နွေဦးဝင်ကာစ ထမင်းစားလေးက ပျက်ချင်ချင်မို့လို့ ချဉ်ပေါင်ရွက်ကြော်နဲ့ ထမင်းသုပ်ပြီး စားလိုက်တာ အင်မတန် ခံတွင်းလိုက်တဲ့ ထမင်းသုပ်တစ်ပွဲ ဖြစ်ခဲ့တာမို့လို့ သုပ်နည်းလေးကို မျှဝေလိုက်ပါတယ်။
ထမင်းသုပ်ဖို့ချဉ်ပေါင်ကြော်ကိုတော့ အရင်ချဉ်ပေါင်ကြော် ကြော်နည်းအတိုင်းဘဲ ကြော်ထားပြီး ထမင်းနဲ့ရောနယ်ကာ အငံနှင့်အစပ် အရသာကို ပိုပြီး ကြိုက်ရင်တော့ ငါးပိရည်နဲ့ ငရုတ်သီးမှုန့်ထပ်ထည့်ပြီး သုပ်ပေးနိူင်ပါတယ်။
ချဉ်ပေါင်ကြော်ရန် ပါဝင်ပစ္စည်းများ
- ချဉ်ပေါင်အနီ - ဇကာအလတ် တစ်လုံး
- မျှစ် - တရုတ်ဟင်းပြင်ပန်းကန် အလတ် တစ်လုံးစာ
- ပုဇွန်ခြောက် - အကောင် သုံးဆယ်ခန့်
- ကြက်သွန်နီ - အနေတော် တစ်လုံး
- ကြက်သွန်ဖြူ - အမွှာကြီးကြီး ငါးမွှာ
- ငရုတ်သီး လုံးခြမ်းကွဲ - ထမင်းစားဇွန်း နှစ်ဇွန်း
- ငါးငံပြာရည် - ထမင်းစားဇွန်း သုံးဇွန်း
- အရသာမှုန့် - လက်ဖက်ရည်ဇွန်း တစ်ဇွန်း
- ဆီ - ထမင်းစားဇွန်း ငါးဇွန်း
- နနွင်းမှုန့်. - လက်ဖက်ရည်ဇွန်း လေးပုံတစ်ပုံ
- ငရုတ်သီးစိမ်း - နှစ်သက်သလောက်
ပြင်ဆင်ပုံ
- ချဉ်ပေါင်ရွက်ကို အရိုးသင်ပြီး ရေစင်အောင် ဆေးပေးကာ ရေစစ်ထားပါ
- မျှစ်ကိုနူးစနေအောင် ပြုပ်ပေးပြီး အမျှင်လေးတွေ ရလာအောင် ခြစ်ပေးထားပါ
- ပုဇွန်ခြောက်ကို ရေတစ်နာရီလောက် စိမ်ပေးပြီး ညက်နေအောင် ထောင်းပေးပါ
- ကြက်သွန်နီကို အခွံခွာပြိး အလုံးလိုက် ရေဆေးကာ ခပ်ပါးပါး လှီးထားပါ
- ကြက်သွန်ဖြူ ကို အခွံခွာပြီး ရေဆေးကာ မထူမပါးလေးတွေ လှီးထားပါ
- လိုအပ်သော ပစ္စည်းများကို ပြင်ထားပါ
- အောက်ခြေမကပ်သော အိုးကိုအပူပေးပြီး ဆီနှင့်နနွင့်မှုန့်ကိုထည့်ပါ
- ဆီပူလာပါက ကြက်သွန်နီနှင့် ငရုတ်သီးမှုန့်ကို ထည့်ပြီး မွှေးလာအောင် ကြော်ပေးပါ
- ငရုတ်သီးနံ့မွှေးလာတာနဲ့ ပုဇွန်ခြောက်မှုန့်ကို တစ်မိနစ်လောက်ထည့်ပြီး ကြော်ပေးပါ
- ပြီးတာနဲ့ ချဉ်ပေါင်ရွက်ကို ထည့်ပြီးမွှေပါ
- ချဉ်ပေါင်ရွက်များ ကျေလာတာနဲ့မျှစ်ကို ထည့်ပြီးကြော်ပေးပါ
- အားလုံးသမသွားတာနဲ့ ငံပြာရည်နှင့် အရသာမှုန့် ကြက်သွန်ဖြူ ငရုတ်သီးစိမ်းတို့ထည့်ပြီး တစ်မိနစ်လောက် ကြော်ပေးပါ
- အားလုံး အရသာ သမသွားပြီ ဆိုတာနဲ့ အရသာမြည်းပြီး လိုသလို ပြင်ပေးကာ ချဉ်ပေါင်ကြော် မွှေးမွှေးလေးရပါပြီ
- အသုပ်သုပ်ရန် လိုသလောက်ဘဲ သုံးပြီး ပိုသောချဉ်ပေါင်ကြော်ကို ထမင်းနဲ့စားရန်ပြင်ထားပေးပါ
အသုပ်သုပ်ရန် ပြင်ဆင်ပုံ
- ထမင်း - တရုတ်ဟင်းပြင်ပန်းကန် တစ်လုံးစာ
- ချဉ်ပေါင်ကြော် - ထမင်းစားဇွန်း မောက်မောက် သုံးဇွန်းသာသာ
- ငါးပိရည် - ထမင်းစားဇွန်း တစ်ဇွန်း
- ငရုတ်သီးအလှော်မှုန့် - လက်ဖက်ရည်ဇွန်း တစ်ဇွန်း
- အားလုံးကိုရောပြီး ဇလုံကျယ်ကျယ် တစ်လုံထဲးမှာ ခပ်ဖွဖွ နယ်ပေးပြီး အရသာမြည်းကာ လိုသလိုပြင်ပေးပြီး ချဉ်ငံစပ် ချဉ်ပေါင်ထမင်းသုပ်ကို စားသုံးနိူင်ပါပြီ။
No comments:
Post a Comment