Tuesday 7 June 2016

ငှက်ပျောသီး ဆနွင်းမကင်း









လမ်းလျှောက်ကအပြန် ဈေးကိုခန၀င်လိုက်တာ ငှက်ပျောသီး တကီလိုကို 1.30$ ဆိုတော့ ဘာပြောရမလဲ ပျော်တာပေါ့လေ။

မနိုင်မနင်း လောဘကြီးစွာနဲ့ ၃ကီလိုတောင်မှ ၀ယ်မိသွားတော့ ငှက်ပျောသီး ဆနွင်းမကင်း ဖုတ်ရမဲ့ အကြောင်းက ဖန်လာခဲ့တယ် ဒီတော့လဲ ပျော်ပျော်ကြီး ဖုတ်ပလိုက်တယ်ပေါ့နော်။

ပြင်ဆင်ရတာ လွယ်သလောက် အင်မတန်မှ စားလို့ကောင်းတဲ့အတွက် မာမာပြင်ဆင်တဲ့နည်းလေး မျှဝေလိုက်ပါတယ်ရှင်။

ပါ၀င်ပစ္စည်းများ
  1. ငှက်ပျောသီး - အခွံခွာပြီးသား တစ်ကီလို
  2. သကြား - ထမင်းစားဇွန်း ငါးဇွန်း (အချိုကြိုက်လျှင် ပိုထည့်ပါ)
  3. ဆား - လက်ဖက်ရည်ဇွန်း သုံးပုံတစ်ပုံ
  4. အုန်းနို့ - 300 ml
  5. ရွှေကြည်မှုန့် - ထမင်းစားဇွန်း ၇ဇွှန်း
  6. ဂျုံမှုန့် - ထမင်းစားဇွန်း ၇ဇွန်း
  7. အုန်းသီးမှုန့် - ထမင်းစားဇွန်း ၁၀ဇွန်း
  8. ထောပတ် - ထမင်းစားဇွှန်း ၄ဇွန်း
  9. ဘိန်းစေ့ - ထမင်းစားဇွန်း တစ်ဇွန်း
  10. Food color အနီရောင် - လက်ဖက်ရည်ဇွန်းဖျား တစ်စက်သာသာ (အရောင်နီတာ ကြိုက်ပါက ပိုထည့်ပါ)

ပြင်ဆင်ပုံ
  • ငှက်ပျောသီးများကို အခွံခွာထားပါ
  • ရွှေကြည်မှုန့်ကို ဒယ်အိုးတစ်လုံးထဲထည့်ပြီး ညိုရောင်သန်းလာတဲ့အထိ လှော်ပေးထားပါ
  • ကျန်နေသော လိုအပ်သော ပစ္စည်းများကို ပြင်ပေးပါ
  • ဇလုံတစ်လုံးထဲမှာ အုန်းသီးမှုန့် ထမင်းစားဇွန်း ၂ဇွန်းနှင့် ဘိန်းစေ့တို့ကိုချန်ပြီး ငှက်ပျောသီး ထောပတ် သကြား ဆား အုန်းနို့ ဂျုံမှုန့် ရွှေကြည်မှုန့် အုန်းသီးမှုန့်ထမင်းစားဇွန်း ၆ဇွန်းတို့ကို လက်နှင့် ဖိချေပေးပါ
  • ငှက်ပျောသီးများ အရမ်းကျေသွားစရာ မလိုတဲ့အတွက် လက်နဲ့ဘဲ ချေပေးပါ
  • အားလုံးအဆင်သင့်ဖြစ်တာနဲ့ မုန့်ဖုတ်မည့် ဗန်းပါတ်ပါတ်လည်ကို ထောပတ်လိုက်သုတ်ပေးပါ
  • ထောပတ်သုပ်ထားသော ဗန်းထဲသို့ အရသာနယ်ထားသော မုန့်နှစ်များ ဖြန့်ပြီးထည့်ပေးပါ
  • မုန့်နှစ်များပေါ်သို့ ချန်ထားသော အုန်းသီးမှုန့်နှင့် ဘိန်းစေ့များကို ဖြူးပေးပါ
  • မုန့်မဖုတ်ခင် ovenကို ၁၈၀စင်တီဂရိတ်နှင့် ၁၀မိနစ်လောက် ကြိုဖွင့်ပေးထားပါ
  • အားလုံးအဆင်သင့်ဖြစ်တာနဲ့ အုန်းသီးများ မကြွမ်းစေရန် ovenထဲမှာ အပေါ်မီးနှင့် ဝေးတဲ့ အဆင့်မှာထားပြီး မိနစ်၅၀ဖုတ်ပေးပါ
  • မိနစ်၅၀ပြည့်တာနဲ့ မီးပိတ်ပြီး ovenထဲမှာ လက်ကျန်အပူရှိန်ဖြင့် မိနစ် ၃၀ထပ်ထားပေးပါ
  • အချိန်ပြည့်တာနဲ့ အပြင်သို့ထုတ်ပြီး အအေးခံပြီးမှ မိမိနှစ်သက်တဲ့ ပုံစံလေးတွေ လှီးပေးပြီး သုံးဆောင် နိူင်ပါပြီ။
မုန့်ဖုတ်မည့်ဘန်းကို ၈" × ၈" သုံးပြီး ဖုတ်နိူင်ပါတယ် မာမာက အိမ်၂အိမ်အတွက် လက်ဆောင်ပေးချင်လို့ ဘန်း အသေးနှင့် ထည့်ဖုတ်ခြင်းသာ ဖြစ်ပါတယ်။

No comments:

Post a Comment