ဒီငါးဟင်းလေး ချက်မိတော့ မြန်မာပြည်က အမေ့အိမ်ကို အရမ်းလွမ်းမိပါတယ် မိုးတွင်းရောက်တိုင်း အမေချက်နေကျ ဟင်းတမယ်ပါ ဒီလို ရောတိရောရာ ငါးမျိုးစုံလေးတွေကို လယ်တောထဲကနေရပြီး ငါးကြီးကြီးမားမား မပါဘဲ ငါးစရစ် ငါးဒေါင်စင်း ငါးဖျဉ်းစလက် ငါးခုံးမ ငါးဇင်ရိုင်း ငါးလက်ကပ် ငါးနက်ပြာ လယ်ငါးခူ ပလီမ ရေပိုး ဒေါင်းပဆိတ် ဂဏန်းလုံး ပုဇွန်ဆိတ် စသည့်ငါးပုဇွန်လေးတွေ အားလုံးဟာ အကောင်ကြီးတွေ မဟုတ်ဘဲ ခပ်သေးသေးလေးတွေဘဲ ဖြစ်ပါတယ်။
အဲဒီငါးလေးတွေကို ငါးရှာသူဟာ ဒလူးလို့ခေါ်တဲ့ နှီးဝါးနဲ့ယက်ထားတဲ့ ဇကာချွန်ပြန့်ပြန့်ကို ၀ါးလုံး၂လုံးဘေးမှာ တပ်ကာ ပြုတ်မထွက်အောင် ခြည်နှောင်၍ ရင်နဲ့တွန်းပြီး ငါးကိုဖမ်းရတဲ့ ပစ္စည်းပါ ဘေးနှစ်ဖက်မှာ လက်ကိုင်ကိုင်း ၀ါးလုံးအရှည် ၂ခုပါပြီး လူတကိုယ်စာ ၀င်စာသာသာ ခပ်ကားကားလေး လုပ်ထားပြီး အဲဒီကိုင်း၂ဖက်ထဲ လူရဲ့ကိုယ်လုံးက၀င်ပြီး ကိုင်းနှစ်ဖက်ကို ကိုင်ကာ အားစိုက်ပြီး တွန်းရပါတယ်။
မိုးဦးကျ မြစ်ရေချောင်းရေတို့နဲ့ လယ်တောထဲကို ပါလာတဲ့ ငါးသားပေါက်တွေဖြစ်ပြီး စပါးမစိုက်ရသေးတဲ့ လယ်ထဲက ရေတွေထဲမှာ နေကြပါတယ် အဲဒီသားပေါက်လေးတွေရဖို့ ဒလူးကို လက်နှစ်ဖက်နဲ့ကိုင်က အားနဲ့ပြေးရင်း တွန်းရပါတယ် အဲလိုပြေးရင်း ဇကာပေါက်လို စကာပြန့်ပြန့်ထဲမှာ တင်ပြီးပါလာတဲ့ ငါးမျိုးစုံကို ဒလူးငါး ရင်တွန်းငါးဆိုပြီး ပြောကြတာ ဖြစ်ပါတယ်။
အဲဒီလိုငါးလေးတွေကို ဒလူးထိုးတဲ့သူက မနက်ထဲစောစောထဲက လယ်ထဲမှာ ထွက်ထိုးရကာ နေမွန်းတည့်မှ လယ်ထဲကနေ ပြန်လာကြပါတယ် နေ့လည်ဆယ့်နှစ်နာရီလောက်ဆို လမ်းထဲမှာ လိုက်ရောင်းပြီး လာရောင်းတဲ့အချိန်က မနက်စာ မမှီတဲ့အတွက် မိသားစုတွေရဲ့ ညစာဖြစ်ခဲ့ရပြီး မိုးတွင်းကာလမှာ မပါမဖြစ်တဲ့ ဟင်းတမယ်ပါ။
နူးညံ့တဲ့အတွက် ချက်ရတာမြန်ပြီး အငံလေးလေး ချက်ရတဲ့အတွက် ထမင်းတပန်းကန်အတွက် ငါးဟင်း ထမင်းစားဇွန်း တဇွန်းသာသာလောက်ဆို လောက်ငပါတယ် ခေါင်းတရာသား အရိုးပါ ၀ါးစားနိူင်တဲ့အတွက် အရိုးတွေကိုလဲ သန်မာစေပါတယ်။
