Monday, 1 August 2016

မော်လမြိုင် မုန့်ဟင်းခါး




မာမာတယောက်က ခရီးသွားခြင်းကို မနှစ်မျို့သူ ခရီးသွားပြီးတိုင်း စိတ်ပန်းလူပန်းနဲ့ နေမကောင်းခြင်းက အမြဲဖြစ်လေ့ ရှိပါတယ် နေမကောင်းပေမဲ့လဲ စိတ်ထဲစားချင်တာ ကိုယ့်ဘာသာကိုယ် ထချက်ပြီး စားရလေတော့ အမြန်အလွယ်ပြီးစေမဲ့ မော်လမြိုင်မုန့်ဟင်းခါးလေး ချက်မိပြန်ပါတယ်။

မြို့အမည်တပ်ပြီး ရေးမိပေမဲ့ မော်လမြိုင်မှာ နေစဉ်ခန စားဖူးခဲ့တဲ့ အရသာကို ပြန်လည် ပုံဖော်ခြင်း မျှသာပါ မော်လမြိုင် မုန့်ဟင်းခါးက အရောင်ဖြူပြီး အရည်ကျဲပါတယ် မာမာက ငရုတ်သီး အရောင်လေး နည်းနည်းထည့်ပြီး ဆီသတ်ထားတာမို့လို့ အရောင်လေးတော့ ပါနေပေမဲ့ အရသာက မော်လမြိုင်မုန့်ဟင်းခါး အတိုင်းပါဘဲ အမြန်အလွယ် ချက်စားလို့ရတာမို့လို့ ချက်စားကြည့်စေချင်ပါတယ်။


ပါဝင်ပစ္စည်းများ

  • မုန့်ဟင်းခါးဖတ် - 1000g
  • ငါးခူ - 500g
  • ငါးငံပြာရည် - လိုသလောက်
  • ဆား - လိုသလောက်
  • စပါးလင် - ၆ပင် (ဆီသတ်ရန် ငါးပြုပ်ရန် ဟင်းအိုးထဲထည့်ရန်)
  • ငှက်ပျောအူ - နှစ်သက်သလောက်
  • ကြက်သွန်နီ - အလုံးကြီးကြီး ၂လုံး (ဆီသတ်ရန် )
  • ကြက်သွန်နီ - အလုံးသေး ၁၈လုံးခန့် (ဟင်းရည်ထဲထည့်ရန် )
  • ကြက်သွန်ဖြူ  - အမွှာကြီးကြီး အမွှာ ၂၀ခန့် (ဆီချက် ချက်ရန်)
  • ကြက်သွန်ဖြူ အမွှာကြီးကြီး ၅မွှာခန့် (ငါးဆီသတ်ရန်)
  • ဆန်လှော်မှုန့် - ၁၀၀ဂရမ်
  • ချင်း - တလက်မခန့်
  • ငရုတ်သီးအရောင်တင်မှုန့်- လက်ဖက်ရည်ဇွန်း တ၀က်
  • နနွင်းမှုန့် - လိုသလောက်
  • ငရုတ်သီးအလှော်မှုန့် - စားနိူင်သလောက်
  • ဆီ - ထမင်းစားဇွန်း ၅ဇွန်း (ငါးဆီသတ်ရန်)
  • ဆီ လက်ဖက်ရည်အကြမ်းပန်းကန် တလုံး (ဆီချက်ချက်ရန်)
  • ထန်းလျှက်ခဲ - ကွမ်းသီးဆံလုံးလောက်  ၃ခဲ
  • ရေအေး - ၃လီတာခန့် (ဟင်းရည်ချက်ရန် )
  • ရေအေး -၂လီတာခန့် (ငါးပြုပ်ရန် ငါးရိုးအရည်ငင်ရန်)
ငါးပြုပ်ရန်
  • ဇောက်နက်သော အိုးတလုံးထဲမှာ ငါးခူကို ထန်းလျှက်ခဲ ငါးငံပြာရည် ထမင်းစားဇွန်း နှစ်ဇွန်း ဆား စပါးလင်၂ပင် နနွင်းမှုန့် လက်ဖက်ရည်ဇွန်း သုံးပုံတပုံနှင့် ရေကို ငါးမြုပ်အောင်ထည့်ပြီး ပြုပ်ပေးပါ
  • ငါးကျက်ပါက ငါးပြုပ်ရည်ကို ဖယ်ထားပါ
  • ငါးကိုအအေးခံပြီး အရိုးအသား သတ်သတ်စီ နွှင်ပေးထားပြီး အရိုးများကို စပါးလင်အရိုးများနှင့် ရောပြီးထောင်းပါ
  • ပြီးတာနဲ့ ရေအနည်းငယ်ဖြင့် အရိုးများကို ငင်ပေးပြီး ဇကာဖြင့်စစ်ကာ အရည်ကိုယူထားပါ
ပြင်ဆင်ရန်
  • ငှက်ပျောအူမှ အရင့်များဖယ်ပြီ အနုများကို ပါးပါးလှီးပြီလျှင် အရောင်မမည်းစေရန် နနွင်းမှုန့် လက်ဖက်ရည်ဇွန်း ၁ဇွန်းခန့်နှင့် ရေဖျော်ကာ စိမ်ထားပေးပါ
  • ကြက်သွန်နီ အလုံးကြီးကြီးကို အခွံခွာပြီး ညက်အောင် ထောင်းထားပါ
  • ကြက်သွန်ဖြူ အမွှာ၂၀ခန့်ကို ဆီချက်ရန် မညက်တညက် ထောင်းထားပါ
  • ကြက်သွန်ဖြူ ၅မွှာခန့်ကို ငါးဆီသတ်ရန် ညက်နေအောင် ထောင်းထားပါ
  • ချင်းကို ညက်နေအောင် ထောင်းထားပါ
  • စပါးလင် ၂ပင်ကို ညက်နေအောင် ထောင်းထားပါ
  • ကြက်သွန်နီ အလုံးသေးများကို အခွံခွာပြီး ရေဆေးထားပါ
  • စပါးလင် ၂ပင် ဟင်းအိုးထဲထည့်ရန် ထုထားပါ
  • ဆန်လှော်မှုန့်ကို ရေအနည်းငယ်ဖြင့် ဖျော်ထားပေးပါ
  • နံနံပင် ပူစီနံတို့ကို ရေဆေးပြီး ခပ်ပါးပါး လှီးထားပါ
  • ပဲကြော် ပြင်ထားပါ
  • ကြက်သွန်ဖြူ ဆီချက်ပြင်ထားပါ

