ပဲလွန်းနှပ် စိမ့်စိမ့်လေး

ဒီနေ့တော့ ငါးပိရည်ဖျော်လေး လုပ်မိတာနဲ့ ပဲနှပ်လေးလဲ ချက်မိပါသေးတယ် မြန်မာပြည်မှာ ဆိုင်တော့ ပံလွန်းလို့ ခေါ်ကြပြီး မာမာတို့ဆီမှာတော့ black eye ပဲလို့ခေါ်ကြပါတယ်။

ထမင်းပူပူလေးကို ပဲနှပ်လေးရယ် ငါးပိရည်ဖျော် စပ်စပ်လေးရယ် နယ်စားလိုက်ရင်တော့ ထမင်းစားလို့ မြိန်စေအုံးမှာ အမှန်ပါဘဲ။

ဒါကြောင့်မို့လို့ မာမာပြင်တင်ပြီး ချက်ထားတဲ့ လွယ်ကူမြန်ဆန် ပဲနှပ်ချက်နည်းလေးကို မျှဝေပေးလိုက်ပါတယ်ရှင်။

ပဲပြုပ်ရန် ပါဝင်ပစ္စည်းများ

1. ပဲလွန်း - ထမင်းပေါင်းအိုး ဆန်ချင်ဗူး နှစ်ဗူး
2. ဆား - လက်ဖက်ရည်ဇွန်း တစ်ဝက်
3. ရေ - လိုသလောက် သုံးပေးပါ

ပြင်ဆင်ပုံ

• ဇလုံ ခပ်ကြီးကြီး တစ်လုံးထဲမှာ ပဲကိုထည့်ပြီး ရေနှစ်ထပ်လောက် ဆေးပေးပါ
• ပြီးတာနဲ့ ပဲများအားလုံး ရေမြုပ်အောင်ထည့်ပြီး သုံးနာရီလောက် ရေစိမ်ပေးပါ
• ရေစိမ်ထားသော ပဲများပွလာတာနဲ့ စိမ်ထားသော ရေများကို သွန်လိုက်ပါ
• ပဲများကို ဇောက်နက်သော အိုးထဲမှာ ထည့်ပေးပြီး ဆားနှင့် ရေမြုပ်အောင်ထည့်ပြီး တည်ပေးပါ
• ပထမတစ်ရည်ခမ်းပြီး ပဲမနူးသေးပါက ရေကိုချင့်ချိန်ပြီး ထပ်ထည့်ကာ ပဲများနူးတဲ့အထိ ပြုပ်ပေးပါ
• ပဲများ နူးလာတာနဲ့ မီးပိတ်ပေးပြီး ရေများကို သွန်ပါပေးပြီး ရေစစ်ထားပါ

ပါနှပ်ရန် ပါဝင်ပစ္စည်းများ

1. ပြုပ်ပြီးသားပဲ - ဟင်းပြင်ပန်းကန် တစ်လုံးစာ
2. နနွင်းမှုန့် - လက်ဖက်ရညိဇွန်း တစ်ဝက်
3. အရသာမှုန့် - လက်ဖက်ရည်ဇွန်း တစ်ဝက်သာသာ
4. ငါးငံပြာရည် - ထမင်းစားဇွန်း တစ်ဇွန်း
5. ကြက်သွန်နီ - အနေတော် တစ်လုံး
6. ကြက်သွန်ဖြူ - အမွှာကြီးကြီး သုံးမွှာ
7. ချင်း - လက်တစ်ဆစ်ခန့်
8. ဆီ - ထမင်းစားဇွန်း ဆယ်ဇွန်းခန့်

ပဲနှပ်ရန် ပြင်ဆင်ပုံ

• ကြက်သွန်နီကို အခွံခွာပြီး ရေဆေးကာ ခပ်ပါးပါး လှီးပေးပါ
• ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
• ချင်းကို အခွံခွာပြီး ရေဆေးကာ ပါးပါးရိတ်ရိတ် အမြှောင်းလေးတွေ လှီးပေးထားပါ
• ပါဝင်ပစ္စည်းများကို အဆင်သင့် ပြင်ထားပါ
• ဒယ်အိုးထဲမှာ ဆီနှင့်နနွင်းမှုန့်ထည့်ပြီး အပူပေးပါ
• ဆီပူလာတာနဲ့ ကြက်သွန်ဖြူ ကြက်သွန်နီနှင့် ချင်းတို့ကို အိအိလေး ဖြစ်သွားအောင် ကြော်ပေးပါ
• ကြက်သွန်များ အိသွားတာနဲ့ ပဲပြုပ် ငံပြာရည် ဆားနှင့်အရသာမှုန့်တို့ ထည့်မွှေပြီး ကြော်ပေးပါ
• ချင်းနံ့လေး သင်းလာတာနဲ့ ပဲနှပ်အိအိလေးကို စားသုံးရန် ပြင်ပေးနိူင်ပါပြီ။။