Tuesday, 19 April 2016

ငရုတ်သီးစိမ်း အစာသွတ်









ဒီနေ့တော့ ဆောင်းဦးအ၀င်လေးမှာ ပူပူစပ်စပ်လေး စားချင်တာနဲ့ ငရုတ်သီးအစာသွတ်လေး ချက်ဖြစ်သွားခဲ့ပါတယ် ကြက်သားအစား ၀က်သားအစာသွတ်ရင်လဲ ရပါတယ် စားကောင်းလွန်းတဲ့ ဟင်းတမယ်မို့ ချက်နည်းလေး မျှဝေလိုက်ပါတယ်။

ပါဝင်ပစ္စည်းများ

  • ငရုတ်သီးစိမ်း အပွတောင့် - ၇တောင့်
  • ကြက်ကြိတ်သား - 150g
  • ဂျုံမှုန့် - ထမင်းစားဇွန်း တဇွန်း
  • ငရုတ်ကောင်းမှုန့် - လက်ဖက်ရည်ဇွန်း တ၀က်
  • ဆား - လက်ဖက်ရည်ဇွန်း တ၀က်မရှိတရှိ
  • အချိုမှုန့် - လက်ဖက်ရည်ဇွန်း တ၀က်
  • နနွင်းမှုန့် - လက်ဖက်ရည်ဇွန်း လေးပုံတပုံ
  • ကြက်သွန်နီ - အနေတော် တလုံး
  • ဆီ - ဟင်းခတ်ဇွန်းကြီး တဇွန်း
ပြင်ဆင်ပုံ
  1. ငရုတ်သီးစိမ်းကို ရေဆေးပြီး ရေခြောက်အောင် သုပ်ထားပါ
  2. ရေခြောက်နေသော ငရုတ်သီးစိမ်းကို အညှာမဖြတ်ဘဲ အရှည်လိုက် အထက်အောက် ခွဲချပေးပါ
  3. ပုံပါအတိုင်း အောက်ဘက် အထိမခွဲဘဲ တ၀က်ဘဲခွဲကာ အထဲမှ အစေ့များကို လက်ဖက်ရည်ဇွန်း ဇွန်းဖင်နှင့် ကလော်ထုတ်ပေးပါ
  4. ကြက်သွန်နီကို အခွံခွာပြီး အလုံးလိုက်ရေဆေးကာ ခပ်နုတ်နုတ် လှီးထားပါ
  5. ကြက်ကြိတ်သားကို ဆား အချိုမှုန့် ငရုတ်ကောင်းမှုန့် ဂျုံမှုန့်တို့နှင့် အရသာဝင်အောင် နယ်ပေးပါ
  6. အရသာနယ်ထားသော ကြက်သားကို ငရုတ်သီးတောင့်ထဲသို့ ပုံပါအတိုင်း သွတ်ပေးပါ
  7. အားလုံးအဆင်သင့်ဖြစ်တာနဲ့ ဆီကိုအပူပေးပါ
  8. ဆီပူတာနဲ့ နနွင်းမှုန့်နှင့် ကြက်သွန်ထည့်ကာ မွှေပေးပါ 
  9. ကြက်သွန်နွမ်းတာနဲ့ ငရုတ်သီးစိမ်း အစာသွတ်ကို ထည့်မွှေကာ အထက်အောက် လှန်ပေးပြီး ရေမြုပ်အောင်ထည့်၍ ဆီပြန်အောင်တည်ပေးပါ
  10. ဆီပြန်လာတာနဲ့ မွှေးပြီးအိနေကာ စပ်စပ်မွှေးမွှေး အလွန်စားကောင်းသော ငရုတ်သီးစိမ်း အစာသွတ်ဟင်း ဆီပြန်မွှေးမွှေး စပ်စပ်လေး ရပါပြီ။

No comments:

Post a Comment