူပူလေးနှင့် စားသုံးလို့ ရပါပြီ။

    Tuesday 7 June 2022

    က ကတစ် ငါးဆားနယ်ဟင်း

     

    မာမာဒီနေ့တော့ က ကတစ်ငါးလေးတွေ ဝယ်လာပြီး ငါးဆားနယ်လေးလုပ်ကာ အချဉ်ဆီလည်ရေလည်ဟင်းလေး ချက်ဖြစ်ပါတယ်။
    ထမင်းစားလို့ မြိန်စေတဲ့ ဟင်းလေးဖြစ်တဲ့အတွက် မာမာပြင်ဆင်ပြီး ချက်ထားတဲ့ ငါးဆားနယ် ဟင်းချက်နည်းလေးကို မျှဝေပေးလိုက်ပါတယ်ရှင်။

    ပါ၀င်ပစ္စည်းများ
    1. က ကတစ်ငါး - တစ်ကောင် (တစ်ကီလိုခန့်)
    2. ဆား - ထမင်းစားဇွန်း သုံးဇွန်း (ငါးဆားနယ်လုပ်ရနိ)
    3. ကြက်သွန်နီ - အနေတော် တစ်ဥ
    4. ကြက်သွန်ဖြူ - အမွှာကြီးကြီး နှစ်မွှာ
    5. ချင်း - လက်တစ်ဆစ်ခန့်
    6. ငရုတ်သီး အရောင်တင်မှုန့် - လက်ဖက်ရည်ဇွန်း တစ်ဇွန်း
    7. ဆား - လက်ဖက်ရည်ဇွန်း တစ်ဝက် ( ဟင်းချက်ရန်)
    8. အရသာမှုန့် - လက်ဖက်ရည်ဇွန်း တစ်ဝက်သာသာ
    9. ငါးငံပြာရည် - ထမင်းစားဇွန်း တစ်ဇွန်း
    10. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
    11. မန်ကျည်းသီးမှည့် - ကွမ်းသီးဆံလုံးလောက် တစ်လုံးစာ (ဟင်းချက်ရန်)
    12. ဆီ - ထမင်းစားဇွန်း ၅ဇွန်း
    13. နံနံပင် - မိမိနှစ်သက်သလောက် ထည့်ပေးပါ
    ပြင်ဆင်ပုံ

    • ငါးကို အကြေးခွံနှင့် မလိုတာတွေ ဖယ်ပေးပြီး သန့်စင်ကာ ရေဆေးပြီး ရေစစ်ပေးပါ
    • ရေစစ်သွားတာတဲ့ ဆားများများနှင့် နယ်ပေးကာ လေလုံရေလုံသော အိတ်ထဲမှာ ထည့်ပေးကာ တစ်ညသိပ် ထားထားပေးပါ
    • နောက်နေ့ ဟင်းမချက်ခင် ငါးမှာကပ်နေသော ဆားများကုန်သွားအောင် ရေ လေးငါးထပ်လောက် ဆေးပေးပါ
    • အားလုံးပြီးပါက ငံပြာရည် ထမင်းစားဇွန်းတစ်ဇွန်း နနွင်းမှုန့် လက်ဖက်ရည်ဇွန်း သုံးပုံတစ်ပုံ အရသာမှုန့် လက်ဖက်ရည်ဇွန်း တစ်၀က်သာသာတို့နဲ့ နယ်ကာ နာရီဝက်လောက် နှပ်ထားပေးပါ
    • မန်ကျည်းသီးမှည့်ကို ရေနှစ်ထပ်လောက်ဆေးပြီး ရေနွေးနှင့် စိမ်ထားပေးပါ
    • ကြက်သွန်နီ ကြက်သွန်ဖြူ  ချင်းတို့ကို အခွံခွာပြီး ရေဆေးကာ ငရုတ်သီးမှုန့်နှင့်ရောပြီး ညက်နေအောင် ထောင်းပေးပါ
    ဟင်းချက်ရန်
    • အားလုံးအဆင်သင့် ဖြစ်တာနဲ့ ဒယ်အိုးထဲမှာ ဆီထည့်ပြီး ဆီကို အပူပေးပါ
    • ဆီပူလာတာနဲ့ ထောင်းထားသော ကြက်သွန်များနှင့် ငရုတ်သီးအရောင်တင်မှုန့်ရောပြီး ထောင်းထားတို့ကို အတူထည့်ပြီး မွှေးလာအောင် ဆီသတ်ပါ
    • ဆီသတ်နံ့ မွှေးလာပါက ငရုတ်သီး ထောင်းထားသော ငရုတ်ဆုံကို ရေအနည်းငယ်နှင့် ကျင်းကာ ဆီသတ်တဲ့ အိုးထဲကို ထည့်ပေးပါ
    • ပြီးတော့မှ ငါးကိုထည့်ပြီး ငါးအသား မာလာတဲ့ထိ မမွှေဘဲ အိုးကိုလှုပ်ပြီး ဆီသတ်ပေးပါ
    • ငါးအသား မာလာပါက မန်ကျည်းသီးမှည့် အရည်ကို ငါးထဲမြုပ်အောင် ထည့်ပေးပါ
    • ရေဆူပြီး ဆီကျန်ရေကျန် အချိန်မှာ အရသာမြည်းပြီး လိုသလို ပြင်ပေးကာ နံနံပင် အုပ်ပေးပါ
    • က ကတစ်ငါး ငါးဆားနယ် ငါးဟင်း အရသာ ချဉ်ငံစပ်လေး ရလာတာနဲ့ မီးပိတ်ပေးပြီး ထမင်းပူပူလေးနဲ့ သုံးဆောင်နိုင်ရန် ပြင်ပေးနိူင်ပါပြီ။

