Wednesday 29 December 2021

ကြက်သားကြာစေ့ အချိုနှပ်

 

ဒီနေ့တော့ ကြာစေ့လေးတွေ ဝယ်လာဖြစ်တာနဲ့ ကြက်သားနဲ့ ကြာစေ့ကို အချိုနှပ်လေး ချက်ဖြစ်ပါတယ် ထမင်းပူပူလေးနဲ့ လိုက်ဖက်လွန်းတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။


ပါဝင်ပစ္စည်းများ
  1. ကြက်ရင်ပုံသား - 400 
  2. ကြာစေ့ - မိမိနှစ်သက်သလောက်
  3. ဆား - လက်ဖက်ရည်ဇွန်း တစ်ဝက်
  4. ငရုတ်ကောင်းမှုန့် - လက်ဖက်ရည်ဇွန်း လေးပုံတစ်ပုံ
  5. Cooking wine - လက်ဖက်ရည်ဇွန်း တစ်ဇွန်း
  6. ချင်းတက် - လက်တစ်ဆစ်ခန့်
  7. ပဲငံပြာရည်အပျစ် - ထမင်းစားဇွန်း တစ်ဇွန်း
  8. ပဲငံပြာရည်အကြည် -ထမင်းစားဇွန်း တစ်ဇွန်း
  9. ခရုဆီ - ထမင်းစားဇွန်း တစ်ဇွန်း
  10. နှမ်းဆီမွှေး - လက်ဖက်ရည်ဇွန်း တစ်ဇွန်း
  11. ရေ - လိုသလောက် သုံးပေးပါ (ဟင်းချက်ရန်)
  12. ရေ - ထမင်းပေါင်းအိုး ဆန်ချင်ဗူး တစ်ဗူး (အရသာစပ်ရန်)
  13. ဆီ - ထမင်းစားဇွန်း လေးဇွန်း
ပြင်ဆင်ချက်ပြုပ်ပုံ
  • ကြက်သားကို ရေစင်အောင်ဆေးပြီး အနေတော် အတုံးလေးတွေ တုံးပေးပါ
  • တုံးထားသော ကြက်သားကို cooking wine ဆား ငရုတ်ကောင်းမှုန့်တို့နှင် ့ အရသာဝင်အောင် နယ်ထားပါ
  • ကြာစေ့များကို အနေတော် အိုးတစ်လုံးထဲမှာ ရေခပ်များများ ထည်ပေးပြီး နူးနေအောက် ပြုပ်ပေးထားပါ
  • ချင်းတက်ကို အခွံခွာပြီး ခပ်ပါးပါးလေးတွေ လှီးထားပါ
  • ပန်းကန်လုံး တစ်ခုထဲမှာ ပဲငံပြာရည်အကြည် ပဲငံပြာရည်အပျစ် နှမ်းဆီမွှေး ခရုဆီနှင့် ရေ တို့ထည့်ပြီး သမအောင် မွှေထားပါ
  • အားလုံးအဆင်သင့် ဖြစ်တာနဲ့ ဒယ်အိုးထဲမှာ ဆီထည့်ပြီး အပူပေးပါ
  • ဆီပူလာတာနဲ့ ချင်းပြားလေးတွေကို မွှေးလာတဲ့အထိ ထည့်ကြော်ပေးပါ
  • ချင်းနံ့လေး သင်းလာတာနဲ့ အရသာ နယ်ထားသော ကြက်သားကို ထည့်ကြော်ပေးပါ
  • ကြက်သား အသားလေးတွေ မာတင်းလာတာနဲ့ ရေမြုပ်အောင်ထည့်ပြီး ရေခမ်းတဲ့အထိ တည်ပေးပါ
  • ရေခမ်းတာနဲ့ အရသာ စပ်ထားသော ပဲငံပြာရည်ကို ထည့်မွှေပေးပါ
  • အဲငံပြာရည်များ ပွက်ပွက်ဆူလာတာနဲ့ ကြာစေ့များကို ထည့်မွှေပေးပြီး အရသာ မြည်းပေးပါ
  • မိမိစိတ်ကြိုက် အရသာ ရလာအောင် ပြင်ပေးပြီးတာနဲ့ ထမင်းပူပူလေးနဲ့ စားသုံးရန် ကြက်သားကြာစေ့နှပ်ကို ပြင်ပေးနိူင်ပါပြီ။

Tuesday 28 December 2021

မှို မာလာဟင်း

 

ဒီနေ့တော့ oyster မှိုလေးတွေ ဝယ်လာပြီး မာလာအနှစ်လေးနဲ့ ချဉ်ငံစပ်လေး ချက်ပါတယ် ထမင်းပူပူလေးနဲ့ လိုက်ဖက်လွန်းတဲ့အတွက် မာမာပြင်ဆင်ပြီး ချက်ထားနဲ့ နည်းလေးပို မျှဝေပေးလိုက်ပါတယ်ရှင်။


ပါဝင်ပစ္စည်းများ
  1. Oyster mushrooms - 400 g
  2. မာလာအနှစ် - ထမင်းစားဇွန်း သုံးဇွန်း
  3. မန်ကျည်းသီးမှည့် - ကွမ်းသီးဆံလုံးလောက်
  4. ရေနွေး - အနည်းငယ် (မန်ကျည်းသီးမှည့် ရေစိမ်ရန်)
  5. ဆား - လက်ဖက်ရည်ဇွန်း - တစ်ဝက်
ပြင်ဆင်ချက်ပြုပ်ပုံ
  • မှိုများမှ မလိုတာတွေ ဖယ်ပေးပြီး ရေစင်အောင်ဆေးကာ မထူမပါးလေးတွေ လှီးပေးထားပါ
  • မန်ကျည်းသီးမှည့် အနှစ်ကို ရေတစ်ထပ် ဆေးပေးပြီး ရေနွေးပူပူနဲ့ စိမ်ထားပေးပါ
  • အိုးတစ်လုံးထဲမှာ မှိုများကို ရေမြုပ်အောင်ထည့်ပြီး တည်ပေးပါ
  • ပထမ တစ်ရည် မခမ်းခင်း မာလာအနှစ်ကို ထည့်မွှေပေးကာ မန်ကျည်းနှစ် အရည်နှင့် ဆားတို့ကို  ထပ်ထည့်ပေးပြီး တည်ပေးပါ
  • အရသာ သမသွားအောင် သုံးလေးခါလောက် မွှေပေးပြီး အရသာမြည်းပေးပါ
  • မိမိစိတ်ကြိုက် အရသာ ရလာအောင် ပြင်ပေးပြီး ရေခမ်းတဲ့အထိ တည်ပေးပါ
  • ရေခမ်းတာနဲ့ မှိုမာလာဟင်းကို ထမင်းပူပူလေးနဲ့ စားသုံးရန် ပြင်ပေးနိူင်ပါပြီ။

Saturday 18 December 2021

ပြောင်းဖူးဟင်းချို

 

ဒီနေ့တော့ ပြောင်းဖူး လတ်လတ်ဆတ်ဆတ်လေးတွေ ဝယ်လာပြီး ဟင်းချိုရည်လေး ချက်ပါတယ် သောက်လို့ ကောင်းလွန်းတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
  1. ပြောင်ဖူး - အဖူးကြီးကြီး နှစ်ဖူး (လတ်လတ်ဆတ်ဆတ်ကို သုံးပေးပါ)
  2. ဆား - လက်ဖက်ရည်ဇွန်း တစ်ဇွန်း
  3. အရသာမှုန့် - လက်ဖက်ရည်ဇွန်း တစ်ဝက်
  4. ပြောင်းကော်မှုန့် - ထမင်းစားဇွန်း နှစ်ဇွန်းခွဲ
  5. ရေ - ထမင်းပေါင်းအိုး ဆန်ချင်ရာတွင် သုံးသောဗူး နှစ်ဗူး
  6. ရေ - ဟင်းရည်ချက်ရန် လိုသလောက် သုံးပေးပါ
ပြင်ဆင်ပုံ
  • ဇလုံပန်းကန် တစ်လုံးထဲမှာ ရေနှ င့်ပြောင်းကော်တို့တို အရည်ပျော်အောင် ဖျော်ထားပေးပါ
  • ပြောင်းဖူးကို အခွံခွာပြီး မလိုတာတွေ ဖယ်ကာ အဖူးလိုက် ရေဆေးပေးပါ
  • ရေဆေးပြီးတာနဲ့ ဓါးနှင့် မထူမပါးလေးတွေ လှီးချပေးပါ
  • ဇောက်နကိသော အနေတော် အိုးထဲမှာ ပြောင်းဖူးများကို ရေမြုပ်တဲ့အထိ ထည့်ပေးပြီး ပြုပ်ပေးပါ
  • ပထမ တစ်ရည် မခမ်းခင် နောက်ထပ် ပြောင်းဖူးမြုပ်အောင် ရေထပ်ထည့်ပြီး ဆက်တည်ပေးပါ
  • ဒုတိယ ရေမခမ်းခင် တရုတ်ဟင်းရည်သောက် ပုံမှန် ပန်းကန်းလုံး တစ်လုံးခွဲစာ ထည့်ပေးပြီး တည်ပေးပါ
  • ရေ ပွက်ပွက် ဆူလာတာနဲ့ ဆား အရသာမှုန့်နှင့် ဖျော်ထားသော ကော်ရည်တို့ကို ထည့်မွှေပေးပါ
  • ကော်ရည်များ မပျစ်လာမချင်း ဆက်တိုက်မွှေပေးပါ
  • ကော်ရည်များ ပျစ်လာတာနဲ့ အရသာ မြည်းပြီး မိမိစိတ်ကြိုက် အရသာ ရလာအောင် ပြင်ပေးပါ
  • ပြီးတာနဲ့ ပြောင်းဖူးဟင်းချို ပူပူလေးကို သောက်သုံးရန် ပြင်ပေးနိူင်ပါပြီ။ 

Wednesday 15 December 2021

Black Bean Sauce ဆမ်း ခေါက်ဆွဲ

 


ဒီနေ့တော့ သတ်သတ်လွတ် စားဖွယ်ရာ တစ်မျိုးကို အမြန်ချက်ဖြစ်ပါတယ် စားလို့ကောင်းပြီး ပြင်ဆင်ရတာ မြန်တဲ့အတွက် မာမာပြင်ဆင်ထားတဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. ခေါက်ဆွဲအစို - 500 g
  2. ကြယ်​သီးမှို - အနေတော် ဆယ်ပွင့်
  3. Black bean sauce (hot) - ထမင်းစားဇွန်း လေးဇွန်း
  4. ရေ - ထမင်းပေါင်းအိုး ဆန်ချင်ဗူး နှစ်ဗူးခွဲ
  5. ကိုက်လံ - လေးပင်
ပြင်ဆင်ပုံ
  • ခေါက်ဆွဲအစိုကို အဆင်သင့် ပြင်ထားပါ
  • ကိုက်လံကို ရေဆေးပြီး ရေနွေးဆူဆူမှာ သုံးမိနစ်ခန့် ပြုပ်ကာ ရေအေးနှင့် စိမ်ထားပေးပါ
  • မှိုကိုရေဆေးပြီး ခပ်နူတ်နူတ်လေးတွေ လှီးထားပါ
  • အိုးတစ်လုံးထဲမှာ လှီးထားသော မှိုများ black bean sauce နှင့် ရေတို့ကိုထည့်ပြီး ပွက်ပွက်ဆူအောင် တည်ပေးပါ
  • အားလုံး အဆင်သင့် ဖြစ်တာနဲ့ ခေါက်ဆွဲအစိုကို ရေနွေးဆူဆူထဲမှာ တစ်မိနစ်ခန့် ထည့်ပေးကာ ရေစစ်ပေးပါ
  • ပြီးတာနဲ့ ပန်းကန်ပြား တစ်ချပ်ထဲမှာ ခေါက်ဆွဲကို တစ်ပွဲစာ ထည့်ပေးပါ
  • ခေါက်ဆွဲထည့် ပြီးတာနဲ့ မှိုနှင့် black bean saue တို့ ရောကျိုထားတာကို သင့်တော်သလို ဆမ်းပေး ပြုပ်ထားသော ကိုက်လံကို ထည့်ပေးကာ သုံးဆောင်နိူင်ပါပြီ။

Tuesday 14 December 2021

မျှစ်ကြွတ် အချိုနှပ်

 


ဒီနေ့တော့ မျှစ်အကြွတ်လေးတွေ ဝယ်လာပြီး မျှစ်ချိုနှပ်လေး ချက်ဖြစ်ပါတယ် ဒီမျှစ်ကြွတ်နှပ်လေးက ထမင်းနဲ့ စားရင်လဲ အရမ်းကောင်းသလို သူ့ချည်းသက်သက် စားရင်လဲ စားလို့ကောင်းပါတယ်။