ကြက်သွန်ဖြူ ဆီချက်ချက်ရန်

  • ကြက်သွန်ဖြူ အမွှာ၂၀လောက်ကို မညက်တညက်ထောင်းပေးပါ
  • ဒယ်အိုးတလုံးမှာ ဆီ လက်ဖက်ရည်အကြမ်းပန်းကန် တလုံးသာသာထည့်ပါ
  • မီးအပူပေးပြီး ဆီပူလာတာနဲ့ နနွင်းမှုန့် လက်ဖက်ရည်ဇွန်း တ၀က်ထည့်ပြီး ထောင်းထားသော ကြက်သွန်ဖြူကို ကြော်ပေးပါ
  • မွှေးပြီးကြွတ်လာတာနဲ့ ပန်းကန်ထဲ ပြောင်းထည့်ပေးထားပါ


ဆီသတ်ရန်

  • ဒယ်အိုးထဲသို့ ဆီထည့်ပြီး ဆီပူလာလျှင် ထောင်းထားသော ကြက်သွန်ဖြူ ကြက်သွန်ဖြူ၊နီ စပါးလင် ချင်းတို့ကိုထည့်ပြီး မွှေးလာတဲ့အထိ ကြော်ပါ
  • ပြီးတာနဲ့ ငရုတ်သီးအရောင်တင်မှုန့်နှင့် နနွင်းမှုန့်တို့ကိုထည့်ပြီး မိနစ်ဝက်လောက် ရောမွှေပေးပါ
  • ငါးအသားများနှင့် ဆား လက်ဖက်ရည်ဇွန်းတ၀က်ကို ထည့်မွှေပေးပါ
  • ငါးဆီသတ်နံ့ မွှေးလာလျှင် မီးပိတ်ပေးပါ

ဟင်းရည်ချက်ရန်


  • ဇောက်နက်သော အိုးကြီးကြီး တလုံးထဲမှာ ငါးပြုပ်ရည် ငါးအရိုး ကျင်ထားသောအရည် ငှက်ပျောအူ ဆား လက်ဖက်ရည်ဇွန်း တဇွန်း ငါးငံပြာရည် ထမင်းစားဇွန်း ၃ဇွန်း ငါးဆီသတ်နှင့် ထုထားသော စပါးလင်တို့ကို ထည့်ပေးပါ
  • ငှက်ပျောအူများ  နူးလာပါက ရေ၃လီတာခန့်ကို ထည့်ပေးပါ
  • ရေ ပွက်ပွက်ဆူလာလျှင် ရေဖျော်ထားသော ဆန်လှော်မှုန့်ကို ထည့်ပြီး ရောမွှေပေးပါ
  • ဆန်မှုန့်များ ခဲမသွားစေရန် မကြာမကြာ မွှေပေးပါ
  • ဆန်လှော်မှုန့်များ အရမ်းမပွခင် ကြက်သွန်နီများကို အလုံးလိုက် ထည့်ပေးပါ
  • ကြက်သွန်နီများ နူလာပါက အရသာမြည်း၍ လိုသလို ပြင်ပေးပါ
  • မုန့်ပြင် ပန်းကန်လုံးထဲမှာ မုန့်ဟင်းခါးဖတ် ငရုတ်သီးအလှော်မှုန့် နံနံပင် ပူစီနံ ကြက်သွန်ဥ ပဲကြော် ကြက်သွန်ဖြူ ဆီချက် ထည့်၍ အပေါ်မှ မုန့်ဟင်းရည် လောင်းထည့်ကာ အရသာရှိစွာ မော်လမြိုင်မုန့်ဟင်းခါးကို နှစ်သက်သလို သုံးဆောင်နိုင်ပါပြီ။


No comments:

Post a Comment