ဒီနေ့တော့ မန်ကျည်းသီးအမှည့် အခွံမခွာရသေးတာလေးတွေ ဝယ်လာပြီး ငါးပိရည်ဖျော် ဖျော်ကာ ထမင်းမြိန်မြိန် စားဖို့အတွက် ပြင်ထားပါတယ်။
စပ်ပေ့ဆိုတဲ့ ငရုတ်သီးစိမ်းကိုသုံးပြီး ကြက်သွန်ဖြူ မီးကင်လေးရယ် မန်ကျည်းသီး အမှည့်လေးတွေနဲ့ ငါးပိရည် စပ်စပ်မွှေးမွှေးလေး ဖျော်ထားတာကို ပဲပင်ပေါက် ရေနွေးဖျော ဆလတ်ရွက် တို့စရာလေးတွေနဲ့ စားပါမယ်။
ငါးပိရည် တစ်ခါကျိုတိုင်း အိမ်ထဲမှာ ကျန်နေတတ်တဲ့ အနံ့တွေက လေလုံတဲ့ အိမ်တွေမှာ တော်တော်နဲ့ မပျောက်တတ်တဲ့အတွက် မာမာကတော့ တစ်ခါကျိုရင် ခပ်များများလေးကျိုပြီး လေလုံဗူးလေးတွေထဲ ထည့်ထားကာ ရေခဲသေတ္တာ ခဲတဲ့အကန့်ထဲမှာ ထည့်ထားပြီး သိမ်းထားတတ်တာမို့လို့ ဒီတစ်ခါလဲ ငါးပိရည် မွှေးမွှေးလေးနဲ့ ငါးပိရည်ဖျော် မွှေးမွှေးစပ်စပ်လေးရဲ့ ဖျော်စပ်ပုံလေးကို မျှဝေလိုက်ပါတယ်။
ပါ၀င်ပစ္စည်းများ
ငါးပိရည်ကျိုရန်
- ငါးပိရည်ကျိုရန် ငါးငပိ - နှစ်ဆယ်သား (ငါးရံ့ငါးပိကို သုံးထားပါတယ်)
- ဆား - လက်ဖက်ရည်ဇွန်း နှစ်ဇွန်း
- နနွင်းမှုန့် - လက်ဖက်ရည်ဇွန်း တစ်၀က်မရှိတစ်ရှိ
- ရေ - ထမင်းပေါင်းအိုး ဆန်ချင်ဗူး ၄ဗူးခွဲသာသာတို့ကို ဇောက်နက်သော အိုးတစ်လုံးထဲ ငါးပိနှင့် အတူတူထည့်ပေးပြီး ဆယ်မိနစ်လောက် ပွက်ပွက်ဆူအောင် တည်ပေးပါ
- ငါးပိရည် ရပါက အရိုးများစစ်ကာ ငါးပိရည်ကို ပန်းကန်လုံး တစ်လုံးထဲသို့ ပြောင်းထည့်ထားပါ။
ဖျော်စရာလုပ်ရန် ပါ၀င်ပစ္စည်းများ
- မန်ကျည်းသီးမှည့် - ဆယ်တောင့်
- ငရုတ်သီးစိမ်း - မိမိနှစ်သက်သလောက်
- ကြက်သွန်ဖြူ - အမွှာကြီးကြီး ၁၁မွှာ
- အရသာမှုန့် - လက်ဖက်ရည်ဇွန်း တစ်ဇွန်းသာသာ
ပြင်ဆင်ပုံ
- ကြက်သွန်ဖြူကို အခွံခွာပြီး ရေဆေးကာ အိုးအသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာတဲ့အထိ ထည့်လှော်ပေးပါ
- လှော်ပြီးတာနဲ့ ညက်နေအောင် ထောင်းပေးပါ
- ငရုတ်သီးစိမ်းကိုလဲ အညှာခြွေပြီး ရေဆေးကာ ခပ်ပါးပါးလေးတွေ လှီးပေးပါ
- မန်ကျည်းသီး အမှည့်ကို အခွံခွာထားပါ
- အားလုံးအဆင်သင့် ဖြစ်ပါက ငါးပိရည် ပန်းကန်ထဲမှာ ပါ၀င်ပစ္စည်းများကို ရောထည့်ကာ အားလုံးသမသွားအောင် ရောဖျော်ပေးပါ
- ငါးပိရည်အဖျော် ရတာနဲ့ တစ်ခါစားစာ ချန်ထားပြီး ပိုနေသော ငါးပိရည်ဖျော်များကို လေလုံဗူးများနှင့်ထည့်ကာ ရေခဲသေတ္တာ ခဲတဲ့အကန့်ထဲမှာ ထည့်ပြီးသိမ်းထားပါ
- ငါးပိရည် အဖျော်မွှေးမွှေး ချဉ်ချဉ် စပ်စပ်လေးနဲ့ အရသာရှိလှတဲ့ ငါးပိရည်ဖျော်လေးကို တို့စရာအစုံနှင့် မြိန်ယှက်စွာ စားသုံးနိုင်ပါပြီ။
No comments:
Post a Comment