ဒီနေ့တော့ ပျော့ပျောင်းနွဲ့နှောင်းတဲ့ တို့ဟူးကျိုနည်းလေးပြောချင်ပါတယ် မာမာခပ်ငယ်ငယ်လေးထဲက တို့ဟူးကို ကောင်းကောင်းကျိုတတ်ပါတယ်။
မာမာနဲ့အထက်အောက် မောင်လေးက ငယ်ငယ်လေးထဲက အသားတွေသိပ်စားလေ့မရှိပါဘူး လက်ဖက်သုပ် လက်သုပ်စုံလို အစာတွေနဲ့ဘဲ စားလေ့ရှိပါတယ်။
သူ့အတွက်ညနေစာကို မာမာတို့နေတဲ့လမ်းရဲ့အနောက်ဖက်လမ်းမှာ အသုပ်ရောင်းတဲ့အိမ်ရှိတော့ မာမာကနေ့တိုင်းသွားသွား၀ယ်ရပါတယ် သွား၀ယ်တိုင်းနောက်နေ့မနက်ရောင်းဖို့အတွက် တို့ဟူးကျိုတာနဲ့ တိုးတတ်ပါတယ်။
ငယ်ငယ်ထဲက စပ်စပ် စပ်စပ်နေရာတကာ ပါတတ်တဲ့တွက်ကြောင့် တို့ဟူးကျိုတဲ့ကြီးကြီး မစိန်ကြည်ကိုမေးပြီး နောက်ပိုင်းတော့ အိမ်မှာစမ်းပြီး ကျိုဖြစ်ရင်းက ကျိုတတ်သွားခဲ့တာပါ ဒါကြောင့်မို့လို့ မာမာပြင်ဆင်တဲ့ နည်းလေးကို မျှဝေလိုက်ပါတယ်ရှင်။။
တို့ဟူးကျိုရန်
- ပဲအစိမ်းမှုန့် - ထမင်းပေါင်းအိုးဆန်ချင်ခွက် ၃ခွက်
- ရေ - ထမင်းပေါင်းအိုးဆန်ချင်ခွက် ၄ခွက်ခွဲ
- ဆီ - ထမင်းစားဇွန်း နှစ်ဇွန်း
- ဆား - လက်ဖက်ရည်ဇွန်း တစ်၀က်
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ပဲမှုန့်နှင့်ရေကိုရောကာ ပဲအနှစ်လေးတွေ ကျေအောင်ချေပြီး ၅နာရီလောက် နှပ်ထားပေးပါ
- ပဲမှုန့်ချင်တွယ်ရာမှာ မည်သည့်ခွက်နှင့်ဘဲချင်ချင် ပဲမှုန့်တစ်ခွက်ကို ပဲမှုန့်ချင်သည့်ခွက်နှင့် ရေတစ်ခွက်ခွဲ ရောပြီးပေးရင် ရပါပြီ။
ပြင်ဆင်ပုံ
- တို့ဟူးကျိုပြီး ထည့်မည့်ဗူးကို ဆီအနည်းငယ်နှင့် သုတ်ပေးထားပါ
- တို့ဟူးကျိုမည့် အိုးကို မီးအနေတော်နဲ့ အပူပေးလိုက်ပါ
- အိုးပူလာပြီ ဆိုတာနဲ့ ပဲရေစိမ်ထားသော ပဲရည်ကြည်ကို အရင်ဆုံး အိုးထဲသို့ ထဲ့ပြီးတာနဲ့ ဆားလက်ဖက်ရည်ဇွန်း တစ်၀က် နနွင်းမှုန့်လက်ဖက်ရည်ဇွန်း တစ်၀က် ဆီထမင်းစားဇွန်း တစ်ဇွန်းတို့ထဲ့ကာ နဲနဲလေး ပြစ်ရုံကျိုလိုက်ပါ
- ပဲရည်ပြစ်လာပြီ ဆိုတာနဲ့ ကျန်နေသော ပဲအနှစ်ကို မကျေသော ပဲအခဲလေးများပါမသွားစေရန် ဇကာခပ်စိတ်စိတ်ခံကာ လောင်းချပေးပါ
- အားလုံးထဲ့ပြီးတာနဲ့ မီးကိုနဲနဲထပ်လျှော့ပေးပြီး အဆက်မပြတ် မွှေပေးပါ
- ၁၀မိနစ်ကျော်ကျော်လောက် မွှေပြီးပါက ပဲအနှစ်များပြစ်ပြီး ခဲလာပါပြီ
- ဆီသုတ်ထားသော ဗူးထဲသို့ ကျိုထားသော ပဲအနှစ်များ လောင်းချပေးပြီး မျက်နှာပြင်ညီအောင်ညှိပေးပါ
- နာရီ၀က်လောက်နေရင် အေးပြီးခဲနေသာ တို့ဟူးတုန်တုန် အိအိလေး ရပါပြီ
- သုပ်စားမလား ကြော်စားမလား မိမိနှစ်သက်သလို စားသုံးရန် ပြင်ပေးနိူင်ပါပြီ။
No comments:
Post a Comment