Monday, 30 May 2016

ဆိတ်သားလုံး ဟင်းအနှစ်ဆမ်း Pasta






ဒီတခါတော့ စားလိုက်ရင် ငါးဖယ်လုံးလို စေးထန်းထန်းလေးနဲ့ စားကောင်းလွန်းတဲ့ ဆိတ်သားလုံးဟင်း အနှစ်ဆမ်းတဲ့ Pasta ချက်နည်းလေး မျှဝေလိုက်ပါတယ် ပုံတွေတင်ရတာ များလွန်းနေတဲ့အတွက် ချက်နည်းတူ ပြင်ဆင်ပုံ တူတာတွေအတွက် ပုံတချို့ကိုတော့ မတင်ဘဲ ထားလိုက်ပါတယ်။

မွေးလာထဲက မြန်မာအစာတွေနဲ့ ကြီးပြင်းလာသူ တယောက်အဖို့ လျှာအရသာ မတူတာတွေ စားရတဲ့အခါမှာ မာမာကိုယ်တိုင် အဆင်မပြေတာတွေက များပါတယ် စားနေကျမဟုတ်တဲ့ ထောပတ်တွေ ချိစ်တွေဟာ တခါတလေ ကောင်းမယ်လို့ ထင်ရပေမဲ့ များသောအားဖြင့် အီလည်လည် အရသာတွေဘဲ ရတာမို့လို့ ကိုယ့်ဘာသာကို စားနိူင်အောင် ဆန်းသစ်ပြီး ချက်ကြည့်လိုက်ပါ အဆင်ပြေတဲ့အခါ ပြန်လည်မျှဝေပေးပါ။

ဟာ ဒါဆို ချက်နည်းလွဲနေတယ် ဒီဟင်းမဖြစ်နိူင်ဘူးဆိုပြီး ပြောချင်ပြောကြပါလိမ့်မယ် အဲဒီအခါမျိုးကျတော့လဲ ဟင်းချက်နည်းဆိုတာ ပုံသေနည်း တွက်သလို မတွက်နိူင်တဲ့ အရာမို့လို့ လိုတိုးပိုလျှော့ ချက်ရတာမျိုး ဆိုတာကို နားလည်ပေးရမှာပါ။

ဆိတ်သားလုံး လုံးရန်အတွက်
ပါဝင်ပစ္စည်းများ

  • ဆိတ်သား - 500g
  • ငရုတ်ကောင်းစေ့ - အစေ့၂၀ခန့်
  • သကြား - ထမင်းစားဇွန်း တဇွန်း
  • ဆား - လက်ဖက်ရည်ဇွန်း တ၀က်
  • ငံပြာရည် - ထမင်းစားဇွန်း တဇွန်း
  • ဆီ - 2cups
  • Corn Starch - ထမင်းစားဇွန်း ၂ဇွန်း
  • Baking Powder - လက်ဖက်ရည်ဇွန်း တ၀က်
  • ဆီ - ထမင်းစားဇွန်း တဇွန်း
  • ရေ - 1/2 cup
ပြင်ဆင်ပုံ
  1. ဆိတ်သားကို ရေဆေးပြီး ရေစင်အောင် သုတ်ထားပါ
  2. ရေသုတ်ထားသော ဆိတ်သားကို ခပ်သေးသေး အတုံးလေးတွေရအောင် ပေါက်ထားပါ
  3. ဆား သကြား ဆီ ရေ ငံပြာရည် ငရုတ်ကောင်းစေ့ corn starch, baking powderတို့ကို ရောပြီး မွှေထားပါ
  4. ခပ်သေးသေး အတုံးလေးတွေ ပေါက်ထားသော ဆိတ်သားကို ဘလင်ဒါထဲထည့်ကြိတ်ပါ
  5. တမိနစ် တခါကြိတ်ပြီး တကြိမ်နားကာ ၉ခါလောက် ကြိတ်ပေးပါ
  6. ကြိတ်နေစဉ် အရသာမွှေထားသော အရည်ကို လောင်းထည့်ပေးပါ
  7. အားလုံးသမသွားပြီဆိုတာနဲ့ အသားများကို ဇလုံတလုံးထဲ ပြောင်းထည့်ပြီး အပေါ်မှ cling wrap ဖြင့် လေလုံအောင် ပိတ်ပြီး နာရီဝက်လောက် အခန်းအပူချိန်အတိုင်း ထားပေးပါ
  8. အချိန်ပြည့်တာနဲ့ လက်ကိုရေစွတ်ပြီး အသားများကို အနေတော် အလုံးလေးတွေ လုံးပေးပါ
  9. အားလုံး လုံးပြီးတာနဲ့ ဇောက်နက်သောအိုး ခပ်သေးသေးတလုံးမှာ ရေထည့်ပြီး ဆူအောင်တည်ပါ
  10. ရေပွက်ပွက် ဆူလာပါက လုံးထားသော အသားလုံးများကို ရေနွေးဆူဆူထဲ ထည့်ပြုပ်ပေးပါ
  11. ရေအေးကို ဇလုံတလုံးထဲ ထည့်ပြီးပြင်ထားပါ
  12. အသားများ ကျက်လာပါက ရေပေါ်ပေါ်လာပါလိမ့်မယ်
  13. ပေါ်လာသော အသားလုံးများကို နှစ်မိနစ်လောက် ဆက်တည်ပေးထားပါ
  14. ပြီးတာနဲ့ အဆင်သင့်ပြင်ထားသော ရေအေးပန်းကန်လုံးထဲသို့ ဆယ်ပြီးထည့်ပေးပါ
  15. ရေအေးထဲမှာ နှစ်မိနစ်လောက် စိမ်ပြီးတာနဲ့ ရေစစ်ပေးပါ
ဆိတ်သားလုံးဟင်းချက်ရန်
ပါဝင်ပစ္စည်းများ

