မာမာကတော့ ချဉ်ငံစပ် အသုပ်လေး စားချင်တာနဲ့ အသုပ်လေးဘဲ သုပ်စားလိုက်ပါတယ် ဒါကြောင့်မို့လို့ လွယ်ကူမြန်ဆန် အသုပ်တစ်မျိုး သုပ်စားချင်ရင်တော့ မာမာ ပြင်ဆင်ပြီး သုပ်စားနည်းကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ခေါက်ဆွဲခြောက် - 50 g
- ပဲအကျက်မှုန့် - လိုသလောက်
- ငရုတ်သီး အလှော်မှုန့် - လိုသလောက်
- နနွင်းမှုန့် - လက်ဖက်ရည်ဇွန်ုး သုံးပုံတစ်ပုံ (ဆီချက်ချက်ရန်)
- ဆီ - လိုသလောက်
- အရသာမှုန့် - လိုသလောက်
- ကြက်သွန်ဖြူ ဆီချက် - ထမင်းစားဇွန်း ဇွန်းနှစ်ဆယ်ခန့်
- မန်ကျည်းသီးအမှည့် - ထမင်းစားဇွန်း နှစ်ဇွန်း
- ငါးငံပြာရည် - လိုသလောက်
- နံနံပင် - လိုသလောက်
- ငရုတ်သီးစိမ်း - စားနိူင်သလောက်
- ကြက်သွန်ဖြူ - (၁၃မွှာ ဆီချက်အတွက် ၅မွှာ ဟင်းခါးအတွက် ၃မွှာ အသုပ်နှင့်စားရန် ၅မွှာခန့်)
- ပုဇွန်ခြောက်မှုန့် - ထမင်းစားဇွန်း နှစ်ဇွန်း
- ငရုတ်ကောင်းစေ့ - ငါးစေ့ခန့်
- ဂေါ်ဖီ - တစ်စိတ်ခန့် (ဟင်းခါးချက်ရန်နှင့် အသုပ်ထဲထည့်ရန်)
အသုပ်ပွဲပြင်ရန် လိုအပ်သော ပစ္စည်းများ
- ဆီချက်
- ငါးငံပြာရည်
- ပုဇွန်ခြောက်မှုန့်
- ပဲအကျက်မှုန့်
- ငရုတ်သီး အလှော်မှုန့်
- ကြက်သားမှုန့်
- မန်ကျည်းသီးမှည့်
- ဂေါ်ဖီ (ရေဆေးပြီး ခပ်ပါးပါး လှီးထားပါ)
- နံနံပင် (ရေဆေးပြီး ခပ်ပါးပါး လှီးထားပါ)
ခေါက်ဆွဲပြုပ်ရန်
- ရေကို ပွက်ပွက်ဆူအောင် တည်ပေးပါ
- ရေဆူလာတာနဲ့ ခေါက်ဆွဲခြောက်ကို ထည့်ပြီးပြုပ်ပေးပါ
- ခေါက်ဆွဲ နူး မနူးကို ဆယ်ပြီး လက်နှင့်စမ်းကြည့်ပါ
- ခေါက်ဆွဲဖတ် အပျော့အမာကို မိမိစိတ်ကြိုက် ရတာနဲ့ ဇကာထဲမှာ ရေများသွန်ပြီး ခေါက်ဆွဲဖတ်များကို ရေနှင့်ဆေးပြီး ရေစစ်ထားပါ။
ဆီချက် ချက်ရန်
- ကြက်သွန်ဖြူ ငါးမွှာကို အခွံခွာပြီး ရေဆေးကာ ခပ်ပါးပါး လှီးထားပါ
- ဒယ်အိုးထဲမှာ ဆီထည့်ပြီး ဆီကိုအပူပေးပါ ဆီပူလာတာနဲ့ နနွင်းမှုန့် ထည့်ပေးပါ
- ပြီးတာနဲ့ ကြက်သွန်ဖြူကို ထည့်ကြော်ပေးပါ
- ကြက်သွန်ဖြူများ အဝါရောင် သန်းလာတာနဲ့ ဆယ်ပြီးဆီစစ်ကာ အအေးခံထားပါ
- ဆီချက်ကိုလဲ အအေးခံထားပါ ဆီအေးသွားမှ ကြက်သွန်ကြော်များနှင့် ရောပေးထားပါ
ဟင်းခါးချက်ရန်
- ရေ တရုတ်ဟင်းရည်သောက် ပန်းကန် ၂လုံးစာထဲ ပုဇွန်ခြောက် ၇ကောင်လောက်ကို ထောင်းပြီးထည့်ပါ
- ဆား လက်ဖက်ရည်ဇွန်း တ၀က် ကြက်သားမှုန့် လက်ဖက်ရည်ဇွန်း တဇွန်းထည့်ပြီး ရေဆူအောင်တည်ပါ
- ရေဆူလာပါက ငရုတ်ကောင်း ၅စေ့လောက်နှင့် ကြက်သွန်ဖြူ ၂မွှာလောက်ကို မညက်တစ်ညက်ထောင်းပြီး ဟင်းရည်အိုးထဲ ထည့်ကာ ဂေါ်ဖီ ခပ်ပါးပါးလှီးပြီး ထည့်ပြီး ရေဆူအောင် တည်ပြီးအရသာမြည်းပါ
အသုပ် တစ်ပွဲစာပြင်ရန်
- အသုပ်သုပ်ရန် ပါ၀င်ပစ္စည်းများကို ပြင်ထားပါ
- မန်ကျည်းသီးမှည့်ကို ရေတစ်ထပ်ဆေးပြီး ရေနွေးပူပူ ထမင်းပေါင်းအိုး ဆန်ချင်ဗူး နှစ်ဗူးစာလောက်နဲ့ စိမ်ထားပါ
- ဇလုံတစ်လုံးထဲမှာ ခေါက်ဆွဲ တစ်ပွဲစာ ထည့်ပေးပါ
- ဆီချက် ထမင်းစားဇွန်း ၂ဇွန်း ငါးငံပြာရည် ထမင်းစားဇွန်း တဇွန်း ပဲအကျက်မှုန့် ထမင်းစားဇွန်း တစ်ဇွန်း ငရုတ်သီး အလှော်မှုန့် လက်ဖက်ရည်ဇွန်း တစ်ဇွန်း ကြက်သားမှုန့် လက်ဖက်ရည်ဇွန်း တစ်၀က်မရှိတရှိ မန်ကျည်းရည် ထမင်းစားဇွန်း တစ်၀က်သာသာ ဂေါ်ဖီ အနည်းငယ် နံနံပင်တို့ထည့်ကာ ခပ်ဖွဖွနယ်ပေးပါ
- အသုပ်အရသာ နယ်ပြီးတာနဲ့ ချဉ်ငံစပ် အရသာကို လိုသလို ပြင်ပေးပြီး စားပွဲပြင်ပေးပါ
- ချဉ်ငံစပ် ခေါက်ဆွဲသုပ် အသုပ်ပွဲ ပြင်ဆင်ပြီးပါက ဆလတ်ရွက် ငရုတ်သီးစိမ်း ကြက်သွန်ဖြူ ဂေါ်ဖီဟင်းခါးတို့နဲ့ တွဲဖက်ကာ သုံးဆောင်နိုင်ပါပြီ။
No comments:
Post a Comment