Sunday, 5 March 2017

မုံလာဥသီးစုံ ချဉ်ရည်ဟင်း


အေးရှန်းဈေးဆိုင်ကိုသွားတာ မုံလာဥတလုံးကို ၈ဆယ်သားလောက် ရှိတဲ့မုံလာဥတွေ မြင်လေတော့ မ၀ယ်ဘဲ မနေနိူင်တာနဲ့ ၀ယ်လာခဲ့မိတယ် အိမ်ရောက်တော့ ဘယ်ကစပြီး ချက်ရမလဲပေါ့ စဉ်းစားခန်းက ၀င်ပါရော။

ဒါနဲ့ဘဲ အရင်ဆုံး မုံလာဥကို ရုံးပတေသီးနဲ့ခရမ်းကြွတ်သီးလေးတွေ ရောသမကာ ချဉ်ရည်ဟင်းလေး ချက်ဖြစ်သွားခဲ့တယ် ဒါကြောင့်မို့ ချက်နည်းလေး မျှဝေလိုက်ပါတယ်။

ပါဝင်ပစ္စည်းများ
  • မုံလာဥ - လှီးပြီးသား တရုတ်ဟင်းပြင်ပန်းကန် အလတ် တလုံးစာ
  • ခရမ်းကြွတ်သီး - ၅လုံး
  • ရုံးပတေသီး - ၁၅တောင့်ခန့်
  • ကြက်သွန်နီ - တခြမ်း
  • ကြက်သွန်ဖြူ - နှစ်မွှာ
  • ချင်း - လက်တဆစ်၏ တဝက်
  • ငရုတ်သီးမှုန့် - လက်ဖက်ရည်ဇွန်း တဇွန်း
  • နနွင်းမှုန့် - လက်ဖက်ရည်ဇွန်း လေးပုံတပုံ
  • ဆီ - ထမင်းစားဇွန်း နှစ်ဇွန်း
  • ငံပြာရည် - ထမင်းစားဇွန်း သုံးဇွန်း
  • ဆား - လက်ဖက်ရည်ဇွန်း တ၀က်
  • မကျည်းအနှစ် - လက်ဖက်ရည်ဇွန်း တဇွန်းမောက်မောက်
  • အရသာမှုန့် - လက်ဖက်ရည်ဇွန်း တဇွန်း
  • ပုဇွန်ထုတ် - ၁၅ကောင်ခန့်
  • နံနံပင် - နှစ်သက်သလောက်
ပြင်ဆင်ပုံ
  1. မုံလာဥကို သင့်သလိုလှီးပြီး ရေဆေးထားပါ
  2. ပုဇွန်ထုတ်ကို ရေဆေးပြီး ခေါင်းဖြုတ်၍ မလိုတာတွေဖယ်ကာ သန့်စင်ထားပါ
  3. ကြက်သွန်ဖြူ  ကြက်သွန်နီ ချင်းတို့ကို ငရုတ်သီးမှုန့်နှင့် ညက်နေအောင်ရောပြီး ထောင်းထားပါ
  4. ခရမ်းကြွတ်သီးကို အညှာဖြတ်ပြီး ရေဆေးကာ ထက်ခြမ်းခြမ်းထားပါ
  5. ရုံးပတေသီးကို အတောင့်လိုက် ရေဆေးပြီး တပိုင်းပိုင်းထားပေးပါ
  6. ဇောက်နက်သောအိုးထဲမှာ လှီးထားသော မုံလာဥများ ပုဇွန်ထုတ် ခရမ်းကြွတ်သီးများ နနွင်းမှုန့် ဆား ငံပြာရည် အရသာမှုန့် ဆီနှင့် ငရုတ်သီးထောင်းတို့ကိုထည့်ပြီး နယ်ပေးပါ
  7. အရသာနယ်ပြီးပါက ရေအနည်းငယ်ထည့်ပြီး အရင်ဆုံး ရေဆူအောင်တည်လိုက်ပါ
  8. ရေဆူလာတာနဲ့ အထက်အောက် သမအောင်မွှေပေးပြီး အဖုံးအုပ်ကာ ပြန်တည်ထားပါ
  9. မုံလာဥများ တော်တော်လေး နွမ်းလာတာနဲ့ ရေလိုသလောက်ထည့်ပြီး ပွက်ပွက်ဆူအောင် ပြန်တည်ပေးပါ
  10. ရေပွက်ပွက်ဆူကာ ခရမ်းသီးနှင့် မုံလာဥများ နူးလာပါက မကျည်းသီးမှည့် အနှစ်ကိုထည့်ပြီး ရေကို တမိနစ်လောက် ထပ်ဆူအောင်ထားလိုက်ပါ ပြီးတာနဲ့ ရုံးပတေးသီးကို ထည့်ကာ ရေပွက်ပွက်ဆူအောင် ၄မိနစ်လောက် တည်ပေးပါ
  11. ရေပွက်ပွက် ဆူလာပါက အရသာမြည်းပြီး လိုသလို ပြင်ပေး၍ နံနံပင်အုပ်ကာ အရသာမြည်းပြီး မီးပိတ်ပေးပါ
  12.  မုံလာဥ ချဉ်ငံစပ် အရသာမွှေးလွန်းတဲ့ ချဉ်ရည်ဟင်းရပါပြီ။


No comments:

Post a Comment