ဒီနေ့တော့ ကြေးအိုးအလွယ် လုပ်နည်းလေးနဲ့ လုပ်သောက်ဖြစ်ပါတယ် မာမာကတော့ အိမ်မှာ ဝက်သားမစားတဲ့အတွက် ကြက်သားနဲ့ဘဲ လုပ်စားဖြစ်ပါတယ်။
တစ်ကယ်တမ်းကျတော့ ကြေးအိုးက ဝက်ပြုပ်ရည်ရယ် ဝက်သားနဲ့ရယ်က ပိုပြီးသောက်လို့ ကောင်းပါတယ် ဒါကြောင့်မို့လို့ ဝက်သားစားတဲ့ သူတွေအတွက်ရယ် ဝက်အသည်းနဲ့ ဝက်အူမကြီး အလွယ်တစ်ကူ ဝယ်လို့ရတဲ့ သူတွေအတွက် ကြေးအိုးလုပ်နည်း ပြည့်ပြည့်စုံစုံလေးကို ရေးပေးလိုက်ပါတယ်ရှင်။
ဝက်နံရိုးပြုပ်ရန် ပါဝင်ပစ္စည်းများ
- ဝက်နံရိုး - ငါးဆယ်သား
- ချင်း - တစ်လက်မခန့်
- ဆား - ထမင်းစားဇွန်း နှစ်ဇွန်းခွဲ
- အချိုမှုန့် - လက်ဖက်ရည်ဇွန်း တစ်ဇွန်းခွဲ
- ကြက်သွန်ဖြူ - ဥကြီးကြီး နှစ်ဥ
- ရေ - ဆယ်လီတာ
ဝက်နံရိုး ပြုပ်ပုံ
- ဝက်နံရိုးကို အနေတော် ပိုင်းခုတ်ပြီး ရေဆေးပါ
- ချင်းကိုအခွံခွာပြီး ရေဆေးကာ မထူမပါးလေးတွေ လှီးထားပါ
- ကြက်သွန်ဖြူကို အပေါ်ယံ အခွံခွာပြီး အလုံးလိုက် ရေဆေးထားပါ
- အားလုံးအဆင်သင့် ဖြစ်တာနဲ့ ဇောက်နက်သော အိုးတစ်လုံးထဲမှာ ဝက်နံရိုး အချိုမှုန့် ဆား ချင်း ကြက်သွန်ဖြူနှင့် ရေတို့ထည့်ကာ ပြုပ်ပေးပါ
- ပြုပ်နေစဉ် မီးကိုအနေတော်နှင့် ပြုပ်ပေးပြီး တစ်နာရီလောက် တည်ထားပေးပါ
- ပြုပ်နေစဉ် အပေါ်ယံမှာ အမြှုပ်များ တက်လာပါက ဆယ်ပြီး သွန်ပေးပါ
- ပြုပ်နေစဉ် ရေနည်းသွားပါက ထပ်ထပ်ပြီး ထည့်ပေးကာ မီးခပ်နွေးနွေးနှင့် ဆက်တည်ထားပါ
အသားလုံး ပြုလုပ်ရန် ပါဝင်ပစ္စည်းများ
- ဝက်ပေါင်သား - လေးဆယ်သား
- ငါးဖယ်ခြစ် - တစ်ဆယ်သား
- ခရုဆီ - ထမင်းစားဇွန်း တစ်ဇွန်း
- ပြောင်းကော်မှုန့် - ထမင်းစားဇွန်း သုံးဇွန်း မောက်မောက်
- သကြား - ထမင်းစားဇွန်း တစ်ဇွန်းမောက်မောက်
- အချိုမှုန့် - လက်ဖက်ရည်ဇွန်း တစ်ဇွန်း
- ပဲငံပြာရည်အကြည် - ထမင်းစားဇွန်း သုံးဇွန်း
- ချင်း - လက်တစ်ဆစ် သာသာခန့်
- ကြက်သွန်ဖြူ - အမွှာကြီးကြီး ငါးမွှာ
အသားလုံး ပြုလုပ်ရန် ပြင်ဆင်ပုံ
