Monday, 18 April 2016

မျှစ်ချဉ် ရုန်းပတေသီးကြော်ချက်









မျှစ်ချဉ်ဆိုတာနဲ့ အနံ့ကြောက်တဲ့သူတွေလဲ ကြောက်ကြပါတယ် မာမာကတော့ ဒူးရင်းသီးတို့မျှစ်ချဉ်တို့ကို အနံ့အရသာကအစ အရမ်းကြိုက်လေတော့ ဒီနေ့တော့ မျှစ်ချဉ်နဲ့ ချက်လေသတည်းပေါ့နော် ဒါကြောင့်မို့ ခြံထွက် ရုန်းပတေသီးလေးတွေနဲ့သတ်သတ်လွတ် စားသူတွေအတွက် အရမ်းအဆင်ပြေတဲ့ ဟင်းတမယ် ချက်နည်းကို မျှဝေလိုက်ပါတယ်။

ပါဝင်ပစ္စည်းများ

  • မျှစ်ချဉ် - တရုတ်ဟင်းပြင်ပန်းကန် အလတ်တလုံးစာ
  • ရုန်းပတေသီး - ၁၅တောင့်
  • ကြက်သွန်နီ - အနေတော်တလုံး
  • ကြက်သွန်ဖြူ - အမွှာကြီးကြီး ၂မွှာ
  • နနွင်းမှုန့် - လက်ဖက်ရည်ဇွန်း သုံးပုံတပုံ
  • ငရုတ်သီးစိမ်း - စားနိူင်သလောက်
  • ငရုတ်သီးစိမ်း - အတောင့်ကြီးကြီး အသားပွပွ ၃တောင့်
  • ဆား - လက်ဖက်ရည်ဇွန်းတ၀က် 
  • အချိုမှုန့် - လက်ဖက်ရည်ဇွန်း တ၀က်
  • ငရုတ်သီး အရောင်တင်မှုန့် - လက်ဖက်ရည်ဇွန်း တဇွန်းမောက်မောက်
  • ဆီ - ဟင်းခတ်ဇွန်းကြီး တဇွန်း
ပြင်ဆင်ပုံ
  1. အသင့်လုပ်ထားသော မျှစ်ချဉ်ကို ရေလေးခါလောက်ဆေးပြီး ရေစစ်ထားပါ
  2. ရုံးပတေသီးကို အတောင့်လိုက် ရေဆေးပြီးမှ အနေတော် ပိုင်းဖြတ်ထားပါ
  3. ကြက်သွန်နီကို အခွံခွာပြီး အလုံးလိုက် ရေဆေးကာ ခပ်နုတ်နုတ်လှီးထားပါ
  4. ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  5. ငရုတ်သီးစိမ်းကို မထူမပါး ခပ်စောင်းစောင်း လှီးထားပါ
  6. ငရုတ်သီးစိမ်း အပွတောင့်ကို ၃ပိုင်းလှီးထားပါ
  7. ဆီကိုအပူပေးပြီး နနွင်းမှုန့်ထည့်ပါ
  8. ဆီအငွေ့တက်လာတာနဲ့ ကြက်သွန်နီ ကြက်သွန်ဖြူ ခပ်နုတ်နုတ်လှီးထားသော ငရုတ်သီးစိမ်း ငရုတ်သီးမှုန့်တို့ကို မွှေးလာအောင် ဆီသတ်ပေးပါ
  9. ဆီသတ်နံ့မွှေးလာတာနဲ့ မျှစ်ချဉ် ဆားနှင့် အချိုမှုန့်တို့ကို ထည့်မွှေပါ
  10. မျှစ်ချဉ်နှင့် ငရုတ်သီးဆီသတ်နံ့ သင်းလာတာနဲ့ မျှစ်ချဉ်ကို ရေမြုပ်အောင် ထည့်ပေးပါ
  11. မျှစ်ချဉ်ရေခမ်းကာနီးတာနဲ့ ငရုတ်သီးစိမ်းနှင့် ရုံးပတေသီးကို ၃မိနစ်လောက် ထည့်ကြော်ပြီးတာနဲ့ အရသာမြည်းပြီး လိုသလိုပြင်ကာ မျှစ်ချဉ်နံ့သင်းသင်းလေးနဲ့ ရုံးပတေသီး ခပ်ကြွတ်ကြွတ်ဟင်းကို  သုံးဆောင်နိူင်ပါပြီ။

No comments:

Post a Comment