ဈေးကအပြန် ပုဇွန်တွေ ဝယ်လာပြီး ပုဇွန်ခေါင်းတွေ အမြှီးတွေ အခွံတွေခွာပြီး ပြစ်လိုက်ရမှာ သမျှောနေတော့ ကြိတ်စက်ထဲ ထည့်ကြိတ်ကာ ပုဇွန်ဦးနှောက်လေး ချက်ဖြစ်ပါတယ် ဒီချက်နည်းလေးက မာမာတို့အမေ အမြဲချက်တတ်တဲ့ နည်းလေးပါ။
ပုဇွန်ဦးနှောက် ချက်ပြီးတာနဲ့ ထမင်းပူပူလေးနဲ့ နယ်ဖတ်ကျွေးတတ်တဲ့ အမေ့လက်ရာလေးတွေကိုလဲ ဒီနေ့အထိ လွမ်းနေမိတုန်းပါဘဲ ဒါကြောင့်မို့လို့ ဒီနေ့တော့ အမေ့အတွက် အလွမ်းပြေ အမေ့ချက်နည်းအတိုင်း ချက်ထားကာ မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ပုဇွန်ခေါင်နှင့် ပုဇွန်အခွံများ - 1500 g
- ဆား - လက်ဖက်ရည်ဇွှန်း နှစ်ဇွန်း
- နနွင်းမှုန့် - လက်ဖက်ရည်ဇွန်း တစ်ဝက်သာသာ
- ရေ - သုံးလီတာ
ပြင်ဆင်ပုံ
- ပုဇွန်အသား ထွင်ရာမှ ထွက်လာသော ပုဇွန်အခွံများကို ဇလုံကျယ်ကျယ်ထဲမှာ ထည့်ပေးပါ
- ပြီးတာနဲ့ ရေများများထည့်ပြီး အခွံမှာ ကပ်နေသော သဲများကုန်သွားအောင် ၇ခါလောက် ဆေးပေးပါ
- ပုဇွန်ခေါင်းများကိုလဲ အခွံခွာကာ အထဲမွ အစာအိတ်ကို ဒုတ်ချွန်လေးနဲ့ ထိုးထုတ်ကာ ဖယ်ပေးပါ
- ခေါင်းခွံထဲမှာ ရှိနေတဲ့ သွားများကိုလဲ ဖယ်ပေးပါ
- အားလုံးအဆင်သင့် ဖြစ်တာနဲ့ ပုဇွန်အဆီနှင့် အသားအနည်းငယ်ပါသော ပုဇွန်ခေါင်းများကို အရင်ဆုံး အသားကြိတ်တဲ့ ဘလင်ဒါထဲ ထည့်ပေးကာ အရင်ဆုံး မညက်တစ်ညက် ကြိတ်ပေးပါ
- ကြိတ်ထားသော ပုဇွန်ကြိတ်ဖတ်များကို ရေအနည်းငယ်နှင့် အရင်ဆုံး ကျင်ပေးပါ
- အရည်ကျင်ထားသော ပုဇွန်အဖတ်များကို ဇကာစိတ်စိတ်လေးခံကာ လက်အားသန်သန်နှင့် အရည်များကို ညှစ်ချပေးပါ
- အရည်ညှစ်ချထားသော ပုဇွန်အဖတ်များကို နောက်တစ်ခေါက် ညက်နေအောင် ထပ်ပြီး ကြိတ်ပေးပါ
- ဒုတိယ အကြိမ်ကြိတ်ထားသော ပုဇွန်အဖတ်များကို အရည်အနည်းငယ်နှင့် ပထမ နည်းအတိုင်း အရည်ကျင်ကာ အရည်ညှစ်ထားသော အဖတ်များကို ပြစ်လိုက်ပါ
- ဘလင်ဒါနဲ့ ကြိတ်တာဖြစ်တဲ့အတွက် နှစ်ခါလောက်ဘဲ ကြိတ်ပြီး အရည်ယူလိုက်ရင် ရပါပြီ
- ပုဇွန်အခွံများကိုလဲ အထက်ပါ နည်းအတိုင်း ကြိတ်ပေးပြီး အရည်ငင်ပေးပါ
- ပုဇွန်အခွံ ကြိတ်သားများကို အရည်ကျင်ရာမှာ ရေအများကြီး မထည့်ဘဲ ကျင်ပေးပါ
- ပုဇွန်အခွံ အရည်ကျင်ရာမှာ ရေအများကြီးထည့်ပြီး အရည်ကျင်ပါက ပုဇွန်ဦးဏှောက် ချက်ရာမှာ အချိန်ကြာတတ်ပါတယ်
- အားလုံးအဆင်သင့် ဖြစ်ပါက အရည်ကျင်ထားသော ပုဇွန်ခေါင်းနှင့် ပုဇွန်အခွံ ကြိတ်ထားသော အရည်များကို အိုးတစ်လုံးထဲထည့်ကာ နနွင်းမှုန့်နှင့် ဆားထည့်ပြီး ကျိုပေးပါ
- ပုဇွန်အရည် ကျိုနေစဉ် အိုးမကပ်စေရန်နှင့် ဝေမကျစေရန် မကြာမကြာ မွှေပေးပါ
- ပုဇွန်အခွံထောင်း အရည်များ ပြစ်လာပြီး အဖတ်လေးတွေ တက်လာပြီ ဆိုတာနဲ့ မီးကို အနေတော်လောက် လျှော့ပေးပါ
- ပုဇွန်အနှစ်များ ဥလာအောင် မီးမျှင်းမျှင်းနဲ့ ဂရုစိုက်ပြီး တည်ထားပေးပါ
- ပုဇွန်အနှစ်များ ပြစ်လာပြီး အဖတ်လေးများ ဥလာပြီ ဆိုတာနဲ့ ပုဇွန်ဦးနှောက် မွှေးမွှေးလေးကို ရပါပြီ
- ပြီးတာနဲ့ မီးပိတ်ပေးပြီး အေအးခံကာ လိုသေလာက်ကိုဘဲ သုံးပေးပြီး ကျန်တာကို တာရှည်အသုံးခံအောင် ဗူးထဲထည့်ပြီး ရေခဲသေတ္တာ ခဲတဲ့အကန့်ထဲမှာ ထည့်ပေးထားပါ
- ထမင်းပူပူလေးနဲ့ နယ်ဖတ်ပြီး စားလို့ရသလို ပုဇွန်ဦးနှောက် အနှစ်လေးတွေနဲ့ ဟင်းချို ဟင်းခါးတို့လဲ ချက်နိူင်ပါသေးတယ်။
No comments:
Post a Comment