ဒါကြောင့်မို့လို့ မာမာပြင်ဆင်ပြီး ချက်ထားတဲ့ မျှစ်ချိုနှပ် ချက်နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. မျှစ်ကြွတ် - ၈ခု
  2. ဆား - လက်ဖက်ရည်ဇွန်း တစ်ဝက်
  3. သကြား - ထမင်းစားဇွန်း တစ်ဇွန်း
  4. ခရုဆီ - ထမင်းစားဇွန်း တစ်ဇွန်း
ပြင်ဆင်ပုံ
  • မျှစ်ကြွတ်ကို ရေဆေးပြီး ထက်ဝက်ပိုင်းကာ ပုံပါအတိုင်း အစိတ်လေးတွေ ရလာအောင် လှီးပေးပါ
  • မကပ်သော ဒယ်အိုးထဲမှာ သကြားကိုထည့်ပြီး မီးအနေတော်နှင့် လှော်ပေးပါ
  • သကြားများ အရည်ပျော်လာပြီး နီညိုရောင်လေး သန်းလာတာနဲ့ ရေအနည်းငယ်ထည့်ပြီး မွှေပေးပါ
  • ပြီးတာနဲ့ မျှစ်များနှင့် ဆားများထည့်ပေးကာ မွှေပေးကာ အဖုံးအုပ်ပြီး တည်ပေးပါ
  • ပထမ တရည်ခမ်းသွားတာနဲ့ နောက်ထပ် မျှစ်များရေမြုပ်အောင်ထည့်ပြီး အဖုံးအုပ်ကာ တည်ပေးပါ
  • ဒုတိယတစ်ရည် ခမ်းကာနီးတာနဲ့ ခရုဆီကို ထည့်မွှေပေးပြီး ရေခမ်းတဲ့အထိ ဆက်တည်ပေးပါ
  • ရေခမ်းသွားတာနဲ့ မီးပိတ်ပေးပြီး ထမင်းပူပူလေးနဲ့ စားသုံးရန် မျှစ်အချိုနှပ်ကို ပြင်ပေးနိူင်ပါပြီ။

Monday 13 December 2021

ပဲဖတ်ချဉ်သုပ်

 




မာမာဒီနေ့တော့ သိပ်ပြီးပြန်ချင်နေတဲ့ မြန်မာပြည်ကို ပြန်လို့မရတော့ မြန်မာပြည် အလွမ်းပြေ ပဲဖတ်ချဉ်နဲ့ အရသာ တစ်ထပ်ထဲကျတဲ့ အသုပ်လေး သုပ်စားဖြစ်ပါတယ်။

နိူင်ငံရပ်ခြားမှာ ရောက်နေတဲ့သူတွေ မြန်မာပြည် နေစဉ်အခါတုန်းက ပဲဖတ်ချဉ်သုပ်ကို ကြိုက်နှစ်သက်ခဲ့ဖူးတယ်ဆိုရင် မာမာအခု ပြထားတဲ့ ဘူးလေးကို ရှာဝယ်ပြီး သုပ်စားကြည့်စေချင်ပါတယ်။

ဒါကြောင့်မို့လို့ ရှောက်ရွက်နံ့လေး မွှေးပြီး ငရုတ်သီးစိမ်း ခပ်စပ်စပ်လေးနဲ့ အရသာ ကောင်းလွန်းတဲ့ အသုပ်တစ်ပွဲအတွက် မာမာပြင်ဆင်ပြီး သုပ်ထားတဲ့ သုပ်နည်းလေးကို မျှဝေပေးလိုက်ပါတယ်ရှင်။ 


ပါဝင်ပစ္စည်းများ
  1. Smokey Chipotle - ထမင်းစားဇွန်း လေးဇွန်းမောက်မောက်
  2. ကြက်သွန်နီ ခရမ်းရောင် - အနေတော် တစ်လုံး
  3. ငရုတ်သီးစိမ်း - စားနိူင်သလောက်
  4. ငရုတ်သီး အကျက်မှုန့် - စားနိူင်သလောက်
  5. ရှောက်ရွက် - ဆယ်ရွက်
  6. ပဲဆီစိမ်း - ထမင်းစားဇွန်း သုံးဇွန်း
  7. ဆား - လက်ဖက်ရည်ဇွန်း သုံးပုံတစ်ပုံ
  8. အရသာမှုန့် - လက်ဖက်ရည်ဇွန်း သုံးပုံတစ်ပုံ
ပြင်ဆင်ပုံ
  • ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးထားပါ
  • ရှောက်ရွက်ကို ရေဆေးပြီး ခပ်ပါးပါး လှီးထားပါ
  • ငရုတ်သီးစိမ်းကို ရေဆေးပြီး မထူမပါးလေးတွေ လှီးထားပါ
  • Smokey Chipotle နဲ့အတူ ပါဝင်ပစ္စည်းများကို အဆင်သင့် ပြင်ထားပါ
  • အားလုံးအဆင်သင့် ဖြစ်တာနဲ့ ပါဝင်ပစ္စည်း အားလုံးကို ဇလုံထဲမှာထည့်ပြီး အရသာ သမအောင် နယ်ပေးပါ
  • အရသာ နယ်ပြီးတာနဲ့ မိမိစိတ်ပြိုက် အရသာ ရလာအောင် ပြင်ပေးပါ
  • ပြီးတာနဲ့ အဲဖတ်ချဉ်သုပ်နဲ့ အရသာ တစ်ထပ်ထဲ တူလွန်းတဲ့ အသုပ်လေးကို ထမင်းပူပူလေးနဲ့ စားသုံးရန် ပြင်ပေးနိူင်ပါပြီ။

Saturday 11 December 2021

ပုဇွန်ပေါင်း

 


ဒီနေ့တော့ ပုဇွန်ထုတ်လေးတွေ ဝယ်လာပြီး ပုဇွန်ပေါင်းလေး ပေါင်းစားဖြစ်ပါတယ် ဒါကြောင့်မို့လို့ မာမာပြင်ဆင်ပြီး ပေါင်းထားတဲ့ ပုဇွန်ပေါင်း ပေါင်းနည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
  1. ပုဇွန်ထုတ် - အကောင်ကြီးကြီး ၁၇ကောင်
  2. ဆား - လက်ဖက်ရည်ဇွန်း တစ်ဝက် (ပုဇွန် အရသာနယ်ရန်)
  3. ဆား - ထမင်းစားဇွန်း တစ်ဇွန်း ( ပုဇွန်ဆေးရန်)
  4. သကြား - ထမင်းစားဇွန်း တစ်ဇွန်း
  5. ပြောင်းဖူးကော်မှုန့် - ထမင်းစားဇွန်း တစ်ဇွန်းခွဲ 
  6. ငရုတ်ကောင်းမှုန့် - လက်ဖက်ရည်ဇွန်း လေးပုံတစ်ပုံ
  7. ကြက်သွန်ဖြူမှုန့် - လက်ဖက်ရည်ဇွန်း သုံးပုံတစ်ပုံ
  8. ချင်းမှုန့် - လက်ဖက်ရည်ဇွန်း သုံးပုံတစ်ပုံ
  9. နှမ်းဆီ - လက်ဖက်ရည်ဇွန်း တစ်ဇွန်း
  10. နေကြာဆီ - ထမင်းစားဇွန်း တစ်ဇွန်း
  11. မုံလာဥနီ - အနေတော် တစ်ဥ
  12. ကြက်သွန်မိတ် အနေတော် တစ်ပင်
  13. ကြွေပန်းကန်လုံး - တစ်လုံး
  14. ပေါင်းအိုး - တစ်လုံး
ပြင်ဆင်ပြုလုပ်ပုံ
  • ပုဇွန်ထုတ်များကို ရေစင်အောင်ဆေးပြီး ခေါင်း အခွံနှင့် ကြောဖက်မှ အမည်းကြောင်းများ ဖယ်ပေးပါ
  • ပြီးတာနဲ့ ဆားနှင့်နယ်ပေးကာ ရေလေးထပ်လောက်ဆေးပြီး ရေစစ်ထားပါ
  • ပုဇွန်များ ရေစစ်သွားတာနဲ့ ခပ်နုတ်နုတ် စင်းထားပေးပါ
  • မုံလာဥနီကို အခွံခွာပြီး ရေဆေးကာ ခပ်နုတ်နုတ်လေးတွေ လှီးထားပါ
  • ကြက်သွန်မိတ်ကို ရေဆေးပြီး မထူမပါးလေးတွေ လှီးထားပါ
  • အားလုံးအဆင်သင့် ဖြစ်တာနဲ့ ဇလုံတစ်လုံးထဲမှာ နေကြာဆီမှလွဲပြီး အားလုံးကို ထည့်ပေးပါ
  • ပြီးတာနဲ့ အရသာ သမသွားအောင် နယ်ပေးပါ
  • ကြွေပန်းကန်လုံးကို နေကြာဆီ သုတ်ပေးပြီး အရသာ နယ်ထားသော ပုဇွန်များကို ထည့်ပေးပါ
  • ပေါင်းအိုး အောက်ခံအိုးထဲမှာ ရေတစ်ဝက်လောက် ထည့်ပေးကာ ပေါင်းခံခုံကို ထည့်ပေးပါ
  •  ထို ပေါင်းခံခုံပေါ်မှာ ဇကာကိုတင်ပြီး ပုဇွန်ထည့်ထားသော ပန်းကန်ကို ထည့်ပေးပါ
  • ပြီးတာနဲ့ ပေါင်းအိုးကို အဖုံး အုပ်ပေးပြီး steam ခလုတ်ကို နှိပ်ကာ ၁၅မိနစ် ခန့် ပေါင်းပေးပါ
  • ပေါင်းချိန်ပြည့်တာနဲ့ ပေါင်းအိုးထဲမှ လေကုန်အောင် ထုတ်ပေးကာ ပေါင်းအိုးမဖုံးကို ဖွင့်ပြီး ပုဇွန်ပေါင်း ပန်းကန်ကို ထုတ်ပေးပါ
  • ပြီးတာနဲ့ ပုဇွန်ပေါင်း မွှေးမွှေး ပူပူလေးကို မိမိနှစ်သက်သလို စားသုံးရန် ပြင်ပေးနိူင်ပါပြီ။

Friday 10 December 2021

ငါးရံ့အချဉ်ဆီပြန်

 


မာမာ ငါးရံ့ကို ခရမ်းချဉ်သီး အနှစ်များများနဲ့ အချဉ်ဆီလည်ရေလည်လေး ချက်ပါတယ် ထမင်းပူပူလေးနဲ့ အရမ်းကိုဘဲ စားလို့ကောင်းလွန်းတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ငါးရံ့ - 500 gm (အကောင်ကြီးကြီးကိုသုံးပါ)
  2. ခရမ်းချဉ်သီး - အလုံးကြီးကြီး လေးလုံး
  3. ကြက်သွန်ဖြူ - အမွှာကြီးကြီး သုံးမွှာ
  4. ကြက်သွန်နီ - အနေတော် တစ်ခြမ်း
  5. စပါးလင် အရင်းပိုင်း - တစ်လက်မခန့်
  6. ချင်း - လက်တစ်ဆစ်
  7. မန်ကျည်းသီးမှည့် - ထမင်းစားဇွန်း တစ်ဇွန်းသာသာ 
  8. ငရုတ်သီးအရောင်တင်မှုန့် လက်ဖက်ရည်ဇွန်း - တစ်ဇွန်း
  9. အချိုမှုန့် - လက်ဖက်ရည်ဇွန်း တစ်ဇွန်း
  10. ဆား - လက်ဖက်ရည်ဇွန်း တစ်ဇွန်း
  11. ငါးငံပြာရည် - ထမင်းစားဇွန်း ( ငါးအရသာနယ်ရန်)
  12. ငါးငံပြာရည် ထမင်းစားဇွန်း တစ်ဇွန်း( ဟင်းအိုးထဲထည့်ရန်)
  13. ဆီ - ထမင်းစားဇွန်း ငါးဇွန်း
  14. နနွင်းမှုန့်. - လက်ဖက်ရည်ဇွန်း တစ်ဇွန်း (ငါးအရသာနယ်ရန်နှင့် ဆီသတ်ရန်)
  15. နံနံပင် - မိမိနှစ်သက်သလောက်

