Tuesday, 17 May 2016

ဗန်းမော် မျှစ်ချဉ်ခေါက်ဆွဲ













ဒီနေ့တော့ ရာသီဥတု အေးစက်နေချိန်မှာ ပူပူစပ်စပ် ဗန်းမော် မျှစ်ချဉ်ခေါက်ဆွဲ ချက်ဖြစ်လို့ ချက်နည်းလေးလဲ မျှဝေရင်း လိုအပ်တာတွေရှိရင်လဲ အကြံပေးဖို့ အရင်ဆုံးပြောပါရစေ။

ဒီချက်နည်းလေးက မာမာ့သူငယ်ချင်း အယ်နန်ဒွဲ တခါချက်ကျွေးတာကို မှတ်ထားပြီး ချက်ထားတဲ့ နည်းလေးပါ လိုအပ်တာတွေ ရှိကောင်းရှိနေနိူင်သလို သုံးထားတဲ့ ငါးကလဲ မတူပါဘူး သူသုံးထားတာက ငါးမြစ်ချင်းပါ မာမာကတော့ ငါးမြစ်ချင်းလဲ အလွယ်တကူ မရနိူင်တဲ့ နေရာကို ရောက်နေတော့ အိမ်မှာ ၀ယ်ထားပြီးသား အလွယ်ရှိနေတဲ့ ငါးခူနဲ့ဘဲ ချက်လိုက်တာပါ။

န်စီးခေါကိဆွဲ ဆန်ခေါက်ဆွဲ အလုံးသေးလေးတွေ သုံးလေ့သုံးထ ရှိကြပေမဲ့ မာမာကတော့ အဆင်ပြေသလို ဆန်ခေါက်ဆွဲ အပြားအသေးကို သုံးထားပါတယ် တိုင်းရင်းသား ရိုးရာအစာတွေ ရေးရတာ ချက်နည်းလွဲမှာရယ် ချက်နည်းမှားတဲ့အခါ ရိုးရာအစာတွေကို ဖျက်ဆီးသလို ဖြစ်မှာရယ်ကြောင့် တစုံတရာ လွဲချော်ခဲ့ရင်တော့ တတ်သလောက် မှတ်သလောက် ချက်ထားတဲ့ အိမ်ချက်လေးမို့ နားလည်ပေးကြစေချင်ပါတယ်။




