Monday 6 April 2020

ကြက်သားလုံး အစိမ်းကြော်



တစ်နေ့တစ်နေ့ ဘာချက်ရမလဲ စဉ်းစားလိုက် စဉ်းစားထားတဲ့ အတွေးတွေက ပျောက်သွားလိုက်နဲ့ COVID19 ကြောင့် စျေးလဲမသွားချင်တာနဲ့ အိမ်မှာရှိတာလေး ဟင်းပွဲတစ်ပွဲ ဖြစ်အောင် ကြံရဖန်ရပြန်ပါတယ်။

ဒါကြောင့်မို့လို့ ဒီနေ့တော့ ကြက်သားလုံး အစိမ်းကြော် တစ်ပွဲအတွက် ရှိတာလေးနဲ့ အဆင်ပြေအောင် ချက်ထားတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
  1. ကြက်ရင်ပုံသား - 150 g
  2. မုံလာဥနီ - အနေတော် တစ်ဥ
  3. ကြက်သွန်နီ  - အနေတော် တစ်ခြမ်း
  4. ကြက်သွန်ဖြူ - အမွှာကြီးကြီး နှစ်မွှာ
  5. ကြက်သွန်မိတ် - နှစ်ပင်
  6. ဆား - လက်ဖက်ရည်ဇွန်း သုံးပုံနှစ်ပုံ
  7. အရသာမှုန့် - လက်ဖက်ရည်ဇွန်း တစ်ဝက်
  8. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  9. ပြောင်းကော်မှုန့် - ထမင်းစားဇွန်း နှစ်ဇွန်း
  10. ကြက်ဥ - တစ်လုံး
  11. ပဲငံပြာရည်အနောက် - ထမင်းစားဇွန်း တစ်ဇွန်းခွဲ
  12. ပဲငံပြာရည် အကြည် - ထမင်းစားဇွန်း တစ်ဇွန်း
  13. ဆီ - လိုသလောက် သုံးပေးပါ( ကြက်သားလုံးကြော်ရန်)
  14. ဆီ - ထမင်းစားဇွန်း လေးဇွန်း (အစိမ်းကြော်ကြော်ရန်)
ကြက်သားအရသာနယ်ရန်
  • ငါးငံပြာရည်အကြည် - ထမင်းစားဇွန်း တစ်ဝက်သာသာ
  • နနွင်းမှုန့် - လက်ဖက်ရည်ဇွန်း လေးပုံတစ်ပုံ
  • အရသာမှုန့် - လက်ဖက်ရည်ဇွန်း တစ်ဝက်
  • ပြောင်းကော်မှုန့် - လက်ဖက်ရည်ဇွန်း နှစ်ဇွန်း
  • ကြက်ဥ - တစ်လုံး (အကာဘဲယူပါ)
ပြင်ဆင်ပုံ
  • ကြက်သားကို အတုံးလိုက် ရေဆေးပြီး ခပ်သေးသေး အမြှောင်းလေးတွေလှီးကာ အရသာ နယ်ထားပါ
  • ကြက်ဥအကာကို ခလောက်ထားပါ
  • ပြောင်းကော်မှုန့်ကို ရေနှင့် ခပ်ပျစ်ပျစ်လေး ဖျော်ထားပါ
  • အရသာ နယ်ထားသော ကြက်ဥနှင့် ကော်မှုန့် အရည်ဖျော်ထားတာတို့ကို ရောပြီး နယ်ပေးထားပါ
  • မုံလာဥနီကို အခွံခွာပြီး ရေဆေးကာ မိမိနှစ်သက်သလို လှီးထားပါ
  • ကြက်သွန်နီကို အခွံခွာပြီး အလုံးလိုက် ရေဆေးကာ အကွင်းလိုက် လှီးထားပါ
  • ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
  • ကြက်သွန်မိတ်ကို ရေဆေးပြီး အနေတော် ပိုင်းဖြတ်ထားပါ
  • ဒယ်အိုးတစ်လုံးထဲမှာ ဆီနှင့် နနွင်းမှုန့်ထည့်ပေးကာ အပူပေးပါ
  • ဆီပူလာတာနဲ့ အရသာ နယ်ထားသော ကြက်သားကို တစ်တုံးချင်း အိုးဆန့်သလောက် ထဲ့ကြော်ပေးပါ
  • ကြက်သားလုံးကြော် တစ်ခုလုံး ရွှေဝါရောင် သန်းလာတာနဲ့ ဆယ်ပြီးဆီစစ်ထားပါ
  • အားလုံးအဆင်သင့် ဖြစ်တာနဲ့ ဒယ်အိုးတစ်လုံးထဲမှာ ဆီထည့်ပြီး အပူပေးပါ
  • ဆီပူလာတာနဲ့ ကြက်သွန်ဖြူနှင့် ကြက်သွန်နီကို ထည့်ကြော်ပါ
  • ကြက်သွန်နွမ်းတာနဲ့ ပဲငံပြာရည် အကြည် မုံလာဥနီ ဆားနှင့် အရသာမှုန့်တို့ကို နှစ်မိနစ်လောက်ဘဲ ထည့်ကြော်ပါ
  • ပြီးတာနဲ့ ကြော်ထားသော ကြက်ကြော်ကိုထည့်ပြီး မွှေပေးပါ
  • ကြက်သားလုံးကြော်ကို ထည့်ပြီးတာနဲ့ ပဲငံပြာရည်ထည့်ပေးပြီး အရသာ သမအောင် မွှေပေးပါ 
  • ပြီးတာနဲ့ အရသာမြည်းကာ မိမိနှစ်သက်တဲ့ အရသာ ရလာအောင် ပြင်ပေးကာ ကြက်သွန်မိတ်ထည့်ပြီး မွှေပေးပါ
  • ချိုစိမ့်စိမ့်လေး ကြက်သားလုံးကြော်လေးကို ထမင်းပူပူ ဟင်းပူပူလေး တွဲဖက်ပြီး စားသုံရန် ပြင်ပေးနိူင်ပါပြီ။

No comments:

Post a Comment