ဒီနေ့တော့ မာမာ့အိမ်မှာ စိုက်ထားတဲ့ ပိန်းပင်လေးတွေ စားလို့ရပြီဖြစ်လို့ ဥဖော်ပါတယ် ပိန်းဥလေးတွေ ရလာတော့ ကိုယ်စိုက်တဲ့အပင်က ရလာတဲ့ ပိန်းဥလေးတွေကို ချက်စားရမှာမို့ သမျှောတာတစ်ဝက် အပျော်တစ်ဝက်တော့ ဖြစ်ခဲ့ရပါသေးတယ်။
ဒါပေမဲ့လဲ အရည်သောက်ဆမ်း ဟင်းလေးတစ်မယ် ရလေအောင် ချက်ဖြစ်ပြန်ပါတယ် ဒါကြောင့်မို့လို့ မာမာပြင်ဆင်ပြီး ချက်ထားတဲ့ ပိန်းဥအရည်သောက်ဆမ်းဟင်း ချက်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ပိန်းဥ - 500 g
- ဆီ - ထမင်းစားဇွန်း နှစ်ဇွန်း
- ကြက်သွန်နီ - အနေတော် တစ်ခြမ်း
- ကြက်သွန်ဖြူ - အမွှာကြီးကြီး နှစ်မွှာ
- ငရုတ်သီးအရောင်တင်မှုန့် - လက်ဖက်ရည်ဇွန်း တစ်ဇွန်း
- နနွင်းမှုန့် - လက်ဖက်ရည်ဇွန်း တစ်၀က်
- ဆား - လက်ဖက်ရည်ဇွန်း တစ်ဇွန်း
- အချိုမှုန့် - လက်ဖက်ရည်ဇွန်း တစ်ဇွန်း
- ပုဇွန်ခြောက် - ဆယ့်ငါးကောင်ခန့်
- ရေ - တရုတ်ဟင်းရည်သောက် ပန်းကန်လုံးအလတ် တစ်လုံး
- ဆား - ထမင်းစားဇွန်း တစ်ဇွန်း (ပိန်းဥဆေးရန်)
ပြင်ဆင်ပုံ
- ပိန်းဥများကို အခွံခွာပြီး ဆားနှင့်နယ်ပြီး ရေဆေးပေးပါ
- ပိန်းဥအလုံးကြီးပါက အနေတော် အတုံးလေးတွေ တုံးပေးပါ
- ပိန်းဥအခွံခွာတဲ့အခါ အခန့်မသင့်ရင် လက်ယားတတ်တဲ့အတွက် လက်အိတ်လေး စွတ်ပြီးမှ အခွံကို ခွာပေးပါ
- ပုဇွန်ကိုခြောက်ကို ရေဆေးပြီး ရေနာရီဝက်လောက် စိမ်ထားပါ
- ကြက်သွန်ဖြူ နှင့် ကြက်သွန်နီတို့ကို အခွံခွာပြီး ရေဆေးကာ ငရုတ်သီးမှုန့်နှင့်ရောပြီး ညက်နေအောင် ထောင်းထားပါ
- ဇောက်နက်သော အိုးတစ်လုံးမှာ အခွံခွာထားသော ပိန်းဥ ဆား ပုဇွန်ခြောက် နနွင်းမှုန့် ငရုတ်သီးထောင်းပြီးသား အချိုမှုန့်နှင့် ဆီတို့ထည့်ပြီး အရသာ၀င်အောင် နယ်ပေးပါ
- အရသာ နယ်ပြီးတာနဲ့ ရေအနည်းငယ်ထည့်ပြီး သုံးမိနစ်ခန့် လုံးချက်လေး ချက်ပေးပါ
- ပိန်းဥများ လုံးမိတာနဲ့ ရေကိုမြုပ်အောင်ထည့်ပြီး ဟင်းအိုးဆူအောင် တည်ပေးပါ
- ပိန်းဥများ နူးလာတဲ့အထိ တည်ပေးပြီး ပိန်းဥများ နူးလာတာနဲ့ ဟင်းရည်အပျစ် အကျဲကို လိုသလို ထည့်ပေးပါ
- ပိန်းဥဟင်း ကျက်တာနဲ့ အရသာမြည်းပြီး လိုသလိုပြင်ပေးကာ ပိန်းဥအရည်သောက်ဆမ်းဟင်းကို ပုဇွန်ချဉ်သုပ် ငါးချဉ်သုပ်တို့နှင့် တွဲဖက်ပြီး သုံးဆောင်ရန် ပြင်ပေးနိူင်ပါပြီ။
No comments:
Post a Comment