ငါးအရသာနယ်ရန်
  • ငါးကိုအရင်ဆုံး ငါးရဲ့အမြှီး ဆူးတောင်များနှင့် ခေါင်းတို့ကို ဖယ်ပေးပါ 
  • ပြီးတာနဲ့ ဗိုက်ထဲမှ မလိုတာတွေ ထုတ်ပေးပါ
  • ပြီးတော့မှ အကောင်လိုက်ကို ရေနှင့် ခြောက်ထပ်လောက် ဆေးပေးပါ
  • ငါးကို ရေဆေးပြီးတာနဲ့ ငါးကိုအကွင်းလိုက် လက်တစ်လုံးလောက် အထူရအောင် တုံးပေးပါ
  • ငါးတစ်ကောင်လုံး ခုတ်ပြီးတာနဲ့ ရေနှစ်ထပ်လောက် ဆေးပေးပြီး ရေစစ်ထားပါ
  • ကြက်သွန်ဖြူ ကြက်သွန်နီနှင့် ချင်းတို့ကို အခွံခွာပြီး ရေဆေးထားပါ
  • စပါးလင်ကို ရေဆေးပြီး ခပ်ပါးပါး လှီးထားပါ
  • ပြီးတာနဲ့ ချင်း စပါးလင် ကြက်သွန်ဖြူ ကြက်သွန်နီတို့ကို ငရုတ်သီး အရောင်တင်မှုန့်နှင့် ညက်နေအောင်ရောပြီး ထောင်းပေးပါ
  • မန်ကျည်းသီးမှည့်ကို ရေတစ်ထပ်ဆေးပြီး ရေနွေးအနည်းငယ်နှင့် စိမ်ထားပါ
  • ခရမ်းချဉ်သီးကို ရေဆေးပြီး ခပ်ပါးပါး လှီးထားပါ
  • နံနံပင်ကို ရေစင်အောင်ဆေးပြီး အနေတော်လေးတွေ ပိုင်းဖြတ်ထားပါ
  • ပြီးတာနဲ့ ဇလုံကျယ်ကျယ်ထဲမှာ ငါးရံ့တုံးများ နနွင်းမှုန့် လက်ဖက်ရည်ဇွန်း တစ်ဝက် အချိုမှုန့် လက်ဖက်ရည်ဇွန်း တစ်ဇွန်း  ဆား လက်ဖက်ရည်ဇွန်း တစ်၀က်နှင့် ငါးငံပြာရည် ထမင်းစားဇွန်း တစ်ဇွန်းသာသာထည့်ပေးကာ အရသာဝင်အောင် နယ်ပေးပါ
ဟင်းချက်ရန်
  • ဒယ်အိုးထဲမှာ ဆီထည့်ပြီး ဆီကိုအရင်ဆုံး အပူပေးပါ
  • ဆီပူလာမှ နနွင်းမှုန့်ကို ထည့်ပေးပါ
  • ပြီးတာနဲ့ ထောင်းထားသော ငရုတ်သီးထောင်းကို ထည့်မွှေပေးပါ
  • ငရုတ်သီး ဆီသတ်တာ မွှေးလာပြီး ငရုတ်သီးများ မွလာပါက ခပ်ပါးပါး လှီးထားသော ခရမ်းချဉ်သီးကို ထည့်မွှေပေးပါ
  • ခရမ်းချဉ်သီးများ ကျေပြီးအခွံများ လိတ်လာတဲ့အထိ အိုးအဖုံးအုပ်လိုက် မွှေလိုက် လုပ်ပေးပါ
  • ခရမ်းချဉ်သီး အခွံများ လိတ်လာတာတဲ့ အရသာ နယ်ထားသော ငါးကိုထည့်ပြီး အသာအယာလေး မွှေပေးကာ အဖုံးအုပ်ပေးပါ
  • ယောင်းမနှင့် အရမ်းကြီး ထိုးမွှေပါက ငါးအသားက နူးညံ့လွန်းတဲ့အတွက် ကျေမွကုန်တတ်ပါတယ်
  • အိုးမကပ်စေရန် အိုးကိုကိုင်ပြီး လှုပ်လှုပ်ပေးပါ
  • ငါးအသားလေးတွေ ငရုတ်သီးရောင် တက်လာတာနဲ့ ငံပြာရည် ထမင်းစားဇွန်း တစ်ဇွန်းထည့်ပြီး အရသာညီအောင် အိုးကိုလှုပ်ပေးပါ
  • ငါးအသားများ မာပြီးတင်းသွားမှ ရေမြုပ်အောင်ထည့်ပြီး အဖုံးအုပ်ကာ တည်ပေးပါ
  • အိုးထဲမှ ရေဆူလာပြီး ထိုအရည် မခမ်းတစ်ခမ်း အနေအထားရအောင် တည်ပေးပါ
  • ရေအရမ်း မခမ်းခင် မန်ကျည်းမှည့်အရည် ထပ်ထည့်ပြီး အဖုံးအုပ်ကာ ဆက်ချက်ပေးပါ
  • ဆီလည်ရေလည် အရည်လေး ရလာချိန်မှာ နံနံပင်အုပ်ပေးပြီး အရသာမြည်းကာ လိုသလို ပြင်ပေးပြီး မီးပိတ်ပေးပါ
  • ပြီးတာနဲ့ ငါးရံ့ အချဉ်ဆီလည်ရေလည် ဟင်းမွှေးမွှေးလေးကို ထမင်းပူပူလေးနှင့် စားသုံးရန် ပြင်ပေးနိူင်ပါပြီ။

Thursday 9 December 2021

ချဉ်ငံစပ် သံပုယိုသီးသုပ်

 



အခုရက်ထဲ မာမာခရီးသွားနေတာရယ် မာမာ့ရဲ့အဖေ နေမကောင်းပြီး ဆုံးသွားတဲ့အတွက် အလုပ်တွေများခဲ့တဲ့အတွက် ဘလော့လေးဆီ မရောက်ဖြစ်ခဲ့ပါဘူး။
ဒီနေ့တော့ အရင်တစ်ပါတ်က ဝယ်လာတဲ့ သံပုယိုသီးတွေ မကုန်သေးတဲ့အတွက် ချဉ်ချဉ်ငံငံ စပ်စပ်လေး သုပ်စားဖြစ်ပါတယ် ဒါကြောင့်မို့လို့ ထမင်းပူပူလေးနဲ့ စားရလေအောင် မာမာပြင်ဆင်ပြီး သုပ်ထားတဲ့ အသုပ် သုပ်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. သံပုယိုသီး - ခပ်ကြီးကြီး တစ်လုံး
  2. ကြက်သွန်နီ - ဥကြီးကြီး တစ်ဥ
  3. ငရုတ်သီးစိမ်း - မိမိစားနိူင်သလောက်
  4. ပုဇွန်ခြောက်မှုန့် - ထမင်းစားဇွန်း နှစ်ဇွန်း
  5. ပဲအကျက်မှုန့် - ထမင်းစားဇွန်း တစ်ဇွန်း
  6. ငါးငံပြာရည် - ထမ်းစားဇွန်း တစ်ဇွန်း
  7. ဟင်းချိုမှုန့် - လက်ဖက်ရည်ဇွန်း တစ်ဝက်
  8. ငရုတ်သီးအလှော်မှုန့် - ထမင်းစားဇွန်း တစ်၀က်သာသာ
  9. ကြက်သွန်နီဆီချက် - ထမင်းစားဇွန်း တစ်ဇွန်းခွဲ 

သံပုယိုသီး အချဉ်ပေါ့ပြီး မခါးစေရန် ဆားရည်စိမ်နည်း
  • ဇလုံတစ်လုံးထဲမှာ ဆားထမင်းစားဇွန်း တစ်ဇွန်းကို ရေ ထမင်းပေါင်းအိုး ဆန်ချင်ဗူး နှစ်ဗူးနှင့်ဖျော်ပေးပါ
  • သံပုယိုသီးကို အခွံခွာပြီး အမွှာလေးများ ထွင်ပေးကာ ဆားရည်ထဲမှာ နာရီ၀က်လောက် စိမ်ပေးထားပါ
ပြင်ဆင်ပုံ
  • ကြက်သွန်နီကို အခွံခွာပြီး ရေဆေးကာ ခပ်ပါးပါး လှီးထားပါ
  • ငရုတ်သီးစိမ်းကို ရေဆေးပြီး ခပ်ပါးပါး လှီးပေးထားပါ
  • အသုပ်သုပ်ရန် ပါ၀င်ပစ္စည်းများကို ပြင်ထားပါ
  • ဇလုံကျယ်ကျယ် တစ်လုံးထဲမှာ ငရုတ်သီးစိမ်း ကြက်သွန်နီ ပဲအကျက်မှုန့် ငံပြာရည် ပုဇွန်ခြောက်မှုန့် ဟင်းချိုမှုန့် ဆီချက် ငရုတ်သီးမှုန့်တို့နှင့်အတူ ဆားရည်စိမ်ထားသော သံပုယိုသီးအဖတ်လေးများကို ရေညှစ်ပြီးထည့်ကာ အားလုံးကို ခပ်ဖွဖွ နယ်ပေးပါ
  • အရသာ နယ်ပြီးပါက အရသာမြည်းပြီး  မိမိနှစ်သက်တဲ့ အရသာ ရလာအောင် ပြင်ပေးကာ ချဉ်ငံစပ် သံပုယိုသီးသုပ်လေးကို နှစ်သက်သလို စားသုံးနိူင်ပါပြီ။

Wednesday 1 December 2021

ပဲဟင်းရည်ဆမ်း နံပြား

 



ဒီနေ့တော့ အသားငါးတွေ မချက်ချင်တာနဲ့ ပလာတာကြော်ပြီး ပဲဟင်းလေးချက်ကာ စားဖို့ပြင်လိုက်ပါတယ်။
တစ်ခါတစ်လေ အခုလိုလေး စားရတာကို အရသာ တွေ့တတ်တာမို့လို့ အလွယ်ချက်တဲ့ ပဲဟင်းချက်နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ (ပလာတာ တစ်ဆယ့်ငါးချပ်စာအတွက်)
  1. ပလာတာ - တစ်ဆယ့်ငါးချပ်
  2. ကုလားပဲခြမ်း - နှစ်ဆယ်သား
  3. နနွင်းမှုန့် - လက်ဖက်ရည်ဇွန်း တစ်ဝက် (ပဲပြုပ်သည့် အထဲထည့်ရန်)
  4. နနွင်းမှုန့် - လက်ဖက်ရည်ဇွန်း တစ်ဝက် (ကြက်သား အရသာနယ်ရန်)
  5. ဆား - လက်ဖက်ရည်ဇွန်း တစ်ဇွန်း (ကြက်သား အရသာနယ်ရန်)
  6. အရသာမှုန့် - လက်ဖက်ရည်ဇွန်း တစ်ဇွန်း (ကြက်သား အရသာနယ်ရန်)
  7. မဆလာ - လက်ဖက်ရည်ဇွန်း တစ်ဇွန်းခွဲ (ကြက်သား အရသာနယ်ရန်)
  8. ငရုတ်ပွခြောက် - ခြောက်တောင့် (သို့မဟုတ်)
  9. ငရုတ်သီး အရောင်တင်မှုန့် - လက်ဖက်ရည်ဇွန်း နှစ်ဇွန်း
  10. ကြက်သွန်နီ - အနေတော် လေးလုံး (ငရုတ်သီးနှင့် ရောထောင်းရန်)
  11. ကြက်သွန်ဖြူ  - အမွှာကြီးကြီး ကိုးမွှာ (ငရုတ်သီးနှင့် ရောထောင်းရန်)
  12. ချင်း - လက်တစ်ဆစ်ခန့် (ငရုတ်သီးနှင့် ရောထောင်းရန်)
  13. အာလူး - ကီလိုဝက်
  14. ဆား - လက်ဖက်ရည်ဇွန်း တစ်ဝက် (အာလူးအရသာနယ်ရန်)
  15. နနွင်းမှုန့် - လက်ဖက်ရည်ဇွန်း သုံးပုံတစ်ပုံ (အာလူး အရသာနယ်ရန်)
  16. အရသာမှုန့် - လက်ဖက်ရည်ဇွန်း တစ်ဝက် (အာလူး အရသာနယ်ရန်)
  17. ဆီ - ထမင်းစားဇွန်း ဆယ်ဇွန်း (အာလူးကြော်ရန်နှင့် ဆီသတ်ရန်)
  18. ဆား - လက်ဖက်ရည်ဇွန်း တစ်ဇွန်း (ဟင်းရည်အိုးထဲ ထည့်ရန်)
  19. အရသာမှုန့် - လက်ဖက်ရည်ဇွန်း တစ်ဇွန်း (ဟင်းရည်အိုးထဲ ထည့်ရန်)
  20. ကရဝေးရွက် -နှစ်ရွက်
  21. ပဲနံ့သာစေ့ - လက်ဖက်ရည်ဇွန်းနှစ်ဇွန်း
  22. ဂေါ်ဖီထုပ် - တစ်စိတ်
  23. ကြက်သွန်နီ - အနေတော် ငါးလုံး
  24. ငရုတ်သီးစိမ်း - မိမိနှစ်သက်သလောက်
  25. သံပုရာသီး - ငါးလုံး
  26. ပူစီနံ - မိမိနှစ်သက်သလောက်
ပဲပြုပ်ရန် ပြင်ဆင်ပုံ
  • ကုလားပဲခြမ်းကို ရေနှစ်ထပ်လောက် ဆေးပေးပြီး ဇောက်နက်သော အိုးထဲမွာ ထည့်ပေးပါ
  • ကုလားပဲခြမ်းကို ရေမြုပ်အောင်ထည့်ပြီး နနွင်းမှုန့်ထည့်ကာ ပြုပ်ပေးပါ
  • ပဲပြုပ်တဲ့အခါ ပဲအိုးထဲမွ ရေများဝေမကျအောင် အိုးအဖုံးကို ဟပြီးပြုပ်ပေးပါ
  • ပဲများကို နူးတဲ့အထိ ပြုပ်ပေးပြီး ပဲများနူးပါက အအေးခံထားပါ
ငရုတ်သီးထောင်းရန်
  • ငရုတ်ပွတောင့်ကို နာရီဝက်လောက် ရေစိမ်ပေးပြီး အညှာခြွေကာ ရေဆေးပေးပါ
  • မာမာကတော့ ငရုတ်ပွတောင့် မရှိတဲ့အတွက် ငရုတ်သီး အရောင်တင်မှုန့်ကို သုံးထားပါတယ်ကြ
  • က်သွန်နီကို အခွံခွာပြီး ရေဆေးကာ လေးစိတ်စိတ်ထားပေးပါ
  • ကြက်သွန်ဖြူ  နှင့် ချင်းကို အခွံခွာပြီး ရေဆေးပေးပါ
  • ပြီးတာနဲ့ ငရုတ်ဆုံထဲမှာ ငရုတ်ပွတောင့် (သို့မဟုတ်) ငရုတ်သီး အရောင်တင်မှုန့် ချင်း ကြက်သွန်ဖြူ နှင့် ကြက်သွန်နီတို့ကို ညက်နေအောင် ရောပြီး ထောင်းပေးထားပါ
အာလူးကြော်ရန်
  • အာလူးများကို အခွံခွာပြီး အလုံးလိုက် ရေဆေးကာ လေးစိတ်စိတ်ထားပါ
  • ပြီးတာနဲ့ အာလူးများကို နနွင်းမှုန့် အရသာမှုန့်နှင့် ဆားတို့ထည့်ကာ အရသာဝင်အောင် နယ်ပေးပါ
  • ဒယ်အိုးထဲမှာ ဆီထည့်ပြီး အပူပေးပါ ဆီပူလာတာနဲ့ အာလူးကို ထည့်ကြော်ပေးပါ
  • အာလူးတစ်တုံးလုံး ရွှေဝါရောင် သန်းလာပါက ဆယ်ပေးထားပါ
ဟင်းချက်ရန်
  • အာလူးကြော်ထားသော ဆီအိုးထဲမွာ ပဲနံ့သာစေ့နှင့် ကရဝေးရွက်တို့ကို ထည့်ကြော်ပေးပါ
  • ပြီးတာနဲ့ ထောင်းထားသော ငရုတ်သီးအနှစ်များကို ထည့်မွှေပေးပြီး ဆီသတ်ထားပါ
  • ဆီသတ်နံ့ မွှေးလာတာနဲ့ အာလူးကို ထည့်ပေးပြီး ရေကို နည်းနည်းချင်း ထည့်ပေးပြီး ချက်ပေးပါ 
  • အာလူး နူးတဲ့အထိ ရေကိုနည်းနည်းချင်း ထည့်ပေးပြီး ချက်ပေးပါ
  • အာလူး နူးလာပါက ပြုပ်ထားသော ပဲအိုးထဲကို ပြောင်းပြီးထည့်ကာ တည်ပေးပါ
  • ရေကိုမပျစ်မကျဲ  အေနအထား ရလာအောင် ထည့်ပေးပြီး ဆားနှင့် အရသာမှုန့်တို့ ထည့်ပြီး မွှေပေးကာ အရသာကို မြည်းပေးပြီး ပြင်ပေးပါ
  • မိမိနှစ်သက်တဲ့ အရသာ ရလာတာနဲ့ ပဲဟင်းရည် ရပြီဖြစ်တဲ့မတွက် မီးပိတ်ပေးထားပါ
ပလာတာကြော်ရန်
  • ဒယ်အိုးထဲမှာ ဆီအနည်းငယ်ထည့်ပြီး အပူပေးပါ
  • ဆီပူလာတာနဲ့ ပလာတာကို တစ်ချပ်ချင်း ထည့်ကြော်ပေးပါ
  • တစ်ဖက်ကျက်တာနဲ့ တစ်ဖက်ကို လှန်ပေးပြီး နောက်တစ်ဖက် ကျက်ပါက ဆယ်ပြီးဆီစစ်ပေးထားပါ
စားပွဲပြင်ရန်
  • ကြော်ထားသော ပလာတာများကို ကပ်ကျေးဖြင့် အနေတော် ညှပ်ပေးထားပါ
  • ပဲဟင်းရည် ပူပူနွေးနွေးကိုလဲ ပြင်ထားပါ
  • ဂေါ်ဖီကို ခပ်ပါးပါးလှီးပြီး ရေဆေးကာ ရေစစ်ထားပါ
  • ငရုတ်သီးစိမ်းကို ရေဆေးပြီး ခပ်ပါးပါး လှီးပေးထားပါ
  • ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးပေးထားပါ
  • ပူစီနံကို ရေဆေးပြီး ရေစစ်ထားပါ
  • သံပုရာသီးကို ရေဆေးပြီး လေးစိတ်စိတ်ထားပါ
  • အားလုံး အဆင်သင့် ဖြစ်တာနဲ့ ပန်းကန်ပြား တစ်ချပ်ထဲမှာ ပလာတာ ထည့်ပေးပြီး ပဲဟင်းရည်ဆမ်းကာ ဂေါ်ဖီ ပူစီနံ ငရုတ်သီးစိမ်းနှင့် သံပုရာရည်တို့ကို ထည့်ပေးကာ ပလာတာ ပဲရည်ဆမ်း ပူပူလေးကို စားသုံးရန် ပြင်ပေးနိူင်ပါပြီ။

