Monday 1 August 2016

ငါးဖယ်ငါးဆုပ် အုန်းနို့ချက် ​မွှေးမွှေးလေး


ဒီတခါတော့ အုန်းနို့နိူင်နိူင် ထည့်ချက်ထားတဲ့ ငါးဖယ်ငါးဆုပ် ပြစ်ချက်လေးကို အအီပြေအောင် ခရမ်းချဉ်သီး နိူင်နိူင်နဲ့ချက်ဖြစ်ပြန်ပါတယ်။

ငါးဖယ်ငါးဆုပ်ချက်တိုင်း ကြော်ပြီးချက်တာထက် ပြစ်ချက်လေး ချက်တာကို ပါးစပ်ထဲမှာ အရသာပိုပြီး တွေ့လေတော့ ၀ါးလိုက်တိုင်း အရသာကောင်းစေတဲ့ အုန်းနို့ငါးဖယ် ပြစ်ချက်ဟင်းချက်နည်းလေး မျှဝေလိုက်ပါတယ်။

ပါဝင်ပစ္စည်းများ

  1. ငါးဖယ်ခြစ်  - 500 g
  2. ချင်း - လက်တစ်ဆစ်လောက် 
  3. ကြက်သွန်နီ - အလုံးသေး ၃လုံးခန့်
  4. ကြက်သွန်ဖြူ - အမွှာကြီးကြီး  ၆မွှာ (ငါးဖယ်ခြစ် ထောင်းရန်)
  5. ကြက်သွန်ဖြူ အမွှာကြီးကြီး ၅မွှာ ( ငါးဆုတ်ဆီသတ်ရန်)
  6. ဆား -  လက်ဖက်ရည်ဇွန်း တစ်ဝက်ခန့် (ငါးဖယ်ခြစ် ထောင်းရန်)
  7. ငါးငံပြာရည် - ထမင်းစားဇွန်း ၂ဇွန်း
  8. ငရုတ်သီး အရောင်တင်မှုန့်. - လက်ဖက်ရည်ဇွန်း ၁ ဇွန်း
  9. အချိုမှုန့် လက်ဖက်ရည်ဇွန်း တစ်ဇွန်း (ငါးဖယ် ထောင်းရန် ဆီသတ်ရန်)
  10. အုန်းနို့ - 110 ml
  11. ခရမ်းချဉ်သီး - အနေတော် ၅လုံးခန့် (သို့မဟုတ်)
  12. ခရမ်းချဉ်သီး - လှီးပြီးသား ready made 300 g
  13. နံနံပင် - နှစ်သက်သလောက်
  14. ရေ - အနေတော်
  15. ဆီ - ထမင်းစားဇွန်း ၅ဇွန်းသာသာ

ပြင်ဆင်ပုံ
  • ကြက်သွန်ဖြူ ကြက်သွန်နီ ချင်းတို့ကို အခွံခွာပြီး ရေဆေးထားပါ
  • ငါးဆုပ် ဆီသတ်ရန် ငရုတ်ဆုံထဲမှာ ချင်း ကြက်သွန်ဖြူ ကြက်သွန်နီတို့ကို ညက်အောင် ထောင်းပေးပါ
  • ငရုတ်ဆုံ ကြီးကြီးထဲမှာ ကြက်သွန်ဖြူ ကြက်သွန်နီတို့ကို ညက်အောင်ထောင်းပြီး နနွင်းမှုန့် အချိုမှုန့်  ဆားနှင့် ငါးဖယ်ခြစ်ကိုထည့်ပြီး  စေးထန်းလာတဲ့အထိ ထောင်းပေးပါ
  • ငရုတ်ဆုံ ကြီးကြီးမရှိပါက ၂ခါ ခွဲပြီး ထောင်းပေးပါ
  • ခရမ်းချဉ်သီးကို ခပ်နုတ်နုတ် လှီးထားပါ
  • မာမာကတော့ အရောင်ရဲရဲလေး လိုချင်လို့ လှီးပြီးသား ဗူးကို သုံးထားပါတယ်
  • နံနံပင်ကို ရေဆေးပြီး အနေတော် လှီးထားပါ
  • ထောင်းပြီးသား ငါးဖယ်ခြစ်များကို လက်မှာရေစွတ်ပြီး အနေတော် အလုံးလေးတွေ ဆုပ်လုံး လုံးပေးပါ
  • ဒယ်အိုးကို အပူပေးပြီး ဆီထည့်ကာ ထောင်းထားသော ကြက်သွန်များနှင့် ငရုတ်သီး အရောင်တင်မှုန့်ကို ထည့်ပြီး ဆီသတ်ပါ
  • ဆီသတ်နံ့ သင်းလာတာနဲ့ လှီးထားသော ခရမ်းချဉ်သီး  အချိုမှုန့် ငါးငံပြာရည်တို့ထည့်ကာ ခရမ်းချဉ်သီး ကြေတဲ့အထိ မွှေပေးပြီ တည်ပေးပါ
  • ခရမ်းချဉ်သီးများ ကြေလာတာနဲ့ အုန်းနိူ့ နှင့် ရေထည့်ကာ မိနစ်ဝက်လောက် ပွက်ပွက်ဆူအောင် ထားလိုက်ပါ
  • ရေကို အများကြီး တခါထဲ မထည့်ဘဲ လိုချင်သလောက် ချင့်ချိန်ပြီး ထည့်ပေးပါ
  • ဟင်းအနှစ် ပွက်ပွက်ဆူလာတာနဲ့ ငါးဖယ်ငါးဆုပ်ကို အစိမ်း ပြစ်ချက်လေး ထည့်ပြီး ချက်ပေးပါ
  • ၅မိနစ်လောက် တည်ပေးပြီး ဟင်းအိုး ပွက်ပွက်ဆူကာ အုန်းနို့ဆီပြန်လာတာနဲ့ အရသာမြည်းပြီး လိုသလို ပြင်ပေးကာ နံနံပင်အုပ်ပြီး အထက်အောက် သမအောင် မွှေပေး၍ လိုသလိုပြင်ပြီး အုန်းနို့ငါးဖယ်ခြစ်ဟင်း မွှေးမွှေးလေးကို နှစ်သက်သလို သုံးဆောင်နိူင်ပါပြီ။

No comments:

Post a Comment