ဒီနေ့တော့ အုန်းသီးအနုလေးတစ်လုံး ဝယ်လာကာ အုန်းစိမ်းရည်ရယ် အုန်းသီးဇွန်းခြစ် အသားလေးတွေရယ် ရောပြီး အချိုတည်းဖို့အတွက် ကျောက်ကျောလး လုပ်ပါတယ်။
စားလိုက်တဲ့အခါ အုန်းစိမ်းရည် အနံ့လေးရယ် အုန်းသီးဇွန်းခြစ် အနံ့လေးရယ် ရောနေပြီး အနံ့သင်းသင်းလေးနဲ့ စားလို့အရမ်းဘဲ ကောင်းတဲ့အတွက် မာမာပြင်ဆင်ပြီး လုပ်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ကျောက်ကျောမှုန့် - 12 g
- သကြား - 50 g
- အုန်းစိမ်းရည် - 310 ml
- ရေ - 350 ml
- ဇွန်းခြစ်အုန်းသီးဖတ် - မိမိကြိုက်သလောက် ထဲ့ပေးပါ
- ကျောက်ကျောကျိုပြီးထည့်ရန် အပူခံမည့်ဗူး (သို့) ဗန်း - တစ်ခု (သို့) ပုံစံခွက်လေးများ
- ဇောက်နက်သော အနေတော်အိုး - တစ်လုံး
ပြင်ဆင်ပုံ
- အုန်းသီးကိုခွဲပေးကာ အုန်းရည်ကို အရင်ဆုံးယူထားပါ
- အုန်းသီးအထဲမှ အုန်းသီးဖတ် အသားအနုလေးတွေကို ဇွန်းနှင့် ခြစ်ပေးပါ
- ကျောက်ကျောကျိုမည့် ကျောက်ကျောမှုန့် အုန်းရည် အုန်းသီးဖတ် ရေနှင့် သကြားတို့ကို ပြင်ထားပါ
- ကျောက်ကျောကျိုပြီးထဲ့မည့် ဗန်း (သို့) ဗူး (သို့ ) ပုံစံခွက်လေးများကို ပြင်ထားပါ
- ဇောက်နက်သော အနေတော် အိုးတစ်လုံးထဲမှာ ရေ အုန်းရည် ကျောက်ကျောမှုန့် သကြားတို့ကို အရည်ပျော်သွားအောင် ရောမွှေထားပေးပါ
- ပြီးတာနဲ့ မီးဖိုပေါ်တင်ပြီး အပူပေးပါ
- ကျောက်ကျောရည်များ ပွက်ပွက်ဆူလာပါက မီးကို အလယ်လောက်အထိ လျှော့ပေးပြီး ကျိုပေးပါ
- ကျိုနေသော ကျောက်ကျောရည်များ တော်တော်လေး ပျစ်လာတဲ့အထိ မွှေပေးပါ
- မွှေနေစဉ်မှာ ကျောက်ကျောအရည်များ ပျစ်လာပါက ကျောက်ကျောရည်ကို ဇွန်းနှင့်ခပ်ကာ ပန်းကန်ပြား တစ်ချပ်ပေါ်မှာ ကျောက်ကျောရည် အစက်လေးကို ချပေးပါ
- အစက်ချထားသော ကျောက်ကျောရည်ကို မိနစ်ဝက်လောက်နေရင် လက်ကလေးနဲ့ တွန်းကြည့်ပါ
- ပန်းကန်ပြားထဲမှ ကျောက်ကျောရည် ခဲသွားပါက အုန်းသီးဖတ်များကို ထဲ့မွှေပေးပါ
- ပြီးတာနဲ့ အဆင်သင့် ပြင်ထားသော ပုံစံခွက်လေးများထဲသို့ ကျောက်ကျောရည်ကို လောင်းထည့်ပေးပါ
- ပြီးတာနဲ့ ခဲသွားတဲ့အထိ အခန်းအပူချိန်အတိုင်း အအေးခံပေးပါ
- ကျောက်ကျောရည်များ ခဲသွားမှ ပုံစံခွက်ထဲမှ ကျောက်ကျောတုံးလေးများကို ဓါးဦးချွန်လေးနှင့် ကော်ပေးကာ အပြင်ကို ထုတ်ပေးပါ
- ပြီးတာနဲ့ အချိုပွဲအဖြစ် အုန်းစိမ်းကျောက်ကျော မွှေးမွှေးလေးကို စားသုံးဖို့ ပြင်ပေးနိူင်ပါပြီ။
မှတ်ချက် ။။ အချိုအရသာ ပိုကြိုက်ပါက သကြားကို ပိုထဲ့ပေးပါ။
No comments:
Post a Comment