Wednesday 17 November 2021

စားတော်ပဲပြုပ်

 


ဒီနေ့တော့ စားတော်ပဲကို နောက်ထပ်တစ်မျိုး စမ်းသပ်ပြီး ပြုပ်ပါတယ် ပဲပြုပ်ပြုပ်တဲ့ ပြုပ်နည်းလေးတွေ တစ်နည်းမဟုတ်ရင် တစ်နည်းနဲ့ အဆင်ပြေအောင် အမျိုးမျိုး စမ်းသပ်ပြီး ပြုပ်ဖြစ်နေတာက မာမာ့ရဲ့ ဝါသနာလို့တောင် ပြောလို့ရနေပါပြီ။
 မာမာပတော့ ဘယ်လိုနည်းလေးနဲ့ဘဲ ပြုပ်ပြုပ် ပဲပြုပ်တဲ့နည်းတိုင်းက အဆင်ပြေနေတော့ အဆင်မပြေလို့လာလာ မေးကြတဲ့သူတိုင်းအတွက် ဖြေစရာ အဖြေက ဘယ်လို ဖြေရမှန်း မသိအောင် ဖြစ်ခဲ့ရပါတယ်။

တစ်ချို့က ပြုပ်နေရင်း အခွံတွေ ကျွတ်ထွက်ကုန်တယ်တဲ့ အခွံကျွတ်တာအတွက် အဖြေက ပြုပ်မဲ့ပဲ ပမာဏနဲ့ ပဲထည့်ပြုပ်မဲ့အိုးက သိပ်ကြီးနေရင်လဲ ပဲတွေက အိုးထဲမှာ ချောင်ပြီး အခွံတွေ ကျွတ်ထွက်တတ်သလို ပြုပ်နေစဉ် ပဲအိုးကို ဖွင့်ပြီး ခနခန မွှေပေးရင်လဲ အခွံတွေ ကျွတ်ထွက်တတ်ပါတယ်။

ဒါကြောင့်မို့လို့ ပဲပြုပ်မယ်ဆိုရင် အိုးအသားထူပြီး ပြုပ်မဲ့ပဲ ပမာဏကို  အိုးထဲမှာ ထည့်ပြီးတာနဲ့ ပဲအပေါ်မှာ လက်လေးလုံးလောက်ဘဲ အမြင့်ရှိတဲ့ အိုးနဲ့ပြုပ်ပေးပါ။

တစ်ချို့ကကျတော့လဲ ပြုပ်ပြီးတာနဲ့ ပဲတွေပျော့ပျဲ သွားတတ်ပါတယ်တဲ့ အဲဒီအတွက် အဖြေကတော့ စဉ်းစားရ နည်းနည်း ခက်ပါတယ် စဉ်းစားမိတာလေးကတော့ ပြုပ်တဲ့ ပဲအမျိုးအစား မတူတာ ဖြစ်နိူင်သလို ပဲ ပြုပ်နေစဉ် ခနခန မွှေမိတာလဲ ဖြစ်နိူင်ပါတယ်။

တစ်ခါတလေ ပဲနဲ့ရေအချိန်အဆ ကွာသွားတာလဲ ဖြစ်နိူင်သလို အသုံးပြုသော မီးဖိုတွေရဲ့အပူရှိန် ပမာဏ မတူတာတွေလဲ ဖြစ်နိူင်ပါတယ် ဒါကြေင့်မို့လို့ မိမိအသုံးပြုသောပဲ မိမိအသုံးပြုသော မီးအပူချိန်တွေကို ချင့်ချိန်ပြီး အသုံးပြုကြ စေချင်ပါတယ်။

အရင့် အရင် ပဲပြုပ်တဲ့ နည်းတွေမှာ ပဲပြုပ်ဖို့ ပြင်လေတိုင်း ဆိုဒါကို ပဲရေစိမ်ချိန်မှာလဲ မသုံးသလို ပြုပ်စဉ်မှာလဲ မသုံးပါဘူး  ဆိုဒါသုံးခြင်းကြောင့် ပဲပြုပ်နည်းတွေ ပျက်ပျက်သွားတာ ကြုံဖူးသလို ပဲပြုပ်မှာ ဆိုဒါနံ့တွေ ကျန်နေတတ်လို့ပါဘဲ။

ဒါပေမဲ့ အခုတစ်ခါမှာတော့ ပဲပြုပ်တဲ့နည်းက အရင်နည်းကိုဘဲ အခြေခံပြီး ပြုပ်ပေမဲ့ ပဲပြုပ်ချိန် အချိန်ကုန် သက်သာအောင် ရေအနည်းငယ် လျှော့ထည့်ပြီး ဆိုဒါအနည်းငယ် ထည့်ပြုပ်ပါတယ်။

ဆိုဒါ ထည့်ပြီးပြုပ်တဲ့အတွက် ပဲပြုပ်ချိန်မှာ သတိတော့ထားရပါတယ် ပဲပြုပ်ရည်များ ဝေကျတတ်တဲ့အတွက် အိုးအဖုံးကို ခပ်ဟဟလေး ဖုန်းထားရပါတယ်။

ရေလျှော့ထည့်ထားတဲ့အတွက် ပဲအိုးမကပ်အောင်တော့ သတိထားပြီး ကြည့်ကြည့်ပေးရပါတယ် ပဲအိုးရေခမ်းတာနဲ့ မီးပိတ်ပေးပြီး လက်ကျန်မီးအပူရှိန်လေးနဲ့ ပဲအိုးကို နှပ်ပေးလိုက်ရင် အိအိထွေးထွေးလေးနဲ့ ပဲပြုပ်ကို ရလာပါလိမ့်မယ်။

ပဲကိုအပင်ဖောက်ပြီး ပြုပ်တဲ့အခါ ပဲပြုပ်ကပိုပြီးချိုပါတယ် ဒါကြောင့်မို့လို့ ဒီတခါတော့ စားတော်ပဲ စစ်စစ်လေး ရလာတာနဲ့ အပင်ဖောက်ပြီး ပြုပ်ထားပါတယ်။

အလျှင်စလို အမြန်စားချင်တယ် ဆိုရင်တော့ ၁၀နာရီလောက် ရေစိမ်ပြီး အပင်မဖောက်ဘဲ တစ်ခါထဲ ပြုပ်ပေးနိူင်ပါတယ် မာမာကတော့ ပဲပြုပ်ကို ပြုပ်ပြီးတာနဲ့ အအေးခံပြီး ခဲထားချင်တာနဲ့ ပဲကို အညှောင့်လေးတွေ ဖောက်လိုက်ပါသေးတယ် ဒါကြောင့်မို့လို့ အရမ်းလွယ်ပြီး ရိုးရိုးရှင်းရှင်း ပဲပြုပ်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. စားတော်ပဲ - ထမင်းပေါင်းအိုး ဆန်ချင်ဗူး သုံးဗူး
  2. ထန်းလျှက်ခဲ ကွမ်းသီးလုံးလောက် - နှစ်ခဲ
  3. ရေ - ထမင်းပေါင်းအိုး ဆန်ချင်ဗူး သုံးဗူး
  4. ဆား - လက်ဖက်ရည်ဇွန်း တစ်ဝက်
  5. ဆိုဒါ - လက်ဖက်ရည်ဇွန်း လေးပုံတစ်ပုံ
  6. ပဲပြုပ်ရန်အိုး - အိုး (အိုးအသားထူပြီး ပြုပ်မည့်ပဲနှင့် ပမာဏ သိပ်မကွာတဲ့ အိုးအနေတော် တစ်လုံး)
ပြင်ဆင်ပုံ
  • ဇလုံတစ်လုံးထဲမှာ ပဲများကိုထည့်ပြီး နှစ်ထပ်လောက် ဆေးပေးပါ
  • ပြီးတာနဲ့ ပဲများရေမြုပ်အောင် ခပ်များများလေး ထည့်ပေးကာ ၁၀နာရီလောက် ရေဝအောင် စိမ်ထားပေးပါ 
  • ပဲများရေဝလာကာ ပဲများပွလာပြီ ဆိုတာနဲ့ အပေါက်ခပ်စိတ်စိတ်ပါသော ဇကာတစ်ခုထဲကို သွန်ချပေးပြီး အစို့ဖောက်ဖို့ ပြင်ပါမယ်
  • အစို့ဖောက်ရာမှာ ပဲတွေကို အဝတ်စနဲ့ ထုတ်ပြီး အစို့မဖောက်မိစေဖို့ သတိထားပေးပါ
  • အဝတ်စနဲ့ထုတ်ပြီး အစို့ဖောက်တဲ့ ပဲကိုပြုပ်တဲ့အခါ ရေစော်နံတတ်သလို ရာသီဥတု ပူလွန်းရင်လဲ ပဲများအချဉ်ဖောက်ကုန်တတ်ပါတယ်ပဲ
  • ဇကာထဲမှာထည့်ပြီး ပဲများ အစို့ဖောက်ထားစဉ် အ၀က်စ သန့်သန့်တစ်ခုကို ရေစွတ်ပြီး ပဲအပေါ်မှာ အုပ်ထားပေးပါ
  • အစို့လေးတွေ မြန်မြန်ထွက်လာအောင် အ၀တ်စကို တစ်နေ့ရေ၃ခါလောက် စွတ်ပြီးမှ ပြန်ပြန်အုပ်ပေးပါ
  • ဒုတိယရက်မှာဘဲ ပဲအစို့လေးများ စပြီးထွက်လာပါလိမ့်မယ်အ
  • တတိယရက်မှာလဲ အ၀တ်စကို ရေစွတ်ပြီး တစ်နေ့၃ခါ အရင် ရက်ကလိုဘဲ အုပ်ပေးပါ
  • တတိယရက်မှာ ပဲအစို့လေးတွေ တော်တော်လေး ရှည်လာပါပြီ
  • ပဲအစို့ ဖောက်ထားစဉ် ပဲများကို မဖွမိဖို့ သတိထားပေးရသလို ပဲထည့်ထားသော ဇကာရဲ့ အောက်ချေမှာလဲ ရေများအိုင်မနေအောင် သတိထားပါ
  • တတိယနေ့ ညနေပိုင်း ၃နာရီလောက်ဆို ပဲပြုပ်ဖို့ ပြင်နိူင်ပါပြီ​
  • အစို့ဖောက်ထားသော ပဲများကို ရေတစ်ထပ် ဆေးပေးပါ
  •  ပြီးတာနဲ့ အိုးအသား ထူသော အိုးထဲသို့ ပဲများကို ပြောင်းပြီး ထည့်ပေးပါ
  • ပဲအိုးထဲကို ထန်းလျက်ခဲ ရေ ဆားနှင့် ဆိုဒါတို့ထည့်ပြီး အိုးအဖုံးအုပ်ကာ ပြုပ်ပေးပါ
  • ဆိုဒါပါတဲ့အတွက် ပဲအိုး ရေပွက်ပွက် ဆူလာပြီ ဆိုတာနဲ့ အိုးအဖုံးကို ဟပေးပါ
  • ထိုပုံစံ အတိုင်းလေးဘဲ ပဲအိုးရေခမ်းတဲ့အထိ ဆက်ပြုပ်ပါ
  • ရေခမ်းကာနီးပါက မီးကိုပိတ်လိုက်ပြီး ပဲအိုးကို လက်ကျန်မီးအပူရှိန်နှင့်နှပ်ပေးပါ
  • နှပ်ထားသော ပဲများနပ်လောက်ချိန်မှာ အိုးကိုအဖုံး ဖုံးထားပြီး လက်နှစ်ဖက်နှင့် အ၀တ်ခံပြီးကိုင်ကာ အထက်အောက် သမအောင် ၂ချက်လောက် ခလောက်ပြီး ပဲကိုအထက်အောက် လှန်ပေးပါ
  • ပြီးတာနဲ့ မီးပိတ်ပြီး မီးဖိုပေါ်မှာ လက်ကျန်မီးအပူရှိန်နဲ့ ဆက်နှပ်ထားပေးပါ
  • ပဲနပ်သွားပြီ ဆိုပါက ချိုပြီးအိနေသော ပဲပြုပ်အိအိ မွှေးမွှေးလေးကို မိမိနှစ်သက်သလို စားသုံးနိုင်ရန် ပြင်ပေးနိူင်ပါပြီ။ 

