ဒီနေ့တော့ ဗီယက်နမ် အစားအသောက် အများစုမှာ မပါမဖြစ်တဲ့ စပါးလင်ဆီချက်လေး ချက်ပါတယ် ဒီဆီချက်လေးတွေက ဗီယက်နမ် လူမျိုးအများစုက တစ်ခြားအစား အစာတွေနဲ့ တွဲဖက်ပြီး စားကြပါတယ်။
တစ်ခါတစ်လေမှာ သူတို့လို ချက်စားချင်တဲ့အတွက် ဒီဆီချက် ချက်နည်းလေးကို သူငယ်ချင်း ဗီယက်နမ်မလေးဆီက သင်ယူထားတဲ့အတိုင်း ချက်ဖြစ်တဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- စပါးလင် အရင်းပိုင်း - ခြောက်လက်မခန့် လေးပင်
- ကြက်သွန်ဖြူ - အမွှာကြီးကြီး ဆယ့်ငါးမွှာ
- ငရုတ်သီးအစပ် လုံးခြမ်းကွဲ - ထမင်းစားဇွန်း ငါးဇွန်း
- နနွင်းမှုန့် - လက်ဖက်ရည်ဇွန်း တစ်ဝက်
- ဆီ - ထမင်းပေါင်းအိုး ဆန်ချင်ဗူး သုံးဗူး
ပြင်ဆင်ပုံ
- စပါးလင် အရင်းပိုင်းကို ရေစင်အောင်ဆေးပြီး ခပ်ပါးပါး လှီးထားပါ
- လှီးထားသော စပါးလင်ကို ငရုတ်ဆုံရှိပါက ငရုတ်ဆုံနှင့် ညက်အောင် ထောင်းပေးပါ
- ငရုတ်ဆုံ မရှိပါက အသီးအရွက် ကြိတ်ရာတွင် အသုံးပြုသော ဗလင်ဒါထဲမှာ ရေအနည်းငယ်နှင့် စပါးလင်ကိုထည့်ကာ ညက်နေအောင် ရောကြိတ်ပေးပါ
- ကြက်သွန်ဖြူကို အခွံခွာကာ ရေဆေးပြီး ပုံပါအတိုင်းရအောင် မညက်တစ်ညက် ကြိတ်ပေးပါ
- ငရုတ်သီး အစပ်တောင့်ကို ပုံပါအတိုင်း လုံခြမ်းကွဲရအောင် ကြိတ်ပေးပါ
- အိုးအသားထူသော ဒယ်အိုးကို မီးအပူပေးပါ
- အိုးပူလာတာနဲ့ ဆီနှင့် နနွင်းမှုန့်ကို ထည့်ပေးပါ
- ဆီအငွေ့တက်လာတာနဲ့ မီးကိုအနေတော် လျှော့ပေးပြီးမှ စပါးလင်ထောင်း ငရုတ်သီး လုံးခြမ်းကွဲ ကြက်သွန်ဖြူထောင်းတို့ကို တခါထဲ ထည့်ကြော်ပေးပါ
- ကြော်နေစဉ် အကျက်ညီစေရန် အဆက်မပြတ် မွှေပေးပါ
- စပါးလင်ထောင်း ကြက်သွန်ဖြူထောင်းနှင့် ငရုတ်သီး လုံးခြမ်းကွဲတို့ မွှေးလာပြီး အနည်းငယ် ကြွတ်လာပါက မီးပိတ်ပေးပါ
- မီးဖိုပေါ်မှာ လက်ကျန်မီး အပူရှိန်နှင့် ကြွတ်နေအောင် ဆက်ကြော်ပေးပါ
- ဒယ်အိုးအသား ပါးပါက ခနလေးနှင့် ကျွမ်းသွားတတ်တဲ့အတွက် အိုးအသားထူတာကို ရွေးသုံးပါ
- စပါးလင်ဆီချက်က ကျွမ်းသွားတဲ့အခါ ခါးတတ်တဲ့အတွက် သတိထားပြီး မွှေမွှေပေးပါ
- စပါးလင်ဆီချက်လေး မွှေးပြီးကြွတ်လာတာနဲ့ အဖတ်များကို ဆီစစ်ပြီး အေအးခံထားပါ
- ဆီများကိုလဲ အအေးခံထားပါ
- နှစ်မျိုးလုံး အေးသွားပါက ပန်းကန်လုံး တစ်ခုထဲမှာ ရောပေးပြီး မွှေးပြီးစပ်နေတဲ့ စပါးလင်ဆီချက်ကို ခေါက်ဆွဲကြော် ခေါက်ဆွဲပြုပ် ကြာဇံကြော် ကြာဇံပြုပ် အသားပြုပ် အစရှိသည်တို့နှင့် တခြားအစာများနှင့်လဲ မိမိနှစ်သက်သလို တွဲဖက်ပြီး စားသုံးနိူင်ပါပြီ။
No comments:
Post a Comment