- ဝက်သားနှင့် ငါးဖယ်ခြစ်ကို ကြိတ်စက်ထဲမှာထည့်ပြီး ညက်နေအောင် ကြိတ်ပေးပါ
- ကြိတ်စက်မရှိပါက ဝက်သားကို ညက်နေအောင် စင်းပေးပြီး ဇလုံတစ်လုံးထဲမှာ ငါးဖယ်ခြစ်နှင့် ရောကာ အချက်တစ်ရာလောက် ပေါက်ပေးပါ
- ချင်းကိုအခွံခွာပြီး ရေဆေးကာ ညက်နေအောင် ထောင်းပေးပါ
- ကြက်သွန်ဖြူကို အခွံခွာပြီး ရေဆေးကာ ညက်နေအောင် ထောင်းပေးပါ
- ကျန်နေသော ပါဝင်ပစ္စည်းများကို အဆင်သင့် ပြင်ထားပါ
- ဝက်သားနှင့် ငါးဖယ်ခြစ် ရပြီဆိုတာနဲ့ ဇလုံတစ်လုံးထဲမှာ ဝက်သားနှင့်ငါးဖယ် ကြိတ်ပြီးသား ပဲငံပြာရည် အချိုမှုန့် သကြား ချင်းထောင်း ကြက်သွန်ဖြူထောင်း ပြောင်းကော်မှုန့်တို့ထည့်ပြီး အရသာ သမအောင် နယ်ပေးထားပါ
ငါးဖယ်လုံးလုံးရန် ပါဝင်ပစ္စည်းများ
- ငါးဖယ်ခြစ် - တစ်ဆယ်သား
- ကြက်သွန်ဖြူ - အမွှာကြီးကြီး နှစ်မွှာ
- ချင်း - လက်တစ်ဆစ်ခန့်
- ဆား - လက်ဖက်ရည်ဇွန်း တစ်ဝက်
- အချိုမှုန့် - လက်ဖက်ရည်ဇွန်း တစ်ဝက်
- ပြောင်းကော်မှုန့် - ထမင်းစားဇွန်း နှစ်ဇွန်း
- ငါးဖယ် – ၁၀ကျပ်သား ကြက်သွန်ဖြူ - နှစ်မွှာ
ငါးဖယ်လုံး ပြုလုပ်ရန်
- ဇလုံထဲမှာ ငါးဖယ်ခြစ် ဆား အချိုမှုန့် ပြောင်းကော်မှုန့်တို့ ထည့်ထားပါ
- ကြက်သွန်ဖြူကို အခွံခွာပြီး ရေဆေးကာ ညက်နေအောင် ထောင်းထားပါ
- ချင်းကို အခွံခွာပြီး ရေဆေးကာ ညက်နေအောင် ထောင်းထားပါ
- ပြီးတာနဲ့ ငါးဖယ်ခြစ် ဇလုံထဲမှာ အားလုံးကို ရောပြီး အချက်တစ်ရာလောက် ပေါက်ပေးထားပါ။
ကြေးအိုးပွဲပြင်ရန် ပါဝင်ပစ္စည်းများ
- ဝက်အူမကြီး - တစ်ဆယ်သား
- ဝက်အသည်း - တစ်ဆယ်သား
- ငုံးဥ - ဆယ်လုံး
- ဆန်ကြာဇံ - တစ်ထုတ် (သို့မဟုတ်)
- ဆန်ပြားခေါက်ဆွဲဖတ်
- မုန့်ညှင်းစိမ်း - တစ်စည်း
- ကျူဆိုင် - တစ်စည်း
- ကြက်သွန်မိတ် - တစ်စည်း
- ပဲပြား - တစ်တုံး
- ငရုတ်ကောင်းမှုန့် - လိုသလောက် သုံးပါ
- ငရုတ်ဆီ အချဉ်ရည် - လိုသလောက် သုံးပါ
ကြေးအိုးပွဲပြင်ရန် ပြင်ဆင်ပုံ
