ဒီနေ့တော့ တစ်ပါတ်တစ်ရက် သတ်သတ်လွတ်စားတဲ့ သမီးလေးအတွက် ငရုတ်ပွကို သတ်သတ်လွတ်လေး ကြော်ပါတယ် ထမင်းပူပူလေးနဲ့ လိုက်ဖက်ပြီး စားလို့ကောင်းလွန်းတဲ့အတွက် မာမာပြင်ဆင်ပြီး ကြော်ထားတဲ့ ကြော်နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- ငရုတ်ပွ - သုံးလုံး (အဖြူ အနီ အဝါ)
- ကြက်သွန်ဖြူ - အမွှာကြီးကြီး သုံးမွှာ
- ကြက်သွန်နီ - အနေတော် တစ်ခြမ်း
- ပဲငံပြာရည် အကြည် - ထမင်းစားဇွန်း တစ်ဇွန်း
- ပဲငံပြာရည် အပျစ် - ထမင်းစားဇွန်း တစ်ဝက်
- ဆီ - ထမင်းစားဇွန်း သုံးဇွန်း
- နှမ်းဆီ - လက်ဖက်ရည်ဇွန်း တစ်ဝက်
- ငရုတ်ကောင်းမှုန့် - လက်ဖက်ရည်ဇွန်း လေးပုံတစ်ပုံ
ပြင်ဆင်ပုံ
- ငရုတ်ပွများကို ရေဆေးပြီး အထဲမှ အစေ့များ ဖယ်ပေးကာ အရှည်အမြှောင်းလေးတွေ လှီးပေးပါ
- ကြက်သွန်ဖြူကို အခွံခွာပြီး ရေဆေးကာ ဓားပြားရိုက်ထားပါ
- ကြက်သွန်နီကို အခွံခွာပြီး ရေဆေးကာ မထူမပါးလေးတွေ လှီးထားပါ
- ဒယ်အိုးထဲမှာ ဆီထည့်ပြီး အပူပေးပါ
- ဆီပူလာတာနဲ့ ကြက်သွန်ဖြူနှင့် ကြက်သွန်နီတို့ကို ထည့်ကြော်ပေးပါ
- ကြက်သွန်များ အနည်းငယ် နွမ်းလာတာနဲ့ ငရုတ်ပွများကို ထည့်ကာ ပဲငံပြာရည် နှစ်မျိုးလုံးကို တစ်ခါထဲ ထည့်မွှေပေးပါ
- အကြာကြီး ကြော်စရာ မလိုဘဲ သုံးမိနစ်လောက် ကြော်ပြီးတာနဲ့ အရသာမြည်းပြီး မိမိစိတ်ကြိုက် ရလာအောင် ပြင်ပေးပါ
- အရသာ ပြင်ပြီးတာနဲ့ ငရုတ်ကောင်းမှုန့်နှင့် နှမ်းဆီတို့ ထည့်မွှေပေးပါ
- ပြီးတာနဲ့ ပန်းကန်ထဲ ပြောင်းထည့်ပေးပြီး ထမင်းပူပူလေးနဲ့ သုံးဆောင်နိူင်ပါပြီ။
No comments:
Post a Comment