ပါဝင်ပစ္စည်းများ



  • ငါးခူ - 500g
  • မျှစ်ချဉ် - တရုတ်ဟင်းပြင်ပန်းကန် အလတ် တလုံးစာ
  • ကြက်သွန်ဖြူ - ၁၀မွှာ (ငါးဆီသတ်ရန် ငါးပြုပ်ထဲ ထည့်ရန် )
  • ကြက်သွန်နီ - အနေတော် ၂လုံး
  • ချင်း - တလက်မခန့်
  • ဆား - လက်ဖက်ရည်ဇွန်း ၃ဇွန်း
  • စပါးလင် - ၅ချောင်းခန့်
  • ဆန်ခေါက်ဆွဲမုန့်ဖတ် အခြောက် - 375g တထုတ်
  • နနွင်းမှုန့် - လက်ဖက်ရည်ဇွန်း တ၀က်သာသာ (ငါးဆီသတ် ငရုတ်သီးဆီသတ် ဆီချက်အ၀ါချက်ရန် )
  • နံနံပင် - စားနိူင်သလောက်
  • ငရုတ်သီးစိမ်း - စားနိူင်သလောက်
  • ငရုတ်သီး အရောင်တင်မှုန့် - ထမင်းစားဇွန်း တဇွန်း
  • ငရုတ်ကောင်းမှုန့်- လက်ဖက်ရည်ဇွန်း တ၀က်
  • အရသာမှုန့် - လက်ဖက်ရည်ဇွန်း ၃ဇွန်းခန့် (ငါးဆီသတ်နှင့် ဟင်းခါးထဲထည့်ရန်)
  • ရွှေပဲရွက် - နှစ်သက်သလောက်
  • ငရုတ်သီး အကြမ်းမှုန့် - ထမင်းစားဇွန်း ၄ဇွန်း
  • ဆီ - တလီတာခန့် (ငါးဆီသတ်ရန် ဆီဝါချက်ရန် ငရုတ်ဆီချက်ရန်နှင့် ငရုတ်သီးအကြမ်းမှုန့်ကြော်ရန်အတွက် လိုသလောက်ဘဲသုံးပါ)
ငါးပြုပ်ရန် ပြင်ဆင်ပုံ
  • ငါးကို သန့်စင်ပြီး ရေစင်အောင်ဆေးထားပါ
  • စပါးလင်ကို ရေစင်အောင် ဆေးထားပါ
  • ချင်းကို အခွံခွာပြီး ခပ်ပါးပါးလှီးထားပါ
  • ကြက်သွန်ဖြူ ၅မွှာကို အခွံခွာပြီး ဓါးပြားရိုက်ထားပါ
  • အိုးတလုံးထဲမှာ စပါးလင်အရွက်များ ခင်းကာစပါးလင်အရိုး ချင်း ကြက်သွန်ဖြူ ဆား လက်ဖက်ရည်ဇွန်း တဇွန်းနှင့် ငါးကိုထည့်ပါ
  • ငါးအိုးထဲမှာ ငါးမြုပ်အောင် ရေထည့်ပြီး ပြုပ်ပါ
  • ရေမခမ်းခင် ငါးအသားများ နူးတာနဲ့ ငါးကိုဆယ်ပြီး အရိုးအသားများ ထွင်ထားပါ
  • ငါးအသားကို ဖယ်ထားပြီး ငါအရိုးများကို ထောင်းကာ အရည်ငင်၍ ငါးပြုပ်ရည်အိုးထဲ ပြန်ထည့်ထားပါ
မျှစ်ချဉ်ချက်ရန်
  • မျှစ်ချဉ်ကို ရေဆေးပြီး အနေတော်လှီးထားပါ
  • ငရုတ်သီးစိမ်းကို ခပ်ပါးပါး လှီးထားပါ
  • လှီးထားသော မျှစ်ချဉ်ကို နနွင်းမှုန့် လက်ဖက်ရည်ဇွန်း သုံးပုံတပုံလောက်ထည့်ကာ ရေမြုပ်အောင်ထည့်ပြီး ၂ရည်လောက် ခမ်းအောင်ပြုပ်ပေးပါ
  • ပြုပ်ပြီးသော မျှစ်ချဉ်ကို ငရုတ်သီးစိမ်း ခပ်ပါးပါးလှီး၍ အရသာမှုန့် ဆားအနည်းငယ်တို့နဲ့ နယ်ထားပါ
ငါးပြုပ်ကို ဆီသတ်ရန်
  • ပြုပ်ထားသော ငါးကို အသားထွင်ထားပါ
  • ကြက်သွန်နီကို အခွံခွာကာ အလုံးလိုက် ရေဆေးပြီး ခပ်နုတ်နုတ် လှီးထားပါ
  • ကြက်သွန်ဖြူ၃မွှာကို အခွံခွာပြီး ခပ်နုတ်နုတ် လှီးထားပါ