- ဇလုံထဲမှာ ကြာဇံကို ရေမြုပ်အောင်ထည့်ပြီး ငါးနာရီလောက် စိမ်ထားပြီး ရေစစ်ထားပါ (သို့မဟုတ်)
- ဆန်ပြားခေါက်ဆွဲဖတ်ကို အဆက်သင့် ပြင်ထားပါ
- ငုံးဥကို ကျက်အောင်ပြုပ်ပြီး အခွံခွာထားပါ
- ဝက်နံရိုး ပြုပ်ရည် အိုးကို ပွက်ပွက်ဆူအောင် တည်ပေးကာ အရသာမြည်းပြီး မိမိစိတ်ကြိုက် အရသာ ရလာအောင် ပြင်ပေးကာ မီးခပ်နွေးနွေးလေးနှင့် အရည်အိုးကို တည်ထားပါ
- ဝက်အူမကြီးကို ရေစင်အောင်ဆေးပြီး မထူမပါးလေးတွေ လှီးထားပါ
- ဝက်အသည်းကို ရေဆေးပြီး မထူမပါးလေးတွေ လှီးထားပါ
- ဝက်သားလုံးလုပ်ရန် ပြင်ထားသော အသားများကို အနေတော် အလုံးလေးတွေ လုံးထားပါ
- ငါးဖယ်လုံး ပြုလုပ်ရန် ငါးဖယ်ပေါက်ထားတာကို အနေတော် အလုံးလေးတွေ လုံးထားပါ
- မုန့်ညှင်းစိမ်းကို ရေစင်အောင်ဆေးပြီး အနေတော်လေးတွေ ပိုင်းဖြတ်ပေးပါ
- ကျူဆိုင်ကို ရေဆေးပြီး အနေတော် ပိုင်းဖြတ်ထားပါ
- ပဲပြားကို ရေဆေးပြီး မိမိနှစ်သက်သလောက် အတုံးလေးတွေ တုံးထားပါ
- ငရုတ်ကောင်းမှုန်နှင့် ငရုတ်ဆီအချဉ်ရည်ကို အဆင်သင့် ပြင်ထားပါ
ကြေးအိုးစားပွဲပြင်ဆင်ပုံ
- ကြေးအိုးပွဲပြင်ရန် ကြွေဇလုံ ခပ်ကြီးကြီးထဲမှာ ရေစိမ်ထားသော ကြာဇံ (သို့မဟုတ်) ဆန်ပြားခေါက်ဆွဲဖတ် တစ်ပွဲစာနှင့် ငုံးဥတို့ကို ထည့်ပေးပါ
- ပြီးတာနဲ့ အနေတော် အိုးအသေး တစ်လုံးထဲမှာ အရိုးပြုပ်ရည် တစ်ပွဲစာကို မှန်းပြီးထည့်ပေးပါ
- အရိုးပြုပ်ရည်ထဲမှာ ဝက်အူမကြီး ဝက်အသည်း ငါးဖယ်လုံး ဝက်သားလုံး မုန့်ညှင်းရွက်တို့ကို တစ်ပွဲစာ မှန်းပြီးထည့်ပေးကာ ပွက်ပွက်ဆူအောင် တည်ပေးပါ
- ဝက်အသည်းက အရမ်းကျက်သွားရင် စားလို့မကောင်းတဲ့အတွက် အကြာကြီး မပြုပ်မိဖို့ သတိထားပေးပါ
- မိမိစိတ်ကြိုက် ဟင်းရည်အနေတော် ရပြီဆိုတာနဲ့ ကြာဇံပန်းကန်ထဲကို လောင်းထည့်ပေးပါ
- ပြီးတာနဲ့ ငရုတ်ကောင်းမှုန့် ဖြူးပေးပါ
- ပူပူလူလူလေးနဲ့ သောက်လို့ ကောင်းလွန်းတဲ့ ကြေးအိုးပြုပ်ကို ငရုတ်ဆီ အချဉ်လေးနှင့် တွဲဖက်ပြီး သောက်သုံးနိူင်ပါပြီ။
No comments:
Post a Comment