ဒီနေ့တော့ သမီးငယ်လေး သူကျောင်းသွားတက်တဲ့ မြို့ကနေ ကျောင်းပိတ်လို့ ခနပြန်လာပါတယ် လေဆိပ်မှာထဲက မေမေရယ် တို့ဟူးသုပ် စားချင်တယ်ဆိုပြီး ပူဆာပါလေရော
ဒီတော့ လေဆိပ်ကနေ အိမ်ကိုပြန်ရောက်တာနဲ့ တို့ဟူးသုပ် အရမ်းစားချင်နေတဲ့ သမီးလေးအတွက် မြန်မြန်စားချင်တော့ မြန်မြန်ကျိုလို့ရတဲ့ နည်းလေးနဲ့ ကျိုဖြစ်ပါတယ်။
ပဲရည်ကို တစ်ညသိပ် မနှပ်ဘဲ ဒီအတိုင်း အရည်ဖျော်ပြီး ကျိုတဲ့အတွက် တို့ဟူးသားလေးက အနည်းငယ် ကြမ်းသလိုလေး ဖြစ်ပါတယ်။
ဒါပေမဲ့လဲ အသုပ်ဆိုင်တွေမှာ ရောင်းတန်းဝင် တို့ဟူးသားတွေလောက်တော့ ရပါတယ် ဒါကြောင့်မို့လို့ မာမာကျိုတဲ့ နည်းလေးကို မျှဝေပေးလိုက်ပါတယ်ရှင်။
တို့ဟူးကျိုနည်းတွေ အမျိုးမျိုးကျိုကြပေမဲ့ အချိုးအစား တိတိကျကျ မရေးကြတာကြောင့် တစ်ချို့လဲ ကျိုတိုင်းပျက်ကြပါတယ်လို့ လာလာပြောကြပါတယ်။
ဒါကြောင့်မို့လို့ မာမာအခုကျိုထားတဲ့ နည်းလေးအတိုင်းသာ ကျိုကြည့်ပါ တို့ဟူးကောင်းကောင်းလေး ရမှာပါလို့ ပြောပါရစေရှင်။
ပါ၀င်ပစ္စည်းများ
- ပဲအစိမ်းမှုန့် - ထမင်းပေါင်းအိုး ဆန်ချင်ဗူး သုံးဗူး
- ရေ - ထမင်းပေါင်းအိုး ဆန်ချင်ဗူး လေးဗူးခွဲ
- ဆီ - ထမင်းစားဇွန်း နှစ်ဇွန်း
- ဆား - လက်ဖက်ရည်ဇွန်း တစ်ဇွန်း
- နနွင်းမှုန့် - လက်ဖက်ရည်ဇွန်း တစ်ဝက်
- ဂျုံစစ်ဇကာ - တစ်ခု
- ဇောက်နက်ပြီး မကပ်သောအိုး ခပ်ကြီးကြီး - တစ်လုံး
- သစ်သားယောင်းမ - အရိုးရှည်ရှည် တစ်ချောင်း
- ဇလုံ - ခပ်ကြီးကြီး တစ်လုံး
- အပူခံနိူင်သော ကော်ဗူး - တစ်ဗူး (သို့မဟုတ်) မိမိအဆင်ပြေသော ဗန်းတစ်ခု
ပဲမှုန့်ရေဖျော်ရန်
- ဇလုံတစ်လုံးထဲမှာ ပဲအစိမ်းမှုန့် နှင့် ရေတို့ကိုရောကာ အမှုန့်များ ကျေအောင် မွှေတံနှင့်ချေပေးပါ
- ပြီးတာနဲ့ တို့ဟူးကျိုမည့် အိုးအပေါ်မှာ ဂျုံစစ်ဇကာ ဇကာစိတ်စိတ်လေးကို တင်ပေးပါ
- ပဲရည်များကို ထိုဇကာပေါ် လောင်းထည့်ပြီး မကျေဘဲ ကျန်နေသော ပဲအနှစ်များကို ဇွန်းနှင့်ဖိပြီး ချေပေးကာ ပဲအကြည်ရည် အနည်းငယ်နှင့် လောင်းချပေးပါ
- ပဲရည်ပေါ်မှာ တက်လာသော အမြှုပ်များကို ခပ်သွန်ပေးပါ
