Thursday, 6 April 2017

ဆိတ်သားနှပ် အိအိလေး


ဒီနေ့တော့ အိန္ဒယဆိုင်က ဆိတ်သားဝယ်လာကာ ဒိန်ချဉ်လေးလဲ ရှိနေတုန်း ဆိတ်သားနှပ်လေး နှပ်မယ်စိတ်ကူးကာ ချက်ဖြစ်ပါတယ် စားမိန်ဟင်းလေး ဖြစ်တဲ့အတွက် ချက်စားနိူင်အောင် ချက်နည်းလေး မျှဝေလိုက်ပါတယ်။

ပါဝင်ပစ္စည်းများ

  • ဆိတ်သား  - 500g
  • ကြက်သွန်နီ - အနေတော် ၂လုံး
  • ကြက်သွန်ဖြူ - အမွှာကြီးကြီး ၇မွှာ
  • ခပ်ပါးပါး လှီးထားသောချင်း - ထမင်းစားဇွန်း တဇွန်း
  • ငရုတ်သီး အရောင်တင်မှုန့် - လက်ဖက်ရည်ဇွန်း တဇွန်းခွဲ
  • လေးညှင်း - တပွင့်
  • ဖာလာ - တစေ့
  • သစ်ဂျပိုးခေါက် - တလက်မခန့်
  • ကရဝေးရွက် - ၃ရွက်
  • ဆား - လက်ဖက်ရည်ဇွန်း တဇွန်းခွဲ
  • ခနော ကြက်သားမှုန့် - လက်ဖက်ရည်ဇွန်း တဇွန်းခွဲ
  • နနွင်းမှုန့် - လက်ဖက်ရည်ဇွန်း သုံးပုံတပုံ
  • ဆီ - ထမင်းစားဇွန်း ၉ဇွန်း
  • သံပုရာသီး - တလုံး
  • ဒိန်ချဉ် - ထမင်းစားဇွန်းမောက်မောက် ၄ဇွန်း
  • မကျည်းသီးမှည့် - ကွမ်းသီးဆံလုံးလောက်
ပြင်ဆင်ပုံ
  1. ဆိတ်သားကို အနေတော် အတုံးလေးတွေ တုံးထားပါ
  2. တုံးထားသော ဆိတ်သားကို သံပုရာရည် ညှစ်ပြီး နယ်ကာ ၅မိနစ်ခန့် နှပ်ထားပြီးမှ ရေစင်အောင် ဆေးပလိုက်ပါ
  3. ရေဆေးပြီးသော ဆိတ်သားကို ဒိန်ချဉ် ကြက်သားမှုန့် လက်ဖက်ရည်ဇွန်း တဇွန်း ဆား လက်ဖက်ရည်ဇွန်း တ၀က် နနွင်းမှုန့်တို့နဲ့နယ်ကာ ၁၅မိနစ်လောက် နှပ်ထားပါ
  4. ကြက်သွန်နီ တလုံးကို အခွံခွာ အလုံးလိုက်ရေဆေးပြီး ခပ်နုတ်နုတ် လှီးထားပါ
  5. နောက်ထပ် ကျန်သော တလုံးကို ထက်ခြမ်းခြမ်းကာ လှီးထားပါ
  6. ကြက်သွန်ဖြူ ၃မွှာကို အခွံခွာပြီး ရေဆေးကာ ခပ်နုတ်နုတ် လှီးထားပါ
  7. နောက်ထပ်ကျန်သော လေးမွှာကို အခွံခွာပြီး ရေဆေးထားပါ
  8. ချင်းကို အခွံခွာပြီး ခပ်သေးသေး လှီးထားပါ
  9. မကျည်းသီးမှည့်ကို ရေဆေးပြီး ရေအနေတော်ထည့်ကာ ရေစိမ်ထားပေးပါ 
ချက်ပြုပ်ပုံ
  1. အရသာဝင်အောင်နှပ်ထားသော ဆိတ်သားကို ဇောက်နက်သော အိုးတလုံးထဲ ထည့်ပြီး ရေမြုပ်အောင်ထည့်ကာ ပြုပ်ပေးပါ
  2. ပထမ တရည်ခမ်းပါက နောက်တရည်ထပ်ထည့်ပြီး ဆိတ်သားနူးအောင် ပြုပ်ပေးပါ
  3. ဆိတ်သားနူးလာတာနဲ့ ဟင်းချက်ရန် ပြင်ဆင်ပါ
  4. ဒယ်အိုးတလုံးကို အပူပေးပြီး ဆီထည့်ပါ ဆီပူလာတာနဲ့ ခပ်နုတ်နုတ်လှီးထားသော  ကြက်သွန်ဖြူ ကြက်သွန်နီ သစ်ဂျပိုးခေါက် လေးညှင်း ဖာလာ ကရဝေးရွက် ချင်းနှင့် ငရုတ်သီးမှုန့်တို့ထည့်ပြီး အဆက်မပြတ် မွှေပေးကာ မွှေးလာအောင် ဆီသတ်ပေးပါ
  5. ဆီသတ်နံ့ မွှေးလာတာနဲ့ ပြုပ်ထားသော ဆိတ်သားအိုးထဲကို ထည့်ပြီး မွှေပေးပါ
  6. ပြီးတာနဲ့ ရေမြုပ်အောင် ထပ်ထည့်ပြီး အစိတ်လေးများရအောင် လှီးထားသော ကြက်သွန်နီ ကြက်သွန်ဖြူအမွှာ ဆားလက်ဖက်ရည်ဇွန်း တ၀က်နှင့် ကြက်သားမှုန့် လက်ဖက်ရည်ဇွန်း တ၀က်ထည့်ပြီး တည်ပေးပါ
  7. တည်ထားသော ရေခမ်းကာနီးတာနဲ့ ရေစိမ်ထားသော မကျည်းသီးမှည့် အရည်ကိုထည့်ပြီး တည်ပေးပါ

    1.  
  8.  ရေဆူပြီး ဟင်းအနှစ် အနေတော် ရတာနဲ့ဆီလည်ရေလည် ကျန်တဲ့အထိ တည်ပေးကာ အရသာမြည်းပြီး လိုသလိုပြင်ကာ ချဉ်ဖြုန့်ဖြုန့် အရသာလေးနဲ့ ဆိတ်သားနှပ်ဟင်း အိအိမွှေးမွှေးလေးကို စားပွဲပြင်နိုင်ပါပြီ။

No comments:

Post a Comment