အသီးအရွက် ချဉ်လို့ အသံကြားလိုက်တာနဲ့ မာမာတို့ ငယ်ဘဝလေးကို အရမ်းလွမ်းမိပါတယ် စည်းကမ်းကြီးတဲ့ အမေ့အမ အကြီးဆုံး အပျိုကြီး ကြီးကြီးရဲ့လက်ပေါ်မှာ ကြီးခဲ့တာမို့ အိမ်မှုကိစ္စကို အသက်အရွယ်အလိုက် နိူင်သလောက် လုပ်ကြရပါတယ်။
မိန်းကလေးဆို အိမ်မှုကိစ္စကို ပိုပြီးသင်ပေးသလို သင်တဲ့အတိုင်း လုပ်လဲလုပ်ရပါတယ် ထမင်းချက် ဟင်းချက်အပြင် ၆ဧကကျော်ကျယ်တဲ့ ခြံ၀င်းထဲက ထွက်သမျှ အသီးအနှံကို ရာသီချိန်တိုင်း အသုံး၀င် တာရှည်ခံအောင် ပြင်ဆင်နည်းများကို သင်ပေးတတ်တာမို့ ဒီနေ့ထိ ကြီးကြီး သင်ပေးတာတွေ အားလုံးက မာမာ့အတွက် လိုသလို အသုံးချနိူင်ခဲ့ပါတယ်။
ဒီနေ့တော့ ထိုင်းဆိုင်က ဝယ်လာတဲ့ ရေထိကရုံးလေးတွေကို အချဉ်တည်ပါမယ် ဒီအချဉ် တည်နည်း လုပ်နည်းလေးက သိပြီးသူတွေ အတွက်တော့ အရမ်းကို လွယ်ပါတယ် မသိသေးသူတွေအတွက် အိမ်လုပ်ရေထိကရုံးချဉ်ဖတ် သန့်သန့်လေး စားနိူင်အောင် မာမာပြင်ဆင်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ရေထိကရုံး - လက်တစ်ဆုတ်စာ
- မန်ကျည်းသီးမှည့် - ကွမ်းသီးဆံလုံးလောက်
- နနွင်းမှုန့် - လက်ဖက်ရည်ဇွန်း တစ်၀က်
ပြင်ဆင်ပုံ
- ရေထိကရုံးပင်လေးတွေကို မလိုတာတွေ ဖယ်ပေးပြီး ရေစင်အောင်ဆေးပြီး ရေစစ်ထားပါ
- မန်ကျည်းသီးမှည့်ကို ရေ လက်ဖက်ရည် ပန်းကန်လုံး တစ်လုံးစာလောက်နှင့် စိမ်ထားပါ
- မန်ကျည်းသီးမှည့်အစား ဇီးသီးခြောက်ကို ရေစိမ်ပြီးတော့လဲ သုံးနိူင်ပါတယ်
- နနွင်းမှုန်ကို ရေအနည်းငယ်နှင့် ဖျော်ထားပါ
ချဉ်ဖတ်တည်ရန်
- အားလုံး အဆင်သင့်ဖြစ်တာနဲ့ ရေ၂လီတာလောက်ကို ပွက်ပွက်ဆူအောင် တည်ပေးပါ
- ရေ ပွက်ပွက် ဆူလာတာနဲ့ ရေထိကရုံးလေးတွေကို ရေနွေးထဲမှာ မြုပ်အောင် တစ်မိနစ်လောက် ထည့်လိုက်ပါ
- ပြီးတာနဲ့ ရေနွေးထဲကနေဆယ်ပြီး ရေအေးနှင့်ဆေးပေးကာ ရေ၂မိနစ်လောက် ရေစိမ်ထားပေးပါ
- ရေထိကရုံးပင်လေးများ အေးသွားတာနဲ့ ရေများစင်အောင် လက်နှင့်အသာအယာ ဆုတ်ပြီးညှစ်လိုက်ပါ
- ရေစစ်သွားတာနဲ့ နနွင်းရည်ထဲ စိမ်ပေးပါ
- နနွင်းစိမ်ပြီးတာနဲ့ မန်ကျည်းရည်ထဲ ထည့်စိမ်ပေးပါ
- အားလုံး ပြင်ဆင်ပြီးတာနဲ့ ရေထိကရုံး ချဉ်ဖတ်ကို ချက်ခြင်း သုံးဆောင်နိူင်သလို ဖန်ပုလင်း (သို့မဟုတ်) ဗူးသန့်သန့်ထဲ ထည့်ပေးပြီး လေလုံအောင်ပိတ်ကာ ရေခဲသေတ္တာ မခဲတဲ့ အကန့်ထဲထည့်ပြီး လိုသလောက်ယူ၍ စားသုံးနိူင်ပါတယ်။
No comments:
Post a Comment