Monday 15 November 2021

ချဉ်ငံစပ် မုန့်တီသုပ်

 






ဒီနေ့တော့ မိုးလေ အေးအေးနဲ့ ဘာလေးလုပ်စားရင် ကောင်းမလဲ စဉ်းစားလိုက်တာ ချဉ်ချဉ်ငံငံစပ်စပ်လေး စားချင်လာတာနဲ့ ဒီတစ်ခါတော့ မုန့်တီသုပ်လေးဘဲ သုပ်စားလိုက်ပါတော့တယ်။ 
ဒါကြောင့်မို့လို့ မာမာပြင်ဆင်ပြီး သုပ်ထားတဲ့ မုန့်တီသုပ်နည်းလေးကို မျှဝေပေးလိုက်ပါတယ်ရှင်။


မုန့်တီပူပူစပ်စပ်လေး ချက်သောက်ဖြစ်လို့ မာမာချက်တဲ့ နည်းလေးကိုဘဲ မျှဝေလိုက်ပါတယ် တိုင်းရင်းသား ရိုးရာအစာတွေ ချက်ရတာ နေရာဒေသ တစ်နေရာနဲ့ တနေရာ ချက်နည်းတွေ မတူကြတဲ့အတွက် တစ်ခါတရံ ချက်နည်းမှားတယ် ဘာညာ လာပြောရင်တော့ တော်တော်လေးတော့ သည်းခံရပါတယ်။

ဘယ်အစာကိုဘဲဖြစ်ဖြစ် အစားတစ်ခုမှာ ပါ၀င်တာတွေကို ရိုးရာအစာ အရသာကို မပျောက်ပျက်စေဘဲ ပါ၀င်ပစ္စည်းတွေကို အခြေခံကာ ကိုကိုယ်တိုင် ဆန်းသစ်ပြီး ချက်ကြည့်စေချင်သလို တစ်ယောက်နဲ့ တယောက်လဲ အကြိုက်တွေ မတူကြတာမို့လို့ ကိုယ်နှစ်သက်သလို ပြင်ဆင်ပြီး ချက်ပြုပ်တတ်အောင် ကျိုးစားကြည့်စေချင်ပါတယ်။

အခုလဲ မာမာ့အကြိုက် ပုံစံတစ်မျိုးနဲ့ ချက်ထားတဲ့ မုန့်တီချက်နည်းတူပေမဲ့ သုံးထားတဲ့ ငါးမတူတဲ့အတွက် ငါးရွှေနဲ့ချက်မှ မုန့်တီလို့တော့ ပြောကြအုံးမယ် ထင်ပါတယ်။

ငါးရွှေမရှိတဲ့ အရပ်ဒေသမှာ အနီးစပ်ဆုံးတူအောင် စားချင်စိတ်ကို အာသီသဖြေဖို့အတွက် ချက်ထားခြင်းသာ ဖြစ်ပါတယ်။

အရင်တစ်ခါ ဘာဆာငါးနဲ့ချက်ပြီး အခုတစ်ခါတော့ ငါးခူနဲ့ ချက်ထားပါတယ် ငါးခူက ဟင်းရည်အရသာကို ပိုပြီးချိုစေပြီး ဘာဆာငါးကတော့ အချိုပေါ့ပါတယ် ချက်နည်းတိုင်းမှာ ပါ၀င်ပစ္စည်းကတော့ အတူတူပါဘဲရှင်။

ပါ၀င်ပစ္စည်းများ
ငါးပြုပ်ရန်
  1. ငါးခူ - နှစ်ဆယ်သား
  2. ငါးငံပြာရည် - ထမင်းစားဇွန်း သုံးဇွန်း
  3. ဟင်းချိုမှုန့် - လက်ဖက်ရည်ဇွန်း တစ်ဇွန်း 
  4. ဆား ထမင်းစားဇွန်း တစ်ဇွန်း (ငါးဆေးရန်)
  5. နနွင်းမှုန့် - လက်ဖက်ရည်ဇွန်း တစ်ဇွန်း (ငါးဆေးရန်)
  6. မန်ကျည်းသီးမှည့် - ထမင်းစားဇွန်း တစ်ဇွန်း (ငါးဆေးရန်)
ငါးပြုပ်ပုံ
  1. ငါးခူကို အရင်ဆုံး မန်ကျည်းသီးမှည့် ဆားနှင့်နနွင်းမှုန့်ထည့်ပြီး အချွဲများကုန်သွားအောင် နယ်ပေးပါ
  2. ပြီးတာနဲ့ ရေတစ်ထပ်ဆေးပြီး ခေါင်းထဲမှ ပါးဟက်များ ဆူးတောင်များ အညှိလုံးများနှင့် ဗိုပ်ထဲမှ မလိုတာတွေကို ဖယ်ပေးပါ
  3. အားလုံးဖယ်ပြီးတာနဲ့ ရေနှင့် လေးငါးထပ်လောက် စင်အောင်ဆေးပေးပါ
  4. အိုးထဲမှာ ငါး ဟင်းချိုမှုန့်နှင့်  ငါးငံပြာရည်တို့ ထည့်ကာ ငါးကို ရေမြုပ်အောင် ထည့်ပေးပြီး ပြုပ်ပေးပါ  
  5. ငါးအသားများ နူးလာပါက မီးပိတ်ပြီး အအေးခံကာ အရိုးအသား သတ်သတ်စီ ထွင်ထားပါ 
  6. ငါးအရိုးများကို ငရုတ်ဆုံထဲမှာ ညက်အောင်ထောင်းပြီး ငါးပြုပ်အရည်နှင့် ရေ အနည်းငယ်ထည့်ကာ အရည်ငင်ပြီး အရည်ကို ယူထားပါ
  7. ငါးအသားများကို မကပ်သော ဒယ်အိုးထဲမှာထည့်ပြီး ခြောက်ပြီးမွလာတဲ့အထိ လှော်ပေးထားပါ

ဟင်းရည်ချက်ရန်
ပါဝင်ပစ္စည်းများ
  • ရေ - 11 cups
  • အရိုးငင်ထားသော ငါးရိုး အရည် - 2 cups
  • ကြက်သွန်ဖြူ - ဆယ်မွှာ 
  • ငရုတ်ကောင်းမှုန့် - လက်ဖက်ရည်ဇွန်း တစ်ဇွန်းမောက်မောက်
  • ပုဇွန်ငပိ - ထမင်းစားဇွန်းနှစ်ဇွန်း
  • ဆား - လက်ဖက်ရည်ဇွန်းတစ်ဇွန်း
  • ငါးငံပြာရည် - ထမင်းစားဇွန်းနှစ်ဇွန်း
  • ဟင်းချိုမှုန့် - ထမင်းစားဇွန်းတစ်ဝက်
  • ပဒဲကော - တစ်လက်မ 
ဟင်းရည်ချက်ရန် ပြင်ဆင်ပုံ
  1. ကြက်သွန်ဖြူကို အခွံခွာပြီး ရေဆေးကာ မညက်တစ်ညက် ထောင်းထားပါ
  2. ပဒဲကောကို ရေဆေးပြီး ညက်နေအောင် ထောင်းထားပါ
  3. ပုဇွန်ငပိကို ဇလုံတစ်လုံးထဲမှာ ရေအနည်းငယ်နှင့် ဖျော်ထားပါ
  4. ငရုတ်ကောင်းမှုန့်နှင့် ပါဝင်ပစ္စည်းများကို အဆင်သင့် ပြင်ထားပါ
  5. အိုးထဲမှာ လှော်ထားသော ငါးအသားများ ငါးငံပြာရည် အရသာမှုန့် ရေနှင့် ငါးပြုပ်အရိုးငင်ရည်ကို ထည့်ပြီး ပွက်ပွက်ဆူအောင် တည်ပေးပါ
  6. ဟင်းရည်အိုး ပွက်ပွက်ဆူလာတာနဲ့ ပုဇွန်ငပိ ဖျော်ထားသော အရည်ကို အနယ်များ မပါအောင် ထည့်ပေးပါ
  7. ဟင်းရည်အိုး ပွက်ပွက်ဆူလာတာနဲ့ အရသာကို မိမိစိတ်ကြိုက် ရလာအောင် ပြင်ပေးပါ
  8. ပြီးတာနဲ့ ထောင်းထားသော ပဒဲကော ငရုတ်ကောင်းမှုန့်နှင့် ကြပ်သွန်ဖြူတို့ကို ထည့်မွှေပေးပါ
  9. ကြက်သွန်ဖြူများ နူးလာချိန်မှာ အရသာကို ထပ်မြည်းပေးပါ
  10. ဟင်းရည်ပွက်ပွက် ဆူလာတဲ့အချိန်မှာ ရေအနည်းငယ် ခမ်းသွားတဲ့အတွက် ဟက်းရည်အရသာ လေးနေရင် ရေနွေးအနည်းငယ် ထပ်ရောပေးပါ
  11. အရသာ အနေတော်ဘဲဆိုရင်မီးပိတ်ပြီး လက်ကျန်မီးအပူရှိန်နဲ့ တင်ထားပေးပါ
မုန့်ပွဲပြင်ရန် ပါဝင်ပစ္စည်းများ
  1. မုန့်ဖတ် - 600 g (ready made အထုတ်ကို သုံပါတယ် )
  2. ပဲကြော် - မိမိနှစ်သက်သလောက်
  3. နံနံပင် - မိမိနှစ်သက်သလောက်
  4. ငရုတ်သီးစိမ်း - မိမိနှစ်သက်သလောက်
  5. ငါးဖယ်ကြော် - မိမိနှစ်သက်သလောက်
  6. ကြက်သွန်ဖြူ ဆီချက်ဖတ် - မိမိနှစ်သက်သလောက်
  7. မန်ကျည်းသီးမှည့် - ထမင်းစားဇွန်း သုံးဇွန်း
  8. ရေ - ထမင်းပေါင်းအိုး ဆန်ချင်ဗူး နှစ်ဗူး ( မန်ကျည်းသီးမှည့်ဖျော်ရန်)
မုန့်ဖတ်ပြုပ်ပုံ
  • အိုးထဲမှာ ရေထည့်ပြီး ပွက်ပွက်ဆူအောင် တည်ပေးပါ
  • ရေဆူလာတာနဲ့ မုန့်ဖတ်ကို ထည့်ပြီးပြုပ်ပေးပါ
  • ပြုပ်နေစဉ် မုန့်ဖတ်ကို ဆယ်ပြီးစမ်းကြည့်ပါ 
  • ခပ်ပျော့ပျော့ အနေအထား ရလာပြီဆိုရင် ဇကာထဲသွန်ချပြီး ရေများများနှင့်ဆေးကာ ရေစစ်ထားပါ
မုန့်ပွဲပြင်ရန်
  • မုန့်ဖတ် ပဲကြော် ငါးဖယ်ကြော် ကြက်သွန်ဖြူကြော်တို့ကို အဆင်သင့် ပြင်ထားပါ
  • မန်ကျည်းသီးမှည့်ကို ရေတစ်ထပ်ဆေးပြီး ရေနွေးပူပူနှင့် စိမ်ထားပါ
  • နံနံပင်ကို ရေဆေးပြီး မထူမပါးလေးတွေ လှီးထားပါ
  • ငရုတ်သီးစိမ်းကို ရေဆေးပြီး အညှာခြွေကာ လှော်ပေးပါ ပြီးတာနဲ့ ညက်နေအောင် ထောင်းပေးပါ
  • မုန့်တီဟင်းရည်ကို ပူနေအောင် ပြန်နွှေးထားပါ
မုန့်ပွဲတစ်ပွဲစာပြင်ပုံ
  • မုန့်ဖတ် - လက်တစ်ဆုတ်စာ
  • ပဲကြော် - တစ်ချပ်ငါး
  • ငံပြာရည် - လက်ဖက်ရည်ဇွန်းတစ်ဝက် (အငံအရသာ လိုမှထည့်ပါ)
  • မန်ကျည်းမှည့်ရေ - လက်ဖက်ရည်ဇွန်းတစ်ဇွန်းခွဲ
  • ငရုတ်သီးစိမ်းထောင်း - လက်ဖက်ရည်ဇွန်းတစ်ဇွန်း
  • ငါးဖယ် - တစ်ချပ်
  • ကြက်သွန်ဖြူဆီချက်အဖတ် - အနည်းငယ်
  • နံနံပင် - နှစ်သက်သလောက်တို့ကို ပန်းကန်ထဲမှာ ထည့်ပေးပြီး မုန့်တီဟင်းရည် ပူပူလေး ထည့်ပေးကာ သုံးဆောင်နိူင်ပါပြီ။
  • ငါးအသား လှော်ပြီးသားလေး ထည့်စားချင်ပါက ငါးကိုပိုပြီး ပြုပ်ပေးပါ

