ကြက်သားဟင်းနဲ့ သုပ်ထားတဲ့ မုန့်ဖတ်သုပ်ရဲ့ အရသာက ရှယ်ကောင်းတာမို့လို့ မာမာသုပ်စားတဲ့ နည်းလေးရယ် ကြက်သားဟင်း ချက်တဲ့ နည်းလေးရယ်ကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ကြက်ရင်ပုံသား - 500 g
- ကြက်သွန်ဖြူ - အမွှာကြီးကြီး ငါးမွှာ
- ကြက်သွန်နီ - အနေတော် ကိုးလုံး
- ငရုတ်သီး အရောင်တင်မှုန့် - လက်ဖက်ရည်ဇွန်း သုံးဇွန်း
- နနွင်းမှုန့် - လက်ဖက်ရည်ဇွန်း တစ်ဝက် (ကြက်သားပြုပ်ရန်)
- ဆား - လက်ဖက်ရည်ဇွန်း တစ်ဝက် (ကြက်သားပြုပ်ရန်)
- ငါးငံပြာရည် - ထမင်းစားဇွန်း တစ်ဇွန်းခွဲ (ကြက်သားပြုပ်ရန်)
- ဆား - လက်ဖက်ရည်ဇွန်း တစ်ဇွန်း (ကြက်သားဆီသတ်ရန်)
- ငါးငံပြာရည် - ထမင်းစားဇွန်း သုံးဇွန်း (ကြက်သားဆီသတ်ရန်)
- အရသာမှုန့် - လက်ဖက်ရည်ဇွန်း တစ်ဇွန်း (ကြက်သားဆီသတ်ရန်)
- ဆီ - ထမင်းပေါင်းအိုး ဆန်ချင်ဗူး လေးဗူးခန့် (ကြက်သားဆီသတ်ရန်)
- အုန်းနို့ - ထမင်းပေါင်းအိုး ဆန်ချင်ဗူး သုံးဗူး (ကြက်သားဆီသတ်ရန်)
ပြင်ဆင်ပုံ
- ကြက်သားကို ရေစင်အောင်ဆေးပြီး ဆား တစ်ဇွန်း ငါးငံပြာရည် နနွင်းမှုန့်နှင့် အရသာမှုန့်တို့ ထည့်ပြီး အရသာဝင်အောင် နယ်ပေးပါ
- ပြီးတာနဲ့ ဇောက်နက်သော အိုးထဲမှာ ကြက်သားကို ထည့်ပေးပြီး ရေမြုပ်အောင်ထည့်ကာ ရေခမ်းတဲ့အထိ တည်ပေးပါ
- ကြက်သားပြုပ်ထားတာ ရေခမ်းတာနဲ့ အအေးခံပြီး ပုံပါအတိုင်း ရှည်ရှည်အမြှောင်းလေးတွေရအောင် အသားနွှင်ပေးထားပါ
ကြက်သားဆီသတ်ရန်
- ကြက်သွန်နီကို အခွံခွာပြီး အလုံးလိုက် ရေဆေးကာ ခပ်နုတ်နုတ်လေးတွေ လှီးထားပေးပါ
- ကြက်သွန်ဖြူကို အခွံခွာပြီး ရေဆေးကာ ခပ်နုတ်နုတ် စင်းထားပေးပါ
- ဒယ်အိုးထဲမှာ ဆီထည့်ပြီး နနွင်းမှုန့် လက်ဖက်ရည်ဇွန်း တစ်ဝက်ထည့်ပြီး အပူပေးပါ
- ဆီပူလာတာနဲ့ ကြက်သွန်နီ ကြက်သွန်ဖြူနှင့် ငရုတ်သီး အရောင်တင်မှုန့်တို့ကိုထည့်ပြီး ဆီသတ်ပေးပါ
- ဆီသတ်နံ့ မွှေးလာတာနဲ့ အသားနွှင်ထားသော ကြက်သားကို ထည့်မွှေပေးပါ
- ကြက်သားထည့်ပြီးတာနဲ့ ဆား လက်ဖက်ရည်ဇွန်း တစ်ဝက် ငါးငံပြာရည် ထမင်းစားဇွန်း နှစ်ဇွန်းနှင့် အရသာမှုန့် လက်ဖက်ရည်ဇွန်း တစ်ဇွန်းသာသာတို့ကို ထည့်မွှေပေးကာ ဆက်ပြီးချက်ပေးပါ
- အရသာ သမလောက်တာနဲ့ အုန်းနို့နှင့် ရေမြုပ်အောင်ထည့်ပြီး ကြက်သွန်များ နွမ်းအိသွားအောင် ရေခမ်းပြီး ဆီပြန်တဲ့အထိ တည်ပေးပါ
- ချက်ထားသော ကြက်သားများ ဆီပြန်လာတာနဲ့ မီးပိတ်ပေးထားကာ အုန်းနို့နံ့လေး မွှေးနေတဲ့ ကြက်သားဟင်းကို အသုပ် သုပ်ရန် ပြင်ဆင်နိူင်ပါပြီ။
မုန့်ဖတ်အသုပ်ပွဲပြင်ရန်
- မုန့်ဖတ်များကို အဆင်သင့် ပြင်ထားပါ
- ကြက်သား ချက်ပြီးသားကို အဆင်သင့် ပြင်ထားပါ
- သံပုရာသီးကို ရေဆေးပြီး လှီးထားပါ
- နံနံပင်ကို ရေဆေးပြီး အနေတော်လေးတွေ လှီးပေးထားပါ (သို့မဟုတ်)
- နံနံပင် မရှိပါက ကြက်သွန်မိတ်ကို ရေဆေးပြီး မထူမပါးလေးတွေ လှီးပေးထားပါ
- ကြက်သွန်နီကို အခွံခွာပြီး အလုံးလိုက်ရေဆေးကာ ခပ်ပါးပါး လှီးထားပေးပါ
- အရသာမှုန့် ပဲအကျက်မှုန့်နှင့် ငရုတ်သီး အလှော်မှုန့်တို့ကို ပြင်ထားပါ
- အားလုံးအဆင်သင့် ဖြစ်တာနဲ့ ဇလုံတစ်လုံးထဲမှာ မုန့်ဖတ် တစ်ပွဲစာ အရသာမှုန့် ကြက်သားဟင်း ပဲအကျက်မှုန့် ငရုတ်သီးအလှော်မှုန့် နံနံပင် ကြက်သွန်နီ ငါးငံပြာရည် သံပုရာရည်တို့ကို သင့်သလို ထည့်ပေးပြီး နယ်ပေးပါ
- အရသာ သမသွားတာနဲ့ အရသာမြည်းကာ လိုသလို ပြင်ပေးပြီး အသုပ်ပွဲကို ထည့်ပေးပြီး စားသုံးနိူင်ပါပြီ။
No comments:
Post a Comment