ဒီနေ့တော့ ခရမ်းကြွတ်သီးလေးတွေ ၀ယ်လာပြီး ခပ်စပ်စပ် ငပိချက်လေး ချက်လိုက်ပါတယ် ဒါကြောင့်မို့လို့ ထမင်းပူပူနဲ့ နယ်ဖတ်ပြီး စားရတာ လိုက်ဖက်လွန်းတဲ့ ခရမ်းကြွတ်သီး ငပိချက် ချက်နည်းလေးကို မျှဝေလိုက်ပါတယ်ရှင်။
ပါ၀င်ပစ္စည်းများ
- ခရမ်းကြွတ်သီး - ဆယ့်နှစ်လုံး
- ကြက်သွန်နီ - ဥကြီးကြီး တစ်ဥ
- ပုဇွန်ခြောက် - လက်ဖက်ရည်ပန်းကန်လုံး တစ်လုံးစာ
- ကြက်သွန်ဖြူ - အမွှာကြီးကြီး သုံးမွှာ
- ဆား - လက်ဖက်ရည်ဇွန်း တစ်၀က်သာသာ
- အရသာမှုန့် - လက်ဖက်ရည်ဇွန်း တစ်၀က်
- ငရုတ်သီး အစိမ်းမှုန့် - လက်ဖက်ရည်ဇွန်း တစ်ဇွန်းမောက်မောက်
- ငရုတ်သီးစိမ်း - မိမိနှစ်သက်သလောက်
- ဆီ - ထမင်းစားဇွန်း လေးဇွန်း
- ငါးငံပြာရည် - ထမင်းစားဇွန်း တစ်ဇွန်းခွဲ
- မျှင်ငပိ - ထမင်းစားဇွန်း တစ်ဇွန်း
ပြင်ဆင်ပုံ
- ခရမ်းသီးကို အညှာကို လှီးပေးပြီး လေးစိတ်လှီးပေးကာ ရေနာရီ၀က်လောက် စိမ်ထားပါ
- အညိုရောင်အရည်များ ထွက်သွားပါက ရေစင်အောင်ဆေးပြီး ရေစစ်ထားပေးပါ
- ကြက်သွန်နီနှင့်ကြက်သွန်ဖြူတို့ကို အခွံခွာပြီး ရေဆေးကာ ငရုတ်သီးစိမ်းနှင့် ငရုတ်သီး အစိမ်းမှုန့်တို့ကို ရောပြီးထောင်းထားပါ
- ပုဇွန်ခြောက်ကို ရေဆေးပြီး ရေနာရီဝက်လောက် စိမ်ပေးကာ ရေစစ်ပြီး ညက်နေအောင် ထောင်းထားပါ
- အိုးတစ်လုံးထဲမှာ ခရမ်းကြွတ်သီးများ ဆီ မျှင်ငပိ ကြက်သွန်ဖြူ ကြက်သွန်နီ ငရုတ်သီးထောင်း ဆား အရသာမှုန့် ပုဇွန်ခြောက်ထောင်းတို့ကို ရောနယ်ပေးထားပါ
- ပြီးတာနဲ့ ရေမမြုပ် တမြုပ်ထည့်ကာ အဖုံးအုပ်ပြီး တည်ပေးကာ ဟင်းအိုးမကပ်စေရန် မမွှေဘဲ လှုပ်လှုပ်ပေးပါ
- ရေ မခမ်းခင် အိုးကို အသာလှုပ်ပေးပြီး ဆီကျန်ရေကျန် အနေအထားလေး ရလာအောင် တည်ပေးပါ
- ခရမ်းသီးများ နူးအိလာပါက အရသာမြည်းပြီး မိမိစိတ်ကြိုက် အရသာ ရလာအောင် လိုသလို ပြင်ပေးကာ အိအိမွှေးမွှေး ခရမ်းကြွတ်သီး ငပိချက် စပ်စပ်လေးကို သုံးဆောင်နိုင်ပါပြီ။
No comments:
Post a Comment