Friday, 12 August 2016

ပုဇွန်​မျှစ် ဖက်ထုတ်ကင် မွှေးမွှေးလေး










အေးရှန်းကုန်စုံဆိုင်ကိုသွားတာ မျှစ်နုနုလေးတွေရယ် ပုဇွန်ဆတ်ထုတ်လေးတွေ ရလာတော့  ပုဇွန်မျှစ်ကင်လေး လုပ်စားဖြစ်ပြန်ပါတယ်။

အေးလွန်းတဲ့ ရာသီဥတုကြောင့် ပူပူစပ်စပ်လေးတွေဘဲ စားချင်နေမိသလို ၀ါးတွေပေါလွန်းတဲ့ ကော့ကရိတ်မြို့ကိုလဲ လွမ်းမိစေပါတယ် ဆေးရုံကုန်းပေါ်က ၀န်ထမ်းအိမ်တွေရဲ့ အနောက်ဖက်မှာ အလေ့ကျ ပေါက်နေတဲ့ ၀ါးပင်တွေဆီက ၀ါးရွက်တွေ ရသလို  မျှစ်နုတွေလဲ ရတတ်ပြီး ဂျိုင်းမြစ်ထဲကလာတဲ့ ပုဇွန် အရွယ်စုံ ဆိုဒ်အစုံကိုလဲ တမ်းတမိပြန်ပါတယ်။

တနေ့တမျိုး မရိုးရလေအောင် အဆင်ပြေသလိုလေး လုပ်စားဖြစ်တဲ့ ပုဇွန်မျှစ်နုကင်လေး ပြင်ဆင်ပုံကို မျှဝေလိုက်ပါတယ်။

ပါဝင်ပစ္စည်းများ

  • ပုဇွန်အကောင်သေး - 250g
  • မျှစ်ဝါ - 150g
  • ငရုတ်သီးစိမ်း - အတောင့်ကြီးကြီး ၂တောင့်
  • ခရမ်းချဉ်သီး - အလုံးကြီးကြီး တလုံး
  • အချိုမှုန့် - လက်ဖက်ရည်ဇွန်း တ၀က်
  • ပုဇွန်ငါးပိ - ထမင်းစားဇွန်း တဇွန်း
  • ဆန်အစိမ်းမှုန့် - လက်ဖက်ရည်ဇွန်း တဇွန်း
  • ဆီ - လက်ဖက်ရည်ဇွန်း တဇွန်း
  • ပင်စိမ်းရွက် သို့ ပူစီနမ် သို့ ကြက်သွန်မိတ် - 100ml
  • ၀ါးရွက်အခြောက် (သို့) ၀ါးရွက်အစို (သို့) ငှက်ပျောရွက် - လိုသလောက်
ပြင်ဆင်ပုံ
  • ပုဇွန်ကို ရေဆေးပြီး ခေါင်းဖြုတ်ကာ ကြောဖက်မှ အမည်းကြောင်းဖြုတ်၍ ရေစစ်ထားပါ
  • ၀ါးရွက်အခြောက်ကို ရေနွေးနှင့် လေးနာရီလောက် စိမ်ထားပေးပါ
  • ၀ါးရွက်အစို ငှက်ပျောရွက်အစိုတို့ကို သုံးပါက ဖုံများအမှိုက်များ စင်အောင် အ၀တ်စသန့်သန့်နှင့် သုတ်ပေးထားပါ
  • ပြုပ်ပြီးသား မျှစ်နုများကို ၁၀မိနစ်လောက် ထပ်ပြုပ်ပြီး ရေသွန်၍ နှစ်သက်သလို လှီးထားပါ
  • ပုဇွန်ငါးပိနှင့် ဆန်အစိမ်းမှုန့်ကို ပြင်ထားပါ
  • ငရုတ်သီးစိမ်းကို ခပ်ကြမ်းကြမ်း လှီးထားပါ
  • ကြက်သွန်မိတ်ကို ခပ်ကြမ်းကြမ်း လှီးထားပါ
  • ခရမ်းချဉ်သီးကို ခပ်ထူထူ လှီးထားပါ
  • အားလုံးအဆင်သင့်ဖြစ်တာနဲ့ ဇလုံတလုံးထဲမှာ ပါဝင်သော အစာများအားလုံး သမအောင် နယ်ထားပေးထားပါ
  • ပြီးတာနဲ့ ၀ါးရွက်၅ရွက်ကို ထုတ်လို့အဆင်ပြေစေရန်နှင့် ကင်လို့ကောင်းရန် တရွက်နှင့်တရွက်ထပ်ကာ ခပ်ထူထူ ခင်းပေးပြီး ၀ါးရွက်ပေါ်မှာ  ၃ ပုံ ၁ ပုံခွဲထည့်ကာ ကျစ်နေအောင် ထုတ်ပေးပါ
  • ထုတ်နေစဉ် သပ်သပ်ရပ်ရပ် ဖြစ်စေရန် ၀ါးရွက်ရဲ့ ထိပ်နှစ်ဖက်ကို အနည်းငယ်စီ ကပ်ကျေးဖြင့် ညှပ်ပေးပါ
  • ကင်နေစဉ် အစာများ ပေါက်ထွက်မသွားစေရန် အရွက်၃ရွက်ကို တခုနှင့်တခု လက်၂လုံးလောက်စီ ထပ်ပေးပြီး နောက်ထပ်၂ရွက်လောက်ကို မစာပုံထည့်မည့် အောက်ဖက်မှာ ထပ်ပေးပါတယ်
  • ထုတ်ထားသော အထုတ် ပြေမသွားအောင် ကြိုးဖြင့် ချည်ပေးထားပါ
  • အားလုံးထုတ်ပြီးတာနဲ့  grill pan ထဲထည့်ကာ မီးအားပြင်းပြင်းနဲ့ တဖက်ကို ၁၅မိနစ်စီ ကင်ပေးပါ
  • grill pan မရှိပါက အသားထူသော ဒယ်အိုးကို အသုံးပြုပြီး ကင်ပေးပါ
  • မီးသွေးမီးဖို သုံးပါက မီးသွေးမီးဖိုပေါ်မှာ သံဇကာတင်ပြီး ကင်ပေးပါ
  • တဖက်ကျက်လျှင် နောက်တဖက်ကိုလှည့်ပြီး ကင်ပေးပါ
  • နှစ်ဖက်လုံး ကင်ပြီးတာနဲ့ ပုဇွန်မျှစ်နုကင် စပ်စပ်မွှေးမွှေးလေးကို နှစ်သက်သလို စားသုံးနိူင်ပါပြီ
  • စားမည့်သူ များပါက ထိုနည်းအတိုင်း အစာများကို ဆတိုးထည့်ပြီး အစာစပ်ကာ ကင်ပေးနိူင်ပါတယ်။

No comments:

Post a Comment