တခါတလေ အသားဟင်း ဆီပြန်တွေ စားရတာ စိတ်ထဲ အီလယ်လယ် ဖြစ်လာလေတော့ ဒီတခါ ပြည်ကြီးငါးကို အစပ်ကြော်ပြီး ထမင်းပူပူလေးနဲ့ စားဖို့ပြင်ထားပါတယ် ပြင်ဆင်ချိန် ကြော်ချိန်က သိပ်မကြာဘဲ စားလို့ကောင်းလွန်းလို့ ကြော်နည်းလေး မျှဝေလိုက်ပါတယ်။
ပါဝင်ပစ္စည်းများ
- သန့်စင်ဆေးကြောထားသော ပြည်ကြီးငါး - အကောင်ကြီးကြီး ၂ကောင်
- ဆား - လက်ဖက်ရည်ဇွန်း လေးပုံတစ်ပုံ
- ငရုတ်ကောင်းမှုန့် - လက်ဖက်ရည်ဇွန်း တစ်ဝက်
- ကြက်သွန်ဖြူ - အမွှာကြီးကြီး ၅မွှာ
- ငရုတ်သီးစိမ်း - အတောင့်ကြီးကြီး ၂တောင့်
- အာလူးမှုန့် - ထမင်းစားဇွန်း မောက်မောက် ၂ဇွန်း
- ဆီ - ထမင်းပေါင်းအိုး ဆန်ချင်ဗူး ၂ဗူးစာ
ပြင်ဆင်ပုံ
- သန့်စင်ထားသော ပြည်ကြီးငါးကို အရှည်လိုက် တ၀က်ခြမ်းပေးပြီး ပုံပါအတိုင်း လက်တလုံးစာလောက် ကန့်လန့်ဖြတ် လှီးပေးပါ
- ကြက်သွန်ဖြူကို အခွံခွာပြီး ဓါးပြားရိုက်ကာ ခပ်နုတ်နုတ် လှီးထားပါ
- ငရုတ်သီးစိမ်းကို ခပ်ပါးပါး လှီးထားပါ
- ငရုတ်ကောင်းကို ထောင်းထားပါ
- အာလူးမှုန့်ကို ပြင်ထားပါ
- လှီးထားသော ပြည်ကြီးငါးကို ဆား ငရုတ်ကောင်း အာလူးမှုန့်တို့နှင့် ခပ်ဖွဖွ ရောနယ်ပေးပါ
- ဒယ်အိုးကို အပူပေးပြီး အရသာနယ်ထားသော ပြည်ကြီးငါးကို တခုခြင်း ထည့်ကြော်ပေးပါ
- တဖက်ကျက်လျှင် တဖက်ကို လှန်ပေးပြီး တခုလုံး ရွှေဝါရောင်သန်းလာလျှင် ဆယ်ထားပေးပါ
- ပြည်ကြီးငါး ကြော်ထားသော ဆီများကို အိုးထဲမှာ ထမင်းစားဇွန်း ၃ဇွန်းစာလောက်ဘဲ ချန်ထားပြီး ကြက်သွန်ဖြူနှင့် ငရုတ်သီးကို ထည့်ကြော်ပါ
- ကြက်သွန်ဖြူနှင့် ငရုတ်သီးနံ့ သင်းလာပါက ပြည်ကြီးငါးကြော်ကို ထည့်မွှေပေးပါ
- အားလုံး သမသွားတာနဲ့ ပြည်ကြီးငါးကြော် စပ်စပ်မွှေးမွှေးလေးကို နှစ်သက်သလို စားသုံးရန် ပြင်ဆင်ပေးပါ။
No comments:
Post a Comment