ဒီနေ့တော့ ဂျလေဘီလုပ်နည်းလေး မျှဝေပေးချင်ပါတယ် မုန့်တစ်ခုခု လုပ်မယ်ဆို စိတ်တော့ ရှည်ရပါတယ် စိတ်ရှည်မှလဲ မုန့်ရဲ့အရသာ ကောင်းကောင်းလေးနဲ့ မုန့်လှလှလေး ရမှာဖြစ်ပါတယ်ရှင်။
ပါဝင်ပစ္စည်းများ
- ဂျုံမှုန့် - 125 g
- ရေ - 125 g ( မုန့်နှစ်စပ်ရန် )
- မတ်ပဲ - 50 g (အခွံခြွတ်ပြီးသား ) (သို့ ) မတ်ပဲအမှုန့်
- Baking powder - လက်ဖက်ရည်ဇွန်း တစ်ဇွန်း
- food color - လက်ဖက်ရည်ဇွန်း တစ်ဝက် ( အဝါရောင်ကိုသုံးပါ )
- သကြား - 500 g
- ရေ - 500 g ( သကြားကျိုရန် )
- ဖာလာစေ့ - ၄စေ့ခန့်
- သံပုရာရည် - ထမင်းစားဇွန်း တစ်ဇွန်း
- ဆီ - လိုသေလာက္
- မုန့်နှစ်ထည့်ပြီး ညှစ်ရန်အတွက် ခရမ်းချဉ်သီးဆော့ထည့်သည့် ကော်ဗူး - တစ်ဗူး
- မုန့်ကြော်ရန် အောက်ချေမကပ်သော ဒယ်အိုး - တစ်အိုး
ပြင်ဆင်ပုံ
- မတ်ပဲကို ရေမြုပ်အောင်ထည့်ပြီး ၃နာရီခန့် ရေစိမ်ထားပါ
- မာမာကတော့ သုံးရလွယ်တဲ့ မတ်ပဲအမှုန့်ကို သုံးထားပါတယ်
- ရေစိမ်ထားသော ပဲများပွလာပါက ဗလင်ဒါထဲမှာ ရေ ထမင်းစားဇွန်းခန့်ထည့်ပြီး ခပ်ပြစ်ပြစ်လေး ကြိတ်ပေးပါ
- မတ်ပဲအမှုန့်ကို သုံးမယ်ဆိုရင်တော့ ဆီ သံပုရာရည် ဖာလာစေ့နှင့် သကြားမှလွဲပြီး ပါဝင်ပစ္စည်းများကို ရောမွှေပေးပါ
- ဖာလာစေ့နှင့် သံပုရာရည်ကို အဆင်သင့် ပြင်ထားပါ
- သကြားနှင့် ရေတို့ကို ရောပြီး သကြားပျော်လာအောင် ကျိုပေးပါ
- သကြားများ အရည်ပျော်လာပါက ဖာလာစေ့ကို ကွဲသွားတယ်ဆိုရုံလေးထုကာ ထည့်ပေးပါ (မထည့်လဲ ရပါတယ်)
- ပြီးတာနဲ့ သံပုရည်ထည့်ကာ မွှေပေးပါ
- သကြားရည်ကို အရမ်းမပြစ်မသွားစေဘဲ မုန့်သားစိမ်လို့ရရုံ ကပ်စေးစေး ဖြစ်ရုံလေး ကျိုပေးပါ
- သကြားရည် ကျိုရာမှာ အရမ်းမကျဲ အရမ်းမပြစ်စေရန် သတိထားပါ
- သကြားရည် အရမ်းကျဲပါ မုန့်စိမ်တဲ့အခါမှာ မုန့်သားများ ကွဲထွက်သွားနိူင်ပြီး သကြားရည် အရမ်းပြစ်ပါက မုန့်ရည်စိမ်တဲ့အခါမှာ မုန့်သားထဲ မဝင်ဘဲ ဖြစ်သွားတတ်ပါတယ်
- သကြားရည်ကျိုပြီး အဆင်သင့် ဖြစ်ပါက ဇလုံခပ်ကြီးကြီး တစ်လုံးထဲမှာ ပြောင်းပြီးထည့်ထားပါ
မုန့်နှစ်ဖျော်ရန်
- ဇလုံအနေတော် တစ်လုံးထဲမှာ ဂျုံမှုန့် food colorနှင့် baking powder တို့ကို သမအောင် ရောမွှေပေးပါ
- အားလုံးသမသွားတာနဲ့ ရေ ပေါင်းအိုးဆန်ချဉ်ခွက်ရဲ့လေးပုံသုံးပုံကိုထည့်ကာ သမသွားအောင် သေသေချာချာ မွှေပေးပါ
- ပြီးတာနဲ့ ကြိတ်ထားသော မတ်ပဲအနှစ်များကို ထည့်မွှေပေးပါ
- မာမာကတော့ မတ်ပဲအမှုန့်ကို သုံးတဲ့အတွက် တခါထဲ သမအောင် မွှေလိုက်ပါတယ်
- မုန့်နှစ်ရလာတာနဲ့ ခရမ်းချဉ်သီးဆော့ထည့်သည့် ပလပ်စတစ်ဗူး အလွတ်ထဲကို ထည့်ပေးပါ
မုန့်သားကြော်ရန်
- မုန့်နှစ်ထည့်ထားသော ခရမ်းချဉ်သီးဆော့ထည့်သည့် ဆော့ဗူးအလွတ်ကို ပြင်ထားပါ
- အောက်ချေမကပ်သော ဒယ်အိုးထဲကို ဆီထည့်ပြီး အပူပေးပါ
- ဆီပူလာတာနဲ့ မီးကို အလယ်လောက်ထိ လျှော့ပေးပါ
- ပြီးတာနဲ့ ဆော့ဗူးထဲမှ မုန့်နှစ်ကို တစ်ဖက်သပ်ထဲဝိုက်ပြီး ၄ခါလောက် ဝိုက်ပြီးထည့်ပေးပါ
- ဒယ်အိုးထဲမှာ မုန့်သားများ ဆန့်သလောက် ထည့်ကြော်ပေးပါ
- ကြော်ထားသော မုန့်သားများ ရွှေဝါရောင် သန်းလာတာနဲ့ ဆယ်ပြီးဆီစစ်ကာ အအေးခံထားသော သကြားရည်ထဲ တန်းထည့်ပေးပါ
- သကြားရည်များ မုန့်သားထဲ စိမ့်ဝင်သွားအောင် ဇွန်းဖြင့့်အနည်းငယ် ဖိပေးပါ
- အထက်ပါ နည်းအတိုင်း မုန့်သားများ ကုန်တဲ့အထိ ကြော်ပေးလိုက် သကြားရည် စိမ်ပေးလိုက် လုပ်ပြီးပါက စားလို့အရမ်းကောင်းတဲ့ ဂျလေဘီမုန့်လေးတွေ ရပါပြီ
- တစ်ခါထဲ စားလို့မကုန်ပါက သကြားရည်စိမ်ထားသော ဂျလေဘီမုန့်လေးများကို ရေခဲသေတျွှာထဲမှာ ထည့်ထားပြီး စားသုံးနိူင်ပါတယ်။
- ခရမ်းချဉ်သီးဆော့ထည့်သည့် ဗူးမရှိပါက ပလပ်စတစ်အိတ် ခပ်ထူထူထဲ မုန့်နှစ်ထည့်ကာ အိတ်ရဲ့အောက်ချေ ထောင့်ကို အနည်းငယ် ဖောက်ပေးပြီး ညှစ်ချပေးပါက ရပါတယ်။
No comments:
Post a Comment