ဆန်ပြုပ်လေး သောက်ချင်လာတော့ ဆန်ကိုအရင်ဆုံး လှော်ပြီး ဆန်ပြုပ်ဖို့ ပြင်ရပြန်ပါတယ် တခါတလေလဲ ဆန်အစိမ်းအတိုင်း ပြုပ်ရတာ က လက်မဝင်ပေမဲ့ ဆန်လှော်လေးနဲ့ ပြုပ်ချင်ရင်တော့ နည်းနည်းလေး လက်ဝင်ခဲ့ပါတယ်။
ဒါပေမဲ့လည်း ဆန်လှော်ဆန်ပြုပ်လေးတွေ မကြာမကြာ ပြုပ်တတ်လို့ ဒီတခါတော့ ဘဲသားလေးလဲ အဆင်သင့် ရှိနေတာနဲ့ ဘဲသားဆန်ပြုပ် ပြုပ်နည်းလေး မျှဝေလိုက်ပါတယ်။
ပါ၀င်ပစ္စည်းများ
- ဆန် - ထမင်းပေါင်းအိုး ဆန်ချင်ဗူး တဗူး
- ရေ - လိုသလောက်
- ဆား - လက်ဖက်ရည်ဇွန်း နှစ်ဇွန်းခွဲ
- ဟင်းချိုမှုန့် - လက်ဖက်ရည်ဇွန်း တဇွန်းခွဲ
- ကြက်သွန်မိတ် - လိုသလောက်
- ဘဲရင်ပုံသား - 150 g
- ကြက်သွန်နီ - အနေတော် ၃လုံး
- ကြက်သွန်ဖြူ - အမွှာကြီးကြီး၅မွှာ
- နနွင်းမှုန့်- လက်ဖက်ရည်ဇွန်း လေးပုံတပုံ
- ငရုတ်ကောင်းမှုန့် - လက်ဖက်ရည်ဇွန်း တ၀က်သာသာ
- ကြက်သွန်နီကြော် - လိုသလောက်
- ဆီ - ထမင်းစားဇွန်း ၄ဇွန်း
ပြင်ဆင်ပုံ
- ဆန်ကို ရေမဆေးဘဲ ရွှေအိုရောင်သန်းလာတဲ့ထိ မီးအနေတော်နှင့်လှော်ပေးပါ
- ဆန်လှော်နေစဉ် အဆက်မပြတ် မွှေပေးပါ
- ရွှေအိုရောင် သန်းလာတာနဲ့ ပြုပ်မည့်အိုးထဲသို့ ပြောင်းထည့်ပါ
- ဆန်လှော်ရဲ့ အထက် ရေလက်ငါးလုံးလောက် မြုပ်အောင်ထည့်ပြီး ပြုပ်ပေးပါ
- အောက်ခြေ မကပ်စေရန် မကြာမကြာ မွှေပေးပါ
- ရေခမ်းကာနီး ဆန်စေ့လေးများ ကျေလာတာနဲ့ ရေအပျစ်အကျဲကြည့်ပြီး ထည့်ကာ မီးအေးအေးနှင့် တည်ထားပေးပါ
- ဆန်သားကျေလာလေ ဆန်လှော်ဆန်ပြုပ်က ကောင်းလေမို့ မီးအေးအေးနှင့် တည်ထားပြီး မကြာမကြာမွှေပေးပါ
- ကြက်သွန်မိတ်ကို အနေတော် လှီးထားပါ
- ကြက်သွန်နီကို အခွံခွာပြီး အလုံးလိုက်ရေဆေးကာ အဖတ်လေးများရအောင် လှီးထားပါ
- ကြက်သွန်ဖြူကို ဓါးပြားရိုက်ထားပါ
- ငရုတ်ကောင်းကို ညက်နေအောင် ထောင်းထားပါ
- ဘဲသားကို အနေတော်လှီးထားပြီး ဆားလက်ဖက်ရည်ဇွန်း တ၀က် ဟင်းချိုမှုန့် လက်ဖက်ရည်ဇွန်း တ၀က်တို့နှင့် နယ်ထားပါ
- ဆီကိုအပူပေးပြီး နနွင်းမှုန့်ထည့်ပါ
- ဆီအငွေ့တက်လာတာနဲ့ ကြက်သွန်နီနှင့် ကြက်သွန်ဖြူ တ၀က်ဆီထည့်ကြော်ပါ
- ကြက်သွန်များ နွမ်းတာနဲ့အရသာနယ်ထားသော ဘဲသားကို ထည့်ပြီး ၄မိနစ်လောက် ဆီသတ်ပါ
- ဘဲသား အသားမာလာတာနဲ့ ဆန်ပြုပ်အိုးထဲ ပြောင်းထဲ့ပါ
- ဘဲသားထည့်ပြီးတာနဲ့ ဆား ဟင်းချိုမှုန့် ကြက်သွန်နီတို့ထည့်ကာ ကြက်သွန်နီနွမ်းတဲ့ထိ မီးအနေတော်နှင့် ပြုပ်ပေးပါ
- ကြက်သွန်နီ နူးလာတာနဲ့ ရေအပျစ်အကျဲ လိုသလိုပြင်ရန် ရေနွေးကို ထည့်ပေးပါ
- ပြီးတာနဲ့ ငရုတ်ကောင်းမှုန့် ကြက်သွန်ဖြူတို့ထည့်ပြီး ရေဆူအောင်တည်ကာ အရသာမြည်း၍ လိုသလိုပြင်ကာ ဘဲသား ဆန်လှော်ဆန်ပြုပ်ကို ကြက်သွန်နီကြော်နှင့် ကြက်သွန်မိတ်ဖြူးပြီး သောက်နိူင်ပါပြီ။
No comments:
Post a Comment