မနေ့က ဈေးသွားရင်းက ဟင်းချိုချက်ဖို့ ကြက်တောင်ပံလေးတွေ ဝယ်လာခဲ့ပြီး ကြက်တောင်ပံပေါင်း ဟင်းချိုလေး လုပ်စားဖြစ်ပါတယ်။
ဒါကြောင့်မို့လို့ မနေ့က လုပ်စားဖြစ်တဲ့ ကြက်တောင်ပံပေါင်း ဟင်းချိုရည် လုပ်နည်းလေးကို ဒီနေ့မှာ မျှဝေပေးလိုက် ပါတယ်ရှင်။
ပါဝင်ပစ္စည်းများ
- ကြက်တောင်ပံ -500 g
- ဆား - လက်ဖက်ရည်ဇွန်း တစ်ဝက်
- အရသာမှုန့် - လက်ဖက်ရည်ဇွန်း တစ်ဝက်သာသာ
- ချင်း - ခပ်ပါးပါး ငါးပြား
- ကြက်သွန်ဖြူ - အမွှာကြီးကြီး ငါးမွှာ
- တရုတ်နံနံပင် - အနည်းငယ်
- ငရုတ်ကောင်းမှုန့် - အနည်းငယ်
- ကြွေပန်းကန်လုံး - အနေတော် တစ်လုံး ( ဝက်ရိုးထည့်ရန်)
- ပေါင်းအိုး - တစ်လုံး
ပြင်ဆင်ပြုလုပ်ပုံ
- ကြက်တောင်ပံများကို ရေစင်အောင်ဆေးပြီး ပန်ကန်လုံး တစ်လုံးထဲမှာ ထည့်ထားပါ
- ကြက်သွန်ဖြူကို အခွံခွာပြီး ရေဆေးထားပါ
- ချင်းကို အခွံခွာပြီး ရေဆေးကာ ခပ်ပါးပါး လှီးထားပါ
- တရုတ်နံနံကို ရေဆေးပြီး မထူမပါးလေးတွေ လှီးထားပါ
- အားလုံးအဆင်သင့် ဖြစ်တာနဲ့ ကြက်တောင်ပံပေါင်းဖို့ ပြင်ဆင်ပေးပါ
ကြက်တောင်ပံ ပေါင်းရန်
- ပန်ကန်ထဲမှာ ထည့်ထားသော ကြက်တောင်ပံများ ဆား အရသာမှုန့် ချင်းနှင့် ကြက်သွန်ဖြူတို့ထည့်ပြီး အရသာဝင်အောင် နယ်ပေးပါ
- အရသာ နယ်ပြီးတာနဲ့ ရေအနည်းငယ် ထည့်ပေးပါ
- ကြက်တောင်ပံ ပန်းကန်ထည့်မည့် ပေါင်းအိုးထဲကို ပေါင်းခံခုံလေး ထိတဲ့အထိ ရေထည့်ပေးပါ
- ထိုပေါင်းခံ ခုံလေးပေါ်မှာ ပေါင်းခံမည့် ဇကာလေးကို တင်ပေးပါ
- ထို ဇကာလေးလေး အပေါ်မှာ အရသာ နယ်ထားသော ကြက်တောင်ပံ ပန်းကန်ကို တင်ပေးပါ
- ပြီးတာနဲ့ အိုးအဖုံးကို သေသေချာချာ ပိတ်ပေးပြီး steam ခလုတ်ကိုနှိပ်ကာ မိနစ်လေးဆယ် နာရီခလုတ်ကို ချိန်ပေးကာ ပေါင်းပေးပါ
- ကြက်တောင်ပံ ပေါင်းတဲ့အချိန် ပြည့်တာနဲ့ အိုးထဲမှ လေကုန်အောင် ထုတ်ပေးပါ
- ပြီးမှ အိုးအဖုံးကို ဖွင့်ပေးကာ ကြက်တောင်ပံ ပန်းကန်ထဲမှ ကြက်ပြုပ်ရည်ကို မိမိနှစ်သက်သလောက် ရေနွေးပူပူလေး ထပ်ရောက အရသာ မြည်းပေးပါ
- မိမိစိတ်ကြိုက် အရသာ ရလာပြီ ဆိုတာနဲ့ ကြက်တောင်ပံပေါင်း ပန်ကန်ကို အပြင်သို့ ထုတ်ပေးပါ
- ပြီးတာနဲ့ တရုတ်နံနံနှင့် ငရုတ်ကောင်းမှုန့် ထည့်ပေးကာ သုံဆောင်နိူင်ပါပြီ။
No comments:
Post a Comment