Monday, 21 December 2015

တမာချဉ် တို့စရာ


တမာချဉ်လို့ အသံကြားလိုက်တာနဲ့ မာမာတို့ငယ်ဘ၀လေးကို အရမ်းလွမ်းမိပါတယ် စည်းကမ်းကြီးတဲ့ အမေ့အမ အကြီးဆုံး အပျိုကြီး ကြီးကြီးရဲ့လက်ပေါ်မှာ ကြီးခဲ့တာမို့ အိမ်မှုကိစ္စကို အသက်အရွယ်အလိုက် နိူင်သလောက် လုပ်ကြရပါတယ်။

ပိုဆိုးတာက မိန်းကလေးဆို အိမ်မှုကိစ္စကို ပိုပြီးသင်သလို သင်တဲ့အတိုင်း လုပ်လဲလုပ်ရပါတယ် ထမင်းချက် ဟင်းချက်အပြင် ၆ဧကကျော်ကျယ်တဲ့ ခြံဝင်းထဲက ထွက်သမျှ အသီးအနှံကို ရာသီချိန်တိုင်း အသုံးဝင် တာရှည်ခံအောင် ပြင်ဆင်နည်းများကို သင်ပေးတတ်တာမို့ ဒီနေ့ထိ ကြီးကြီးသင်ပေးတာတွေ အားလုံးက မာမာ့အတွက် လိုသလို အသုံးချနိူင်ခဲ့ပါတယ်။

ဒီနေ့တော့ တမာချဉ်လုပ်နည်းလေး မျှဝေချင်ပါတယ် တမာရွက် အနုလေးတွေ ခူးခွင့်ပေးတဲ့ အမ မမေကိုလဲ ကျေးဇူးအများကြီး တင်ပါတယ်ရှင်။

တမာချဉ် လုပ်နည်းလေးက သိပြီးသူတွေ အတွက်တော့ အရမ်းကို လွယ်ပါတယ် မသိသေးသူတွေအတွက် အိမ်လုပ်တမာချဉ် သန့်သန့်လေး စားနိူင်အောင် မျှဝေပေးလိုက်ခြင်း ဖြစ်ပါတယ်။

ပါဝင်ပစ္စည်းများ

  • တမာရွက်အနု - ၈ခက်
  • မကျီးသီးမှည့် - ကွမ်းသီးဆံလုံးလောက်
  • နနွင်းမှုန့် - လက်ဖက်ရည်ဇွန်း တ၀က်
ပြင်ဆင်ပုံ
  1. တမာရွက် အနုလေးများကို ရေစင်အောင်ဆေးပြီး ရေစစ်ထားပါ
  2. မကျီးသီးမှည့်ကို ရေ လက်ဖက်ရည် ပန်းကန်လုံး တလုံးလောက်နှင့် စိမ်ထားပါ
  3. မကျီးသီးမှည့်အစား ဇီးသီးခြောက်ကို ရေစိမ်ပြီးတော့လဲ သုံးနိူင်ပါသေးတယ်
  4. နနွင်းကို ရေ အနည်းငယ်နှင့် ဖျော်ထားပါ
  5. အားလုံး အဆင်သင့်ဖြစ်တာနဲ့ ရေ၂လီတာလောက်ကို ဆူအောင်တည်လိုက်ပါ
  6. ရေ ပွက်ပွက်ဆူလာတာနဲ့ တမာရွက်ကို ရေနွေးထဲ မြုပ်အောင် တမိနစ်လောက် ထည့်လိုက်ပါ
  7. အရွက်ပြုပ်ချိန် မကြာရပါ ပြုပ်ချိန်ကြာပါက အရွက်များ အရမ်းနူးပြီး စားမကောင်းတော့သလို ရိုးတံနဲ့အရွက်များ တခြားစီ ဖြစ်ကုန်တတ်ပါတယ်
  8. ပြီးတာနဲ့ ရေနွေးထဲကနေဆယ်ပြီး ရေအေးနှင့်ဆေးပြီး ၂မိနစ်လောက် ရေစိမ်ထားလိုပေးပါ
  9. အရွက်များ အေးသွားနဲ့ ရေများစင်အောင် လက်နှင့်အသာအယာ ဆုတ်ပြီးညှစ်လိုက်ပါ
  10. ရေစင်တာနဲ့ နနွင်းရည်ထဲ စိမ်ပေးပါ
  11. နနွင်စိမ်ပြီးတာနဲ့ မကျီးရည်ထဲ ထည့်စိမ်ပေးပါ
  12. အားလုံး ပြင်ဆင်ပြီးတာနဲ့ တမာချဉ်ကို ချက်ခြင်း သုံးဆောင်နိူင်သလို ဖန်ပုလင်းထဲထည့်ပြီး လေလုံအောင်ပိတ်ကာ ရေခဲသေတ္တာထဲထည့်ပြီး လိုသလောက်ယူ၍ စားသုံးနိူင်ပါတယ်
  13. တမာချဉ်က ချက်ခြင်းကြီး ချဉ်တာမို့ အချဉ်မကြိုက်ပါက မကျီးသီးမှည့်ကို အနည်းငယ် လျှော့ပြီးထည့်ပေးပါ။

တမာရွက်နု

မကျီးသီးမှည့်ကို ရေစိမ်ထားပါ

နနွင်းကို ရေဖျော်ထားပါ

ပြုပ်ပြီးသော တမာရွက်ကို ရေနှင့် ၂မိနစိလောက် စိမ်ထားပေးပါ

နနွင်းရည် မကျီးသီးမှည့်တို့နှင့် စိမ်ပေးပါ

စားရန်ပြင်ဆင်သောအခါ မကျီးသီးမှည့်များ ဖယ်ပေးပါ

တမာချဉ်နှင့် လိုက်ဖက်လွန်းသော ဘဲဥချဉ်ရည်ဟင်း

No comments:

Post a Comment