ပါ၀င်ပစ္စည်းများ (ငါးပြုပ်ရန်)
  1. ငါးခူ - တစ်ဆယ်ကျပ်သား
  2. ငါးငံပြာရည် - ထမင်းစားဇွန်း ၄ဇွန်း
  3. ဟင်းချိုမှုန့် - လက်ဖက်ရည်ဇွန်း တစ်ဇွန်း တို့ကိုရေမြုပ်ရုံ  ရောပြုပ်ပေးပြီး နူးသွားပါက အသားဖတ်လေးများကို ထွင်ထားပါ
  4. ငါးအရိုးများကို ငရုတ်ဆုံထဲမှာ ညက်နေအာင် ထောင်းပေးပြီး ရေ အနည်းငယ်နှင့် အရည်ငင်ထားပါ။

ဟင်းရည်ချက်ရန်
  1. ရေ - 4 cups
  2. အရိုးငင်ထားသော ငါးရိုးအရည် - အနည်းငယ်
  3. ကြက်သွန်ဖြူ - အမွှာကြီးကြီး ငါးမွှာ (ထောင်းပေးပါ)
  4. ကြက်သွန်နီ - နှစ်လုံး (အဖတ်လေးများလှီးပေးပါ)
  5. ငရုတ်ကောင်းမှုန့် - လက်ဖက်ရည်ဇွန်း တစ်ဇွန်း
  6. ပုဇွန်ငါးပိ - ထမင်းစားဇွန်းတစ်ဇွန်း
  7. ဆား - လက်ဖက်ရည်ဇွန်းတစ်ဇွန်း
  8. ငါးငံပြာရည် - ထမင်းစားဇွန်းတစ်ဇွန်း
  9. ဟင်းချိုမှုန့် - လက်ဖက်ရည်ဇွန်းတစ်ဇွန်း
  10. ပဒဲကောအတက် - တစ်လက်မ (ထောင်းပေးပါ)
  11. ငါးဖယ်ခြစ် သို့မဟုတ် ဘာဆာငါးခြစ် အနည်းငယ်ကို အရသာနယ်ပြီး အချက်၂၀၀လောက် ပေါက်ကာ အလုံးလေးတွေ လုပ်ထားပါ
  12. အရိုးထွင်ထားသောငါး အသားများနှင့် ပါ၀င်ပစ္စည်း အားလုံးရောပြီး ရေပွက်ပွက်ဆူကာ ကြက်သွန်ဖတ်များ နူးအောင်တည်ပေးပါ
  13. ရေပွက်ပွက်ဆူလာပါက ငါးခြစ်လုံးလေးများ ဟင်းရည်ထဲထည့်ပေးပါ ငါးလုံးများ ရေပေါ်ပေါ်လာပါက ဟင်းရည်အိုးကို အရသာမြည်းပြီး လိုသလို ပြင်ပေးထားပါ
မုန့်တီသုပ်ရန်
  • ငရုတ်သီးစိမ်း အစပ်တောင့် - စားနိူင်သလောက် (လှော်ပြီးထောင်းပေးပါ)
  • Ready made မုန့်ဖတ်အခြောက် - 400 g (ပြုပ်ပေးထားပါ)
  • မန်ကျည်းသီးမှည့်ရည် - လက်ဖက်ရည်ပန်းကန် တစ်လုံး
  • သံပုရာသီး - တစ်လုံး( ကြိုက်လျှင်ထည့်သောက်ပါ )
  • ငါးငံပြာရည် - လက်ဖက်ရည်ပန်းကန် တစ်လုံး
  • ပဲကြော် - ဆယ်ချပ် (ချေထားပေးပါ)
  • နံနံပင် - ဆယ်ပင်ခန့် (လှီးပေးထားပါ)
  • ငါးဖယ်ကြော် - အချပ်သုံးဆယ် (အနေတော် ညှပ်ထားပေးပါ)
  • ကြက်သွန်ဖြူဆီချက် - တရုတ်ဟင်းပြင်ပန်းကန် အသေးတစ်လုံးစာ ချက်ထားပါ
  • မုန့်တီသုပ်ရန် မိမိအဆင်ပြေသလို ပါ၀င်ပစ္စည်းများထည့်ပြီး ခပ်ဖွဖွနယ်ကာ သုပ်ပေးပြီးပါက ရှူးရှဲအသုပ်လေးကို စားပွဲပြင်ပေးကာ မုန့်တီဟင်းရည်နှင့် တွဲဖက်ပြီး သုံးဆောင်နိုင်ပါပြီ။

Wednesday 10 November 2021

ပုဇွန် ထမင်းကြော်

 


ဒီနေ့တော့ နွေရာသီကြီးမှာ မိုးကလဲရွာ လေကလဲ အရမ်းတိုက်နေတော့ စိတ်ထဲမှာ ညီးစိစိနဲ့မို့လို့ တစ်မယ်ထဲနဲ့ ဗိုက်ဝစေမဲ့ ထမင်းပွဲလေးဘဲ ကြော်လိုက်ပါတယ်။

ဒါကြောင့်မို့လို့ မာမာပြင်ဆင်ပြီး ကြော်ဖြစ်တဲ့အတွက် ထမင်းကြော် ကြော်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. Basmati Rice - ထမင်းပေါင်းအိုး ဆန်ချင်ဗူး နှစ်ဗူး
  2. ရေ - ထမင်းပေါင်းအိုး ဆန်ချင်ဗူး လေးဗူး
  3. ကြက်သွန်နီ - ခပ်သေးသေး တစ်လုံး
  4. ကြက်သွန်ဖြူ  - အမွှာကြီးကြီး သုံးမွှာ
  5. ဆား - လက်ဖက်ရည်ဇွန်း တစ်ဝက်သာသာ
  6. အရသာမှုန့် - လက်ဖက်ရည်ဇွန်း တစ်ဝက်သာသာ
  7. ဆီ - ထမင်းစားဇွန်း ငါးဇွန်း
  8. ငရုတ်ကောင်းမှုန့် - လက်ဖက်ရည်ဇွန်း တစ်ဝက်
  9. ပုဇွန်အကောင်သေး - အကောင်သုံးဆယ်ခန့် (white tiger prawn )
  10. ကြက်ဥ - နှစ်လုံး
  11. နှမ်းဆီမွှေး - လက်ဖက်ရည်ဇွန်း တစ်ဝက်
  12. ပဲငံပြာရည် အပျစ် - ထမင်းစားဇွန်း နှစ်ဇွန်း

ပြင်ဆင်ပုံ
  • ဆန်ကို ရေသုံးခါလောက် ဆေးပေးပါ
  • ရေဆေးပြီးတာနဲ့ ရေနှင့်အတူ ထမင်းပေါင်းအိုးထဲ ထည့်ပေးကာ ခလုတ်နှိပ်ပြီး ချက်ပေးပါ
  • ထမင်းကျက်တာနဲ့ ချက်ထားသော ထမင်းကို အအေးခံပြီး ဖွထားပါ
  • ပုဇွန်ကို ရေဆေးပြီး အမြှီး ခေါင်း အခွံများဖယ်ကာ ကြောမှခွဲ၍ အမည်းကြောင်း ထုတ်၍ သန့်စင်ထားပါ
  • ကြက်သွန်ဖြူကို အခွံခွာပြီး ရေဆေးကာ ခပ်နုတ်နုတ် စင်းထားပါ
  • ကြက်သွန်နီကို အခွံခွာကာ ရေဆေးပြီး ခပ်ပါးပါး လှီးထားပါ
  • ကြပ်ဥကို ဇလုံတစ်လုံးထဲမှာ ဖောက်ထည့်ပြီး ခလောက်ထားပါ
  • ကျန်ပါဝင် ပစ္စည်းများပို မဆင်သင့် ပြင်ထားပါ
ကြော်ရန်ပြင်ဆင်ပုံ
  1. ဒယ်အိုးထဲမှာ ဆီထည့်ပြီး အပူပေးပါ
  2. ဆီပူလာပါ ပုဇွန်များကို အရင်ဆုံး ထည့်ကြော်ပေးပါ
  3. ပုဇွန်ထည့်ပြီး သုံးမိနစ်လောက် ရတာနဲ့  ကြက်သွန်နီနှင့် ကြက်သွန်ဖြူတို့ကိုထည့်ပြီး နွမ်းသွားတဲ့ထိ ကြော်ပေးပါ
  4. ပြီးတာနဲ့ ခလောက်ထားသော ကြက်ဥကို ထည့်ကြော်ပေးပါ 
  5. ကြက်ဥထည့်ကြော်တာ နှစ်မိနစ်လောက် ရတာနဲ့ ထမင်းများကို ထည့်ကြော်ပေးပါ
  6. ပြီးတာနဲ့ ထိုအိုးထဲသို့ ပဲငံပြာရည် အပျစ် ဆားနှင့် အရသာမှုန့်တို့ကို ထည့်ပြီး အရသာ သမအောင် ထည့်မွှေပေးပါ
  7. အားလုံး အရသာ သမသွားပါက နှမ်းဆီနှင့် ငရုတ်ကောင်းမှုန့်ထည့်ပြီး မွှေပေးကာ တစ်မိနစ်လောက် ကြော်ပေးပြီး အရသာမြည်းကာ လိုသလို ပြင်ပေးပါ
  8. ပြီးတာနဲ့ မွှေးပြီးစိမ့်နေတဲ့ ထမင်းကြော်ကို စားသုံရန် ပြင်ပေးနိူင်ပါပြီ။

Tuesday 9 November 2021

အော်စွန်းသုပ်

 






ဒီနေ့တော့ အရင်တစ်ပါတ်က ဝယ်လာတဲ့ အော်စွန်းသုပ်ပါတယ် အနံ့မွှေးမွှေးလေးနဲ့ စားလို့လဲ ကောင်းတဲ့အတွက် မာမာပြင်ဆင်ပြီး သုပ်ထားတဲ့ အသုပ်သုပ်နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
  1. အော်စွန်း - တစ်ပေခွဲခန့်ရှိသော အော်စွန်း
  2. ပဲကြာဇံ - လက်တစ်ဆုတ်စာ
  3. မြေပဲလှော်ထောင်း - ထမင်းစားဇွန်း နှစ်ဇွန်း
  4. သံပုရာသီး - အနေတော် တစ်ခြမ်း
  5. ပဲအကျက်မှုန့် - ထမင်းစားဇွန်း တစ်ဇွန်းမောက်မောက်
  6. ပုဇွန်ခြောက်မှုန့် - ထမင်းစားဇွန်း တစ်ဇွန်းမောက်မောက်
  7. ငါးငံပြာရည် - ထမင်းစားဇွန်း တစ်ဇွန်း
  8. ကြက်သွန်ဖြူဆီချက် - ထမင်းစားဇွန်း နှစ်ဇွန်း
  9. ကြက်သွန်နီ - အနေတော် တစ်ခြမ်း
  10. ငရုတ်သီး အလှော်မှုန့် - စားနိူင်သလောက်
  11. အရသာမှုန့် - လက်ဖက်ရည်ဇွန်း တစ်၀က်
  12. ပြင်ဆင်ပုံ

