မာမာတို့ ငယ်ငယ်က ကျောင်းမှာ ဝယ်စားကြတဲ့ မြေအိုးလေးတွေထဲမှာ ထည့်ထားတဲ့ ရှောက်သီးဆေးပြားတို့ စက္ကူလေးတွေနဲ့ ထုတ်ထားတဲ့ ရှောက်သီးဆေးပြားလေးတွေကို တောဘက်ကျောင်းတွေမှာ ကျောင်းတက်တဲ့ကြ အများစုကတော့ စားဖူးကြမယ် ထင်ပါတယ်။
မာမာကတော့ ရှောက်သီးမရှိတဲ့အတွက် သံပုယိုသီးနဲ့ လုပ်ထားပေမဲ့ ရှောက်သီးဆေးပြား အရသာအတိုင်း ရပါတယ် ဒါကြောင့်မို့လို့ မာအာပြင်ဆင်ပြီး လုပ်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- သံပုယိုသီး - အလုံးနှစ်ဆယ်
- ဆား - လိုသလောက် သုံးပါ
- ဖန်ပုလင်းသန့်သန့် - လိုသလောက်သုံးပါ
- Baking paper - လိုသလောက် သုံးပါ
ပြင်ဆင်ပြုလုပ်ပုံ
- ဖန်ပုလင်းများကို သန့်စင်နေအောင် ဆေးပေးပြီး ရေခြောက်အောင် နေလှန်းပေးထားပါ
- သံပုယိုသီးများကို ရေစင်အောင်ဆေးပြီး ရေခြောက်အောင် သုတ်ပေးထားပါ
- ပြီးတာနဲ့ အောက်ချေအထိ မပြတ်အောင် လေးစိတ်စိတ်ပေးပါ
- လေးစိတ် စိတ်ထားသော ကြားထဲကို ဆားဆန့်သလောက် ဖိသိပ်ထည့်ပေးပါ
- အားလုံးထည့်ပြီးတာနဲ့ အခြောက်ခံထားသော ပုလင်းတွေမှာ သံပုယိုသီးများကို ထောင်ရက်လေးတွေ ဖိသိပ်ထည့်ပေးပါ
- ပြီးတာနဲ့ လေလုံအောင်ပိတ်ပြီး တစ်ပါတ်ခန့် နေလှန်းပေးပြီး အိမ်ထဲမှာ ဆက်ထားပေးပါ
- နေရောင်မရပါက အခန်းအပူချိန် အများဆုံး ရှိတဲ့နေရာမှာ ထားပေးပါ
- ဆားရည်များ ပျော်လာပြီး သံပုယိုသီးများ အိလာပါက သံပုယိုသီး ဆေးပြားလေးတွေ လုပ်လို့ရပါပြီ။
သံပုယိုသီး ဆေးပြားလုပ်ပုံ
- ဆားစိမ်ထားသော သံပုယိုသီးများကို ရေများစစ်ပြီး အပြင်ကို ထုတ်ပေးပါ
- ရေစစ်သွားတာနဲ့ ကြိတ်စက်ထဲကို ကြိတ်စက်နိူင်သလောက် ထည့်ပေးပြီး ညက်နေအောင် ကြိတ်ပေးပါ
- အချိုအရသာလေးနဲ့ စားချင်ပါက သကြားထည့်ကြိတ်ပေးပါ
- အားလုံးကုန်အောင် ကြိတ်ပြီးတာနဲ့ နေလှန်းဖို့ ပြင်ဆင်ပေးပါ
- နေလှန်းမည့် ဗန်းတွေထဲမှာ baking paper တွေကို ခင်းပေးပါ
- ပြီးတာနဲ့ ထိုစက္ကူအပေါ်မှာ ကြိတ်ထားသော သံပုယိုသီးများကို ထည့်ပေးပြီး ပြန့်နေအောင် ဖိဖိပြီး ဖြန့်ပေးပါ
- အားလုံးဖြန့်ပြီးတာနဲ့ နေပူပူမှာ လှန်းပေးပါ
- နေလှန်းတဲ့ အခါမှာလဲ ပိုးကောင်လေးတွေ မနားအောင် အုပ်ဆောင်းအုပ်ပြီး လှန်းပေးပါ
- အပေါ်ယံဘက်က နေလှန်းထားတာ ခြောက်သွေ့လာပါက နောက်တစ်ဖက်ကို လှန်ပြီးလှန်းပေးပါ
- တစ်ချပ်လုံး ခြောက်သွေ့လာတဲ့အထိ နေလှန်းပြီးပါက သံပုယိုသီး ဆေးပြားလေးတွေကို ဖန်ပုလင်းလေးထဲထည့်ကာ အစာကျေ ရင်ချောင်အောင် စားသုံးနိူင်ပါပြီ။
No comments:
Post a Comment