Sunday, 4 June 2017

ဆိတ်သားပြုပ်ကြော် မွှေးမွှေးလေး


ဒီတခါတော့ ဆိတ်သားတွေ ၀ယ်ထားတာနဲ့ ဆိတ်သားပြုပ်ကြော်ကို ထမင်းပူပူလေးနဲ့ စားရအောင် ချက်ထားပါတယ် ချက်နည်းအလွယ်လေးတွေမဲ့ စားကောင်းဖို့က  အဓိကကျတာမို့လို့ သုံးနေကျ ဟင်းခတ်အမွှေးအကြိုင်တွေနဲ့ဘဲ ပြုပ်ကြော်မွှေးမွှေး ကြော်နည်းလေးကို မျှဝေလိုက်ပါတယ်။ 


ပါဝင်ပစ္စည်းများ

  • ဆိတ်သား - 500g
  • ကြက်သွန်နီ - အနေတော် တလုံး
  • ကြက်သွန်ဖြူ - အမွှာကြီးကြီး ၅မွှာ
  • ချင်း - လက်တဆစ်ခန့်
  • အရသာမှုန့် - လက်ဖက်ရည်ဇွန်း တ၀က်
  • ပဲငံပြာရည်အပျစ် - ထမင်းစားဇွန်း တဇွန်း
  • ဆား - လက်ဖက်ရည်ဇွန်း တ၀က်သာသာ
  • ဆီ - ထမင်းစားဇွန်း ၁၂ဇွန်း
  • နနွင်းမှုန့် - လက်ဖက်ရည်ဇွန်း သုံးပုံတပုံ

ပြင်ဆင်ပုံ
  • ဆိတ်သားကို အတုံးလိုက် ရေဆေးပြီး အရှည်လိုက် ပုံပါအတိုင်း လက်တလုံးခန့် အထူလှီးထားပါ
  • ချင်းကို အခွံခွာပြီး အမြှောင်းလိုက် အရှည်လိုက် လှီးထားပါ
  • ကြက်သွန်နီကို အလုံးလိုက် အခွံခွာပြီး ရေဆေးကာ အကွင်းလိုက် ခပ်ထူထူ လှီးထားပါ
  • ကြက်သွန်ဖြူကို အခွံခွာပြီး ရေဆေးကာ ၂မွှာကို ဓါးပြားရိုက်ပြီး ခပ်နုတ်နုတ် လှီးထားပါ
  • ကျန်သုံးမွှာကို ညက်နေအောင် ထောင်းထားပါ
  • ထောင်းထားသော ကြက်သွန်ဖြူထဲ ပဲငံပြာရည်အပျစ် ဆား အရသာမှုန့် တို့နှင့်ရောမွှေကာ ဆိတ်သားကိုပါ ရောနယ်ပေးပါ
  • အရသာနယ်ထားသောဆိတ်သားကို အရင်ဆုံး ရေမြုပ်ရုံလေးထည့်ပြီး ရေခမ်းအောင် တည်ပေးပါ
  • ပထမ လုံးရည်ခမ်းတာနဲ့ နောက်ထပ် ရေကို ဆိတ်သားမြုပ်အောင် ထပ်ထည့်ပြီး အသားနူးတဲ့အထိ ပြုပ်ပေးပါ
  • ပြုပ်ထားသောအရည်များ ခမ်းတာနဲ့ မီးပိတ်ပေးပါ
  • ဆီကို အပူပေးပြီး နနွင်းမှုန့်ထည့်ကာ ကြက်သွန်ဖြူ ကြက်သွန်နီ ချင်းတို့ကို နွမ်းတယ်ဆိုရုံလေး ကြောပေးပါ 
  • ပြီးတာနဲ့ ရေခမ်းပြီး နူးအောင်ပြုပ်ထားသော ဆိတ်သားကို ထည့်ကြော်ပါ
  • ဆိတ်သားကပြုပ်နေစဉ် နူးပြီးသားဖြစ်တဲ့အတွက် ကြက်သွန်များ နွမ်းတာနဲ့ မီးပိတ်ပေးပြီး ဆိတ်သားပြုပ်ကြော်ကို  စားသုံးရန် အသင့်ဖြစ်ပါပြီ။


No comments:

Post a Comment