    • အော်စွန်းကို အပြင်ခွံများ ခွာကာ ရေစင်အောင်ဆေးပေးပါ
    • ပြီးတာနဲ့ ခြစ်တံနှင့် ခြစ်ပေးပါ
    • ပဲကြာဇံကို တစ်နာရီခန့် ရေစိမ်ပေးပါ
    • ရေစိမ်ပြီးတာနဲ့ ရေနွေး ဆူဆူထဲမှာ ထပ်ထည့်ပေးပြီး နှစ်မိနစ်လောက် ထပ်ပြုပ်ပေးပါ
    • ပြုပ်ပြီးပါက ရေအေးနဲ့ဆေးပြီး ရေများကိုသွန်ပေးကာ ဇကာထဲမှာ စစ်ထားပါ
    • ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးထားပါ
    • သံပုရာသီးကို ရေဆေးပြီး အစိတ်လေးတွေ လှီးထားပါ
    • ပါ၀င်ပစ္စည်းများကို အဆင်သင့် ပြင်ထားပါ
    • ဇလုံကျယ်ကျယ်ထဲမှာ ပဲကြာဇံများ အော်စွန်း ကြက်သွန်နီ မြေပဲလှော်ထောင်း  ပုဇွန်ခြောက်မှုန့် ပဲမှုန့် ငရုတ်သီးမှုန့် အရသာမှုန့် ကြက်သွန်ဖြူဆီချက် ငါးငံပြာရည်နှင့် သံပုရာရည် တို့ထည့်ပြီး ခပ်ဖွဖွ နယ်ပေးပါ
    • နယ်ဖတ်ပြီးပါက အရသာမြည်းပြီး လိုသလို ပြင်ပေးကာ ချဉ်ငံစပ် အရသာလေးနဲ့ အော်စွန်း အသုပ်လေးကို နှစ်သက်သလို စားသုံးနိူင်ပါပြီ။

Sunday 7 November 2021

သံပုယိုသီးမွှာ ငပိထောင်း

 






ဒီနေ့တော့ အရင်တစ်ပါတ်က Sydney ကိုသွားရင်း ရှောက်သီးလောက်ကြီးတဲ့ သံပုယိုသီးလေးတွေ ဝယ်လာဖြစ်ခဲ့ပါတယ် အမွှာကြီးတွေကလဲ အကြီးကြီးတွေ ဖြစ်တဲ့အတွက် ချဉ်ငံစပ် ငပိထောင်းလေး ထောင်းဖြစ်သွားပါတယ် ဒါကြောင့်မို့လို့ မာမာပြင်ဆင်ပြီး ထောင်းထားတဲ့ ထောင်းနည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. သံပုယိုသီး - အလုံးကြီးကြီး နှစ်လုံး
  2. ပုဇွန်ငပိ - ထမင်းစားဇွန်း မောက်မောက် ၄ဇွန်းခွဲ
  3. ပုဇွန်ခြောက် - အကောင်ကြီးကြီး အကောင် ၂၀ခန့်
  4. ကြက်သွန်ဖြူ - အမွှာကြီးကြီး ၇မွှာ
  5. ငရုတ်သီးစိမ်း - စားနိူင်သလောက်
  6. အရသာမှုန့် - လက်ဖက်ရည်ဇွန်း တစ်ဇွန်း
  7. ဆား - လက်ဖက်ရည်ဇွန်း တစ်ဇွန်း (သံပုယိုသီး ဆားရည်စိမ်ရန်)
ပြင်ဆင်ပုံ
  • ဆားကို ပန်းကန်လုံး တစ်လုံးထဲမှာ ထည့်ပေးပြီး ရေလက်ဖက်ရည် ပန်းကန်လုံး တစ်လုံးသာသာနှင့် ဖျော်ထားပါ
  • သံပုယိုသီးကို အခွံခွာပြီး အဖြူရောင် အကာများ မပါအောင် ဖယ်ပေးပြီး အသားမွှာလေးတွေ ထွင်ပေးပါ
  • ထို ထွင်ထားသော သံပုယိုသီး အသားမွှာ အဖတ်လေးများကို ဆားရည်ဖျော်ထားသော ရည်ထဲမှာ စိမ်ထားပါ
  • ပုဇွန်ငပိကို မိုက်ခရိုဝေ့ထဲမှာ စက္ကန့်၃၀ဆီ ၂ခါကင်ပေးပါ
  • မိုက်ခရိုဝေ့ မရှိပါက မီးဖိုပေါ်မှာ ဒယ်အိုးခပ်သေးသေး တစ်လုံးထဲ ပုဇွန်ငပိကိုကပ်ကာ ကင်ပေးပါ
  • အပေါ်ယံ တင်းလာပါက နောက်တစ်ဖက်ကို လှန်ပြီး ဆက်ကင်ပေးပါ
  • ငရုတ်သီးစိမ်းများကို ရေဆေးပြီး လှော်ပေးကာ မညက်တစ်ညက် ထောင်းထားပါ
  • ကြက်သွန်ဖြူပို အခွံခွာပြီး ရေဆေးကာ မညက်တစ်ညက် ထောင်းထားပါ
  • အားလုံး အဆင်သင့် ဖြစ်တာနဲ့ အရင်ဆုံး ငရုတ်ဆုံထဲမှာ ပုဇွန်ခြောက်ကို ညက်နေအောင် ထောင်းပေးပါ
  • ပုဇွန်ခြောက် ညက်တာနဲ့  ငရုတ်သီးစိမ်းနှင့် ကြက်သွန်ဖြူတို့ကို ထည့်ထောင်းပေးပါ
  • အားလုံး မညပ်တစ်ညက် အနေအထား ရတာနဲ့ အရသာမှုန့် နှင့် ပုဇွန်ငပိတို့ကို ထည့်ထောင်းပေးပါ
  • ပြီးတာနဲ့ ပုဇွန်ငပိထောင်းကို သံပုယိုသီးအမွှာ အဖတ်နှင့် ရောမွှေပေးကာ ချဉ်ငံစပ်ပြီး မွှေးနေတဲ့ ငပိထောင်းကို မိမိနှစ်သက်တဲ့ တို့စရာလေးတွေနဲ့ တွဲဖက်ကာ စားသုံးနိူင်ပါပြီ။

Saturday 6 November 2021

ထမင်းပေါင်း

 


ဒီနေ့တော့ ထမင်းပေါင်းလေး လုပ်ဖြစ်ပါတယ် စားလို့ကောင်းတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
  1. ပဲလိပ်ချောင်း - တစ်ပေခန့် နှစ်ချောင်း
  2. ကြက်သွန်နီ - အလုံးသေး ငါးဥခန့်
  3. ပန်းဂေါ်ဖီ  - ငါးခက်ခန့်
  4. ဘရော့ကိုလီ - လေးခက်ခန့်
  5. မုံလာဥနီ - အနေတော် တစ်ဥ
  6. ကြက်ဥ - လေးလုံး
  7. မှိုခြောက် - ဆယ့်ငါးခုခန့်
  8. ကြက်သွန်ဖြူ - အမွှာကြီးကြီး သုံးမွှာ
  9. ပန်းခြောက် - ဆယ့်ငါးခုခန့်
  10. တရုတ်နံနံ - အခက်ကြီးကြီး နှစ်ခက်
  11. ပြောင်းကော်မှုန့်. - ထမင်းစားဇွန်း နှစ်ဇွန်းမောက်မောက်
  12. သကြား - ထမင်းစားဇွန်း တစ်ဇွန်း 
  13. ဆား - လက်ဖက်ရည်ဇွန်း တစ်ဇွန်း
  14. ပဲငံပြာရည်အနောက်ရည် - ထမင်းစားဇွန်း တစ်ဇွန်း
  15. ကြက်ပြုပ်ရည် chicken stock - 2 cups
  16. ဆီ - ထမင်းစားဇွန်း သုံးဇွန်း 
  17. ငရုတ်ကောင်းမှုန့် - လက်ဖက်ရည်ဇွန်း တစ်ဝက်
  18. ချက်ပြီးသား ထမင်း 

ပြင်ဆင်ပုံ

  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • ကြက်သွန်နီကို အခွံခွာပြီး ရေဆေးထားပါ
  • ပဲလိပ်ချောင်းကို ရေမြုပ်အောင်ထည့်ပြီး နှစ်နာရီလောက် စိမ်ပေးကာ ရေဆေးပြီး ရေစစ်ထားပါ
  • မှိုခြောက်ကို ရေမြုပ်အောင်ထည့်ကာ နှစ်နာရီလောက် စိမ်ပေးကာ ရေဆေးပြီး ရေစစ်ထားပါ
  • ပန်းခြောက်ကို ရေမြုပ်အောင်ထည့်ကာ နာရီဝက်လောက် စိမ်ပေးပြီး ရေစစ်ထားပါ
  • ဘရော့ကိုလီကို ရေဆေးပြီး အနေတော်လေးတွေ လှီးထားပါ
  • ပန်းဂေါ်ဖီကို ရေဆေးပြီး အနေတော် အခက်လေးတွေ လှီးပေးပါ
  • မုံလာဥနီကို အခွံခွာပြီး ရေတေးကာ မိမိနီစ်သက်သလို လှီးထားပါ
  • တရုတ်နံနံကို ရေဆေးပြီး ခပ်ကြမ်းကြမ်း လှီးထားပါ
  • အသီးအရွက် မကြော်ခင် ကော်ရည်ကို ဖျော်ထားပေးပါ
  • ပြောင်းကော်မှုန့် သကြား ဆားတို့ကို ရေ တရုတ်ဟင်းရေသောက်ပန်းကန် တစ်လုံးစာလောက်နဲ့ ဖျော်ထားပေးပါ
  • ကြက်ဥကို ကျက်အောင်ပြုပ်ပြီး အခွံခွာထားပါ
အသီးအရွက် ကြော်ရန်ပြင်ဆင်ပုံ
  • ပါဝင်ပစ္စည်း အားလုံးကို အဆင်သင့် ပြင်ထားပါ
  • ဇောက်နက်သော အိုးတစ်လုံးကို အပူပေးပြီး ဆီထည့်ပေးပါ
  • ဆီပူလာပါက ဓါးပြားရိုက်ထားသော ကြက်သွန်ဖြူကို မွှေးလာတဲ့အထိ ကြော်ပေးပါ
  • ကြက်သွန်ဖြူ အနံ့လေး မွှေးလာတာနဲ့ ကြက်ပြုပ်ရည်ကို ထည့်ပေးပါ 
  • ကြက်ပြုပ်ရည် ပွက်ပွက်ဆူလာတာနဲ့  ငရုတ်ကောင်းမှုန့်နှင့်  တရုတ်နံနံမှလွဲပြီး အားလုံးကို ထည့်ပေးပါ
  • ရေကို ဆယ်မိနစ်လောက် ပေးဆူပြီးမှ ဖျော်ထားသော ကော်ရည်ကို လောင်းထည့်ပြီး မွှေပေးပါ
  • ကော်ရည်ပျစ်လာပါက ကြက်ဥနှင့် ပဲငံပြာရည်ကို ထည့်မွှေပေးပါ
  •  အရသာကို မြည်းပေးပြီး မိမိစိတ်ကြိုက် အရသာ ရလာအောင် ပြင်ပေးပါ
  • ပြီးတာနဲ့  ငရုတ်ကောင်းမှုန့်နှင့် တရုတ်နံနံကို ထည့်မွှေပြီးတာနဲ့ မီးပိတ်ပေးပြီး ပန်းကန်ထဲ ပြောင်းထည့်ပေးပါ
  • ပန်းကန်ပြား တစ်ချပ်ထဲမှာ ထမင်းကို ထည့်ပေးကာ ကော်ရည်ကို ဆမ်းပေးပါ
  • ပဲလိပ် မှိုခြောက်ပန်းခြောက် ကော်ရည်ပူပူလေးကို ထမင်းပူပူနဲ့ တွဲဖက်ပြီး စားသုံးရန် ပြင်ပေးနိုင်ပါပြီ။

Friday 5 November 2021

ပုဇွန်ကင်ပေါင်းကြော်

 

ဒီနေ့တော့ စားလို့ကောင်းပြီး ထမင်းပူပူလေးနဲ့ လိုက်ဖက်သလို သူ့ချည်းသက်သက် စားရင်လဲ စားလို့ကောင်းလွန်းတဲ့ ပုဇွန်ကင်ပေါင်းကြော် ကြော်နည်းလေးကို မျှဝေပေးလိုက်ပါတယ်ရှင်။