ဒလူးငါးဟင်းက တကယ်တော့ မြန်မာပင်စိမ်းရွက် အုပ်ပြီးချက်ရတာပါ ချက်နေစဉ်မှာဘဲ ငါးပင်စိမ်းအုပ်ဟင်းနံ့က တလမ်းလုံးကို ထမင်းဆာစေတဲ့ ဟင်းတမယ်ဆိုလဲ မမှားပါဘူး မာမာကတော့ မြန်မာပင်စိမ်း မရတဲ့ ဒေသမှာမို့ နံနံပင်အုပ်ကာ နတ်သုဒ္ဒါဟင်းတမယ်ကို အမေ့နည်းအတိုင်း ချက်လိုက်ပါတယ်။
အခုချက်တာကတော့ ဒလူးငါးအစစ် မဟုတ်သလို ငါးနဲ့ပုဇွန် နှစ်မျိုးသာရနိူင်တဲ့ အရပ်ဒေသမှာ မြန်မာပြည် အလွမ်းပြေ အဆင်ပြေသလိုလေး မာမာ့အမေ ချက်တဲ့နည်းအတိုင်း ချက်နည်းလေး မျှဝေလိုက်ပါတယ်။
ပါဝင်ပစ္စည်းများ
- ငါးသားလေး - 500 g
- ပုဇွန်သားလေး - 200 g
- ဆီ - ဟင်းခတ်ဇွန်ဇွန်းကြီး တစ်ဇွန်းသာသာ
- ကြက်သွန်နီ - အနေတော် တစ်ဥ
- ကြက်သွန်ဖြူ - အမွှာကြီးကြီး သုံးမွှာ
- ချင်း - လက်တစ်ဆစ်ခန့်
- ငရုတ်သီးအရောင်တင်မှုန့် - ထမင်းစားဇွန်း တစ်ဇွန်း
- ငါးငံပြာရည် - ထမင်းစားဇွန်း - နှစ်ဇွန်း
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆား - လက်ဖက်ရည်ဇွန်း တစ်ဝက်
- အချိုမှုန့် - လက်ဖက်ရည်ဇွန်း တစ်ဇွန်း
- နံနံပင်( သို့ )ပင်စိမ်း - နှစ်သက်သလောက်
ပြင်ဆင်ပုံ
- ငါးနှင့် ပုဇွန်တို့ကို မလိုတာတွေဖယ်ပြီး ရေစင်အောင်ဆေးပြီး ဆား ငါးငံပြာရည် အချိုမှုန့် နနွင်းမှုန့်တို့နဲ့ အရသာဝင်အောင် နယ်ထားပါ
- ရောပြီးအရသာမနယ်ချင်ပါက ငါးနှင့်ပုဇွန်ကို သတ်သတ်ဆီ အရသာ နယ်ထားပါ
- ချင်း ကြက်သွန်ဖြူ ကြက်သွန်နီ တို့ကို ငရုတ်သီးအရောင်တင်မှုန့်နှင့် ရောပြီးထောင်းထားပါ
- နံနံပင် သို့မဟုတ် ပင်စိမ်းရွက်ကို ရေဆေးထားပါ
- အောက်ခြေမကပ်သော အိုးတလုံးကို အပူပေးပြီး ဆီထည့်ပါ
- ဆီပူလာတာနဲ့ ငရုတ်သီးထောင်းကို မွှေးလာတဲ့ထိ ထည့်မွှေပါ
- ငရုတ်သီးဆီသတ်နံ့ မွှေးလာတာနဲ့ အရသာနယ်ထားသောငါးကို ထည့်ပြီးဆီသတ်ပါ
- ဆီသတ်နေစဉ် ငါးထဲမှ ထွက်လာသော အရည်များခမ်းတဲ့ထိ အိုးကို မကြာမကြာ လှုပ်လှုပ်ပေးပါ
- ရေခမ်းပြီဆိုတာနဲ့ ငါးများရေမြုပ်အောင် ရေထပ်ထည့်ပေးပြီး ဆက်တည်ပါ
- ရေခမ်းကာနီးပါက နံနံပင် သို့မဟုတ် ပင်စိမ်းအုပ်ကာ အိုးကို လှုပ်ပေးပါ
- ငါးအသားများ မကျေစေရန် အရမ်းမွှေမပေးရပါ
- ဆီပြန်ပြီး အိုးကပ်ပြီဆိုတာနဲ့ ဒလူးငါးအိုကပ်ဆီပြန်ဟင်း မွှေးမွှေးလေးကို ထမင်းပူပူလေးနဲ့ စားသုံးနိူင်ပါပြီ။
No comments:
Post a Comment