  • ဆီ နနွင်းမှုန့် ငရုတ်သီး အရောင်တင်မှုန့်ကို ပြင်ထားပါ
  • ဒယ်အိုးတလုံးကို အပူပေးပြီ ဆီထည့်ပါ
  • ဆီပူလာတာနဲ့ နနွင်းမှုန့် လက်ဖက်ရည်ဇွန်း သုံးပုံတပုံထည့်ပြီး ကြက်သွန်နီ ကြက်သွန်ဖြူတို့ကို နွမ်းအောင် ထည့်ကြော်ပါ
  • ကြက်သွန်များ နွမ်းတာနဲ့ ငရုတ်သီးအရောင်တင်မှုန့်ကို မိနစ်ဝက်လောက် ထည့်ကြော်ပါ
  • ပြီးတာနဲ့ ထွင်ထားသော ငါးအသားများကို ထည့်မွှေပြီး မွှေးလာအောင် ဆီသတ်ထားပါ
ဟင်းရည်ချက်ရန်နှင့် ရွှေပဲရွက်ပြုပ်ရန်
  • ငါးပြုပ်ထားသော ဟင်းရည်ကို ရေတရုတ်ဟင်းရည်သောက်ပန်းကန်လုံး နှစ်လုံးသာသာထည့်ပြီး ဆား အရသာမှုန့်နှင့် ငရုတ်ကောင်းမှုန့်ခပ်ကာ တည်ထားပေးပါ
  • ရွှေပဲရွက်ကိုလဲ ရေနွေးထဲထည့်ကာ ပြုပ်ပြီး အရမ်းမနူးစေဘဲ ရေနွေးကိုသွန်ကာ ရေအေးနှင့် စိမ်ထားပါ
ဆီချက်၂မျိုး ချက်ရန်
  • ဆီချက်အ၀ါအတွက် ဆီကို အပူပေးပြီး နနွင်းမှုန့်ထည့်ပါ 
  • ဆီပူလာတာနဲ့ မီးဖိုပေါ်ကချကာ ပန်းကန်ထဲ ပြောင်းထည့်ပေးပါ ( ကြက်သွန်ဖြူထည့်ပြီး ဆီချက်ချက်ရင်လဲ ရပါတယ် )
  • ဆီချက် အနီချက်ရန်အတွက် ဆီကို အပူပေးပါ
  • ဆီပူလာတာနဲ့ နနွင်းမှုန့်ထည့်ပြီး ဆီအိုးကို မီးဖိုပေါ်မှ ချပြီးမှ ငရုတ်သီး အရောင်တင်မှုန့်ကို ထည့်ပြီး မွှေကာ ပန်းကန်တခုထဲ ပြောင်းထည့်ပြီး အအေးခံထားပါ
ငရုတ်သီး အကြမ်းမှုန့်ကြော်ရန်
  • ဒယ်အိုးတလုံးမှာ ဆီထမင်းစားဇွန်း ၃ဇွန်းခန့်ကိုအပူပေးပြ်ီး ဆီပူလာတာနဲ့ မီးပိတ်ပြီး ဆီအိုးကို ဘေးချကာ ငရုတ်သီးမှုန့်ကို ထည့်မွှေပါ
  • ငရုတ်သီးနံ့ မွှေးလာတာနဲ့ ပန်းကန်တခုထဲ ပြောင်းထည့်ပေးထားပါ
ခေါက်ဆွဲပြုပ်ရန်
  • ခေါက်ဆွဲခြောက်များကို ရေအေးနှင့် ရေမြုပ်အောင်ထည့်ပြီး တနာရီခန့် စိမ်ထားပါ
  • ခေါက်ဆွဲသားများ ပျော့လာတာနဲ့ ဇောက်နက်သော အိုးတလုံးထဲ ရေကိုထည့်ကာ ဆူအောင်တည်ပေးပါ
  • ဆူနေသော ရေအိုးထဲသို့ ရေစိမ်ထားသော ခေါက်ဆွဲခြောက်ကို ထည့်ပြီးပြုပ်ပေးပါ
  • ခေါက်ဆွဲပြုပ်ချိန် တမိနစ်သာသာဆို ဆယ်ပြီး လက်နှင့်ဖိကြည့်ပါ ခေါက်ဆွဲဖတ်များ နူးလာတာနဲ့ ဇကာထဲသွန်ချကာ ရေနှင့် လောင်းချပြီး ဆေးကာ ရေစစ်ထားပါ
စားပွဲပြင်ရန်
  • ပန်းကန်တလုံးထဲမှာ ခေါက်ဆွဲဖတ်ကို အနေတော်ထည့်ပြီး မျှစ်ချဉ် ငါးဆီသတ် နံနံပင် ရွှေပဲရွက်တို့ သင့်သလို ထည့်ပြီး ပြင်ပေးကာ ဗန်းမော် မျှစ်ချဉ်ခေါက်ဆွဲကို ဟင်းခါးရည်နှင့် တွဲဖက်ကာ စားသုံးနိူင်ပါပြီ။



No comments:

Post a Comment