    Monday 6 June 2022

    သံပုယိုသီးသုပ်

     

    အခုရက်ထဲ ရာသီဥတု အေးစိမ့်စိမ့်လေး ဖြစ်နေချိန်မှာ ချဉ်ချဉ်ငံငံ စပ်စပ်လေးတွေ စားချင်နေတဲ့အတွက် သံပုယိုသီးကို ချဉ်ချဉ်ငံငံ စပ်စပ်လေး သုပ်စားဖြစ်ပါတယ်။
    ဒါကြောင့်မို့လို့ ထမင်းပူပူလေးနဲ့ စားရလေအောင် မာမာပြင်ဆင်ပြီး သုပ်ထားတဲ့ အသုပ် သုပ်နည်းလေးကို မျှဝေပေးလိုက်ပါတယ်ရှင်။

    ပါ၀င်ပစ္စည်းများ
    1. သံပုယိုသီး - ခပ်ကြီးကြီး တစ်လုံး
    2. ကြက်သွန်နီ - ဥကြီးကြီး တစ်ဥ
    3. ငရုတ်သီးစိမ်း - မိမိစားနိူင်သလောက်
    4. ပုဇွန်ခြောက်မှုန့် - ထမင်းစားဇွန်း နှစ်ဇွန်း
    5. ပဲအကျက်မှုန့် - ထမင်းစားဇွန်း တစ်ဇွန်း
    6. ငါးငံပြာရည် - ထမ်းစားဇွန်း တစ်ဇွန်း
    7. ဟင်းချိုမှုန့် - လက်ဖက်ရည်ဇွန်း တစ်ဝက်
    8. ငရုတ်သီးအလှော်မှုန့် - ထမင်းစားဇွန်း တစ်၀က်သာသာ
    9. ကြက်သွန်နီဆီချက် - ထမင်းစားဇွန်း တစ်ဇွန်းခွဲ 

    သံပုယိုသီး အချဉ်ပေါ့ပြီး မခါးစေရန် ဆားရည်စိမ်နည်း
    • ဇလုံတစ်လုံးထဲမှာ ဆားထမင်းစားဇွန်း တစ်ဇွန်းကို ရေ ထမင်းပေါင်းအိုး ဆန်ချင်ဗူး နှစ်ဗူးနှင့်ဖျော်ပေးပါ
    • သံပုယိုသီးကို အခွံခွာပြီး အမွှာလေးများ ထွင်ပေးကာ ဆားရည်ထဲမှာ နာရီ၀က်လောက် စိမ်ပေးထားပါ
    ပြင်ဆင်ပုံ
    • ကြက်သွန်နီကို အခွံခွာပြီး ရေဆေးကာ ခပ်ပါးပါး လှီးထားပါ
    • ငရုတ်သီးစိမ်းကို ရေဆေးပြီး ခပ်ပါးပါး လှီးပေးထားပါ
    • အသုပ်သုပ်ရန် ပါ၀င်ပစ္စည်းများကို ပြင်ထားပါ
    • ဇလုံကျယ်ကျယ် တစ်လုံးထဲမှာ ငရုတ်သီးစိမ်း ကြက်သွန်နီ ပဲအကျက်မှုန့် ငံပြာရည် ပုဇွန်ခြောက်မှုန့် ဟင်းချိုမှုန့် ဆီချက် ငရုတ်သီးမှုန့်တို့နှင့်အတူ ဆားရည်စိမ်ထားသော သံပုယိုသီးအဖတ်လေးများကို ရေညှစ်ပြီးထည့်ကာ အားလုံးကို ခပ်ဖွဖွ နယ်ပေးပါ
    • အရသာ နယ်ပြီးပါက အရသာမြည်းပြီး  မိမိနှစ်သက်တဲ့ အရသာ ရလာအောင် ပြင်ပေးကာ ချဉ်ငံစပ် သံပုယိုသီးသုပ်လေးကို နှစ်သက်သလို စားသုံးနိူင်ပါပြီ။