- ပြီးတာနဲ့ တို့ဟူးကျိုမည့် အိုးထဲကို ဆား ဆီနှင့်နနွင်းမှုန့် ထည့်ပေးကာ သမအောင် မွှေပေးပါ
တို့ဟူးကျိုရန်
- တို့ဟူးကျိုပြီးထဲ့ရန် ဇလုံ (သို့) ပန်းကန်လုံး (သို့) အပူခံနိူင်သော ဗူးကို ဆီအနည်းငယ်နှင့် နေရာနှံ့အောင် သုပ်ထားပေးပါ
- ပဲအရည် ဖျော်ထားသောအိုးကို မီးဖိုပေါ်တင်ပြီး မီးကို median heat လောက်နှင့် တည်ပေးပါ
- ပဲရည်အိုး မီးဖိုပေါ် ရောက်ကတည်းက သစ်သားယောင်းမဖြင့် မွှေပေးပါ
- အိုးပူလာပြီး ရေပွက်ပွက် ဆူလာတာနဲ့ ပဲရည်များ မကပ်စေရန် အဆက်မပြတ် မွှေမွှေပေးပါ
- မွှေနေရင်းက ပဲအနှစ်ရည် စပြီးပြစ်လာတာနဲ့ အဆက်မပြတ် ဆက်မွှေပေးပါ
- မွှေနေစဉ် အိုးမကပ်စေရန် မီးအပူချိန်ကို သတိထားပါ
- ပဲအနှစ်များ ပျစ်လာတာနဲ့ လက်အားသန်သန်နဲ့ ခပ်သွက်သွက်လေး မွှေပေးပါ
- အဆက်မပြတ် မွှေပေးရင်းက ပဲများပျစ်လာပြီး ပဲအနှစ် ကြည်ရောင်ရောင်လေး သန်းလာတာနဲ့ အထဲမှ ရေများကုန်အောင် မွှေပေးပါ
- ပဲပျစ်လာချိန်မှစပြီး ၈မိနစ်မှ၁၀မိနစ်လောက် မွှေပြီးပါက အထဲမှ ရေများတစ်ဗွက်ဗွက် ပေါက်မလာတော့ရင် ရပါပြီ
- တစ်ခါတလေ မိမိတို့ အသုံးပြုသော မီးဖိုရဲ့ မီးအပူရှိန် မတူညီတဲ့အတွက် ကျိုချိန်လဲ အနည်းငယ် ကွာခြားတတ်ပါတယ်
- တို့ဟူးကျိုလို့ ပြီးပြီဆိုတာနဲ့ အဆင်သင့်ပြင်ကာ ဆီသုပ်ထားသော ဇလုံ(သို့) ပန်းကန်(သို့) ဗူး အစရှိသည့် မိမိအစဉ်ပြေသော အထဲသို့ ကျိုထားသော ပဲအနှစ်များကို ခပ်မြန်မြန်လေး လောင်းချပေးပြီး မျက်နှာပြင်ညီအောင် ဖိပြီး ညှိပေးပါ
- တစ်နာရီ တစ်နာရီခွဲ၀က်လောက်နေရင် ကောင်းကောင်းကြီး အေးပြီးခဲနေသာ တို့ဟူးတုံးလေး ရပါပြီ
- ပူနေသော တို့ဟူးထည့်ထားသည့် ဗူးများကို ရေခဲသေတ္တာထဲ မထည့်မိဖို့ သတိထားပါ
- အခန်းအတွင်းမှာ ရိုးရိုးလေးဘဲ အအေးခံထားပါ
- အေးသွားပြီ ဆိုတော့မှ ရေခဲသေတ္တာထဲမှာ ထဲ့ထားပြီး သုံးရက်လောက်အထိ ထားပြီး စားလိူ့ရပါတယ်
- ချဉ်ငံစပ်လေး သုပ်စားမလား တို့ဟူးကြော်လေး ကြော်စားမလား တို့ဟူးချဉ်စပ်လေး ချက်စားကြမလား အရမ်းကို အဆင်ပြေစေတဲ့ တို့ဟူးတုံးလေး ရပါပြီရှင်။
No comments:
Post a Comment