ဒီနေ့တော့ ကျောင်းနှစ်ပါတ်ပိတ်တုန်း ခနပြန်လာလည်တဲ့ သမီးလေးအတွက် ကြက်ဥနဲ့ သီးစုံချဉ်ရည်ဟင်းလေး ချက်ပါတယ် ဒါကြောင့်မို့လို့ မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ကုလားပဲခြမ်း - ထမင်းပေါင်းအိုး ဆန်ချင်ခွက် တစ်ခွက်
- ကြက်ဥ - ငါးလုံး
- မန်ကျည်းသီးမှည့် - ကွမ်းသီးဆံလုံးလောက်
- ပျဉ်းတော်သိမ်းရွက် - အခက်ကြီးကြီး နှစ်ခက်
- အာလူး - အနေတော် သုံးလုံး
- ခရမ်းသီး အရှည်တောင့် - ငါးလုံး
- ရုံးပတေသီး - ဆယ်တောင့်
- ဆား - လက်ဖက်ရည်ဇွန်း နှစ်ဇွန်း
- ငါးငံပြာရည် - ထမင်းစားဇွန်း နှစ်ဇွန်း
- အရသာမှုန့် - လက်ဖက်ရည်ဇွန်း တစ်ဇွန်း
- နနွင်းမှုန့် - လက်ဖက်ရည်ဇွန်း တစ်ဇွန်း (ပဲပြုပ်ထဲနှင့်ဆီသတ်ရာတွင် သုံးရန်)
- ကြက်သွန်နီ - အနေတော် တစ်ခြမ်း (ဟင်းဆီသတ်ရန်)
- ကြက်သွန်ဖြူ - အမွှာကြီးကြီး နှစ်မွှာ
- ချင်း - လက်တစ်ဆစ်ခန့်
- ငရုတ်သီးအရောင်တင်မှုန့် - လက်ဖက်ရည်ဇွန်း တစ်၀က်သာသာ
- ကုလားလေး မဆလာ - တစ်ထုတ်ဆီ
- ဆီ - ထမင်းစားဇွန်း လေးဇွန်း
ပြင်ဆင်ပုံ
- ကုလားပဲဆန်ကို ရေဆေးပြီး ရေမြုပ်အောင်ထည့် နနွင်းမှုန့် အနည်းငယ်ထည့်ပြီး ပဲကိုမနူးတစ်နူး ပဲအခြမ်းလိုက် အနေအထား မပျက်အောင် ပြုပ်ပြီးထားပါ
- ကြက်ဥကို ကျက်အောင်ပြုပ်ပြီး အခွံခွာကာ ပါတ်ပါတ်လည် မွှန်းထားပါ
- ခရမ်းသီးကို ထက်ဝက်ပိုင်းပြီး နာရီဝက်လောက် ရေစိမ်ထားပါ
- ရုံးပတေသီးကို ရေဆေးပြီး အမြှီးပိုင်းနှင့် အညှာာကို ဖြတ်ကာ ထက်ဝက်ပိုင်းထားပါ
- ပျဉ်းတော်သိမ်းရွက်ကို ရေဆေးထားပါ
- အာလူးကို အခွံခွာပြီး ရေဆေးကာ လေးစိတ်စိတ်ထားပါ
- မန်ကျည်းသီးမှည့်ကို ရေတထပ်ဆေးပြီး ရေမြုပ်အောင် ထည့်ကာ ရေစိမ်ထားပါ
- ကြက်သွန်ဖြူ ကြက်သွန်နီ ချင်းတို့ကို အခွံခွာပြီး ရေဆေးကာ ငရုတ်သီးမှုန့်တို့နဲ့ရောပြီး ထောင်းထားပါ
- အားလုံးအဆင်သင့်ဖြစ်တာနဲ့ ဒယ်အိုးတလုံးကို အပူပေးပြီး ဆီထည့်ပါ ဆီပူလာတာနဲ့ နနွင်းမှုန့်ထည့်ကာ ငရုတ်သီးထောင်းကိုထည့်ပြီး မွှေးလာအောင် ဆီသတ်ပေးပါ
- ဆီသတ်နံ့မွှေးလာတာနဲ့ ပျဉ်းတော်သိမ်းရွက်များကို ထည့်ပြီးဆီသတ်ပါ
- ပြီးတာနဲ့ ဟင်းချက်ရန် ပြင်ထားသော ခရမ်းသီး အာလူးများ ဆား အရသာမှုန့်တို့နှင့် ငံပြာရည်တို့ ထည့်မွှေပြီး ဆီဆက်ပြီးသတ်ပါ
- ငရုတ်သီး ဆီသတ်နံ့ မွှေးလာတာနဲ့ မီးပိတ်ထားပေးပါ
- အသီးအရွက်များ ဆီသတ်ပြီးတာနဲ့ ပြုပ်ထားသော ပဲအိုးထဲကို ပြောင်းထည့်ပြီး ရေလိုသလောက်ထည့်ကာ ပွက်ပွက်ဆူအောင် တည်ပေးပါ
- ရေပွက်ပွက် ဆူလာတာနဲ့ ကြက်ဥ အာလူး နူးအောင် တည်ပေးကာ ရေစိမ်ထားသော မကျည်းမှည့်ကို လက်နဲ့နယ်ဖျော်ပြီး မကျည်းရည် ထည့်ပေးပါ
- ဟင်းရည်ပွက်ပွက်ဆူပါက အရသာမြည်းပြီး လိုသလိုပြင်ကာ ကုလားလေးမဆလာ ပျဉ်းတော်သိမ်းရွက်နှင့် ရုံးပတေသီးတို့ ထည့်ပြီးမွှေပေးပါ
- ဟင်းရည်အိုး ပွက်ပွက်ဆူလာတာ သုံးလေးမိနစ်လောက် ရပါက မီးပိတ်ပေးပြီး ကြက်ဥ ပဲနှင့် သီးစုံချဉ်ရည်ဟင်းကို သုံးဆောင်နိူင်ပါပြီ။
No comments:
Post a Comment