ဒီနေ့ချက်ဖြစ်တဲ့ ငါးဟင်းလေးပါ ငါးမြင်းဟင်းက စားလို့ကောင်းတဲ့ ငါးအမျိုး အစားထဲမှာ ပါပါတယ် ချက်တတ်ဖို့ဘဲလိုပါတယ်။
ငါးအသားက ထူတဲ့အတွက် ဆီသတ်တာ နိုင်ရပါမယ် ဆီသတ်တာ မနိုင်ရင် စားလို့မကောင်းဘဲ ပွစိစိနဲ့ဖြစ်နေတတ်ပါတယ် ဒါကြောင့်မို့ ဘယ်အသားဘဲချက်ချက် ဆီကိုကောင်းကောင်း သတ်ပေးသင့်ပါတယ်။
နောက်တစ်ခုက ငါးမြင်းက အကြေးခွံမပါဘဲ အရည်ခွံ သက်သက်မို့ မခုတ်မပိုင်းခင် အကောင်လိုက်ကို ဆားသို့မဟုတ် မကျီးသီးမှည့်နဲ့ နယ်ဖတ်ပြီး အရင်ဆေးပေးပါ။
အချွဲများ ကုန်သွားစေသလို အညှီနံ့လဲတော်တော်လေး သက်သာစေပါတယ် ပြီးမှငါးကို လိုသလို ခုတ်ပိုင်းပေးပါ။
ပါ၀င်ပစ္စည်းများ
အနေတော် တုံးထားသော ငါးမြင်း - 300 g
ငံပြာရည် - ထမင်းစားဇွန်း တစ်ဇွန်း
ဆား - လက်ဖက်ရည်ဇွန်း တစ်၀က်
နနွင်းမှုန့် - လက်ဖက်ရည်ဇွန်း သုံးပုံတစ်ပုံ
အချိုမှုန့်- လက်ဖက်ရည်ဇွန်း တစ်၀က်သာသာတို့ကို အားလုံးရောနယ်ပြီး ဆယ်မိနစ်လောက်နှပ်ထားပါ
ပြင်ဆင်ပုံ
ငရုတ်သီးအရောင်တင်မှုန့် လက်ဖက်ရည်ဇွန်း တစ်ဇွန်းကို ကြက်သွန်ဖြူ အမွှာကြီးကြီး၃မွှာ ချင်း လက်တစ်ဆစ် ကြက်သွန်နီ အနေတော် တစ်လုံး စပါးလင်အရိုး တစ်လက်မလောက်နှင့် ညက်နေအောင်ရောပြီးထောင်းပေးပါ
မကပ်သောအိုးကို မီးအပူပေးပြီးဆီ ထမင်းစားဇွန်း ၃ဇွန်းလောက်ထဲ့ပါ
ငါးမြင်းက အဆီပါတဲ့ ငါးဖြစ်တဲ့အတွက် ဆီအများကြီး ထည့်ရန်မလိုပါ
ဆီပူလာတာနဲ့ ထောင်းထားသော ငရုတ်သီးနှင့် အမွှေးနံ့သာများကို ဆီသတ်နံ့သင်းလာအောင် ကြော်ပေးပါ
ဆီသတ်နံ့သင်းလာတာနဲ့ အရသာ နယ်ထားသောငါးကို ထည့်ပြီးဆီသတ်ပါ
ဆီသတ်စဉ် ငရုတ်သီးမတူးစေရန် ငါးအရသာ နယ်ထားသော ဇလုံကို ရေနဲနဲနဲ့ကျင်းပြီးထည့်ပေးပါ
ငါးများအိုးမကပ်စေရန် အိုးကို မကြာမကြာ လှုပ်ပေးပါ
ငါးအသားများ အရောင်ပြောင်းပြီး မာလာတာနဲ့ မကျည်းသီးအနှစ် လက်ဖက်ရည်ဇွန်း တစ်ဇွန်းသာသာနှင့် ရေမြုပ်အောင်ထည့်ပြီး ဆက်တည်ပေးပါ
ငါးအသားများ မကြေစေရန် မမွှေဘဲ အိုးကိုလှုပ်လှုပ်ပေးပါ
ရေခမ်းပြီး ဆီပြန်ကာနီး နံနံပင် သို့မဟုတ် ရှမ်းနံနံ သို့မဟုတ် ကြက်သွန်မိတ်တို့ကို အနေတော်ပိုင်းဖြတ်ကာ အုပ်ပေးပြီး အရသာအတွက် အပေါ့အငံမြည်းကာ လိုတာပြင်ပေးပါ
ဟင်းအိုးဆီပြန်လာတာနဲ့ငါးမြင်းဟင်း အချဉ်ဆီပြန် ဟင်းမွှေးမွှေးလေးကို သုံးဆောင်ရန် ပြင်ပေးလို့ရပါပြီ။
No comments:
Post a Comment