    Saturday 4 June 2022

    ငုံးဥ ချဉ်ရည်ဟင်း

     


    ဒီနေ့တော့ ကြက်ဥ ဘဲဥတွေအစား ငုံးဥလေးတွေနဲ့ ချဉ်ရည်ဟင်း ချက်ဖြစ်ပါတယ် ချက်နည်းလေးကတော့ မကြာမကြာ ချက်ဖြစ်တဲ့ ကြက်ဥ ဘဲဥချဉ်ရည်ဟင်းတို့ ချက်တဲ့နည်း  အတိုင်းဘဲ ချက်ထားတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။

    ပါ၀င်ပစ္စည်းများ
    1. ငုံးဥ - ငါးလုံး
    2. အာလူး - အလုံးနှစ်ဆယ်
    3. ကြက်သွန်နီ - အနေတော် တစ်ဥ
    4. ကြက်သွန်ဖြူ - အမွှာကြီးကြီး၃မွှာ
    5. ချင်း - လက်တစ်ဆစ်
    6. မန်ကျည်းသီးမှည့်အနှစ် - လက်ဖက်ရည်ဇွန်း တစ်ဝက်သာသာ
    7. မဆလာ - လက်ဖက်ရည်ဇွန်း တစ်ဝက်
    8. ငါးငံပြာရည် - ထမင်းစားဇွန်း ၂ဇွန်း
    9. ဆား - လက်ဖက်ရည်ဇွန်း တစ်၀က်
    10. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
    11. ငရုတ်သီးအရောင်တင်မှုန့်. - လက်ဖက်ရည်ဇွန်းတစ်ဇွန်း
    12. အရသာမှုန့် - လက်ဖက်ရည်ဇွန်းတစ်ဇွန်း
    13. ဆီ - ထမင်းစားဇွန်း ၅ဇွန်း

    ပြင်ဆင်ပုံ
    • ငုံးဥများကို ကျက်အောင် ပြုပ်ပေးပြီး အခွံခွာထားပါ
    • အာလူးကို အခွံခွာပြီး လေးစိတ်စိတ်ကာ ရေဆေးထားပါ
    • ကြက်သွန်နီ ကြက်သွန်ဖြူ  ချင်းတို့ကို အခွံခွာပြီး ရေဆေးကာ ငရုတ်သီး အရောင်တင်မှုန့်နှင့် ရောပြီး ညက်နေအောင် ထောင်းပေးပါ
    • ပါ၀င်ပစ္စည်းများကို ပြင်ထားပါ
    • ဒယ်အိုးတစ်လုံးထဲမှာ ဆီနှင့်နနွင်းမှုန့်ထည့်ပေးကာ အပူပေးပါ
    • ဆီပူလာပါက ထောင်းထားသော ကြက်သွန်နီ ကြက်သွန်ဖြူ  ချင်း ငရုတ်သီးမှုန့်ထောင်းတို့ကို ထည့်ပေးကာ မွှေးလာတဲ့အထိ ဆီသတ်ပေးပါ
    • ငရုတ်သီးနံ့မွှေးလာတာနဲ့အာလူးကိုထည့်ပေးပြီး ငါးငံပြာရည်ကိုပါ တစ်ခါထဲ ထည့်ပေးပြီး ဆီသတ်ပေးပါ
    • ငံပြာရည်နံ့ သင်းလာပြီး အာလူးအရောင် ပြောင်းလာတာနဲ့ ရေမြုပ်အောင်ထည့်ပြီး တည်ပေးပါ
    • ပြီးတာနဲ့ အရသာမှုန့်နှင့် ဆားထည့်ကာ အာလူးနူးအောင် တည်ပေးပါ
    • အာလူးနူးလာတာနဲ့ မန်ကျည်းသီးမှည့် အနှစ်ထည့်ပေးကာ ဟင်းရည်ကို အရသာမြည်းပြီး လိုသလို ပြင်ပေးပါ
    • ဟင်းရည်အရသာ အနေတော် ရလာတာနဲ့ ငုံးဥများကို ထည့်ပေးကာ တည်ပေးပါ
    • ဆီကျန်ရေကျန် အနေအထားလေး ရလာတာနဲ့ မဆလာအုပ်ပေးကာ မီးပိတ်ပေးပြီးတာနဲ့ ငုံးဥချဉ်ရည်ဟင်းကို စားသုံးနိုင်ပါပြီ။