Wednesday, 13 April 2016

သင်္ဘောသီးအရိုင်းသုပ် စပ်စပ်လေး



သင်္ကြန်ရက်ထဲ ပျိုပျိုမေတို့ ရေကစားကအပြန် ချမ်းတုန်ချမ်း အချိန်လေးမှာ အာပူလျှာပူ လျှာဂျွမ်းပြိ်လေး သုပ်စားလို့ရအောင် သင်္ဘောသီးအရိုင်း ထောင်းသုပ်စပ်စပ်လေး တင်ပေးလိုက်ပါတယ်။

ပါဝင်ပစ္စည်းများ

  • သင်္ဘောသီးစိမ်း - အနေတော် တလုံး
  • ပုဇွန်ခြောက် - အကောင် ၂၀ခန့်
  • မြေပဲလှော် - အစေ့၂၀ခန့်
  • ငရုတ်သီးစိမ်း - ၇တောင့်ခန့် အစပ်ကြိုက်လျှင် ပိုထည့်ပါ
  • ထန်းလျှက်ခဲ - ကွမ်းသီးဆံအလုံးလောက် ၃ခ
  • ပုဇွန်ငပိ - ကင်ပြီးသား ကွမ်းသီးဆံလုံးလောက်
  • ဆား - လက်ဖက်ရည်ဇွန်း တ၀က်သာသာ
  • သံပုရာသီး - တခြမ်း
ပြင်ဆင်ပုံ
  • သင်္ဘောသီးကို အခွံခွာပြီး ထိပ်ဖက်မှ လှီးကာ အစေးများကုန်အောင် ရေဆေးထားပါ
  • ပြီးလျှင် အလုံးလိုက် လက်ဝါးပေါ်တင်ပြီး ဓါးထက်ထက်နှင့် လိုက်ပေါက်ပါ
  • တလုံးလုံးပေါက်ပြီးပါက ဓါးနှင့် ခပ်ပါးပါး လိုက်လှီးချပေးပါ
  • လှီးပြီးသော သင်္ဘောသီးများကို သင်္ဘောသီး အစိမ်းနံ့မနံအောင် ရေများများနဲ့ ဆေးပြီးရေစစ်ထားပါ
  • မြေပဲလှော်ကို မညက်တညက်ထောင်းပြီး ဖယ်ထားပါ
  • ငရုတ်ဆုံထဲမှာ ပုဇွန်ခြောက်ကို မညက်တညက် ထည့်ထောင်းပါ
  • ငရုတ်သီးစိမ်းကို မညက်တညက် ရောထောင်းပါ
  • ထန်းလျှက်ခဲကို ညက်နေအောင်ရောထောင်းပြီးမှ သင်္ဘောသီးကို ထည့်ထောင်းပါ
  • ထောင်းသော ကျည်ပွေ့ပေါ် မူတည်ပြီး သင်္ဘောသီးကို ကြည့်ထောင်းပါ
  • ကျောက်ကျည်ပွေ့ဆိုပါက ၁၅ချက် အချက်၂၀လောက် ထောင်းရင်ရပြီး သစ်သားကျည်ပွေ့ဆိုပါက အချက် ၁၀၀ လောက်ထောင်းပေးမှ အရသာဝင်ပါတယ်
  • ထောင်းနေစဉ် ပုဇွန်ငပိ သံပုရာရည် ညှစ်ထည့်ပြီး ဆားပါ နည်းနည်းခြင်းဆီ ထည့်ပေးပါ
  • စားပွဲပြင်တဲ့အခါ ပန်းကန်ထဲသို့ ငရုတ်ဆုံကိုမပြီး အရည်များရော အဖတ်များပါ သွန်ချပြီး မြေပဲထောင်း ဖြူးပေးကာ ပြင်ဆင်ရပါမယ်
  • စပ်စပ်မွှေးမွှေး  သင်္ဘောသီး အရိုင်းထောင်းသုပ်လေး ရပါပြီ။

No comments:

Post a Comment