ဗီယက်နမ်ဆိုင်က ဝယ်လာတဲ့ ငါးဖယ်ခြစ်ကို အုန်းနို့နဲ့ ချက်ပါတယ် စားလို့ကောင်းလွန်းတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- ငါးဖယ်ခြစ် - 400 g
- အုန်းနို့ - 200 g
- ကြက်သွန်နီ - အနေတော် နှစ်လုံး
- ကြက်သွန်ဖြူ - အမွှာကြီးကြီး သုံးမွှာ
- ချင်း - လက်တစ်ဆစ်ခန့်
- ငရုတ်သီးအရောင်တင်မှုန့် - လက်ဖက်ရည်ဇွန်း တစ်ဇွန်းခွဲ
- စပါးလင် အရင်းပိုင်း - တစ်လက်မခန့်
- ရှောက်နူရွက် - နှစ်ရွက်
- ဆား - လက်ဖက်ရည်ဇွန်း တစ်ဇွန်း (ဟင်းချက်ရန်နှင့် ငါးဖယ် အရသာနယ်ရန်)
- အရသာမှုန့် - လက်ဖက်ရည်ဇွန်း တစ်ဇွန်းခွဲ (ဟင်းချက်ရန်နှင့် ငါးဖယ်အရသာနယ်ရန်)
- နနွင်းမှုန့် - လက်ဖက်ရည်ဇွန်း တစ်ဇွန်း ဟင်းချက်ရန်နှင့် ငါးဖယ်အရသာနယ်ရန်)
- ဆီ - ထမင်းစားဇွန်း ရှစ်ဇွန်း
ပြင်ဆင်ပုံ
- ဇလုံတစ်လုံးထဲမှာ ငါးဖယ်ခြစ် ဆား အရသာမှုန့် နနွင်းမှုန့်တို့ထည့်ပြီး အရသာ သမသွားအောင် နယ်ပေးပါ
- အရသာ သမသွားတာနဲ့ ထိုဇလုံထဲမှာဘဲ ငါးဖယ်ခြစ်များကို အချက် နှစ်ရာလောက် ပေါက်ပေးထားပါ
- ထိုပေါက်ထားသော ငါးဖယ်ခြစ်များကို အနေတော် အလုံလေးတွေ လုံးထားပါ
- ချင်း ကြက်သွန်ဖြူနှင့် ကြက်သွန်နီတို့ကို အခွံခွာပြီး ရေဆေးထားပါ
- စပါးလင်ကို ရေဆေးပြီး ပါးပါးရိတ်ရိတ်လေးတွေ လှီးထားပါ
- ချင်း ကြက်သွန်ဖြူ ကြက်သွန်နီ စပါးလင်တို့ကို ငရုတ်သီး အရောင်တင်မှုန့်နဲ့ရောပြီး ညက်နေအောင် ထောင်းထားပါ
- ရှောက်နူရွက်ကို ရေဆေးထားပါ
- ဇောက်အနည်းငယ် နက်သော အိုးထဲမှာ ဆီနှင့် နနွင်းမှုန့်တို့ထည့်ပြီး အပူပေးပါ
- ဆီပူလာတာနဲ့ ထောင်းထားသော ငရုတ်သီးထောင်းကို ထည့်ပြီး ဆီသတ်ပေးပါ
- ငရုတ်သီးဆီသတ်နံ့ မွှေးလာတာနဲ့ ရှောက်နူရွက်ကို ထည့်မွှေပေးပါ
- ငရုတ်သီး ဆီသတ်ထားတာ မွလာတာနဲ့ မီးကိုအနည်းငယ် လျှော့ပေးပြီမှ ငါးဖယ်ကို တစ်လုံးခြင်း ထည့်မွှေပေးပါ
- ငါးဖယ်အသားလေးတွေ မာတင်းလာတော့မှ အုန်းနို့ကို လောင်းထည့်ပြီး အရသာ ဝင်သွားအောင် မွှေပေးပါ
- ပြီးတာနဲ့ ဆားနှင့်အရသာမှုန့်ထည့်ပြီး မွှေပေးကာ အဖုံးအုပ်ပြီး တည်ပေးပါ
- အုန်းနို့များ အရမ်းမခမ်းခင် အရသာ မြည်းပေးကာ မိမိစိတ်ကြိုက် အရသာ ရလာအောင် ပြင်ပေးပါ
- ဆီပြန်လာတာနဲ့ ငါးဖယ်အုန်းနို့ ဆီပြန်ဟင်းကို ထမင်းပူပူလေးနဲ့ စားသုံးရန် ပြင်ပေးနိူင်ပါပြီ။
No comments:
Post a Comment