မာမာ ဒီနေ့တော့ ငါးခြောက်ကို ခပ်စပ်စပ်လေး ကြော်ပါတယ် မာမာဝယ်လာတဲ့ ငါးခြောက်က ဆားအရမ်းပေါ့တဲ့အတွက် ရေစိမ်ပြီးတဲ့ အခါမှာ ငါးငံပြာရည်နဲ့ အရသာမှုန့်လေးရယ် ပြန်နယ်ပြီး ကြော်ပါမှ အဆင်ပြေပါတယ်။
ထမင်းပူပူလေးနဲ့ အရမ်းကို လိုက်ဖက်သလို ထမင်းကြမ်းလေးနဲ့လဲ လိုက်ဖက်ပါတယ် ဒါကြောင့်မို့လို့ မာမာပြင်ဆင်ပြီး ကြော်ထားတဲ့ ငါးခြောက် ကြော်နည်းလေးကို မျှဝေလိုက်ပါတယ်ရှင်။
ပါ၀င်ပစ္စည်းများ
- ငါးခြောက် - 400 g
- ကြက်သွန်နီ - ခပ်ကြီးကြီး တစ်ဥ
- ကြက်သွန်ဖြူ - အမွှာကြီးကြီး ၁၀မွှာ
- ချင်း - လက်တဆစ် သာသာ
- ငရုတ်သီး လုံးခြမ်းကွဲ - ထမင်းစားဇွန်း ၂ဇွန်းခွဲ
- အချိုမှုန့် - လက်ဖက်ရည်ဇွန်း တစ်၀က်သာသာ
- ငါးငံပြာရည် - ထမင်းစားဇွန်း တစ်ဇွန်း
- ဆီ - လက်ဖက်ရည် အကြမ်းပန်းကန် တစ်လုံးသာသာ
- နနွင်းမှုန့် - လက်ဖက်ရည်ဇွန်း တ၀စ်က်
ပြင်ဆင်ပုံ
- ငါးခြောက်ကို အကောင်လိုက်ရေ နာရီ၀က်လောက် စိမ်ထားပြီး လက်နှစ်ဆစ်အရွယ်လေးများ တုံးထားပါ
- ကြက်သွန်နီကို အခွံခွာပြီး အလုံးလိုက်ရေဆေးကာ ခပ်ပါးပါး လှီးထားပါ
- ကြက်သွန်ဖြူကို အခွံခွာပြီး ရေဆေးကာ မညက်တညက် ထောင်းထားပါ
- ချင်းကို အခွံခွာပြီး ညက်နေအောင် ထောင်းထားပါ
- ဆီကို အပူပေးပြီး နနွင်းမှုန့်ထည့်ပါ
- ငါးခြောက်ကို အရင်ဆုံး ကြွတ်သွားအောင် ကြော်ပြီး ဆယ်ထားပါ
- ငါးခြောက်ကြော်ထားသော ဆီထဲမှာဘဲ ကြက်သွန်နီကိုအရင် နွမ်းအောင်ကြော်ပေးပါ
- ကြက်သွန်နီ နွမ်းမှ ကြက်သွန်ဖြူနှင့် ချင်းကို ထည့်ကြော်ပါ
- ကြက်သွန်များ အရမ်းမကြွတ်ခင် ငရုတ်သီးမှုန့် အချိုမှုန့်နှင့် ငံပြာရည်တို့ကို ထည့်မွှေပါ
- ကြက်သွန်များ ကြွတ်လာပြီဆိုတာနဲ့ ကြော်ပြီးဆီစစ်ထားသော ငါးခြောက်ကြော်ကို ရောမွှေပေးပါ
- ငါးခြောက်ကြော် အေးသွားပါက ကြွတ်ပြီး မွှေးနေသော ငါးခြောက်ကြော် စပ်စပ်လေး ရပါပြီ။
No comments:
Post a Comment