  • PASTA အခြောက် - 400g
  • ဆိတ်သားလုံး - 500g
  • ကြက်သွန်ဖြူ - အမွှာကြီးကြီး ၃မွှာ
  • ကြက်သွန်နီ - အလုံးကြီးကြီး ၂လုံး
  • ဆီ - စားပွဲတင်ဇွန်းကြီး တဇွန်း
  • ခရမ်းချဉ်သီးအနှစ် - 400g တဗူး
  • ခရမ်းချဉ်သီး - အလုံးကြီးကြီး ၂လုံး
  • ဆား - လက်ဖက်ရည်ဇွန်း တဇွန်း
  • ငရုတ်ကောင်းမှုန့် - လက်ဖက်ရည်ဇွန်း တ၀က်
  • အရသာမှုန့် - လက်ဖက်ရည်ဇွန်း တဇွန်း
  • နနွင်းမှုန့် - လက်ဖက်ရည်ဇွန်း သုံးပုံတပုံ
ပြင်ဆင်ပုံ
  1. PASTA ကို ရေနွေးဆူဆူ မြုပ်အောင်ထည့်ပြီး နူးလာအောင် ပြုပ်ပေးပါ
  2. နူးလာတာနဲ့ ရေနွေးကိုသွန်ပြီး ရေအေးနှင့် ဆေးပြီး ရေစစ်ထားပါ
  3. ဆိတ်သားလုံးကို အဆင်သင့် ပြင်ထားပါ
  4. ခရမ်းချဉ်သီး အနှစ်ဗူးကို ဖောက်ထားပါ
  5. ကြက်သွန်နီ ကြက်သွန်ဖြူ ခရမ်းချဉ်သီးတို့ကို ခပ်နုတ်နုတ် လှီးပေးထားပါ
  6. ဆီကိုအပူပေးပြီး ကြက်သွန်ဖြူ နီတို့ကို အရင်ဆီသတ်ပေးပါ
  7. နည်းနည်းနွမ်းလာတာနဲ့ လှီးထားသော ခရမ်းချဉ်သီးကို ထည့်ပြီး တမိနစ်လောက် ချက်ပေးထားပါ
  8. ပြီးတာနဲ့ ခရမ်းချဉ်သီးအနှစ်ကိုထည့်ပြီး  တမိနစ်လောက် ထည့်မွှေပါ
  9. ဆိတ်သားလုံးများကို ထည့်မွှေပြီး ခရမ်းချဉ်သီးအနှစ် အရည်များ ဆူအောင် တည်ပေးပါ
  10. အရည်အရမ်းမခမ်းခင် အရသာမြည်း၍ လိုသလိုပြင်ကာ မီးပိတ်ပေးပါ
  11. စားပွဲပြင်ရန် Pasta ဖတ်များကို ပန်းကန်တခုထဲ ထည့်ပေးပါ
  12. Pastaဖတ်ကို ပွဲပြင်မည့် ပန်းကန်ထဲထည့်ပြီး ဆိတ်သားလုံးဟင်းကို အသားအရည် မျှအောင်ဆမ်း၍ စားသုံးနိူင်ပါပြီ။

No comments:

Post a comment