ပါဝင်ပစ္စည်းများ
  1. ပုဇွန်အကောင်သေး - 300 ml (လက်သန်းအရွယ်)
  2. ချင်းတက် - လက်တစ်ဆစ်သာသာ
  3. ကြက်သွန်ဖြူ - အမွှာကြီးကြီး ငါးမွှာ
  4. ကြက်သွန်မိတ်အပင် - လေးပင် (အပင်ကြီးကြီး)
  5. ကြက်သွန်နီ - အနေတော် တစ်လုံး
  6. အရသာမှုန့် - လက်ဖက်ရည်ဇွန်း တစ်ဝက်
  7. ဆား - လက်ဖက်ရည်ဇွန်း တစ်ဝက်
  8. ရေ - 200 ml 
  9. ကောက်ညှင်းမှုန့် - 250 ml
  10. ဆန်မှုန့် - 45 ml
  11. ဆီ - လိုသလောက် သုံးပေးပါ
ပြင်ဆင်ပုံ
  • ပုဇွန်ကို ရေစင်အောင်ဆေးပြီး အခွံမခွာဘဲ ခေါင်းနှင့်အမြှီးကို ဖြုတ်ပေးကာ ရေစစ်ထားပါ
  • ချင်းကို အခွံခွာပြီး ရေဆေးကာ ညက်နေအောင် ထောင်းပေးပါ
  • ကြက်သွန်ဖြူကို အခွံခွာပြီး ရေဆေးကာ ညက်နေအောင် ထောင်းပေးပါ
  • ကြက်သွန်မိတ်ပင်ကို ရေဆေးပြီး ခပ်ထူထူ လှီးပေးထားပါ
  • ကြက်သွန်နီကို အခွံခွာပြီး ရေဆေးကာ မထူမပါးလေးတွေ လှီးပေးထားပါ
  • အားလုံး အဆင်သင့် ဖြစ်တာနဲ့ ဇလုံထဲမှာ ကြက်သွန်ဖြူထောင်း ချင်းထောင်း ပုဇွန် ကြက်သွန်နီ လှီးပြီးသား ကြက်သွန်မိတ်ပင် လှီးပြီးသား ဆန်မှုန့် ကောက်ညှင်းမှုန့် ဆားနှင့် အရသာမှုန့်တို့ထည့်ပြီ သမအောင် မွှေပေးပါ
  • ပါဝင်ပစ္စည်းများ သမသွားတော့မှ ရေကိုနည်းနည်းချင်း ထည့်မွှေပေးပါ
  • ​မုန့်နှစ်ရည်က ခပ်ပျစ်ပျစ်လေး ဖြစ်နေရမှာမို့လို့ ရေကိုနည်းနည်းချင်း ထည့်လိုက် မွှေလိုက် လုပ်ပေးပါ
  • မုန့်နှစ်စပ်ရာမှာ ရေကို  လိုတိုးပိုလျှော့ လုပ်ပေးကာ ခပ်ပျစ်ပျစ်လေး ရတာနဲ့ အဖုံးအုပ်ကာ တစ်နာရီလောက် နှပ်ထားပေးပါ။
အကြော်ကြော်ပုံ
  • ဒယ်အိုးထဲမှာ ဆီထည့်ပြီး မီးအနေတော်နှင့် အပူပေးပါ
  • ဆီပူလာတာနဲ့ မုန့်နှစ်ရည်ကို အထက်အောက် သမအောင် ပြန်မွှေပေးကာ မိမိနှစ်သက်တဲ့ အကြော်ပုံစံလေးတွေ ရလာအောင် ဇွန်းနှင့်ခပ်ထည့်ပြီး အိုးဆန့်သလောက် ထည့်ပေးကာ ကြော်ပေးပါ
  • မာမာကတော့ အချပ်ကြီးကြီးလေး လိုချင်တဲ့အတွက် ကော်ဖီပန်းကန်ပြားလေးထဲမှာ ပုဇွန်နှင့် အစာပလာများကို မျှတအောင် ထည့်ပေးပြီး ကြော်ပေးပါတယ်
  • အကြော်ရဲ့ အောက်ဘက်အခြမ်းက ရွှေဝါရောင်လေး သန်းလာပါက နောက်တစ်ဖက်ကို လှန်ပေးကာ ဆက်ကြော်ပေးပါ
  • အကြော် တစ်ချပ်လုံး ရွှေအိုရောင်လေး သန်းလာရင်တော့ ဆယ်ပြီးဆီစစ်ပေးထားပါ။
အချဉ်အတွက် ပါဝင်ပစ္စည်းများ
  1. မန်ကျည်းသီးမှည့် - ထမင်းစားဇွန်း တစ်ဇွန်းစာခန့်
  2. သကြား - ထမင်းစားဇွန်း တစ်ဇွန်း
  3. ဆား - လက်ဖက်ရည်ဇွန်း တစ်ဝက်
  4. ငါးငံပြာရည် - ထမင်းစားဇွန်း နှစ်ဇွန်း
  5. ကြက်သွန်ဖြူ - အမွှာကြီးပြီး ငါးမွှာ
  6. ငရုတ်သီးစိမ်း - ၇တောင့်
  7. ငရုတ်သီး အကျက်မှုန့် - ထမင်းစားဇွန်း တစ်ဝက်
  8. ရေနွေးပူပူ - ထမင်းစားဇွန်း သုံးဇွန်း (မန်ကျည်းသီး မှည့်ဖျော်ရန်)
  9. ရေ - ထမင်းစားဇွန်း တစ်ဇွန်း (အချဉ်ဖျော်ရန်)
ပြင်ဆင်ပုံ
  • မန်ကျည်းသီးမှည့်ကို ရေနှစ်ခါလောက် ဆေးပေးပြီး ရေနွေးပူပူနှင့် စိမ်ပေးကာ မန်ကျည်းမှည့်ဘအနှစ်ကို ယူထားပါ
  • ကြက်သွန်ဖြူကို အခွံခွာပြီး ညက်နေအောင် ထောင်းထားပါ
  • ငရုတ်သီးစိမ်းကို ရေဆေးပြီး ခပ်ပါးပါးလေးတွေ လှီးထားပါ
  • ပါဝင်ပစ္စည်း အားလုံးကို အဆင်သင့် ဖြစ်တာနဲ့ ဇလုံခပ်သေးသေး တစ်လုံးထဲမှာ အရသာ သမအောင် ရောမွှေပေးပါ
  • အချဉ်ရပြီ ဆိုတာနဲ့ ပုဇွန်ကင်ပေါင်းကြော်နဲ့ တွဲဖက်ပြီး စားသုံးနိူင်ပါပြီ။

Tuesday 2 November 2021

ဘဲကင် မွှေးမွှေးလေး

 


ဒီနေ့တော့ မာမာတို့မြို့လေးမှာ နေသာမိုးခြောက်တဲ့ ရာသီဥတုလေးကို ရနေပါတယ် ရာသီဥတုလေး ကောင်းနေတော့ စိတ်ပါလက်ပါနဲ့ ဟင်းတွေ ချက်ချင်တဲ့ နေ့လေးတစ်နေ့ဆိုရင်လဲ မမှားပါဘူး။

ဒါကြောင့်မိုလို့ ဘဲကင်လေး ကင်ဖြစ်ပါတယ် လုပ်ရတာလဲလွယ် ပြင်ဆင်ရတာလဲ လွယ်တဲ့အတွက် မာမာပြင်ဆင်ပြီး ကင်ထားတဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ

  1. ဘဲ - အနေတော် တစ်ကောင်
  2. ပျားရည် - ထမင်းစားဇွန်း ၇ဇွန်း (အရသာစပ်ရန်)
  3. ပျားရည် - ထမင်းစားဇွန်း နှစ်ဇွန်း (ဘဲကင်နေစဉ် သုတ်ပေးရန်)
  4. ဆီ - ထမင်းစားဇွန်း နှစ်ဇွန်း (ဘဲကင်နေစဉ် သုတ်ပေးရန်)
  5. Chinese cooking wine - ထမင်းစားဇွန်း နှစ်ဇွန်း
  6. တရုတ်မဆလာ - လက်ဖက်ရည်ဇွန်း နှစ်ဇွန်း
  7. ဗနီကာ - ထမင်းစားဇွန်း နှစ်ဇွန်း
  8. ဆား - လက်ဖက်ရည်ဇွန်း နှစ်ဇွန်းခွဲ
  9. ဆီ - ထမင်းစားဇွန်း ဆယ်ဇွန်းခန့်
  10. ကြက်သွန်ဖြူ - အမွှာကြီးကြီး ဆယ့်ငါးမွှာ
  11. ချင်းတက် - လက်တစ်ဆစ်သာသာ
  12. ကြက်သွန်မိတ် - ဆယ်ပင်ခန့်
  13. နာနတ်ပွင့် - လေးပွင့်
  14. ပဲငပိ အချို - ထမင်းစားဇွန်း လေးဇွန်း
  15. Aluminum foil - လိုသလောက် သုံးပေးပါ
  16. ကင်ပျစ်ဇကာ - တစ်ခု
  17. ကင်မည့်ဗန်း - တစ်ချပ်
အရသာစပ်ရန်
  1. ဇလုံတစ်လုံးထဲမှာ ပျားရည် Chinese cooking wine ဗနီကာ တရုတ်ဆမလာ ဆီ နာနတ်ပွင့်တို့ကို ရောမွှေထားပါ
ဘဲဗိုက်ထဲထည့်ရန် ပြင်ဆင်ပုံ
  1. ချင်းကိုအခွံခွာပြီး ရေဆေးကာ မညက်တစ်ညက် ထောင်းပေးပါ
  2. ကြက်သွန်ဖြူကို အခွံခွာပြီး ရေဆေးကာ မညက်တစ်ညက် ထောင်းပေးပါ
  3. ကြက်သွန်မိတ်ကို ရေဆေးကာ ခပ်ရှည်ရှည် လှီးထားပါ
  4. ကျန်နေသော ပါဝင်ပစ္စည်းများကို အဆင်သင့် ပြင်ထားပါ
ဘဲကင်ရန် ပြင်ဆင်ပုံ
  • ဘဲရဲ့ ဗိုက်ထဲမှ အူကလီစာများကို အကုန်ထုတ်ပေးပါ
  • ဘဲတစ်ကောင်လုံးကို အတွင်းအပြင် သန့်စင်နေအောင် ရေဆေးပေးပါ
  • ပြီးတာနဲ့ ဘဲတစ်ကောင်လုံးကို ခြောက်သွေ့နေအောင် သုတ်ပေးပါ
  • ရေသုတ်ပြီးတာနဲ့ ဘဲကိုဆားနှင့် အတွင်းအပြင် အကုန်လုံးကို လိုက်ပွတ်ပေးပါ
  • ပြီးတာနဲ့ ပျားရည်နှင့် အပြင်ဖက်ကို လိုက်သုတ်ပေးပါ
  • ဘဲရဲ့ ဗိုက်ထဲကို ချင်း ကြက်သွန်ဖြူနှင့် ကြက်သွန်မိတ်များကို ထည့်ပေးပါ
  • ပြီးတာနဲ့ အရသာ စပ်ထားသော အနှစ်ကို ထမင်းစားဇွန်း တစ်ဇွန်းစာယူပြီး ဗိုက်ထဲကို ထည့်ပေးပါ
  • ပဲငပိကိုလဲ ဘဲရဲ့ ဗိုက်ထဲကို ထည့်ပေးပါ
  • အားလုံးအဆင်သင့် ဖြစ်တာနဲ့ ဘဲပေါင်နှစ်ချောင်းကို စုပြီးခြည်ပေးကာ ဗန်းထဲမှာ ပက်လက်အနေအထား ထည့်ပေးပါ
  • ပြီးတာတဲ့ အရသာ စပ်ထားလို့ ပိုတာတွေကို ဘဲတစ်ကောင်လုံးအပေါ် လောင်းချပေးကာ အဖုံးအုပ်ပေးပါ
  • ရေခဲသေတ္တာ မခဲတဲ့ အကန့်ထဲမှာ ငါးနာရီခန့် အနည်းဆုံး နှပ်ထားပေးပါ
ဘဲကင်နေစဉ် သုတ်ပေးရန်
  • ဆီနှင့်ပျားရည်ကို ပန်းကန်တစ်ခုထဲမှာ ရောမွှေထားပါ
ဘဲကင်ကင်နည်း
  • ဘဲကင် ကင်မည့် ဗန်းထဲကို ဘဲကင်တဲ့အခါ အရည်များ ကျလာပါက ဗန်းမညစ်ပါတ်စေရန် aluminum foil ခင်းပေးပါ
  • ထိုအပေါ်မှာ ကင်မည့်ကင်ပျစ် ဇကာလေးကို တင်ပေးပါ
  • ထိုအပေါ်မှာမှ အရသာ နှပ်ထားသော ဘဲကိုတင်ပေးပါ
  • Ovenကို 200 ဒီကရီနှင့် ဖွင့်ပေးကာ ဘဲကင်ကင်မည့် ဗန်းကို oven ထဲ ထည့်ပေးပါ
  • တစ်ဖက်ကို နာရီဝက်လောက် ကင်ပေးကာ နာရီဝက် ပြည့်တာနဲ့ အပြင်ကို ခနထုတ်ပေးပါ
  • နောက်တစ်ဖက် မလှည့်ခင် ဘဲတစ်ကောင်လုံးကို ပျားရည်နှင့်ဆီ စပ်ထားသော အရည်ကို သုတ်ပေးပါ
  • နာရီဝက်တစ်ခါ အပြင်ထုတ်ထုတ်ပေးပြီး ပျားရည်နှင့်ဆီ စပ်ထားသော အရည်ကို သုတ်ပေးလိုက် ပြန်ကင်လိုက်နှင့် တစ်နာရီခွဲမှ နှစ်နာရီလောက်အထိ ကင်ပေးပါ
  • ဘဲသား အရည်ခွံလေးတွေ မွှေးပြီးကြွတ်ရွလာပြီဆိုရင် ဘဲကင်မွှေးမွှေးလေး ရပါပြီ။