Thursday, 25 February 2016

ဆိတ်သား ကီးမားမွှေးမွှေးလေး





ဒီနေ့တော့ ဆိတ်သားလေး ဝယ်လာဖြစ်တာနဲ့ ပလာတာ ချာပါတီ နံပြား  ပေါင်မုန့် ထမင်းပူပူတို့နဲ့ အရမ်းကို လိုက်ဖက်တဲ့ ဆိတ်သားကီးမား ချက်နည်းလေး မျှဝေလိုက်ပါတယ်

ပါဝင်ပစ္စည်းများ

  1. ဆိတ်သား - 250 g
  2. ကြက်သွန်နီ - အနေတော် ၅လုံး
  3. ကြက်သွန်ဖြူ - အမွှာကြီးကြီး ၅မွှာ
  4. ခရမ်းချဉ်သီး - အနေတော် ၄လုံး
  5. ငရုတ်သီးစိမ်း - အတောင့်ကြီးကြီး ၄တောင့်
  6. ချင်း - လက်တစ်ဆစ်ခန့်
  7. အရသာမှုန့် - လက်ဖက်ရည်ဇွန်း တစ်ဇွန်း
  8. ဆား - လက်ဖက်ရည်ဇွန်း တစ်ဝက်
  9. မဆလာ - လက်ဖက်ရည်ဇွန်း ၂ဇွန်းမောက်မောက်
  10. ငရုတ်သီး အရောင်တင်မှုန့် - ထမင်းစားဇွန်း တစ်ဇွန်းခွဲ
  11. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
  12. ဆီ - ဟင်းခပ်ဇွန်းကြီး ၃ဇွန်း

ပြင်ဆင်ပုံ

  1. ဆိတ်သားကို အတုံးလိုက် ရေဆေးပြီး အနေတော် အတုံးလေးတုံးကာ ကြိတ်စက်ထဲထည့်ပြီး တမိနစ်စီ ၂ခါလောက် ကြိတ်ပေးပါ
  2. ကြိတ်ထားသော ဆိတ်သားကို မဆလာတ၀က် ဆား နနွင်း အရသာမှုန့်တို့နဲ့ နယ်ထားပြီး အနည်းဆုံး နာရီဝက်လောက် နှပ်ထားပါ
  3. ကြက်သွန်နီများကို အခွံခွာပြီး အလုံးလိုက် ရေဆေးထားပါ
  4. ကြက်သွန်ဖြူများကို အခွံခွာပြီး ရေဆေးက ခပ်နုတ်နုတ်စဉ်းထားပါ
  5. ကြက်သွန်နီ နှစ်လုံးကို ခပ်နုတ်နုတ်လှီးထားပါ
  6. ကျန်သော ကြက်သွန်နီ ၃လုံးကို လက်တလုံးခန့်အထူ အကွင်းလိုက် လှီးထားပါ
  7. ငရုတ်သီးစိမ်းကို အနေတော် လှီးထားပါ
  8. ခရမ်းချဉ်သီးကို ပုံပါအတိုင်း လေးစိတ် စိတ်ထားပါ
  9. ငရုတ်သီး အရောင်တင်မှုန့်ကို အဆင်သင့် ပြင်ထားပါ

ဟင်းချက်ရန်

  1. ဇောက်နက်သော အိုးကို အပူပေးပါ။
  2. အိုးပူလာပါက ဆီကိုအငွေ့တက်လာအောင် တည်ပါ။
  3. ဆီပူလာတာနဲ့ ကြက်သွန်ဖြူ ကြက်သွန်နီ ချင်းနှင့် ငရုတ်သီးမှုန့်တို့ကို မွှေးလာတဲ့ထိ ဆီသတ်ပါ။
  4. ငရုတ်သီးနံ့ မွှေးလာတာနဲ့ အရသာနယ်ထားသော ဆိတ်သားကို ထည့်ပြီး ဆီသတ်ပါ။
  5. ဆီသတ်စဉ် အသားများကို မကြာမကြာ မွှေပေးပါ။
  6. ၅မိနစ်လောက်ကြာအောင် ဆီသတ်ပြီးမှ အသားနူးစေရန် ရေမြုပ်အောင်ထည့်ပြီး အဖုံးအုပ်ကာ တည်ပေးပါ။
  7. ရေမခမ်းခင် အကွင်းလိုက် လှီးထားသော ကြက်သွန်နီ ငရုတ်သီးစိမ်း ခရမ်းချဉ်သီးနှင့် ကျန်သော မဆလာတ၀က်တို့ကို ထည့်မွှေ၍ ရေခမ်းပြီး ဆီပြန်အောင် တည်ပေးပါ။
  8. ဆီပြန်လာပါက အရသာမြည်းကာ လိုသလိုပြင်ပြီး ပေါင်မုန့် နံပြား ပလာတာ  ချာပါတီ ထမင်းပူပူတို့နှင့် နှစ်သက်သလိုတွဲဖက်ပြီး သုံးဆောင် နိုင်ပါပြီ။
  9. ဆိတ်သားအစား အမဲသား သိုးသားတို့နှင့်လည်း ဤနည်းအတိုင်း ချက်နိုင်ပါတယ်။

No comments:

Post a comment