ဒီနေ့တော့ ကြက်သားစင်းကော အချိုကြော်လေး ကြော်ပါတယ် ထမင်းပူပူလေးနဲ့ လိုက်ဖက်လွန်းတဲ့အတွက် မာမာပြင်ဆင်ပြီး ကြော်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- ကြက်ရင်ပုံသား - 200 g
- ကြက်သွန်နီ - အနေတော် တစ်ဥ
- ကြက်သွန်ဖြူ - အမွှာကြီးကြီး သုံးမွှာ
- မုံလာဥနီ - အနေတော် တစ်ဥ
- ဘေဘီမုန့်ညှင်း - တစ်ပင်
- တရုတ်နံနံ - နှစ်ခက်ခန့်
- ကော်မှုန့် - ထမင်းစားဇွန်း တစ်ဇွန်း
- ဆား - လက်ဖက်ရည်ဇွန်း တစ်ဇွန်းသာသာ
- သကြား - ထမင်းစားဇွန်း နှစ်ဇွန်း
- ပဲငံပြာရည်အနောက် - ထမင်းစားဇွန်း တစ်ဇွန်း
- ခရုဆီ - ထမင်းစားဇွန်း တစ်ဇွန်း
- ဆီ - ထမင်းစားဇွန်း ခွန်နှစ်ဇွန်း
ပြင်ဆင်ပုံ
- ကြက်သားကို ရေစင်အောင်ဆေးပြီး ခပ်နုတ်နုတ်လေးတွေ စင်းပေးကာ ကော်မှုန့် ဆားအနည်းငယ် သကြား ထမင်းစားဇွန်း တစ်ဇွန်းတို့နှင့် အရသာ နယ်ထားပေးပါ
- ကြက်သွန်နီကိုအခွံခွာပြီး ရေဆေးကာ အကွင်းလိုက် လှီးထားပါ
- ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
- မုံလာဥနီကို အခွံခွာပြီး ရေဆေးကာ ခပ်သေးသေး အတုံးလေးတွေ လှီးထားပါ
- ဘေဘီမုန့်ညှင်းကို အပင်အရင်းပိုင်းလေးတွေဘဲယူပြီး ရေဆေးထားပါ
- တရုတ်နံနံကို ရေဆေးပြီး အနေတော်အရွယ် ပိုင်းဖြတ်ထားပါ
- ဒယ်အိုးထဲမှာ ဆီထည့်ပြီး အပူပေးပါ ဆီပူလာလျှင် သကြားကို အရင်ဆုံး ထည့်ကြော်ပေးပါ
- သကြားများ အရည်ပျော်ပြီး ညိုရောင်သန်းလာပါက ကြက်သွန်ဖြူကို ထည့်ကြော်ပေးပါ
- ကြက်သွန်ဖြူနံ့လေး သင်းလာပါက စင်းပြီးအရသာ နယ်ထားသော ကြက်သားကို ထ
ည့်ကြော်ပါ - ကြက်သားအသားများ မာလာပါက ရေအနည်းငယ်ထည့်ပြီး အဖုံးအုပ်ပေးကာ တည်ပေးပါ
- ရေခမ်းပြီး ဆီသံကြားလာပါက အိုးအဖုံးဖွင့်ပေးပြီး ဘေဘီမုန့်ညှင်း အရင်းပိုင်းနှင့် မုံလာဥနီကို ထည့်ကြော်ပေးကာ သမအောင် မွှေပေးပါ
- အသီးအရွက်များ အနည်းငယ် နွမ်းသွားပါက ခရုဆီ ဆားနှင့် ပဲငံပြာရည်အနောက်ရည်တို့ကိုထည့်ပြီး အရသာ သမသွားအောင် မွှေပေးပါ
- အရသာမြည်းပြီး မိမိစိတ်ကြိုက် အရသာ ရလာအောင် လိုသလိုပြင်ပေးကာ တရုတ်နံနံထည့်ပြီး မွှေပေးပါ
- အားလုံးသမသွားပြီ ဆိုတာနဲ့ အရမ်းစားလို့ ကောင်းလွန်းတဲ့ ကြက်သားစင်းကောကြော်လေး ရပါပြီ။
No comments:
Post a Comment